Merekoko

Yekova amoi Akitabu Wene Pangbanga biama ku rogo Fugoko yo tipa ka undo rani ani ini Wiriko. Agu Akitabu Wene Pangbanga re na apangbanga rogoho nga ga ga Yesu raka gbiati gako sunge tungusapai. Agi akitabu re napepa agu apai furani Yesu agumbaha na ki mangihe, gbiati agu abipai ko adu na ni. Agi akitabu du biama re naundo rani ani ‘mákiapa’ ga Yesu kpiapai wenengai. Gure wa ka i ya, si na gu fuo Yesu rogoho ko ambuhe sayo. Sidu, ni wisigo ani agu Akitabu Wene Pangbanga re, ani rengbe ka ino Yesu wenengai gbe. Ni sangbana gipai re, ani rengbe ka pekafuo Yesu wenengai gbe. Tipa ka gbia undo ni bakerehe gbe ti Akitabu Wene Pangbanga, si naida ani mangi kurapai amanga kisusi gu gbua nga ka gedaha. Si naida ani di regbo ka wisigoho wenengai na kini berẽ dudunguro kuriihe. (Oni ringbisi ngaha na Yosua 1:8) Mo sa agu apai mo agedaha rogo Akitabu Wene Pangbanga yo wa agu apai mo abihe abi si ni mangi. Mo mangisunge na berãro tipa ka bi, ka gia, watadu ka berãpa agu apai naamanga. Mo mangi wetekapai rogo agu awaraga ga Yekova riigbu akusaha. w21.04 4-5 ¶11-13

Mbu akama agarã kusayo mbata fu Yesu ye ku auru kpotosende, Yekova ayugu gupai rogo Fugoko yo nga i nika baga Masiya tipa asekere feda 30. (Zek. 11:12, 13) Si adu nga gu boro nika baga Yesu re, ni nika du ni boro sa dagba mbembedi abakureako yo. (Tam. 41:9) Gu nebi nangia Zekaraya akepai a nga: “Mo tá babanda akandoro, akandoro gbándaka.” (Zek. 13:7) Agu aboro naadu na wene ngbaduyo yo aarengbanga ka mbu Yesu mbiko agi apai re te. Gayo idapase adu ni nyakasi nyakasihe ho i abi agi asangbanebi re ni si nadigisi tihe kuti Yesu. Ya mo ani nabi kina gu bangisapai re areme? Ii. Ti gi gaani regbo re, bete agu aDezire Yekova aboro naima ino yo gbe, ima mbu rengo, ki da ni abasamungu kuti ndikidi pambori, na ki asadi ka nyaga kura aboro kusayo ti rengo. I ima gbandaka gbegberẽ apai, agu apangbanga angianga rengo ya, gbiati aziree tipa aDezire Yekova rogo awaraga pangbanga, rogo radio, rogo terevizioni na rogo Internet. Ono agu aboro du na wene ngbaduyo yo akotanga mbiko agi apai re te. Kuba gure, i ima rugatiyo na gupai nga, Ziazia Kekeapai aima pe gupai kumbatayo nga, ngbatunga agu apai re nika manga amanga.—Mt. 24:24; 2 Pet. 2:18-22. w21.05 11 ¶12; 12-13 ¶18-19

Ziazia Kekeapai nayugoho ziazia nga ndikidi inohe nikaa kio kina kumbatayo wa regbo nikaa susa. (Koro. 1:9, 10) Yekova nayugo rengo yeeye, ani duwa ka ani du na nyemu ka sungudo ko na zerangbaduse bambiko imarago nga ga rengo nakĩ kina kumbatayo. Ho Riigbu Bipasunge aino gupai ni nga si naida ani mangi ariapai ngba gu gene ani agiarogo pai yo watadu kini mangipai ngbaha, i namanga ariapai nibasa. Badungu akanisa areme namanga ariapai rogo gayo ayugopai yo bambiko i naida ka sa ngbarago ti gayo aboro watadu i naida badungu aboro ini yo rogo zegino. Ono aDezire Yekova namanga aariapai bambiko ani naida ka mbeda na Mbori na kini irisiko kina ngba gu gene Yesu anaairiso ko ngbaha. (Yak. 4:4) Ho ani amanga aariapai ni, anga si mbiko agu abipai nga ga aboro du rogo zegino ariatihe te, ono si mbiko ani gi rogo Ziazia Kekeapai yo wenengai. Ani ima kpinyemu rengo!—1 Tesa. 2:3, 4. w21.10 22 ¶12

Ginipai rengbe mo ka mangaha ka si du nga mo nabitiro nga mo nisaro? Mo berẽpa wai Yekova aundo ro. (Tam. 55:22) Si nika undo ro mo bihe nga mo nisaro te. Mo naaberãpa wai a Yekova aundo agu awirina nabihe nga i nisayo. (1 Pet. 5:9, 10) Hiroshi, nga gu wirina du kina ko sa ni Dezire Yekova dagba gako aborokporo yo tipa dungu agarã awere aya: “Ino gupai nga ani dunduko namanga gupai rengbe omerani na ni ka iriso Yekova rengbe ka ngarasa agurani adunga gaani aborokporo rogo rengo yo ya.” Na berewe a, mo naamanga agu apai nga ga toro dedede. Gere nakoda pe mo pa gupai nzunzu namanga ro fu Yekova. Mo naageda Fugo Mbori dedede, na mo naaberã kuriipa agu apangbanga du rogoho nga gu nayugo gupai nga Yekova ima kpinyemu ro. Kura aKristano nazio agu averesi kuriyo yo nafu bakere wasa na kini tingidihe, wa agu nga Atambuahe 27:10 na Yesaya 41:10. Kura aboro nadega tuyo kuti dede afugo agu apai du tipa adunguratise, ho i ambakada gayo adunguratise ni watadu ho i amanga gayo geda Ziazia Kekeapai ni. I nape gupai nga si naundo yo ka i naabingo ho nga i nisayo gbe ya. w21.06 9-10 ¶5-8

