Oni Moiberã Roni Fuo Gaoni “Abirĩ Yugopai”
‘Mo nitungusipai, mo nirugu aboro ti gu gbegberẽ apai mangi yó ho, mo bira yó ti gu irairapai mangi yó ho, mo ngarasi yó nigbanga hipai na abirĩ yugopai.’—2 TIM. 4:2, NW.
1. Gini sunge Yesu afuhe fu gako abawiriki, na gini kpiapai ko amoihe?
WA Yesu avura kaa manga iiriwoapai kini husi aboro ti regbo gako sunge auru kpotosende no, gu bambata sunge aboro ainiko ti ni angia yugopai, angianga manga iiriwoapai ya. (Mk. 12:19; 13:1) Tungusa gu wene pangbangaa nga ga Kindo nangia gupai ko aperesipaha mbatayo, na kinawo apefuoko amanga areme a. AKristano na gu sunge kuriyo nga kaa yugopai fu aboro kindi tipa i du ni abawiriki kini mangi agu apai dunduko Yesu arugu gako abawiriki kuti ni.—Mt. 28:19, 20.
2. Ginipai si aida ani mangihe tipa ka manga gu sunge wenengai i afuhe furani nga ga tungusapai?
2 Tipa ani rengbe kaa manga gu sunge nga ga sa aboro ni abawiriki i afuhe furani, ani naaʹasada tirani kindi tipa kadu nibawene abayugupai. Gu mokedi nangia Pauro anyakasipa gipai re ho ko ake waraga ni fu Timoteo nangia gu badiangbako i anaatungusapai naako. Ko aya fuko wee: “Mo bérẽ pa tiro, na ga yugopai; ki ka kuti agi apai re; bambiko manga mo wa gere mo abátasa tiro na agu yo nagia paha ngba ro.” (1 Tim. 4:16) Anga gu ngbatunga yugopai Pauro aafura tipaha re nga gu yugopai nga ka rimisopai gbua kurii boro yo te. Agu aKristano nga wene abatungusipai, i naarimiso agu arengo du rogo Ziazia Kekeapai ku ngbadu aboro yo na ki fõngbadu agu aboro yo re tipa i mangi aʹariapai rogo gayo raka. Gure nga birĩ yugopai. Sidu, wai rengbe oni ka gbia “abirĩ yugopai” wa oni atungusa gu wene pangbangaa du tipa ga Mbori Kindo fu aboro?—2 Tim. 4:2, NW.
Gbia “Abirĩ Yugopai”
3, 4. (a) Wai rengbe ani ka gbia “birĩ yugopai”? (b) Wai gu Sukuru Nga ga Siokrasia aundo rani ani du nibawene abayugupai?
3 Tipa ka yugopai wenengai, si naida ani wisigi gupai ani andu ka yugoho, ki wiriki mangaha, na kini bi wai kura aboro amangaha. Agi apai du biata re dunduko si aida ani naandu kuti ni tipa kadu nibawene abayugu wene pangbangaa. Ani rengbe ka rugatirani wenengai na gupai ani andu ka gumbaha kinagu ka ani wisigihe wenengai na ki kpari fu Mbori tipaha. (Oni gedi Atambuahe 119:27, 34.) Ka ani awisigo wene abatungusipai ho i ayugopai ni, si nika undo rani ani wiriki gayó abirĩ na kini mangihe wa yó. Ka ani aʹasada tirani dedede kaa manga agu apai ani awirikaha, si nika undo rani ani mbakadi gaani agene ayugopai.—Ruka 6:40; 1 Tim. 4:13-15.
4 Yekova nga gaani Bakerepa Bayugupai. Ko nafu arugute fu gako amoyambu vurube gu gako riigbu du auru kpotosende tipa wai si aida i niimangi gu sunge i afuhe fuyó nga ga tungusapai. (Yes. 30:20, 21) Sidu, adungurati dunduko ninaamanga gu Sukuru Nga ga Siokrasia rogo aposo dunduko, nga gu sukuru i azakihe tipa si undo agu aboro du rogoho i du nibawene abatakipande ga Mbori Kindo. Gu bambata buku i ayugo apai rogoho rogo gi sukuru re nga Ziazia Kekeapai. Fugo Mbori nga Ziazia Kekeapai, si nagumba gupai furani si aida ani yuguhe fu aboro. Kurigure, si nayugo agu agene yugopai furani ngbaa gbe. Gu Sukuru Nga ga Siokrasia naatingida rani dedede na gupai nga ani rengbe kadu nibawene abayugupai ka ani amaamburu gaani yugopai rii Fugo Mbori, kini mangisunge na asanahe ngba wene gene, kini yugupai ngba taata gene, na kidu na nyemu aboro. Ani wisigingo agi apai re nibasasa. Fuoho, ani nika wisigo wai rengbe ani ka rimisopai ku ngbadu gu boro yo ani ayugopai funi.
