¿Tuu nga Dios?

Stale binni ná runi cré Dios, peru ora guinabadiidxaʼ tuuxa laacaʼ tuu nga Dios, gadxé gadxé modo ricábicaʼ. Nuu tu laa runi cré naca Dios ti juez ni qué riáʼ ne riuulaʼdxiʼ guni castigar binni pur ca pecadu stiʼ. Xcaadxi ná nácabe ti Dios de guendarannaxhii, purtiʼ intiica gúninu, laabe runi perdonarbe laanu. Ne xcaadxi ná nabé zitu nuu Dios ne qué rizaalaʼdxiʼ binni. Cumu gadxé gadxé modo riníʼ ique binni la?, zándaca stale tu riníʼ ique qué zanda gunibiáʼ Dios.

¿Ñee risaca gunibiaʼluʼ Dios la? Risaca pue. Purtiʼ ra gunibiáʼ chaahuiluʼ Dios racané ni lii guibániluʼ jma galán (Hechos 17:26-28). Ra jma guidxíñaluʼ Dios, jma zannaxhiibe lii ne jma zacanebe lii (Santiago 4:8). Pa gunibiáʼ chaahuiluʼ laabe zanda guibániluʼ sin qué chuʼ dxi gátiluʼ (Juan 17:3).

¿Ximodo zanda gunibiaʼluʼ Dios? Guníʼ ique tuuxa ni runibiaʼluʼ, ti xhamíguluʼ. ¿Ximodo guca xhamígutu yaʼ? Cadi dxandíʼ primeru gunabadiidxaluʼ laabe tu labe la? despué zándaca laaca gunabadiidxaluʼ laabe xcaadxi cosa, ne zaqué bidiiluʼ cuenta ximodo laabe, ca cosa ni riuuláʼdxibe ne ni qué riuuláʼdxibe, xi huayúnibe ne xi cá íquebe gúnibe. Ra gúnnaluʼ guiráʼ ca cosa riʼ de laabe gucané cani lii para gaca xhamíguluʼ laabe jma.

Zacaca zanda gunibiaʼluʼ Dios pa guyúbiluʼ gánnaluʼ respuesta stiʼ ca pregunta riʼ:

• ¿TU LÁ DIOS?

• ¿XIMODO LAABE?

• ¿XI GUIRÁʼ MAʼ BÍʼNIBE?

• ¿XI GUIRÁʼ CHIGÚNIBE?

• ¿XI ZABEENDULUʼ PA GUNIBIAʼLUʼ DIOS?

Revista riʼ zacané ni lii gánnaluʼ ximodo ricabi Biblia ca pregunta riʼ. Xcaadxi artículo riʼ zacané ni lii gánnaluʼ tuu nga Dios, laaca zacané ni lii gánnaluʼ xi zabeenduluʼ pa gaca xhamíguluʼ laabe.