Ya mo mo narungo tipa pa kpio ga boro? Mo di regbo ka nyakasa gamo idapase kuti gu maabangirise du tipa zingabekpio ni geda mo agu apangbanga du rogo Ziazia Kekeapai yo tipa agu aboro i azingisi yo be kpio. Ya mo mo na bakere gberãrago mbiko gupai nga i kusi gamo borokporo kusayo rogo dungurati? Mo mangi wisigopai tipa wa ka mo idi kuti gupai nitiro nga ga Mbori arugute ti aregbo dunduko ni wenehe. Ka mo vura kaa gbia tiro na kina gini kpakarapai vurũ, mo mangisunge na ni wa momu ka nyakasa gamo idapase. Mo kusuko kpotoroyo fu Yekova. Ka mo kparanga tiro nisaro ya, ono mo nye mbembedi na awirinamo. (Snz. 18:1) Mo mangi agu apai rengbe ka undo ro mo hipai, ka si vura du nga mo nakpara akpara ho mo aberãpa agu apai ni namangi ro. (Tam. 126:5, 6) Mo naandu kindi kumbatayo kaa ndu tipa adunguratise, kini tungusipai, na kini gedi Ziazia Kekeapai. Na mo nye kindi kaa berãkuriipa gu weneahe Yekova nakidopa fuhe foro kumbatayo. Wa mo nikaa bi wai Yekova aundo ro, gamo idapase kutiko nikaa nyaka gbe. w21.11 23 ¶11; 24 ¶17

Rogo gini gene du ga Yesu abawiriki ngbaha wakina “toni agude”? Sidu, ada du zegino abiyo nga i du na nyanyakipa yo? Kumukokumuko aboro, abaworimo, gbiati agu aboro du na ome beyo. Ono ga Yesu abawiriki wa gure te. Sidu, agu aboro du rogo zegino nabiyo wa gu “toni agude” adunga na nyanyakipa yo ya. (1 AKor. 1:26-29) Ono Yekova abingo yo wa gure te. Ginipai nasa Yesu ko fura tipa “gu toni agude” re? Gako abawiriki asana ko na sanahe nga: “Da nga bakere ni susi tie rogo gu ngbi nga ga ngbangbaturũ?” (Mt. 18:1) Badungu aYudo ti gu regbo re anaaida gupai nga aboro naabi yo nga i na nyanyakipa yo. Kura wene bawirikipai sa aya: “Nyemu gbia taarimo be aboro gbiati worimo nangia gupai paha anyaki gbe kisusi fuyo rogo gayo raka yo.” Yesu aima ino gupai nga, badungu aYudo naasada ka kiisopa tiyo kisusi gu kura aboro, na mbiko gipai re, si aaida gako abawiriki mangi nyanyaki asadatise tipa ka aria gu gene i aaberã ngbaha. w21.06 20 ¶2; 21 ¶6, 8; 22 ¶9

Gu mokedi nangia Pauro aima maa wene kpiapai wa ko angia bakumba. Ni kpiapai, ho si aaida i fu rugute ni fu agu awirina naadu Tesaronike yo, Pauro aadunga dindikodindiko tipa ka fu rugute te. Ono tie, rogo gu ga Pauro awaraga yo ko akehe fuyo, ko atambua yo mbata tipa gayo mangaapai nga ga idapase, agu asunge i aamangaha mbiko nyemuse, gbiati gayo hipai. Ko aima berãpa gayo raka a na ko ki gumba gupai fuyo nga, ko aima inoho nga gayo raka aadunga taata te na i aahi arungosiro ni ruruyo. (1 Tesa. 1:3; 2 Tesa. 1:4) Zavura ko agumba gupai fu agu awirina re nga, i angia wene kpiapai fu kura aKristano. (1 Tesa. 1:8, 9) Nairiwo gu ngbarago i adu na ni tipa wai Pauro atambua yo re! Kapa aadunga ho nga Pauro aakpingo nyemu awirinako te te. Si du ko adu na rengba ti ni ka fu wene rugute fu aTesaroniko rogo gu gako awaraga yo ue ko akehe fuyo.—1 Tesa. 4:1, 3-5, 11; 2 Tesa. 3:11, 12. w22.02 15 ¶6

Satana namangasunge na abarumbatayo rogo ziree pambori tipa ka pe gupai nga, Yekova nga kere gbegberẽ boro na ko du nasa aboro i naarungo. Na zavura agu akurayo nape gupai nga, ho agude akpi ni, Mbori du nadia yo mbiko ko naida badungu amaraika ngbangbaturũ yo. Gipai re ima du ni kere zanga pa irisa fu Mbori! Ani ima ino gupai nga, Yekova nga gu Baagude nga boro nyemuse. Ho kere kaza azio rani ni watadu ho gaani boro akpi ni, ani abiranga Mbori te. Kuba gure, ani na kido nga uru nika duadu ho sa ko nika husa agu aboro du na kaza, na ki zingisi agu aboro kpiki. Ani ima rengba ka gumba gupai fu agu aboro dunduko rengbe ka degatuyo nga, Yekova nga Mbori nyemuse. Si nika sa Yekova ko karagapai fu gu boro nasoapai kuti ko. (Snz. 27:11) Yekova nga Mbori nunga. Ko na bakere gberãrago ho ko abi rani ni ani nirungo, singia be rungosiro, kaza, watadu gaani azangarengba. (Tam. 22:23, 24) Yekova ima rugatiko na pa gaani arungo; ko naida aida ka diaha kusayo, na ko nika diaha adia kusayo.—Oni ringbisinga ha na Gate 3:7, 8; Yesaya 63:9. w21.07 9-10 ¶9-10