Oni Moimburu Gaoni Yugopai Rii Fugo Mbori
5. Gine si aida ani moimburu gaani yugopai riihe, na tipagine?
5 Yesu nangia bawene bayugupai kisusi abayugupai dunduko auru kpotosende, ko anaamaamburu agu apai ko anaayugoho rii Ziazia Kekeapai. (Mt. 21:13; Yo. 6:45; 8:17) Anga sangbarikoyo ko anaagumbaha te, ono ko anaagumba agu apai nga ga gu Boro nakedi ko. (Yo. 7:16-18) Gure nga gu kpiapai si aida ani pekefuoho. Sidu, ho ani afura ni ti regbo tungusapai kini tanga nani ti akporo, watadu ti regbo wisigo Ziazia Kekeapai na boro kporo, si naida mburuhe du kina rii Fugo Mbori. (2 Tim. 3:16, 17) Ka ani vura tatamana kina wai rogo sakapai na boro, si arengbanga kadu kina sa na gu ome nga ga Ziazia Kekeapai te. Ziazia Kekeapai na ome ti ni. Gupai ani aida gu boro ani ayugo Ziazia Kekeapai funi girogoyo, gu bawene gene rengbe ani ka undo ní ngbaha nga ka ya funi wee ní gedi gupai Ziazia Kekeapai agumbaha tipa gupai re.—Oni gedi AEbere 4:12.
6. Ginipai rengbe bayugupai ka mangaha tipa ka sa gu boro nawirikapai ní girogo gupai ní awirikaha?
6 Ono gure ayugongo gupai nga bayugupai zanga mbakada tiní tipa ka yugopai fu boro te. Si naida bayugupai berẽ aberã tipa ka ino gini averesi si aida i gedihe rogo Ziazia Kekeapai ti regbo wisigopai. Si naida gupai gbe nga boro gedi kina agu averesi nga mburu gaani aida. Si a ninyanyakipa pai tipa ka undo gu boro nawirika Ziazia Kekeapai ní girogo agu averesi ní agedaha.—1 Kor. 14:8, 9.
Oni Sana Wene Asanahe
7. Tipagine du mangasunge na asanahe ti ni niwene gene yugopai?
7 Sana wene asanahe nasa boro ní berẽ na si ki undo bayugupai ní rimisi pai ku ngbadu gu boro yo ní ayugopai funi. Sidu, kuba gupai nga kina roni nisakirogo averesi yo fu gu boro oni ayugopai funi, si naida oni sana ní ní sakirogoyo furoni. Ti kura aregbo, oni rengbe arengba ka sana ní na asanahe nidunguhe, gu tingbafuo kuraha, tipa ka undo ní ní girogo gupai ní awirikaha. Ho oni asasana gu boro ní oni ayugopai funi, gure nga oni naundo ní tipa ní rugutini na ndu gupai gumbayo kurapai ti ni, na ki sani a ní idi kuti gupai re.—Mt. 17:24-26; Ruka 10:36, 37.
