Ani Bi Agu Asino Yekova Nga Gamahe Na Rugatinapai Na Kikiipaha

1, 2. Abakurea Yekova na gini mamu beyo?

WIRINARANI nga Monika ayaa: “Ani ima manga agarã awere 35, kurogo rogatise. Ani ima inido tirani wenengai na kumbaami. Ono tie, zavura tingbafuo gi dungu agarã re vurũ, ani nawirika gu kura apai kindi tipa tirani nga gu ani ainongo ho mbata ya!” Zanga kapa, gere nga gu bangisapai du tipa dungu aramukporo na abakure.

² Ani nidu na ngbarago tipa ka inido tirani na agu aboro ani akpinyemu yó. Ono tie, dagba agu abakure dunduko si aida ani sonosihe, gu nyakipaha gbe nga gu du dagbarani na Yekova. Ani arengbanga ka ino agu apai dunduko du tipa ko te. (Rom. 11:33) Wa ani kaa raka nyeanye kindi, ani nikadu na momu berani tipa kadu na bakere tambuahe tipa asinoko.—Batu. 3:11.

3. Gini apai ani ka wisigoho rogo gi kekeapai re?

³ Gu kekeapai ye mbata fu gere aundo rani ani bi agu asino Yekova nga du zaza na zanga kparaka aboro na kikiipaha. Ani wisigingo pai awere tipa agu asinoko ue nga gamahe na rugatinapai. Nimanga ani he wo, ani nika ye ka ino gupai nga “Yekova du ni wene ko fu aboro dũ, gako wene nunga aboro du ku ri agu ahe dunduko ko amangi he.”—Tam. 145:9.

YEKOVA NGA BORO GAMAHE

4. Gu memepai du tipa ndikidi gamahe nga gine?

⁴ Gamahe nga ginihe? Ani nagbia karagapai rogo agu afugo Yesu du nikekehe rogo Amokedi 20:35 nayaa: “Fu he ngba ti dia ha.” Rogo gi wiri guru afugo re, Yesu afura tipa gu memepai du tipa ndikidi gamahe. Boro gamahe nga gu boro nafu gaani regbo, ome, na gaani amosoro tipa ka undo kura aboro nani, na ní namanga gipai re na ngbarago. Nirengo, anga ndikidi gamahe naruriipa bakio ho te, ono gu ndupai nasa boro ní gamuhe. (Oni gedi 2 AKorindo 9:7.) Boro ho nagamahe wa gaani “betedi Mbori” nga Yekova te.—1 Tim. 1:11.

5. Gini gene Yekova ayugo gamahe ngbaha?

⁵ Waigu Yekova ayugo gamahe? Ko na gama agu ahe fu aboro i azingo tipaha, kodihe na aguyo atadanga ni airisiko ya. Nirengo, ‘Yekova du niwene ko fu aboro dũ.’ Na “ko nafu uru si kuru tipa agu yo nga gbegberẽ yo na agu yo nga wene yo a, kini kedi mai tipa ruru aboro na iraira yo a.” (Mt. 5:45) Si nga ndu gupai gu mokedi nangia Pauro ape gupai ti ni fu agu aboro naangianga aidipase ya nga Yekova ‘mangi wenepai, ki fu mai furoni ngbangbaturũ yo, na rago ida riahe gbe, ki hihisi kpotoroniyo ni riahe na ngbarago.’ (Amo. 14:17) Nirengo Yekova na gamahe fu aboro dunduko.—Rk. 6:35.

6, 7. (a) Yekova na nyemu ka gamahe fu ada? (b) Oni yugungo ho na kpiapai wai Yekova angerafuo ruru airisiko.

⁶ Yekova na ngbarago kafu ahe fu gu gako ruru amoyambu du nazingo. Bakindo Davide ayaa: “Mi adu mbata ni parangare, mi gbinza awere; ono mi ata bi nga ruru boro i nambu ni te, na ngbatungani i nio riahe a te.” (Tam. 37:25) Dungu ruru aKristano aima bi wai Yekova angerafuo yó. Ani bingo gi kpiapai re.