Barambeda, aboro giasangba nika gbia ngbarago tigu bakerepa irisa nga—kadu na gu momu nga ga kpinyemu Yekova na kini irisiko nyeanye kindi! Yesu nika nyasa riipa agu akpakarapai dunduko nga gu ye mbiko ga aAdamu na Eva diaberã ka mbu ga Yekova aborokporo. Yekova nika zingisa amirioni aboro be kpio na ki fu gu momu fuyo nga ga raka nyeanye kindi na wene kpotose auru gu kpotosende i nika saha ni paradizo. (Rk. 23:42, 43) Ho agu aboro nairiso Yekova nika da ni ni rengberengbeyo, i dunduko nika gbia gu “irisa na taarimo” i nafura tipaha rogo Ziazia Kekeapai yo. Ka si du nga mo dagba “bakere rimbasa aboro” yo, mo na bawene maabangirise. (Yugo. 7:9) Mbori ima kpinyemu ro; ko naida mo du ni boro sa dagba gako aborokporo yo. Sidu, mo mangi ai gupai rengbe mo ka mangaha tipa ka fu ngbarago fuko. Mo naaraka na aˈuru dunduko na ga Yekova akidohe berãro yo na ngbaduro yo. Mo naabi gu momu nga ga iriso gu Barani du ngbangbaturũ yo na nyanyakipaha, na mo naabi gu maabangirise nga ga fu taarimo fuko nyeanye kindi na nyanyakipaha a! w21.08 7 ¶18-19

Gu nebi nangia Yeremaya atungusipai tipa agarã naima susa 40 wa si avura du vurũ nga aboro aadeganga tuyo fuko te na i aasoga ko asoga. Ko adu na bakere gberãrago mbiko gu ‘gbarasarimo na ũumohe’ nangia ga asogoko si ki sa gupai nga ko berẽpa mbu gu sunge i afuhe fuko. (Yere. 20:8, 9) Ono Yeremaya aambunga gako sunge te! Ginipai naundo ko ko naandu kindi kumbatayo na kini gbia ngbarago ti gako sunge tungusapai? Ko amoiberã ko tipa nyanyakipa apai ue. Ni bambataha, si adu nga gu ga Mbori pangbanga Yeremaya aagumbaha fu aboro nika ‘fu maabangirise fuyo tipa gayo apai ku mbata yo.’ (Yere. 29:11) Ni uehe, Yekova aima sia Yeremaya ko fura tipa Ko na ki pe gako pangbanga fu aboro. (Yere. 15:16) Ani a nandu na pangbanga maabangirise fu aboro, na ani na rimo Yekova rirani ni gako aDezire. Ho ani amaaberã rani ni kurii gi apai re, ani ima rengba kadu na ngbarago ka si vura du vurũ nga aboro nadegatuyo watadu i adeganga tuyo furani te. Sidu, ka mo dunga na gberãrago watadu omero ki bati ka si du nga gu sonakumbatayo nga ga gamo abawiriki Ziazia Kekeapai nadia regbo adia kisusi wai mo aaberãha ya. Sunge sa aboro ni abawiriki naida na zerangbaduse.—Yak. 5:7, 8. w21.10 27 ¶12-13

Ka si vura du vurũ nga ani aima digo niirisi Yekova tipa gbanga regbo, si naida ani naandu kindi kumbatayo kaa nyakasa gaani idapase kutiko na kini bandaha. Tipagine? Bambiko ka ani aadunga na rubangirise ya, gaani idapase ima rengba ka rungbura. A wa ani nasakipai tipaha, mburu idapase rii ndikidi ahe nga agu ahe ka ani abingo ho ni bangirise ya. Guhe ka ani abingo ho ya, bangirani ima rengba ka go ti ni niipo. Si du nga ndu gupai gu mokedi nangia Pauro aya ti ni tipa zanga idapase wẽ, si nga “gu ingapai ninaaye dedede ka manga rani.” Si du tie, waigu rengbe ani ka sa gaani idapase si nye ninyanyakihe? (2 Tesa. 1:3) Nibambatapai, mo sana Yekova tipa gako ziazia toro na kini mangihe wo dedede. Tipagine? Mbiko idapase nga papara zuzu toro. (Gara. 5:22, 23) Ani arengbanga ka nyakasa gaani idapase kuti Bakusirani na kini bandaha zanga na gu undo nga ga gako ziazia toro te. Ka ani aandu kindi kumbatayo kaa sana Yekova tipa gako ziazia toro, ko nika fuhe afu furani. (Rk. 11:13) Ani ima rengba ka manga kparakpee nga: “Mo kíisi gaani idapase.” (Rk 17:5) Kurigure, mo naageda Fugo Mbori na aˈuru dunduko.—Tam. 1:2, 3. w21.08 18-19 ¶16-18

