Ni rinabadiidxaʼ ca ni ruundaʼ

¿Ñee laaca rusiidiʼ ca gunaa ni naca testigu stiʼ Jehová la?

▪ Laaca, nuu stale de laacabe lu guidubi Guidxilayú nácacabe ti grupu naroʼbaʼ ni runi predicar ca noticia galán stiʼ Reinu stiʼ Dios casi maca guníʼ Jehová lu Salmo 68:11, racá ná: «Guiráʼ ca gunaa ni runi predicar ca noticia nacubi zeeda gácacaʼ ti ejércitu naroʼbaʼ».

Pur razón riʼ, maʼ gadxe modo rusiidiʼ ca gunaa testigu stiʼ Jehová de modo rusiidiʼ ca gunaa de xcaadxi religión. ¿Xiñee maʼ gadxe modo rusiidicabe yaʼ?

Purtiʼ gadxé gadxé binni rusiidicabe, ca gunaa de xcaadxi religión laacaʼ rusiidicaʼ ndaaniʼ yuʼduʼ sticaʼ. Nga runi, ni rusiidicabe nga ca ni rié ndaaniʼ yuʼduʼ stícabe, peru ca gunaa ni naca testigu stiʼ Jehová runi predicarcaʼ de yoo pur yoo ne guiráʼ lugar, cadi ndaaniʼ congregación sticaʼ.

Sti cosa ni runi laacabe gadxé nga modo rúnicabe dxiiñaʼ ndaaniʼ congregación. Ca gunaa de xcaadxi religión laacaʼ rusiidicaʼ ne riniʼcaʼ xi gaca ndaaniʼ yuʼduʼ sticaʼ. Ca gunaa ni naca testigu stiʼ Jehová qué rusiidicaʼ ndaaniʼ congregación ora nuu hermanu ni maʼ guyuunisa, ca ni rúnini nga ca hermanu ni maʼ guca nombrar casi maestru ni nanna gusiidiʼ (1 Timoteo 3:2; Santiago 3:1).

Lu Biblia riete ca hombre si nga zanda gusiidicaʼ ndaaniʼ congregación. Rihuinni zacá ni pur ni bisiene apóstol Pablo ti xpinni Cristu ni biree láʼ Tito. Gudxi apóstol Pablo laabe: «Bisaanaʼ lii guidxi Creta para [...] guni nombrarluʼ ancianu ndaaniʼ cada guidxi» (Tito 1:5). Ne gúdxirube laa xi naquiiñeʼ guni ti hombre para gapa privilegiu ndaaniʼ congregación, guniʼbe «cadi naquiiñeʼ guiníʼ binni laa, cadi gapa chupa chonna gunaa, sínuque xheelaʼ si» (Tito 1:6). Laaca bisiénebe Timoteo lu ti carta ni biseendabe ra nuu: «Pa cayuni ti hermanu stipa para gaca superintendente, jneza ni cá ique guni». Ne laaca guniʼbe: «Naquiiñeʼ guibani ti superintendente jneza ti cadi chuʼ tu guiníʼ laa, cadi gapa chupa chonna gunaa, sínuque xheelaʼ si [...] gaca tobi ni nanna gusiidiʼ» (1 Timoteo 3:1, 2).

Peru ¿xiñee hombre si zanda gaca superintendente ndaaniʼ ti congregación ya? Pablo guníʼ: «Qué racalaʼdxeʼ diaʼ gusiidiʼ gunaa, nin gapa autoridad luguiáʼ ca hombre, sínuque naquiiñeʼ gucaadiaga ne cadi guiníʼ. Purtiʼ primé guyáʼ Adán, oracaruʼ guyáʼ Eva» (1 Timoteo 2:12 ,13). Ni gucalaʼdxiʼ Apóstol Pablo niníʼ nga dxi bizáʼ Dios primé pareja bisihuinni tu naquiiñeʼ gusiidiʼ ne gaca superintendente ndaaniʼ congregación.

Cumu Jesús nga xaíque stiʼ ca xpinni Jehová la? rinándacaʼ ejemplu stibe. Discípulo Lucas ná biree Jesús canazá ndaaniʼ guiráʼ guidxi ne ndaaniʼ ca guidxihuiiniʼ, canayuni predicar ca noticia galán stiʼ Reinu. ¿Xi biʼniʼ ca discípulo stibe ora biseendabe laacaʼ gúnicaʼ dxiiñaʼ riʼ yaʼ? «Biuucabe ndaaniʼ ca guidxihuiiniʼ, canayuni predicárcabe ca noticia galán» (Lucas 8:1; 9:2-6).

Zaqueca cayaca tiempu riʼ, ca xpinni Jehová cásica hombre ne gunaa né stale gana cayacanecaʼ para gaca cumplir ca diidxaʼ ni zeeda lu Mateo 24:14, raca guníʼ Jesús: «Ne zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni, ne oraqueruʼ nga gueeda fin».

[Imagen]