⁷ Bete agarã kusayo, wirinarani ni nazaki gene nga Nancy abi gupai nga ri rogo kpakarapai. Rii ayaa: “Mi aida marã nga 66, dorari tipa ka tumo bambu nani rogo gu kura girorago. Mi ainonga wari mi nika gbia gu marã ni re te. Mi akpari fu Yekova tipaha na ki ndu ku ba gi sunge yo nga ga fu riahe fu aboro. Mi aberãnga pa gbia undo rogo gu nyemu re gbe te bambiko si angia gu uru dungu aboro naayengo ka ri riahe ya. Kina ngbare nazere ka bi gupai nga dungu aboro naye ku ba baga riahe yo nigu nyemu re. Ho gi regbo anyasi ni, mi adungura gu marã aboro afuhe fere si ki dati gu marã nga 66, dorari.” Nancy ima ida kuti gupai nga Yekova agamu kina guhe furi ri aidaha.—Mt. 6:33.

8. Ginihe nga ga Yekova bakere gamahe?

⁸ Yekova nagamahe fu aboro dunduko. Gini gamahe dunga ha? Gu motumo tumorii nga ga Wiriko. Yesu ayaa: “Bambiko Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Rogo gi bangiriba re “zegino” narukuba aboro. Ii, ga Yekova gamahe fu agu aboro dunduko naida nani. Agu aboro duna idapase kuti Yesu nika gbia nyenye unga! (Yo. 10:10) Nirengo, gini kura gopai duho berewe susi gere rengbe ka yugo gupai nga Yekova nga boro gamahe?

ONI WIRIKI GA YEKOVA GAMAHE

9. Wai rengbe ani ka wirika ga Yekova gamahe?

⁹ Wai rengbe ani ka wirika ga Yekova gamahe? Yekova ‘nafu ahe furani u au ani ngi mbikoho’; sidu, si naida ani ‘fukuhe’ fu kura aboro a, kini fubee sa gayo ngbarago. (1 Tim. 6:17-19) Ani nidu na ngbarago ka gamahe fu awirinarani na kini undo agu aboro duna zingo. (Oni gedi Pa Fu Rugute ni Ue he 15:7.) Ginihe rengbe ka undo rani ani tingidipa gamahe? Gu kura awirina naamanga gupai nga: Ho i agbia gamahe ni i na gbata gene a tigayo tipa ka fu gamahe fu kura aboro. Gu dungurati nga ga aKristano na dungu awirina rogoho nga aguyo nasonosa gu toro nga ga gamahe.

10. Gini kura gene rengbe ani ngbaha ka gamahe?

¹⁰ Gu bawene gene rengbe ani ka gamahe ngbaha nga rogo fugo yo na mangapai. Wai rengbe ani ka manga gipai re? Nimanga ani sunge na gaani regbo gbiati gu ome du tirani tipa ka ngarasa kura aboro. (Gara. 6:10) Tipa ka aʹasada ka ino wai rengbe ani ka manga gipai re si naida ani sana tirani nga: ‘Ya mo kura aboro ini gupai nga mi na nyemu ka degature kuti agu apai nafuda yó? Ka boro sanahe ki ya ní naida i undo ní, ya mo mi niya ii ti kina gu regbo du mi na regbo bere? Gini regbo nangia gu yangada regbo mi afu tambuahe fu boro dagba gimi aborokporo yo watadu fu wirina?’ Nirengo, ho ani ‘afuhe’ ni, si nambedisa rani koyo Yekova ni na koyo du abakurearani ni a.—Rk. 6:38; Snz. 19:17.

11. Gini kura bete agene rengbe ani ka gamahe ngbaha fu Yekova?

¹¹ Ani rengbe arengba a ka gamahe fu Yekova. Ziazia Kekeapai nangarasa rani nga: “Mo írisi Yekova na gamo ahe dũ.” (Snz. 3:9) Agu “ahe dũ” re nakoda gaani regbo, ome, na agu ahe du berani nga gu rengbe ani ka mangasunge nani gene tungusapai yo. Zavura rukutu agude a, i ima rengba ka wirika ka gamahe fu Yekova. Baagude sa nga Jason ayaa: “Ho gaani aborokporo naaba gamahe ni Bambu Kindo yo, ani naafu marã fu awirani tipa i ba ru kurogo sanduki gamahe. I nagbia ngbarago agbia bambiko i ‘nafuhe fu Yekova.’” Agu agude nagbia ngbarago nga ga gamahe fu Yekova ho du yó ni rukutu i nikaa sona na kina gu bipai nga si naida i naagamahe agama fu Yekova.—Snz. 22:6.

