Oni Rengbe Arengba Ka Raka Nyeanye Kindi

DUNGU agu aidipambori du rogo zegino areme, i na gu maabangirise du tipa nyenye unga rogo angbatungaha nibakiakia. Gu futufutuapai du tipaha rengbe kadu nibakiakia rogo apambori nibakiakia, ono gu maabangirise du yó nani, si kina sa, nga ka raka gu raka duna ngbarago rogo wene ba zanga gunde bekpio. Ya mo anga si nga ngbatunga gu raka oni akpinyemuhe tee? Wai rengbe oni ka sakapai tipa gi ngbatunga aida rengbe na arago dunduko re? Ya mo gu nyenye unga du aboro na maabangirise tipaha, si atingidi yee?

Ziazia Kekeapai nayugoho ya Bakusiahe amoipa nyenye unga ku kpoto aboro yo ti kina bambata regbo, nga gu regbo ko akusi bambata kumba na diako ti ni. Si nayaa: “Ko . . . [a]moi nyenye apai a ku berã boro yo.”​—Batungusipai 3:11.

Ono tie, tipa gu bambata aboro i akusiyo re rengbe ka raka nyeanye kindi, si aidi i di ga Mbori pagbia kugume nga gu nadu tipa diaberã tipa gupai du niwenehe na gu du nigbegberẽhe. Wa ka i amangihe wo, ka Yekova abi yó ni agu aboro narẽ ka ‘nye niungayo kindi’ rogo gu kporo ko ambakadihe fuyó, nangia ati Edene.​—Bambata Pai 2:8; 3:22.

I Agbarasipa Nyenye Unga

Ziazia Kekeapai nayawee Mbori aru “gu ngua nga ngua ina wenepai na gbegberẽpai” ati yo, na ki za Adamu na Eva ti ri zuzuhe, ya ka i rihe, i kpi akpi. (Bambata Pai 2:9, 17) Wa ka Adamu na Eva aaringa gu zuzu ngua re ya, ka i ayugu gupai nani nga i aima dia ga Mbori pagbia kugume. Ngba kura gene, pa ri yó gu zuzu ngua re ayugu gupai nga i ima ká ga Mbori pagbia. Adamu na Eva abasapa ga Mbori arugute na i ki koditiyo na Satana, nga gu boro nitoro nasamungu kuti ga Mbori pagbia. Nisangbana gipai re, Mbori kini diberã nibasa tipa ka Adamu na Eva rakinga nyenye kindi ya.​—Bambata Pai 3:1-6.

Guhe Mbori afuhe fuyó re angia unga watadu kpio, ka raka watadu ka zanga raka. Sangbana basasangba angia kpio, na si kingia digido gayó raka. Tingbafuo gupai re, gene adunga be Adamu na Eva watadu be atitayo kaa raka kindi mbiko gu ome nga ga abinza watadu mbisimo adu tiyó nazanga kpio te.a

Atita Adamu dunduko narungo areme mbiko gako samungu. Gu mokedi nangia Pauro asakipai tipa sangbanaha ki yaa: “Gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.”​—ARomo 5:12.

Yekova Ambakadipai Berewe Tipa Nyenye Unga

Gu mokedi nangia Pauro afura tipa gupai naamanga atita Adamu niringbisa ko payo kuti agu akanga nadu rogo bambata sa kama agarã. Bambiko gu ingapai awiri Adamu na Eva adihe nigayo ũkumbo, i avunguyó “ni akanga ingapai,” kini pidi kina kpio. (ARomo 5:12; 6:16, 17) Wa ka Yekova ambakadanga pai kuti ndiko ka ngbe agu akanga re ya, si ziazia nga ka i anye wakina gure kini pidi kina kpio. Pauro asakirogoyo ki yaa: “Were, wa sapangbanga aye tie fu aboro dũ sa gbarasangbangase mbiko gu tindika [nangia ga boro] sa; kina wo gamunihe aye fu aboro dũ sa gu diapairi nga ga unga mbiko [gu] manga rurupai [nangia ga boro] sa.” Gu mangaapai nga ga ‘diapairii’ re andu ki da ti gupai nga Yesu fu gako unga ‘nirengberengbe motumo tipa aboro dũ.’ Yekova amangisunge na motumo tumorii ka zaka aboro kusayo kuti ndiko be “sapangbanga” nga ga “gbarasangbangase.”​—ARomo 5:16, 18, 19; 1 Timoteo 2:5, 6.

Si nga ndu gupai aboro-birĩ-inohe nikaa bingo ziga nyenye unga ti ni rogo kpoto aboro yo ya. Kura ba kia du ziga rogoho. Ringbisihe kuti Ziazia Kekeapai, ndu gupai ngbatunga aboro akpiko ti ni si aenge ti iraira sino mangaapai gbiati kuondiko, angianga kpoto boro du nagberẽ ya. Gu gene rengbe ani ngbaha ka gbia nyenye unga, si nga kina gu motumo tumorii Yesu afuhe kuti ndiko. Gi motumo tumorii re a nga yuguyugu ga Mbori ruru mangapai na gako weneringise nga ga nyemuse. Ada tie nika gbia undo be gu motumo tumorii re na ki gbia nyenye unga?

Gu Unga Zanga Kpio

Yekova Mbori “[aima du] mbata rago nikaenga [na ko] nye anye kindi.” Ka ko kpingo te. (Atambuahe 90:2) Gu bambata boro Yekova afu gu gamahe funi nga ga gu unga zanga kpio, ni nga Yesu Kristo. Gu mokedi nangia Pauro asakirogoyo ki yaa: “Kristo azingi dagba akangba ko akpi nga berewe te; kpio afu nga ri ko berewe te.” (ARomo 6:9) Nirengo, wa Pauro aaringbisapa gu kparakparapai du dagba Yesu na agu abazogo nga ga zegino yó, ko ayawee kina Yesu sa dagbayó nga gu boro zanga kpio. Yesu nika ‘nyeanye kindi’ niungako. Gako unga nga gu ‘unga apayanga ya.’​—AEbere 7:15-17, 23-25; 1 Timoteo 6:15, 16.