8. Wai rengbe ani ka ino gupai du ngbadu gu boro yo ani awisigo Ziazia Kekeapai na ní?
8 Gu gene wirikapai du rogo gaani abuku, si nga ga sanahe na karagapai. Zanga kapa, badungu agu aboro oni ayugo Ziazia Kekeapai fuyó, i nikaa karagapai akaraga niipo kuti agu asanahe du nikekehe, bambiko i nikaa bi akaragapai abi kuti ni rogo agu agenewaraga kusi yó agu asanahe re rogoho. Ka si vura duwo, gu bayugupai naida ka rimisopai ku ngbadu boro yo, ní arengbanga gbua kina be agu akaragapai boro afuhe du nikina ruruhe re te. Nikpiapai, gu boro nawirika Ziazia Kekeapai rengbe arengba ka sakarogo gupai yo niruruhe Ziazia Kekeapai agumbaha tipa bäri, watadu meteka. (1 Kor. 6:18) Ono tie, agu asanahe bayugupai asanaha tipa ka ino ga boro bipai, si rengbe ka undo ní ní ini gu berãpai nzunzu nga ga gu boro re tipa gupai ní awirikaha. Bayugupai rengbe ka sanahe ki yaa: “Tipagine Ziazia Kekeapai aya ti ni wee ka boro kodinga ba na gu boro angianga gani badiarogatise ya? Ginipai mo aberãha tipa gi rugute Mbori afuhe re? Ya mo mo naberãha nga ka boro araka ringbisihe kuti agu arugute du tipa kodaba, undo ho ka ní gbiaha?” Agu apai gu boro re nika karagaha kuti agu asanahe re, si rengbe ka yugo gupai nzunzu du ngbaduniyo.—Oni gedi Matayo 16:13-17.
Si Du Taata
9. Ginipai si aida ani du nani berãrani yo ho ani ayugopai ni fu boro rogo Ziazia Kekeapai?
9 Badungu agu arengo du rogo Ziazia Kekeapai, si nitaataha tipa ka giarogoyo. Ono si rengbe kadu nga agu aboro ani ayugo Ziazia Kekeapai fuyó, i nga agu aboro agu azire yugopai nga ga zire pambori aima vundo riyo yo. Wangia ani abayugupai, gupai si aida ani mangihe nga ka sa Ziazia Kekeapai si du taata ka giarogoyo. Wene abayugupai nayugopai ngba taata gene, si kidu ziazia, na niruruhe. Ka ani andu kuti agi arugute re, ani sanga rengo si du nikpakarakpakaraha te. Ka oni gumbanga gu futufutuapai anyakanga paha ya ya. Anga si naida oni fura tipa apapara gu veresi dunduko oni nagedihe te. Ono oni fura riipa kina gupai nandu na gu riipai oni awisigoho. Gu boro re nika tona ka ino gu dudunguroapai nga ga Ziazia Kekeapai ho gani giarogopaiyo nikaa kio ni.—Eb. 5:13, 14.
10. Agenewaraga wai si aida ani nyasihe pati wisigopai sa na boro?
10 Agenewaraga wai si aida ani nyasihe pati wisigopai sa na boro? Si naida boro duna rugatinapai rogo gi bangiriba re. Agu apai du tipa bawirikipai na bayugupai rengbe kadu nibakiakia, ono gupai si aida ani naatingidaha ti aregbo dunduko nga, wangia ani abayugupai, gupai ani aida ka mangaha nga ka undo gu boro ani awisigopai na ní ní duna nyanyaki idapase. Sidu, ani nambu regbo fu boro ní gedi gu rengo du rogo Fugo Mbori, ki girogoyo, na ki idi nani. Si aidanga ani wisigipai na ní nibakerehe susi gu rengbe ní ka giarogoyo te. Si aidanga a ani naaora aora na wisigopai te. Ho boro nagirogopai yo ni, ani nagbisa kumbatayo.—Koro. 2:6, 7.
11. Ginipai rengbe ani ka wirikaha be gu mokedi nangia Pauro nibipa yugopai?
11 Gu mokedi nangia Pauro anaatungusa wene pangbangaa fu vovo aboro ngba gu gene ka i gi rogoyo agia. Wa si avura du nga ko angia bawene bawirikipai, ko anaagumbanga agu afugo rengbe kina wene abawirikipai ka giarogoyo te. (Oni gedi 1 AKorindo 2:1, 2.) Ka gu pangbangaa nga ga Ziazia Kekeapai du taata ka giarogoyo, si rengbe ka gbe dungu aboro kurogo rengo. Anga si naida boro duadu mbata nibawene bawirikipai ní kini ru ka giarogoyo te.—Mt. 11:25; Amo. 4:13; 1 Kor. 1:26, 27.
I Bi Gupai I Awirikaha na Kikiipaha
12, 13. Gine rengbe ka fõngbadu boro yo ní mangi agu apai ní awirikaha? Oni funga kpiapai.