YEKOVA NGA BORO RUGATINAPAI

12. Ginihe nga du na rugatinapai?

¹² Gu kura bawene sino Yekova berewe nga rugatinapai. Ginihe nga duna rugatinapai? Gu fugo i asaha kurogo pa-Zande nga ‘akpikonga pai ya’ watadu rugatinapai, si rogo gu Ziazia Kekeapai nga New World Translation nga duni “bayee.” (Tito 3:1, 2) Boro rugatinapai anyakasanga kina pa manga agu apai du rogo arugute yo dedede te, watadu ka kakuti manga gu kurapai watadu kadu nyakunyaku a te. Kuba gure, ní naasada tiní tipa ka mangapai ngba wene gene na kura aboro, kini berẽpa agu apai du tipa yó. Ní na nyemu ka degatuni fu kura aboro, na ho daha ni nga ni aria berãni tipa ka mangapai kuti gupai i akpinyemuhe, ní namangaha amanga wo.

13, 14. (a) Waigu Yekova ayugu gako rugatinapai? (b) Ginipai rengbe ani ka wirikaha tiga Yekova rugatinapai nibi wai ko amangipai na Roto?

¹³ Waigu Yekova ayugo rugatinapai? Ko naberãpa gako amoyambu na agu apai du tipa yó na ki nimangipai kuti agu apai i asanako tipaha. Nikpiapai, ani kparianga wai Yekova amangipai na gu ruru kumba nangia Roto. Ho Yekova adi berãni tipa ka gbarasa agu abagbata nangia Sodomo na Amora, ko apepa wai fu Roto si aida ko zubo kurii ba gangara yo. Tipa gu kura nduapai, Roto azungadi Yekova ko idihe fuko ko zubo kurogo kura ba. Mo berẽnga kurii gipai re, Roto asana Yekova tipa ko aria berãko ti gupai ko aida ka mangaha!—Oni gedi Bambata Pai 19:17-20.

¹⁴ Boro ima rengba ka ya Roto angia iramungo watadu boro basasangba. Kurigure, Yekova aima rengba ka banda Roto niungako, sidu ndupai adunga ho tipa ko gunde te. Wa si avura duwo, apai adu kinaho naasa Roto ko gunde, na si ki sa Yekova ko aria berãko na ki mangipai kuti gupai Roto agumbaha. Ko ambu Roto ko zubo kurogo gu bagbata ko aima ida ka gbarasaha. (Oni gedi Bambata Pai 19:21, 22.) Si tie ziazia nga, Yekova nyakunyaku watadu ni eegerã ko te. Ko naʹaria berãko aria na ko na rugatinapai.

15, 16. Waigu ga Moize aNdiko ayugu ga Yekova rugatinapai? (Oni bi gu sura du ti tonatonaha.)

¹⁵ Ani kparianga gu kura kpiapai nayugo ga Yekova rugatinapai a wa si adu rogo ga Moize aNdiko yo. Ho Yisaraere aniduni nga irarungo ka gene adunga beni tipa ka tumo na kandoro watadu meme ya, ní anirengbe ka tumo na ambipo ue watadu agbungu ue. Na ginipai tigaha naadu tipa gu Yisaraere naarengbanga ka gbia agbungu ue ya? Yekova abihe nga rungorungo aYisaraere nifu bete wiri ngungo. Ono tie, kura nyanyakipai adu kinaho si aidi i mangihe: Si aadunga nga i fu kina kungbo ngungo gbua te, ono “fufurũ ngungo” gu ngbatunga ngungo i na mbakada riahe nani fu ageno. (Bam. P. 18:6) Tipagine gipai re adu ti ni na nyanyakipaha?—Oni gedi Pa Amotumo 5:7, 11.

¹⁶ Mo moingo kpia gupai ku berãro yo nga, rungorungo Yisaraere nga mo. A wa mo nada bafu motumo yo na ga wiri ngungo tipa ka fuhe ni motumo, mo bi kumukokumuko Yisaraere ní niye na anyaa. Zee ima rengba ka zio ro bambiko mo nabi gupai nga kiingo pa gu ga wiri ngungo ye mo nani nimotumo re te. Ono mo kini tingidi gupai nga Yekova nabi ga motumo abi na kikiipaha. Tipagine? Bambiko Yekova naida gu ngungo du nga wene fufurũ ngungo. Gure wa ka i ya Yekova aya fu gu rungorungo aYisaraere re wee: ‘Mi ima ino gupai nga ka oni fu nga ha wa gu kura aboro afuhe te, na mi ima ino gupai nga, gu oni nafuhe si nga gu rẽ na ome roni.’ Ka pe rengo, Yekova nayugo gako rugatinapai ni berãko pa gako amoyambu na agu apai du tipa yó.—Tam. 103:14.