Anga kina Yesu sa nga gu bangisa boro duna gu ngbatunga gamahe re beni te. Agu aKristano du nimbedimbediyo nitoro nga aguyó i asia yó tipa i ndu ku ngbangbaturũ yo ka zogarago ni abakindo, i nagbia kina gu bangisa zingabekpio nadu wa ga Yesu a. (ARomo 6:5) Gu mokedi nangia Yoane ayugu gupai nga, i nafu gi mamu re fu agu aboro du bangeyo gbua nga 144,000. (Yugoti 14:1) I na gu unga a zanga kpio. Pauro aya tipa gayó zingabekpio wee: “Ka pasio na kure di nga kumbo ga Mbori ngbi te. . . . Kpangi apaa apaa, i ki zingisi kangba aboro zanga zirã, i ki sa rani a kia. Bambiko gi zizirĩ boro re ka ukadi zanga zirã, gi kpikpi boro re ka ukadi zanga kpio.” Kpio adunga na ome kurii agu aboro duna ngbatunga gu zingabekpio re te.​—1 AKorindo 15:50-53; Yugoti 20:6.

Gi mangaapai nga ga Mbori re niʹiiriwoho nirengo. Bambiko zavura amaraika, Yekova akusanga yo i duna gu unga zanga kpio te, wa vura duyó na gu kpoto nga ga toro vurũ. Gipai re niyuguyuguhe nzunzu rogo gupai nga, agu amaraika nakoditiyó kuti Satana rogo samungu kuti Mbori, Mbori nika ima yó aimo. (Matayo 25:41) Ngba kura gene, agu aboro nika zogarago na Yesu, i tigayo nika gbia gu gamahe nga gu unga zanga kpio, si kini yugupa ga Yekova kido kutiyó ni agu aboro du niruruyó fuko.

Ya mo gipai re nayugo gupai nga, kina agu aboro du bangeyo niumbaha gbua nga 144,000, ringbisihe kuti agu abirioni ngbatunga aboro naraki auru kpotosende, i nika gbia nyenye unga? Oó. Ani bingo ndu gupai adunga ha ti ni wo ya?

Nyenye Unga Auru Paradizo Kpotosende

Gu buku nga ga Ziazia kekeapai nga Yugoti, si nayugopa gu dungu rimbasa aboro ka boro agedanga yó ya, nga aguyó nika gbia nyenye unga rogo paradizo auru kpotosende ane. Gu kura aboro berewe nika gbia nyenye unga naayó nikangia agu aboro nakpiki i ka zingisa yó na i kidu berewe niparangayó. (Yugoti 7:9; 20:12, 13; 21:3, 4) I nika ndu naayó sa gu ‘di nga ga ime unga, du nikurẽkurẽhe, nagbada tii gu mbatabakindo yo nga ga Mbori.’ Na ‘angua unga [nikadu pangba gu di re] na akpehe nikadu tipa husa arikaaboro.’ Yekova Mbori nayamba rani niweneringise kini yaa: ‘Gu boro gomoro ime amanga ni, ni ye, guni idihe, ni di ime unga gbua.’​—Yugoti 22:1, 2, 17.

Anga agi angua na gi ime i nagumbapaha re, si nga gu ziga boro adiaha ní ki nye niparanga ní watadu ka ní akpingo ya, wa ngbatunga gu aboro-birĩ-inohe aagbataha vuru gu dungu agarã nasusi kusayo re te. Kuba gure, si narukuba gupai Mbori namangihe tipa ka karaga ngbatunga aboro berewe nirengberengbe yó rogo Yesu yo wa gu si adu ti tonatonaha.

Gu ga Mbori bambata ringbisapai nadu ti tonatonaha ka fu nyenye unga fu gu ngbatunga aboro nga aboro giasangbaa, si aʹarianga tihe te. Yekova nika manga gupai amanga ko aringbisipaha re, bambiko ko nga gu boro nakakuti manga rurupai. Atambuahe 37:29 nayaa: “Ruru aboro adía kumbo ringara, ki nye anye kindi.” Gi kidohe re nafõngbaduraniyo gbiati gu ngbatunga aboro i nafu gu gamahe fuyó nga ga gu unga zanga kpio, ani kini yaa: “Na kii ga mangaapai du ni iiriwo apai, Ako Gbia Mbori du na tandu apai dũ! Gamo agene du ni ruru he na rengo a, mo nga Bakindo arikaaboro! Ako Gbia, da agúnde nga ti ro ya, ka ni atáasa nga rimoro a ya? Kina ro du ni ziazia ro.”​—Yugoti 15:3, 4.

Ya mo oni nakpinyemu gu wene gamahe nga nyenye unga? Ka si du wo, si naida oni ra nigoroni fu “Bakindo arikaaboro” na oni kini gisangbako. Si naida oni wirikipai tipa Yekova na tipa Yesu Kristo, nga gu boro i nambakadipa ngbatunga gu raka re rogo ní yo. Agu aboro dunduko nika ida kuti gu ga Mbori pai sigirako ho nikpiapai fu aboro tipa rurupai na gbegberẽpai, i nika fu gu gamahe fuyó nga “nyenye unga.”​—Yoane 17:3.

[Gu rukutu kekeapai du bandu kpewaraga yo]