12 Tipa gaani yugopai kusi wene sangbanaha, si naida gupai nga, gupai ani ayugoho rimi ku ngbadu gu boro yo ani ayugoho funi. Si naida bawirikipai girogo gupai ní awirikaha ki bi wai rengbehe ka undo ní nisani, na ki ini wai rengbe gani raka ka ngba ka ní ndu kuti gu rugapai nga ga Ziazia Kekeapai.—Yes. 48:17, 18.
13 Nikpiapai, si rengbe kadu nga ani nafura tipa AEbere 10:24, 25, nga gu nangarasa aKristano i naadunguratiyo na akurayo aidipase tipa ka wisigo Ziazia Kekeapai na tipa ka fura na akurayo. Ka si du nga gu boro re atatonanga nduge tipa agu adunguratise nga ga dungurati te, ani rengbe ka gumbapa wai funi niguruhe si naamanga, na ki gumbapa gupai i nika wisigoho ba dunguratise yo rogo gu poso re. Ani rengbe ka ya funi wee agu adunguratise nga ga dungurati, si nga papara gaani irisombori, na ki gumbaha funi nga si naaundo rani aundo nitirani. Fuoho, ani ki sana ní tipa ní ye kadu pati ni. Ka ní idi na gu rugute nga ga Ziazia Kekeapai, si naida ní mangihe wo mbiko ní na nyemu ka giasangba Yekova, angianga ka sa ngbarago ti gu boro nawisigo Ziazia Kekeapai na ní ya.—Gara. 6:4, 5.
14, 15. (a) Giniapai rengbe abawiriki Ziazia Kekeapai ka inoho tipa Yekova? (b) Wai rengbe ino asino Yekova ka undo bawiriki Ziazia Kekeapai?
14 Gu bakere undo kisusi abawiriki Ziazia Kekeapai agbiaha ho i awirikaha ni kini ndu kuti agu abangua rugute du rogoho, si nga, i naino Yekova wenengai na kini kpinyemuko. (Yes. 42:8) I naino gupai nga, anga Yekova nga kina gu Barani du na nyemuse na kingia Bakusiahe sa te, ono ko nayugo asinoko ayugo a fu agu aboro nakpinyemuko na kini irisiko. (Oni gedi Gate 34:6, 7.) Ho Moize ambedi ni ka kusa awiri Yisaraere be sunge akanga Ezipeta yo, Yekova ayugu tiko fuko ki yaa: “Mi nikadu nigu boro mi ka ida kadu nga ní.” (Gate 3:13-15, NW) Gere nayugo gupai nga, Yekova arengbe ka sa tiko nigu ngbatunga boro ko aida kadu nga ní tipa ka manga agu apai ko akpinyemuhe tipa gako siasia aboro nangia aYisaraere. Si ki tadu wo, aYisaraere kini mo ka ino Yekova nigu boro nga Batasi, Basovura, Wene sino boro, na nigu boro napepai si ki mangi kina kuho. I aima ino kura badungu apai a tipa ko.—Gate 15:2, 3; 16:2-5; Yos. 23:14.
15 Agu aboro ani ayugo Ziazia Kekeapai fuyó, i arengbanga ka bi Yekova ko nimangi baiiriwoapai fuyó wagu nadu tipa Moize te. Wa vura duhe wo, ho i nikaa sona ni rogo idapase yo kini bi agu apai i awirikaha na kikiipaha gbe na ki tona mangaha, i nika bi gupai abi nga si naida i niikido kuti Yekova tipa ko fu ngara fuyó, tatamana, na ko niiyugu gene fuyó. Wa i nikaa mangaha wo, i nika ino Yekova a nigu Bafurugute nga iratatamana rengbe aboro ka kido kutiko, ni Babanda aboro, na nigu boro nagama agu ahe fuyó zingoho amanga yó.—Tam. 55:22; 63:7; Snz. 3:5, 6.
Oni Kpinyemu Yó
16. Tipagine adunga ha ti ni nga si naida ani du mbata nikina agu aboro i avunguyo na kina birĩ yugopai tiyó ani kini ru kadu niwene abayugupai ya?