Sosono awirina ima rengba ka undo ga Yekova riigbu ngba dungu agene. Wa vura duhe nga i ima rengba ka zanga du na bakere ome wa gu i anidu na ni mbata, i na bakere inohe nga gu gbiayo ho vuru agu agarã yo susi. Yekova ima rengba kaa ndu kindi kumbatayo kaa mangasunge na yo ngba dungu agene. Ni kpiapai, Ziazia Kekeapai nagumbapa agu aboro naamangasunge kindi fu Yekova ho i adu ni ni gbinza yo. Ni kpiapai, garã Moize adu wa 80 ho ko atona mangasunge ni niga Yekova nebi na ni gu boro naarukuba gu rikaaboro nangia aYisaraere. Si nawiraha wa garã Daniere aima susa 90, Yekova nimangisunge kindi na ko ni nebi. Na si nawiraha wa garã gu mokedi nangia Yoane aima susa 90 a ho ga Mbori toro adu ni kugiiko ko ke gu buku nga Yugoti. I fura tipa Simona gbua tooni rogo Ziazia Kekeapai yo, nga gu kumba naadu ‘niruru ko, ki niberẽ ga Mbori pai aberã gbe,’ ono Yekova aima ino gu ngbatunga boro nangia ko na ki fu gu momu fuko nga ga bi fogo Yesu na gu momu nga ga gumba sangbanebi tipa Yesu gbiati nako.—Rk. 2:22, 25-35. w21.09 3-4 ¶5-7

Si naida avunguagude du na rubangirise tipa ka zanga ringbisa awiriyo dagbatiyo ni basasa watadu ka sanayo i mangi gupai arengbanga omeyo na ni ya. Ka avunguagude aamanga gipai re, i ima rengba ka ba gberãrago ti awiriyo. (Ef. 6:4) Wirina du rimori nga Sachiko aya: “Nina aaida gupai nga mi di kama rii kama ti regbo gimi asada sukuru yo, nga gupai mi abihe nga omere arengbanga namangaha te. Wa vura duhe nga mi aima nyasa sukuru badungu agarã kusayo, mi naabaka bangire abaka singia gupai mi amangaha nafu ngbarago fu Yekova, ka si vura du vurũ nga mi namanga gupai rengbe omere na ni.” Bakindo Davide ape gupai nga, ko anaadunga na nyemu “bakere apai te” watadu kadu na nyemu manga agu apai naima susa omeko te. Mbiko gupai nga ko angia boro umbasitise, ko arengbe kina be agu apai ko adu na rengba ka mangaha na ko kidu na zereda. (Tam. 131:2) Ginipai rengbe avunguagude ka wirikaha ti afugo Davide? Tipa avunguagude du na umbasitise, si aidanga gupai nga i naaberã gupai tipa tiyo nga si naida i naamanga bakere apai nga gu arengbanga omeyo na ni ya te, na si aidanga a i naaberã gupai nga, awiriyo naamanga bakere apai nga gu arengbanga omeyo na ni ya te. Avunguagude rengbe ka undo wiriyo tipa u naabi tiru nga paru nyaki anyaka ni rugayo tiyo na pa gupai du u na rengba ka mangaha wenengai na gu adunga u na rengba ka mangaha wenengai ya, na i ki moi agu asasa rengbe u arengba ka da ti ni. w21.07 21-22 ¶5-6

Yekova ima fu gu gamahe furani nga ga ranirii ka siapai. Gere nayugo gupai nga ani ima rengba ka siapai singia ani nika giasangbako watadu ani agianga sangbako te. Kura agude kinaho avunguyo aadunga ni wene kpiapai ya, ono agu agude re ima diaberã ka iriso Yekova na ka nye ni ruruyo fuko. Agu akurayo kinaho avunguyo amangi nyanyaki asadatise tipa ka yugopai fuyo i kpinyemu Yekova, ono kusa fuo sono yo, i kini mbu Yekova. Sidu, ani dunduko nibasasa si aida ani diberã, singia ani nika iriso Yekova. (Yos. 24:15) Sidu, aguroni nga avunguagude awironi nambu iriso Yekova, ka oni berẽnga gupai nga gaoni ingahe du ya! Ti kura aregbo, bagude watadu nagude ima rengba ka mbu iriso Yekova na zavura ki mbu gani aborokporo. (Tam. 27:10) Gipai re ima rengba kadu nikere pa gberãrago fu agu agude nairisa avunguyo na kini biyo na nyanyakipa yo. Paranga aboro, ka si du nga i ima kusa vunguroni kusayo rogo dungurati, oni du na gu kido a nga, Yekova ima inopa bakio wai gupai re aimisa roni. Ko ima kpinyemu roni, na ko na ngbarago nga oni nandu kindi kumbatayo kaa irisoko niruru roni. Oni tingidi gupai a nga, ka i biranga roni tipa ga avunguroni adiaberã te. w21.09 27 ¶5-7

Ho i akusa Kristano ni kusayo rogo dungurati, ani rengbe ka berã pani wakina gu kandoro du na kaza akurai niima rengba ka diaha tiru. Ni nawoka awoka rogo toro yo. (Yak. 5:14) A wakina gu kura akaza nga ga kpotose, kaza rogo toro yo ima rengba kadu ni gupai rengbe boro ka gbaragaha ti kura aboro. Sidu, aregbo kinaho rẽarẽ i kpara gu boro kusayo nawoka rogo toro yo ti dungurati. Gi rugute i afuhe fu boro re nayugo pa ga Yekova nyemuse tipa gako ruru aboro rogo dungurati, na si rengbe ka undo boro ingapai ni ini pa wai gberẽ gu ingapai ni amangihe na ni ki mangi saberã. Ho i nakusi boro ni kusayo rogo dungurati, ni ima du na rengba kaa ndu tipa adunguratise, nga gu ba rengbe ni ka gbia arugapai rogoho rogo Ziazia Kekeapai, na ki nyakasi gani idapase berewe. Ni ima rengba a ka gbia awaraga kaa gedaha na kaa wisigoho na ni ima rengba a ka bi gu Mbakadapai Nga ga ADezire Yekova Rogo Terevizioni^®. Na a wa abaakumba nikaa bi gani sonakumbatayo, i ima rengba ti kura aregbo kaa fu arugute gbiati arugapai tipa ka undo ni ni mbakadi gani pagume na Yekova tipa i karaga ni berewe ni Dezire Yekova. w21.10 10 ¶9, 11