17. Oni rengbe kadu nakido nga Yekova naida na gini ngbatunga sunge?

¹⁷ Si nipa wasa furani ka ino gupai nga rogo ga Yekova rugatinapai yo, ko nadia gaani agamahe adia kugume ani afuhe fuko na ngbaduraniyo dunduko. (Koro. 3:23) Kura sosono wirinarani sa du rimori nga Constance ayaa: “Fura na aboro tipa bakusirani nga gupai ninaasa ngbarago tire. Si nga ndu gupai nasa re mi naatungusapai na kini wisigi Ziazia Kekeapai na aboro kindi. Kura aregbo kinaho mi nabira tire nga mi atungusanga pai berewe wenengai te bambiko kpotore wenengai te. Ono gupai ini mi he nga Yekova ima ino agu apai du tipa re na ko nakpinyemu re na kini bi agu apai rengbe mi ka mangaha na kikiipaha.”

ONI WIRIKI GA YEKOVA RUGATINAPAI

18. Gine nga gene sa dagba agu akuraha rengbe avunguagude ka wirika Yekova ngbaha?

¹⁸ Wai rengbe ani ka wirika ga Yekova rugatinapai? Ani berẽnga berewe kuriipa wai Yekova amangipa na Roto. Yekova aduna pagbia beko; ono ko adegetuko adega ho Roto aapeka gako berãpai ni. Mbori aima mangapai kuti gupai Roto asanahe tipaha. Kangia vunguagude nga oni, ya mo oni rengbe ka pekafuo ga Yekova kpiapai? Ya mo oni rengbe ka degaturo ho awironi asanahe ni, na ho daha ni nga oni mangipai fuyo kuti gupai i aidaha? Nibi gipai re, gu Ngbaõbambu Sinziri nangia ga Mbirinvuo 1, 2007 afura tipa wai rengbe avunguagude ka sakapai na awiriyo tipa agu andiko nga ga kporo. Nikpiapai, avunguagude na rengo beyo tipa ka sia gu regbo si aida awiriyo niyego ti ni ku kporo. Wa vura duhe wo, si naida agu avunguagude nga aKristano degetuyo adega ho awiriyo ape gayo bipai ni tipa gu regbo i nasiaha re. Ti kura aregbo, avunguagude ima rengba ka manga ariapai ti gu regbo i nasiaha baraho duhe ni nga si akuonga gu bangua arugute nga ga Ziazia Kekeapai te. Avunguagude ima rengba ka kparia ga awiriyo bipai tipa agu arugute nga ga kporo mbiko agude du si aida i girogo agu arugute re yo na kini irisihe.

19. Wai rengbe abaakumba ka wirika ga Yekova rugatinapai?

¹⁹ Abaakumba rogo dungurati naʹasada ka wirika ga Yekova rugatinapai ni berãyo pa agu apai du tipa akurayo aidipase. Oni tingidi gupai nga, Yekova aabi agu amotumo rungorungo aYisaraere aye nani na kikiipaha. Teketeke a, gu kura awirina kinaho adunga gene beyo tipa ka tungusapai berewe wenengai ya bambiko kaza watadu gbinza. Ginipai rengbe ka manga ka si du nga agi awirinarani re na gberarago mbikopa gi gayo zangarengba re? Abaakumba rengbe ka ngarasayo nga Yekova nakpinyemuyo akpi tipa gu asadatise i amangaha tipa kafu kina guhe rengbe na omeyo.—Mk. 12:41-44.

20. Ya mo duna rugatinapai nga ka zanga mangasunge fu Mbori? Oni sakinga rogoyo.

²⁰ Rengo ngaha nga, si aidanga ani vundu pa duna rugatinapai nimbu ani mangapai fu Mbori ka manga weneapai fu kina tirani te. (Mt. 16:22) Si aidanga ani di apai dunduko taata na kini nyakasi kina pa gupai nga ani na rugatinapai te. Kuba gure, ani dunduko “ásadi” tirani tipa ka undo gu sunge nga ga kindo. (Rk. 13:24) Nirengo ani namanga ome tipa ka zanga rõa kina kubani kisusi. Na ani namanga ome ka tungusapai nyanyaki. Na ani tingidi gupai nga Yekova asananga rani ani mangi gupai susi omerani te. Ho ani afu guhe ni fuko rẽ na omerani, ani naa kido nga ko na ngbarago. Ya mo si nipa ngbarago furani tipa kaa mangasunge fu gu bairasunge natambua rani na kidu na rugatinapai te? Rogo gu kekeapai naye fuo gere ani nika wisigopai tipa gu kura wene asino Yekova berewe ue.—Tam. 73:28.