16 Ka oni abi tironi nga oni nga wene abayugupai wagu oni aida kadu te, ka rago gberẽnga tironi ya. Yekova na Yesu nangerakurii gu sunge yugopai namanga auru kpotosende areme. (Amo. 1:7, 8; Yugo. 14:6) I rengbe arengba ka undo rani tipa gaani afugo mangi ariapai amanga rogo gu boro yo duna wene ngbaduniyo. (Yo. 6:44) Gu ndikidi nyemuse du boro nani tipa gu boro ní ayugopai funi, si rengbe ka manga bakere ariapai ka si vura du vurũ nga i aavunganga ní na abirĩ yugopai tiní te. Gu mokedi nangia Pauro aima rugatiko naapa wai nyakipa kpinyemu gu boro ani ayugopai funi.—Oni gedi 1 ATesaroniko 2:7, 8.
17. Wai rengbe ani ka yugo gaani nyemuse tipa gu boro ani ayugo Ziazia Kekeapai funi?
17 Ani rengbe ka yugo gaani nyemuse tipa gu boro ani ayugopai funi nidia ani regbo tipa ka ino ní wenengai. Ho ani kaa wisigo agu abangua rugute ni nga ga Ziazia Kekeapai, ani nika ino agu apai aino du tipa ní. Ani rengbe ka ino gupai tipa ní nga ní aima digo niraki ringbisihe kuti gu kura apai ní nawirikihe rogo Ziazia Kekeapai. Ono kura abangiriba kinaho si aida ní mangi aʹariapai rogoho. Ka ani aundo gu boro ani ayugopai funi ní bi wai rengbe gupai ní awirikaha ka undo ní nitini, gure nga ani naundo ní ninyemuse tipa ní da nindikidi ga Kristo bawiriki.
18. Tipagine nyakipa gupai ti ni nga, ani kpari fu Mbori na gu boro ani ayugopai funi, na ani kpari a tipa ní?
18 Gupai nyakipaha tie kisusi nga, si naida ani kpari fu Mbori na gu boro ani ayugopai funi, na ani kpari a tipa ní. Si naida ní rugutini na gupai wenengai nga, gupai ani aida ka mangaha nga ka undo ní ní ini Bakusiahe wenengai gbe, kidu mbembedii koyo du ko ni gbe, na ki gbia undo be gako arugute. (Oni gedi Atambuahe 25:4, 5.) Ho ani akpara ni fu Yekova tipa ko undo gu boro ani ayugopai funi ní niimangi agu apai ní awirikaha, gu boro re nika ino wai aino nyakipa ‘manga gupai boro awirikaha.’ (Yak. 1:22) Ho ní kaa gia agu akpee ni ani afuhe, ní nika ino wai a rengbe ní ka kpara fu Mbori. Nairiwo gu pa ngbarago ngaha nga ka undo agu aboro ani ayugo Ziazia Kekeapai fuyó i rimi pagume na Yekova!
19. Ginipai ani ka wisigoho rogo gu papara kekeapai naye fuo gere?
19 Gupai nafu wasa nga, aDezire Yekova bangeyo ambeda kina kuti amirioni saba rogo zegino dunduko naʹasada tiyó ka gbia “abirĩ yugopai” tipa ka undo agu aboro duna wene ngbaduyó yo i mangi agu apai dunduko Yesu arugu gako abawiriki kuti ni. Gini weneapai namanga nisangbana gi gaani sunge tungusapai re? Ani nika gbia karagapai kuti gi sanahe re rogo gu papara kekeapai naye fuo gere.
Oni Natingidaha?
• Tipagine si aida aKristano gbia “abirĩ yugopai” ti ni?
• Agini agene rengbe ani ka yugopai ngbaha si kidu niwenehe?
• Gine rengbe ka undo rani rogo gaani yugopai ka si vura du nga i aavunganga rani na abirĩ yugopai te?
[Gu kpiahe du ti kpewaraga 13]
Ya mo oni rimi gu Sukuru Nga ga Siokrasia?
[Gu kpiahe du ti kpewaraga 15]
Si naida gu boro oni ayugopai funi gedi veresi rogo Ziazia Kekeapai
[Gu kpiahe du ti kpewaraga 16]
Oni kpari fu Mbori na gu boro oni ayugopai funi