Areme, Ani napekafuo gu kpiapai a nga ga irisombori gu dungurati nga ga agu aKristano nadu rogo bambata sa kama agarã amoihe. Ni kpiapai, i nambakada rani a kina wai si adu tipa agu aKristano re. Ani na agu ababiapai ninaata ata, abaakumba, gbiati amoundo abaakumba kina wai si adu tipa yo a. (Frp. 1:1; Tito 1:5) Na wakina yo, ani nairisa ga Yekova andiko tipa kodaba na rogatise, gupai Mbori apehe tipa mangasunge na kure, na ani nabanda dungurati be agu aboro aidanga ka pekafuo ga Mbori andiko ya. (Amo. 15:28, 29; 1 Kor. 5:11-13; 6:9, 10; Eb. 13:4) Ziazia Kekeapai nape gupai furani ziazia nga, “idapase” watadu ndikidi pambori gbua kina sa Mbori naidi na ni. (Ef. 4:4-6) Nairiwo gu momu du ani na ni nga kadu ni ga Yekova aboro na ka ino rengo tipa Yekova na tipa gako aringbisapai! Ani naandunga andu kindi kumbatayo kaa kakuti rengo na nyanyaki kido. w21.10 22-23 ¶15-17

Bakindo Yosafata agbiatiko na bakere kpakarapai. Bakere rimbasa abasovura nga ga aAmono, aMoaba, gbiati agu akumba naaraka rogo gu ringara du na agangara rogoho nga ga Seira aserekpo ko, gako aborokporo, gbiati gako aboro. (2 Peka 20:1, 2) Ginipai Yosafata amangihe? Ko asana Yekova tipa undo na ome. Gu ga Yosafata kparakpee nga ga umbasitise du ni kekehe rogo 2 Pekapai 20:5-12, nayugo gupai nga ko aima du na bakere kido kuti Yekova. Yekova afura na Yosafata vurube gu boro Revi rimoko angia Yaziere ni gumbako agu afugo du rogo gaani veresi nga ga areme. Yosafata akido kuti gako Mbori, na ki mangi gupai i agumbaha fuko. Ho ko na gako aboro andu ni ka gbia avurayo, ko aamaanga agu abasovura naadu na biri sovura tiyo kumbatayo te, ono ko amoi kina ababi bia naadunga na aũvura beyo ya. Yekova aima banda gako kidohe fu Yosafata; Ko aima diabe agu abanzengere nangia avurayo re.—2 Peka 20:18-23. w21.11 15-16 ¶6-7

Ho ani agbiatirani ni na akpakarapai, ani ima rengba kadu na gu kido nga Yekova nika undo rani aundo ani banda wene pagume na ko. (2 Kor. 4:7-9) Ani ima rengba kadu na kido nga, Yekova nikaa yugo bangabanga nyemuse ayugo kindi furani bambiko Ziazia Kekeapai nape gupai furani nga, “bangiri Yekova du ti agu yo nagunde ti ko, nga agu yo namaa bangiriyo tipa gako weneringise.” (Tam. 33:18-22) Mbata fu ani tona iriso Yekova, ani aima gbia gu ga Mbori nyemuse ko ayugoho fu aboro dunduko re. Ono wangia ani airisiko, ani nagbia undo agbia a ti gako bangabanga nyemuse. Gu ga Yekova nyemuse re nafõ ngbaduko yo tipa ko banda rani. Ko ti aregbo dũ nika banda rani mbembedi na ko ki digisi gu gako akidohe du tipa gako ringbisipai tipa rani. Ko naida ani du na diabese! (Tam. 46:1, 2, 7) Sidu tie, ka ani vura kaa gbia tirani na kina gini asada vurũ, Yekova nika fu gu ome afu furani ani aidaha tipa ka banda gaani padu niruruse. w21.11 7 ¶17-18

Badungu rani naima ino agu aboro naanye na zinga kuti gayo abadiasunge, akurayo sukuru yo, watadu gayo aborokporo, na ti kura aregbo tipa dungu agarã! Oni tingidi gupai nga agu awiriba Yosefa naadu bawe adu na zinga kutiko, nga gu naasa gupai kusa nga i mangipai kuti gayo sogote kutiko. (Bam. P. 37:2-8, 25-28) Ono Yosefa aamanganga fuyo gbegberẽ te. Ho ko adu ni rogo bangiriba nga ga pagbia ko aima rengba ka irabape ti awiribako, ono ko ayugu inapai fuyo. Yosefa aakpingo pai te. Kuba gure, ko amangipai na ngbanya kuti gu rugute i akehe kusa rogo Pa Amotumo 19:18. (Bam. P. 50:19-21) Agu aKristano naida ka sa ngbarago ti Mbori si naida i pekefuo ga Yosefa kpiapai, nga guko nambupai fu awiribako kuba gupai nga ko iribape tiyo. Gure a nga gupai Yesu apehe ho ko aya ni wẽ si naida ani mbupai fu agu aboro naingapai kuti rani. (Mt. 6:9, 12) Wakina gure a, gu mokedi nangia Pauro arugu akurako aKristano nga: “Abadiangba, ka oni mangi nga boro ti pai fu roni ya.”—Rom. 12:19. w21.12 11 ¶13-14

