Ni rinabadiidxaʼ cani ruundaʼ

Tiempu bibani ca binni ruzeeteʼ Biblia, ¿ñee caquiiñeʼ gapa tuuxa derechu de baʼduʼ lugola para gueeda gaca tobi de cani gueeda gale Mesías que de laa la?

Huayuu biaje huaninu de laani. Ruluíʼ zacá nga rusiidiʼ Hebreos 12:16, ra riete qué nusisaca Esaú ca cosa «ni zeeda de Dios» ne «pur ti bladu endaró si bitoo irá derechu ni gupa de enda lugola stiʼ» lu Jacob. Ruluíʼ ni cusiene ca diidxaʼ riʼ nga dxi gucuaa Jacob derechu de baʼduʼ lugola que laaca gucuaabe derechu para gácabe tobi de cani gueeda gale Mesías que de laa (Mat. 1:2, 16; Luc. 3:23, 34).

Yanna, ra guidúʼndanu caadxi relatu ni zeeda lu Biblia, rudiʼnu cuenta cadi caquiiñeʼ gaca tuuxa baʼduʼ lugola para gaca bixhozegola Mesías. Guidúʼyanu caadxi ejemplu:

Rubén nga guca baʼduʼ lugola stiʼ Jacob (Israel), ni gupané Lea. Despué, primé xiiñiʼ Jacob ni gupané Raquel, xheelaʼ ni jma gunnaxhii, nga José. Dxi biʼniʼ Rubén ti pecadu, derechu de baʼduʼ lugola que gudiʼdiʼ ni lu náʼ José (Gén. 29:31-35; 30:22-25; 35:22-26; 49:22-26; 1 Crón. 5:1, 2). Neca zaqué, cadi de familia stiʼ Rubén nga beeda Mesías que ne nin ca de José, sínuque beedabe de familia stiʼ Judá, guidapa xiiñiʼ Jacob ni gupané Lea (Gén. 49:10).

Lu Evangeliu stiʼ Lucas 3:32, riete lá gaayuʼ hombre ni beeda gale Mesías que de laa. Ruluíʼ baʼduʼ lugola guirácabe. Boaz nga guca bixhoze Obed ne Obed beeda gaca bixhoze Jesé (Rut 4:17, 20-22; 1 Crón. 2:10-12).

Ni beeda despué de lade ca bixhozegola Mesías que nga David. Peru cadi laabe nga baʼduʼ lugola stiʼ Jesé, sínuque ni jma nahuiiniʼ lade xhono xiiñiʼ (1 Sam. 16:10, 11; 17:12; Mat. 1:5, 6). Ne zacagá nga bizaaca né ni zeeda despué de laabe, Salomón, purtiʼ cadi laa nga guca baʼduʼ lugola stiʼ David (2 Sam. 3:2-5).

Qué riníʼ diʼ ndiʼ qué risaca gaca tuuxa baʼduʼ lugola tiempu que. Ndaaniʼ cada familia baʼduʼ primé sticaʼ rapa ti lugar risaca ne nuu biaje maʼ laa reeda gaca xaíque ndaaniʼ familia. Ne laaca laa nga ni ricaa doble de herencia (Gén. 43:33; Deut. 21:17; Jos. 17:1).

Peru derechu ni rapa tobi casi baʼduʼ lugola zanda guicaa sti biʼchiʼ ni. Guzéʼtenu ti ejemplu, dxi gunabaʼ Abrahán Ismael guiree de ra lídxicaʼ, maʼ Isaac gucuaa derechu stibe (Gén. 21:14-21; 22:2). Ne casi bizéʼtenu ante que, maʼ José gucuaa derechu stiʼ Rubén.

Guidúʼyanu xi ná Hebreos 12:16 sti biaje, ra bicaa apóstol Pablo ca diidxaʼ riʼ: «Ne nin tobi de laatu cadi chuʼ né tuuxa ni cadi xheelaʼ, ne nin tobi cadi usaana de ganaxhii ni zeeda de Dios, casi biʼni Esaú chiqué. Pur ti bladu endaró si bitoo irá derechu ni gupa de enda lugola stiʼ». ¿Xi nga nuube gusiénebe yaʼ?

Cadi caníʼ diʼ apóstol riʼ de ca binni ni gueeda Mesías que de laa. Nin cadi xadxí de gúdxibe ca xpinni Cristu sacaʼ jneza para cadi guireechú nin tobi de laacaʼ ne cadi gudxiideche Dios laacaʼ, ni zanda gueeda guizaaca pa guiábacabe lu inmoralidad sexual (Heb. 12:12-16). Pa gúnicabe pecadu riʼ zeeda gácacabe casi Esaú, laa qué nusisaca ca cosa «ni zeeda de Dios» ne gulí guni ca cosa ni qué riuuláʼdxibe.

Bibani Esaú tiempu guyuu ca patriarca, ne zándaca guyuu biaje gúpabe privilegiu de gúnibe sacrificiu casi sacerdote para familia stibe (Gén. 8:20, 21; 12:7, 8; Job 1:4, 5). Peru cumu guníʼ íquebe modo riníʼ ique binni guidxilayú la? bichaabe privilegiu de gácabe baʼduʼ lugola pur ti bladu lenteja. Zándaca bíʼnibe ni para cadi gacanabe purtiʼ maca cá zacaná descendencia stiʼ Abrahán (Gén. 15:13). Laaca bisihuinni Esaú riuulaʼdxiʼ ca cosa malu, o qué nusisaca ca cosa ni zeeda de Dios, ra bichaganáʼ chupa gunaa ni qué runi ni ná Dios ne pur ngue nabé bininabe bixhózebe ne jñaabe (Gén. 26:34, 35). Maʼ gadxé guca Jacob, laa bichaganáʼ ti gunaa ni runi adorar Dios ni dxandíʼ (Gén. 28:6, 7; 29:10-12, 18).

Yanna, ¿xi rizíʼdinu yaʼ? Nuu tiru de ca baʼduʼ lugola que nga za Mesías que, peru cadi guiráʼ biaje guca ni zaqué. Nanna ca judíu que ni ne biʼniʼ crecaʼ ni, ti ejemplu de laani nga biʼniʼ crécabe zeeda Mesías que de David, ni jma nahuiiniʼ lade ca xiiñiʼ Jesé (Mat. 22:42).