Yekova Nabi Gaoni “Amina” na Nyanyakipaha

YEKOVA nabi gaani irisombori na nyanyakipaha. Ko ‘nadegatuko ki nigi pa’ gako amoyambu, na ko nabi ai gupai i amangaha ka irisoko na nyanyakipaha, ka si vura du kina tooni vurũ. (Mara. 3:16) Ni kpiapai, oni bingo gu fugo si awira gupai nga ani ima gumbaha bara dunguhe gbe. Gu fugo re nga “amina.” Ya mo Yekova nabi gu wiri tooni fugo re na nyanyakipaha? Ii, ko nabihe abi na nyanyakipaha! Tipa ka ino ndu gupai duhe ti ni wo, ani wisigingo pai tipa rogo gu fugo yo re na wai i namangisunge na ni rogo Ziazia Kekeapai yo.

“ABORO AKÁRAGA PAI DŨ, KI YA, ‘AMINA!’ ”

Gu fugo nga “amina” rogoyo nga “si mangi kinawo” watadu “nirengo.” Si naye tigu pa-Ebere du rogo yo nga “si du ni gupai du ni ruruhe,” “si du ni gupai rengbe boro ka kido kuti ni.” I anaamangasunge amanga ti kura aregbo na gi fugo re ti regbo sarangbanga. Fuo boro mangi kidohe, ni aniya “amina” tipa ka yugo gupai nga gupai gumba ni he re ni ruruhe na ni nika ida gu sangbanapai aida nika ye ti gupai ni nagumbaha. (Geda 5:22) Ho ni aniya ni “amina” dagba dungu aboro, gure anaayugoho berewe gbe nga ni nika ka aka kuti gani kidohe.—Nem. 5:13.

Gu bakere kpiapai nga ga mangasunge na gu fugo nga “amina” gu du ni kekehe rogo Pa Fu Rugute ni Ue he kapita 27. Fuo aYisaraere rimi ku rogo Ringara Mokido, si adu nga i dunguratiyo ku dagba Bagangara Abarima na Bagangara Gerizima tipa ka gia Andiko i nigedihe. I aadunga yo tipa ka gia kina Andiko gbua te ono ka idaha a. Ho i anigedi agu asangbanapai ni nga ga basasangba, i anaaidaha ni ya yo wẽ “Amina!” (Pa Rug. 27:15-26) Mo makianga pa badungu akutu akumba, adee, gbiati agude i nikaragapai na fugoyo kuari! (Yos. 8:30-35) Nirengo, bangiriyo aagonga ti agu afugo i agumbaha ni gu uru re te. Na agu aYisaraere re aima kakuti afugoyo, gu kekeapai du tipa yo naya: “AYisaraere anamanga pa Yekova ti rago Yosua dunduko, na ti agu arago dunduko nangia ga agu abaakumba nanye ni ungayo fuo kpio Yosua, nangia agu yo naini pa gu pai dunduko Yekova amangi he fu aYisaraere.”—Yos. 24:31.

Yesu aima mangasunge a na gu fugo nga “amina” ka yugo gupai nga gupai ko aapehe angia rengo, ono ko agumba gipai re ngba kparakpara gene. Kuba gupai nga Yesu mangisunge na gi fugo nga “Amina” re tipa ka karagapai kuti pai, ko amangisunge na gi fugo re ti tonatona gako fugo ka yugo gupai nga rengo du ko agumbaha. Ti kura aregbo, ko anaadogoda gu fugo re niya ko wẽ, “amina amina.” (Mt. 5:18; Yo. 1:51) Rogo gi gene re, ko anaakido agu aboro naadegatuyo fuko nga agu apai ko anaagumbaha angia kina ku rengo dunduko. Yesu aafura na ngbatunga gu kido re mbiko ko du nga gu boro i afu pagbia fuko tipa ko sa ga Mbori akidohe dunduko si da ti rengo.—2 Kor. 1:20; Yugo. 3:14.