Kusa rogo gu nyemu naadu rogo Nisana 14, rogo gu garã nangia 33, Fuo Batikayo Kristo, Yesu andu ku rogo gu ati nangia ga Getesemane. Yo ko akusuko kpotokoyo ni fu Yekova. (Rk. 22:39-44) Ti gu kpakarakpakara aregbo re, Yesu ‘afu akpe . . . na nyanyaki akpe du na aume.’ (Eb. 5:7) Ginipai Yesu akpari tipaha rogo gu yangara yuru naadu mbata fu kpio ko? Ko akpari tipa gupai nga ka nye niruru ko fu Yekova na ka manga gupai Ko akpinyemuhe. Yekova aima gia gu kparakpee naaye kina boro kpoto Wiriko yo re na ko ki kedi maraika tipa ko nyakasi ko. Yesu aima inopa wai si adu ni nyanyakipa pai fuko ko nye ni ruruko na ki ziasi rimo Bako. Yekova aima degatuko fu Yesu tipa agu apai ko aasanahe tipaha. Tipagine ko adegetuko ti ni? Mbiko gupai Yesu aabakabangiriko tipaha angia ka nye niruru ko fu Bako na tipa ka ziasi rimoko. Ka si du nga ani nika manga kina gu bangisapai re, fu Yekova ko nika karagapai akaraga kuti gaani akparakpee tipa undo.—Tam. 145:18. w22.01 18 ¶15-17

Badungu aboro areme nasoga rani mbiko ani naká ka rimiso tirani ku rogo agu apai nga ga birĩ-zogarago. I naida gupai nga ani bawaraga ti regbo bawaraga. Ono tie, ka ani sia wiri boro ni du ni bazogo kurirani, gure nga ani naká Yekova. (1 Sam. 8:4-7) Aboro ima rengba ka berã gupai nga, si naida ani naameka asukuru gbiati abambungua na kini mangi agu apai nga gu nafu undo fu aboro rogo dagbarago. I naká gaani pangbanga mbiko ani namanga ome nyanyaki tipa kaa tungusapai, kuba gupai nga ka asada ka mbakada agu akpakarapai du awere nga ga zegino. Waigu rengbe ani ka ne kota ki zanga mbu pekafuo Yesu? (Mt. 7:21-23) Si naida ani moiberãrani kuti manga gu sunge Yesu afu zinahe furani ani mangihe. Si aidanga ani gbeberã rani kuti agu apai nga ga birĩ-zogarago gbiati asada ka mbakada agu akpakarapai nga ga zegino te. Ani ima kpinyemu aboro, na ani naberãpa gayo akpakarapai aberã, ono ani ima ino gupai nga, gu wene gene ngba kisusi rengbe ani ka undo akuarani ngbaha nga niyugo ani pai fuyo tipa ga Mbori Kindo na niundo ani yo i sonosi pabakure na Yekova. w21.05 7 ¶19-20

Wa vura duhe nga badungu abazogo nga ga arikaaboro yo namanga tiyo nga i nairiso Mbori, i aidanga ka mbu gu ome gbiati pagbia du yo na ni te. Sidu, kina wai abazogo amangipai ti rago Yesu, kinawo a i amangapai areme, i nasoga ga Yekova Mbedimbedi Boro ni zubo yo gako ruru abawiriki. (Amo. 4:25-28) Waigu Yekova namangipai? Atambuahe 2:10-12 nafu gu karagapai nga: “Ako abakindo, awere oni dú ni tatamana aboro; Ako abasapungbanga rogo kpotosende, oni wiriki pai. Oni tá manga pa Yekova ni gunde, ki du pusiapusia ni kio, oni údi wiri ni rengo, ko ka zinga, oni ki kpiki gene; bambiko gako zinga narunguda ni ipo. Aboro maku nga agu yo dunduko nafu tiyo ku be ko.” Yekova nga wene sino boro, na ko ima fu regbo fuyo tipa i mangi ruru diaberã. I kindi naima rengba ka manga ariapai na ki diberã ka ida na ga Yekova Kindo. Ono tie, kiingo gu regbo nye koyo te. (Yes. 61:2) Si naida aboro ini rengo awere niˈipiˈipihe na ki sia ka iriso Yekova. w21.09 15-16 ¶8-9

Pauro aagumba gupai nga si naida ani rengbe kina be ai guhe nga ga borose du berani. (Frp. 4:12) Gaani nyanyakipa he kisusi nga gaani pagume na gaani Mbori, angianga gu ũborose du berani ya. (Abak. 3:17, 18) Oni bingo gupai Moize apehe fu aYisaraere fuo dia yo agarã 40 ku ngbakungba yo, ko aya: ‘Yekova gaoni Mbori fu maku fu roni rogo gaoni mangaapai dunduko nga ga beroni. . . . Agi agarã 40 re Yekova gaoni Mbori adu na oni; zingohe amanga nga roni wa sa te.’ (Pa Rug. 2:7) Vuru agu agarã yo 40 re, Yekova afu manu fu aYisaraere i naarihe. Yekova asa gupai nga ka gayo aroko sipingo ya. Sidu, i adu kindi na rengba kaa vo agu aroko i akuru na ni Ezipeta yo. (Pa Rug. 8:3, 4) Yekova nika du na ngbarago na ani ka si du nga ani wiriki wai ka rengba kina be agu ahe du berani. Ko naida gupai nga ani du na tambuahe zavura tipa gu taata ahe ko afuhe furani na ani ki rugutirani na gupai nga agu ahe re nga gamahe beko. w22.01 5 ¶10-11

