Aboro Nagbata Akaragapai Kuti agu Asasanahe Du Tipa Yesu — GU BA AWARAGA DU ROGO INTERNET nga ga Ngbaõbambu Sinziri

Aboro Nagbata Akaragapai Kuti agu Asasanahe Du Tipa Yesu

BAKE ABUKU SA DU RIMOKO NGA STAN GUTHRIE AYAA: “Badungu aboro du na gayo abipai nibakiakia tipa gu boro nga Yesu. Ka si vura du vurũ nga ani na idapase kutiko watadu ani na idapase kutiko te, ani dunduko nasana tirani na gu sanahe nga, ‘Da nga ko?’”

BADUNGU aboro naida ka inopai tipa Yesu. Agu abuku i akekaha tipa Yesu, aboro nangbehe nikerehe. Agu aboro nambakada asinima tipa Yesu, i nagbia bakere marã. Ono na agi apai re dunduko, aboro kindi na badungu asasanahe ngbayo tipa Yesu. Aboro na abiapai nibakiakia tipa gu boro nzunzu nangia Yesu.

Nikpiapai, bete agarã kusayo, aboro ue dagba agu aboro ninaakeka apangbanga akusi gu sanahe nga “Da nangia Yesu?” na ki ya aboro karagapai kutini rogo Internet. Bete agu akaragapai aboro afuhe duku kusende re:

● “Si nawira wa ko angia Rabi (bayugupai) nga gu ko gako gene raka angia wene kpiapai nga ga nunga.”

● “Ko angia boro wakina rani ono naraki iiriwo raka.”

● “Gopai ho nayugo gupai nga Yesu adu ti ni te.”

● “Yesu nga Wiri Mbori nga guko i avunguko, ko ki kpi, na ki zingi bekpio tipa ka batasa rani be ingapai. Ko naraka araka awere, na Ko ayeaye berewe ku auru kpotosende ane.”

● “Mi idi kuti gupai nga Yesu Kristo nga bangisa wiri Mbori, ko nga kina ndikidi boro, kidu adu a ni mbori ti kina bangisa regbo.”

● “Si nipa agude ka ida kuti agu apangbanga du tipa Yesu.”

Nirengo, agu abiapai du kuari re arengbanga kadu dunduko nirengo te. Ya mo he ho nga gu du na rengba behe ka fu ndikidi akaragapai kuti gaani asasanahe tipa Yesu? Agu aboro nakusa gi magazini re idi kuti gupai nga Ziazia Kekeapai nga Fugo Mbori, kinaha sa rengbe ka gumba gu ndikidi rengo furani du tipa Yesu.a—2 Timoteo 3:16.

Rogo gu kekeapai naye fuo gere, ani nika wisigo ga Ziazia Kekeapai akaragapai kuti agu asasanahe aboro asanaha gbe tipa Yesu. Ko nitiko agumba gupai nga gene bata nizazaha fu “gu ni ka idi pa ko.” (Yoane 3:16) Ani nahõpai beroni oni makia agu akaragapai du tipa Yesu na ki mangi diaberã tipa tironi singia oni naida ka ino dungu apai tipa ko na wai rengbe oni ka yugo idapase kutiko.

[Footnote]

a Tipa ka ino kura apai berewe, oni bi gu kapita 2 du riihe nga “Ziazia Kekeapai Nga gu Kitabu Naye be Mbori,” rogo gu buku nga Gini Apai Nzunzu Ziazia Kekeapai Ayugoho? aDezire Yekova akusaha.

[Picture Credit Line on page 3]