“ABORO DUNDUKO KI YA ‘AMINA!’ KI TAMBUA YEKOVA”

AYisaraere anaamangasunge amanga na “amina” ho i anaatambua Yekova ni na ho i anaamanga kparakpee ni fuko. (Nem. 8:6; Tam. 41:13) Ho agu aboro nanaadegatuyo kuti kparakpee anigumba gu fugo ni nga amina fuo kparakpee, i anaayugo gupai nga ima dia gu kparakpee re ni gayo. Rogo gi gene re, agu aboro naanidu ho dunduko anaafu be kuti gu kparakpee re, na i kini gbia ngbarago ti iriso Yekova ngba gi gene re. Si nga gupai namangi ho Bakindo Davide aye ni na ga Yekova Sanduki mokido ku Yerusarema yo. Ti regbo gu pumbo nangbefuo gure, ko agumba kparakpee rogo bia yo, nga gu du ni kekehe rogo 1 Pekapai 16:8-36. Agu afugo ko agumbaha aima zio ngbadu agu aboro yo naadu ho “aboro dunduko ki ya ‘amina!’ ki tambua Yekova.” Ni rengo, i adu na ngbarago ka iriso Yekova sa.

Agu aKristano naadu rogo bambata sa kama agarã aima mangasunge na gu fugo nga “amina” a ho i anaatambua Yekova ni. Abakeke Ziazia Kekeapai dedede anaakoda gi fugo re ku rogo gayo awaraga. (Rom. 1:25; 16:27; 1 Pet. 4:11) Gu buku nga ga Yugoti nayugo amaraika a i nitambua Yekova niya yo wẽ: “Amina, Areruya!” (Yugo. 19:1, 4) Agu aKristano naadu mbata anaaya dedede “amina” fuo kparakpee ti regbo adunguratise. (1 Kor. 14:16) Ono tie, si aangianga kungbo fugo i anaagumbaha gbua zanga berãkuriihe te.

NDU GUPAI DU GAMO “AMINA” TI NI NA NYANYAKIPAHA

Fuo ino ani ndu gupai ga Yekova amoyambu amangisunge ti ni na gu fugo nga “Amina,” ani ima rengba ka bi gupai duhe ti ni ni nyanyakipa pai tipa ka digiso kparakpee na ni. Ho ani agumba amina ni ti digido gaani akparakpee, ani nayugo gupai nga rengo du gumba ani he re. Na ho ani akaragapai ni nga “amina,” zavura kukiri kuti gu kparakpee i amangaha fu dungu aboro, ani nayugo gupai nga ani ima ida na gupai peyo ho. Oni makianga gu kura pai berewe du gaani “Amina” ti ni na nyanyakipaha.

Ani nadegaturani ho gu kura boro amanga kparakpee ni mbiko si nga papara gaani irisombori. Ani airisongo Yekova ti regbo kparakpee sa na kina gupai ani agumbaha te ono na wai a ani amangapai ti regbo kparakpee. Ani nairiso Yekova ti regbo kparakpee angianga kina niya ani “amina” sa ya ono ni dega ani turani kuti kparakpee.

Ani ni kodikodi rani wangia ani airisimbori. Ti regbo gu kparakpee i amangaha fu dungu aboro, ani nagia kina gu bangisa kparakpee re sa na dungurati dunduko. (Amo. 1:14; 12:5) Ho ani akaragapai ni kuti kparakpee wa sa na awirinarani, si nakoda rani ni bakerehe gbe. Ho ani akaragapai ni kuti kparakpee nga “amina” singia na fugorani kuari watadu ku kpotorani yo, si nasa Yekova ko mangi gupai ani nasanako tipaha.

Wirina dua riri tipa kparakpee wa ri agia dunguratise rogo terefuni — Gaani “amina” nafubee kuti gaani irisombori

Ani natambua Yekova. Yekova nabi ai gupai abi ani amangaha rogo gaani irisombori yo. (Rk. 21:2, 3) Ko nabi ndu gupai abi ani amangapai ti ni gbiati gupai du kpotorani yo. Ka si vura du vurũ nga ani namanga dunguratise ni dega ani turani kuti terefuni, ani ima rengba kadu na gu kido nga Yekova azanganga bi gaani “amina” te. Ho ani aya ni “amina,” ani nakoda tirani na agu aboro du pati dunguratise ka tambua Yekova.