Kumbakuadee, oni na gu sunge rironi nga ga ngerafuo gaoni aborokporo, sidu, oni mangi sunge nyanyaki ka banda yo na ka songoda yo. Ho oni agbiatironi ni na akpakarapai, oni ima rengba ka berã gupai nga oni ima rengba ka mangapai kuti agu akpakarapai re nitironi. Ono tie, ka oni kidongo kuti gaoni ome ya. Kuba gure, oni kpari fu Yekova tipa undo ho du oni ni nisaroni. Kurigure, oni naamanga kparakpee kina boro kpotoroni yo na adiaroni. Oni gbata arugapai be Yekova niwisigo oni Ziazia Kekeapai gbiati agu awaraga ga Mbori riigbu akusaha na kini mangipai kuti agu arugute oni agbiaha rogoho. Kura aboro ima rengba ka zanga ida kuti agu adiaberã oni amangaha nga gu du mburuhe rii Ziazia Kekeapai. I ima rengba ka pe gupai nga, marã gbiati agu ahe marã narengbe ka ngbehe ima rengba ka fu bandahe fu gaoni aborokporo. Ono tie, oni tingidipa gu kpiapai nga ga Bakindo Yosafata. (2 Peka 20:1-30) Ko aima kido kuti Yekova na ko ki yuguhe rogo gako mangaapai yo. Yekova aambunga gu ruru kumba re te, na ko ambunga roni a te.—Tam. 37:28; Eb. 13:5. w21.11 15 ¶6; 16 ¶8

Mbori akusi rani rogo kpiako yo, sidu, ani na nyemu gupai nga kaa bi gupai nga i naamangapai na aboro ngba ruru gene. (Bam. P. 1:26) Ono mbiko gupai nga ani nga kpakpa aboro, ani ima rengba ka sarangbanga ni irairaha tipa apai, zavura ho ani aberãha ni nga arengo dunduko kina be rani tipaha. Ni kpiapai, oni tingidinga pa wai Yona adu na gberãrago na ga Yekova diaberã ka yugo inapai fu aboro Nineve. (Yona 3:10–4:1) Ono tie, oni berẽnga pa gupai namangi, bambiko Yekova ayugu inapai fuyo. Aboro Nineve bangeyo aima susa 120,000 nga aguyo naima saberã yo abati! Ti digidoho, Yona du nasaringbanga aboro ni irairaha angianga Yekova ya. Si aidanga Yekova naasaka rogo gu nduapai yo asaka fu aboro ko amanga gako adiaberã ti ni te. Rengo ngaha nga, Yekova aima mbu gene fu gako amoyambu bakuru kusayo i peke gayo aberãpai nibipa agu adiaberã si aaida ko mangihe watadu ko aaida ka mangaha. (Bam. P. 18:25; Yona 4:2, 3) Na ti kura aregbo, ko anaasaka rogo ndu gupai yo asaka ko amanga adiaberã ti ni. (Yona 4:10, 11) Ono tie, si aidanga Yekova sana rani asana mbata ho ko aida ka mangapai ni watadu tingbafuo manga ko pai te.—Yes. 40:13,14; 55:9. w22.02 3-4 ¶5-6

Ani namangapai wa “tame” ho ani “aberã gupai ni nga akuarani kiipayo” tirani. (Frp. 2:3, NW) Ka ani asonosa gi bipai re ni bakerehe, si nawira gupai nga ani adunga ni agu aboro nakotosa aboro gbe te. Awirinarani dunduko nyakipa yo kisusi rani rogo kura agene yo. Si taata ka rugatise na gipai re ho ani agbeberã rani ni kuti gayo wene asino. Si naida ani moi gu rugute ku berãrani yo gu mokedi nangia Pauro afuhe fu aKorindo, nga gu naya: “Da nasa roni oni du akia? Gini he du be ro Mbori afu nga ha foro ya? Ono si ngia i afu he foro, tipagine mo asambua he ti ni, wa ka mo adi he tigamo?” (1 Kor. 4:7) Si naida ani du na rubangirise ka zanga gbeberã aboro kuti rani, watadu ka zanga berã gupai nga parani nyaki kisusi ga kura aboro. Ni kpiapai, agu awirina nga akumba du na tandu manga wene agumbapai watadu agu awirina nga adee du na tandu tona wisigo Ziazia Kekeapai na badungu aboro, si naida i naafu taarimo ti aregbo dunduko fu kina Yekova tipa gupai du yo na rengba ka mangaha. w21.06 22 ¶9-10

Si nakpakara kina kumbatayo fu dungu aDezire Yekova tipa i gbia aboro rogo akpuyo. Kura abatungusipai naraka rogo agu aba i akiso angbadimoho akiso. Agu akporo re watadu agu aba re ima rengba kadu na aboro ho ngbadimo nabandaha, nga aguyo ambunga aboro i rimi ku rogo agu akporo re watadu ku rogo agu aba re ya kina gu ka agu aboro naraka yo idihe fuyo. Kura abatungusipai nagbia kina bete aboro tiikporo watadu i natungusapai rogo agu aba kina bete aboro araka rogoho. Agi abatungusipai re ima rengba ka ndu tipa gbanga regbo tipa ka gbia boro sa—nga gu ni naima rengba ka zanga du tii kporo a! Ka si du nga ani nagbiatirani na ngbatunga akpakarapai wa gere, si naida ani naandu kindi kumbatayo kaa tungusapai. Oni asadi ka ndu fuo aboro ti aregbo ni bakiakia. Ka ani aatungusapai ti gu regbo rengbe ani ka bi aboro kporo, si nika sa gupai nga ani fura na badungu aboro. Kurapai berewe nga, aboro ninaanyenga ku gene ta yo te, i naaga aga ku kporo yo! Dungu awirina ninaatungusapai tingbafuo bebere uru watadu nyemu, mbiko agu aregbo re i naagbia dungu aboro ti ni. Kurii gure, airakporo ima rengba kadu na rengba gbe na kadu regerege ka fura ti agu aregbo re. w21.05 15 ¶5, 7

