Ximodo ruuyaʼ religión stiluʼ guerra

Alberto, ti hombre ni guca soldadu biaʼ chii iza, guníʼ sicaríʼ: «Sacerdote stidu guluu ndaayaʼ laadu ne guníʼ: “Nuuné Dios laatu”. Peru naa guníʼ iqueʼ: “Xiñee chiguuteʼ binni pa Biblia na: «Cadi guutiluʼ» yaʼ”».

Ray, sti hombre ni guca soldadu stiʼ marina dxi guca guiropa guendaridinde lu guidubi naca Guidxilayú. Ti biaje gúdxibe ti sacerdote: «Lii riguiʼbaluʼ ndaaniʼ barcu stidu ne rinábaluʼ Dios gapa laadu ne guni ganardu. Peru ñee cadi laaca ngaca runi ca xhenemígudu la?». Sacerdote que gudxi laabe guirutiʼ qué randa riene guiráʼ ni runi Señor.

Ñee raca nagana para lii guiéneluʼ ni bicabi sacerdote ca la? Pa zacá ni, cadi guizaalaʼdxuʼ, cadi lii siouʼ nga qué riéneluʼ ni.

XI RUSIIDIʼ BIBLIA

Jesús guníʼ ndiʼ nga tobi de ca mandamientu jma risaca: «Gunaxhii stobi cásica nadxii lu lii» (Marcos 12:31). Ora guníʼ Jesús ca diidxaʼ riʼ, ñee guniʼbe caquiiñeʼ gannaxhiinu ca binni si de xiixa guidxi la? Coʼ. Laabe gúdxibe ca discípulo stibe: «Pa ganaxhii saa tu zacá la? zanna binni xpinne laatu» (Juan 13:34, 35). Zudii binni cuenta dxandíʼ xpinni Cristu laacabe ora guʼyaʼ pabiáʼ nadxiisaacabe. Qué liica zanácabe guuticabe binni, peru cadi ngasi, dede zudiicabe xquendanabánicabe pur laacaʼ.

Ngapeʼ nga ni biʼniʼ ca primé xpinni Cristu. Ti enciclopedia cusiene: «Tertuliano ne Orígenes, ca primé binni ni gudixhestí ni runi cré ca católicu (Padres de la Iglesia), guniʼcaʼ qué zanda diʼ guuti ca xpinni Cristu binni, principiu riʼ nga qué nudii lugar ñácacabe soldadu stiʼ Roma» (The Encyclopedia of Religion).

XI ZANDA GUININU DE CA TESTIGU STIʼ JIOBÁ

Casi lu guidubi naca Guidxilayú nuu ca testigu stiʼ Jiobá. Ne ora tindené xquídxicabe sti guidxi, qué riuucabe lu guerra, sínuque rúnicabe stipa para gusihuínnicabe pabiáʼ nadxiisaacabe.

Guzéʼtenu xi bizaaca ndaaniʼ guidxi Ruanda. Cumu nabé nanaláʼdxisaa ca binni de raza hutu ne tutsi la? gudíndecaʼ lu iza 1994, peru qué ñuu ca Testigu lu guendaridinde que. Ca Testigu de ti raza que bicaachicaʼ ca Testigu de sti raza, neca nánnacaʼ zándaca guuticabe laacaʼ. Ora gunaazeʼ ca soldadu stiʼ Interahamwe chupa testigu hutu purtiʼ cucaachicaʼ ca xpinni Cristu ni naca tutsi la? gúdxicabe laacaʼ: «Zuutidu laatu purtiʼ cayacanetu ca tutsi». Ne biiticabe guiropaʼ Testigu que (Juan 15:13).

Ximodo ruuyuʼ nga yaʼ. Ñee biaʼsi nga ni biʼniʼ ca Testigu riʼ ne modo guníʼ Jesús naquiiñeʼ gannaxhiisaa ca xpinni la?