Gaani “amina” ima rengba kaa ngera wa nyakingo paha te, ono si na banyanyakipaha. Buku sa du mburuhe rii Ziazia Kekeapai naya: “Ga Mbori amoyambu nayugo gayo kido, nyanyaki ida, gbiati gayo maabangirise nga gu du kpotoyo yo.” Gu gaani “amina” dunduko ani agumbaha sanga ngbarago asa ti Yekova.—Tam. 19:14.

YA MO SI NAIDA ANI NAAYA “AMINA” TI AREGBO DŨ?

“Amina” nga nyanyakipa fugo. Ono tie, na ka si du nga gu boro namanga kparakpee gumba gupai arunga ya? Ya mo si naida ani zanga ya “amina”? Anga wo duhe nzunzu te. Gu kurapai berewe nga, Yekova ima ino gupai nga ani ninaagumba gupai agumba ti kura aregbo arunga ya, na ko abingo gu wiri aingahe re na pai te. Kuba gupai nga kadu ni agu aboro nabisirapa apai, si naida ani moiberãrani tipa gupai gu boro re aida ka gumbaha angianga agu afugo ni agumbaha ya, ka ani mangihe wo, ani bi gupai abi nga si naida ani ya aya “amina” kuti gupai gumbayo ho.

Ono tie, si aidanga ani ya “amina,” na fugorani kuari watadu kukiri kuti gu kparakpee gu boro angianga ndikidi idipase ya namangihe te. Na ka si du nga ani rogo gu ba i amanga ngbatunga gu kparakpee re rogoho? Ni kpiapai, ani ima rengba kadu pati pai na i kini sana boro ni mangi kparakpee. Watadu ani ima rengba kadu rogo gu ngbadimokporo adunga aboro dunduko rogoho ni aDezire Yekova ya, na bairakporo angianga Dezire Yekova ya kini diberã ka manga kparakpee fu aborokporo. Ginipai rengbe ani ka mangaha?

Ka ani gbiatirani rogo ngbatungapai wa gure, si naida ani ongo kii rogo irisa yo. Ani arengbanga ka ya “amina”; watadu ka zio berani na gu kura aboro ti regbo gu kparakpee re te, bambiko ka ani ya amina watadu ka zio berani na yo, gure yugu gupai nga ani ima kodatirani na yo rogo gu kparakpee re. Ani ima rengba ka diaberã ka manga gaani kparakpee kukiri, ono si ki idi gupai nga ka ani ya nga “amina” na fugorani kuari ya, tipa ka gu kura aboro berẽnga gupai nga ani ima kodatirani na yo rogo gayo kparakpee ya. Ka i ru kuari ka manga gayo kparakpee, ani rengbe ka manga gaani diaberã singia ani naida ka ru kuari watadu ka sungo asungo. Ru kuari watadu dua rirani kusende nga irisombori te. AKristano ni basasa rengbe ka manga diaberã tipa gupai rengbe yo ka mangaha ka i du rogo ngbatungapai wa gure, na si aidanga i bisirapa boro tipa gani siapai rogo ngbatungapai wa gure te.

Agu apai ani nabihe kuari re nayugo gu ndupai berewe du gaani “amina” ti ni na nyanyakipaha fu Yekova.

“ABORO AKÁRAGA PAI DŨ, KI YA, ‘AMINA!’ ”

“ABORO DUNDUKO KI YA ‘AMINA!’ KI TAMBUA YEKOVA”

NDU GUPAI DU GAMO “AMINA” TI NI NA NYANYAKIPAHA

“ABORO AKÁRAGA PAI DŨ, KI YA, ‘AMINA!’ ”