Ya mo ani nabi kina gu bangisapai re areme? Ii. Badungu aboro nidu na gberãrago ho aDezire Yekova akodanga tiyo ni na yo kaa iriso agu asino mangaapai adunga ringbisihe kuti Ziazia Kekeapai ya wa gu nga, iriso uru batikase gbiati Krisimasi. Agu akurayo na zinga mbiko gupai nga aDezire Yekova akodanga tiyo na yo rogo agu apumbo nga ga ringara watadu kaa manga agu agene kpara boro adunga kuti Fugo Mbori ya te. Agu aboro du na zinga kuti aDezire Yekova mbiko agi andu apai re ima rengba ka ida kuti gupai nzunzu nga Mbori naida aida na gu gene i airisoko ngbaha. Ono i arengbanga ka sa ngbarago tiko ka si du nga i nakpi kina nyemu agu ayugopai nga ga zegino kisusi agu ayugopai du ziazia rogo Ziazia Kekeapai yo te. (Mk. 7:8, 9) Waigu rengbe ani ka ne kota ki zanga mbu pekafuo Yesu? Si naida ani sonosi bakere nyemuse tipa ga Yekova andiko na arugute. (Tam. 119:97, 113, 163-165) Ka ani kpinyemu Yekova, ani nika soga agu asino mangaapai nafu gberãrago fuko. Ani ambunga ai pai si du na nyanyakipaha kisusi gaani nyemuse tipa Yekova te. w21.05 6 ¶15-16

Waigu rengbe ani ka mangapai kuti gu rugute nga ga gu mokedi nangia Pauro? Si naida ani banda gaani idapase ni nyanyakihe ni wisigo ani pai dedede, ni manga ani kparakpee zanga piriga, na ni manga ani gu sunge Yekova nafuhe furani ani mangihe. (2 Tim. 4:4) Ka ani du na idapase, ani agundenga ho ani agia gbegberẽ apangbanga ni tipa aDezire Yekova te. (Yes. 28:16) Gaani nyemuse tipa Yekova, tipa Fugoko, na tipa awirinarani nika undo rani ani zanga kota mbiko agu aboro mbu rengo. Rogo bambata sa kama agarã, badungu aboro naakoto na i ki mbu Yesu. Ono wa si avura du wo, badungu aguyo aima dia ko kugume. Na boro sa dagba agu aboro re angia boro sa dagba ga aYudo aboro rondo yo, na zavura “bakere rimbasa aboromotumo.” (Amo. 6:7; Mt. 27:57-60; Mk. 15:43) Wakina gure areme, amirioni aboro akotanga te. Tipagine? Bambiko i ima ino gu rengo du rogo Fugo Mbori yo na ki ima kpinyemuhe. Fugo Mbori naya: “Bakere zereda du fu agu yo nakpi nyemu ga rugute; he adu nga ho sa ka kotosi yo te.”—Tam. 119:165. w21.05 13 ¶20-21

Gu mokedi nangia Pauro arugutiko na gupai nga, agu apai dunduko ko amangihe tingba ga Yekova sunge, ko amangihe mbiko ga Mbori ome, angianga mbiko gako ome ya. Yekova afu ome fu Pauro vurube gako ziazia toro tipa gupai nga ko digisi gako sunge tungusapai wenengai, si ki vura du vurũ nga ko agbiatiko na arungosiro, i ki ba ko ku bambukiso yo, na ko ki gbiatiko na kura akpakarapai. Si aaida gupai a nga Timoteo nga guko nangia ga Pauro paranga badiasunge kido kuti gu ome nga ga Mbori tipa ka manga gako sunge. Timoteo anaagasa Pauro na gu sunge nga ga amokedi ku rogo tuturũ arago. Berewe a, Pauro akedi ko ko ndu gu kura anunguro tipa ka bi adungurati na ki ngarasi he. (1 Kor. 4:17) Timoteo aima rengba ka bi tiko nga ko arẽnga te. Isoke si du Pauro ape gupai ti ni fuko nga: “Ka boro páyasi nga pa ro mbiko wa du mo ni paranga wa sa ya.” (1 Tim. 4:12) Kurigure, ti gu regbo re, Timoteo aima du a na gako kpakarapai nga gu naadu wakina kiwe ti kpotokoyo, nangia ko “awoka dedede.” (1 Tim. 5:23) Ono Timoteo aima ino gupai nga, ga Yekova ziazia toro du na ome ti ni nika fu gu ome afu fuko ko aidaha tipa ka tungusa wene pangbanga na kini undo awirinako.—2 Tim. 1:7. w21.05 21 ¶6-7

Gu rugute du rogo Yakoba 1:19 fu agu aboro gbe nafu rugute. Yakoba akepai nga: “Aboro dunduko i ipisi tiyo ka gia pai, ki rõasi tiyo tipa gumba pai, ki rõasi tiyo tipa zinga a.” Bakumba ima rengba ka berã gupai nga, ni ima ino agu apai dunduko namanga, ono ya mo ni ini agu apai re nzunzu? Asanza 18:13 natingida rani na gupai nga: “Ka boro karagapai mbata fu gia pai, si nga pa mungo na zee fu ni.” Si ni wenepai gbe ka sana kina gu boro nagbia tini na apai re ni pekepa agu apai re nitini. Sidu, si naida bakumba degetuni mbata fu ni fura. Bakumba ima rengba ka sanahe nga: “Ginipai ninaamanga rogo gamo raka yo?” “Waigu rengbe mi ka undo ro?” Ka abaakumba di regbo tipa ka ino agu arengo pai duho, si nawiraha gbe nga i ima rengba ka undo awirinayo na ki ngarasi yo ni bakerehe gbe. Anga fu wene rugute nakoda gupai gbua nga ka geda bete averesi watadu ka fu berãpai watadu gu kura apai te. Awirinarani naida ka bi gupai abi nga ani naberãpa yo aberã, ani ima rugatirani na agu apai du tipa yo, na ani naida ka undo yo. w22.02 17 ¶14-15