I Afu Biskuiti fu Gimi Aango
NICK, nga gu ko naraka Oregon yo, Amerika yo aya, “Ti tonatona gu garã nangia 2014, mi atona ta na gimi aango vuru gu gbata mi aaraka rogoho. ADezire Yekova anaaru dedede vuru gu gbata re pati gayo ũtura awaraga. I anaambakada tiyo ni bawenehe gbe, na i anaafu sene fu aboro dunduko na mongo ti ngbayo.
“Sino agu aDezire Yekova re aima ngba, angianga fu kina aboro sa ya ono fu gimi aango a. Rogo kura uru sa, Elaine nga gu ri naru pati ũtura awaraga, afu biskuiti fu gimi aango naadu ue. Tifuo gure, ai gu regbo ani anindu mbembedi kupati ũtura awaraga, gimi aango anaaida ka ndu fuo aDezire Yekova tipa gu wene biskuiti i afuhe fura.
“Bete adiwi aima susa. Gu biskuiti i afuhe fu gimi aango aima ngba tira na mi aima gbia ngbarago nifura mi ni guruhe na agu aDezire Yekova re. Ono mi aaidanga ka fura na yo ni bakerehe te. Garãre aima susa 70, na mi aainongo gupai aDezire Yekova aidi kutini te. Mbiko gupai nga rago aima gberã tire na dungu agu apambori nga ga aKristano, mi aberẽ gupai nga si adu ni wenepai ka mi aawisigo Baibiri ni kina tire.
“Ti agi aregbo re, mi abi kura aDezire Yekova berewe rogo kura papara gbata kia i naru pati gayo aũtura awaraga. I adu a na wenesino tiyo. I anaakaragapai dedede kuti gimi asanahe rogo Baibiri yo na gupai re nasa re mi du na bakere kido kutiyo.
“Rogo kura uru sa, Elaine asana re nga, ‘Ya mo mo idi kuti gupai nga anya nga gamahe be Mbori?’ Mi akaragapai furi nga, ‘Ii, mi ima ida kutini!’ Fuo gure, Elaine agedi Yesaya 11:6-9 fere. Natona ti gu regbo re ka ndu kumbatayo, mi aima ida ka wirika Ziazia Kekeapai, ono mi aaidanga kindi ka dia ai he be aDezire Yekova ka gedaha te.
“Rogo agu aˈuru nangbe fuo gure, mi anaagbia ngbarago ti guru sakapai na Elaine gbiati kumbari nangia Brent. I afu gu berãpai fere nga, si naida mi gedi Matayo kuti Amokedi tipa ka rugatire na gupai si ayugoho kadu ni ndikidi Kristano. Sidu, mi aima gedaha. Si aaimanga te, mi ki idi ka wirika Baibiri na Brent gbiati Elaine. Gipai re amangi bebere gu garã nangia 2016.
“Mi anaangera kumbatayo tipa gimi wirika Ziazia Kekeapai na aposo dunduko na adunguratise Bambu Kindo yo. Mi adu na bakere ngbarago tipa ka wirika gupai nzunzu Ziazia Kekeapai apehe. Mi ada ni gu Dezire Yekova niima zio bapatiza fuo regbo niima susa garã sa kusa. Wa du garãre awere nga 79, mi ngba ruru gene. Si ni pa maku nga Yekova akodi re ku dagba gako amoyambu yo nga aguyo kparatiyo fuko.”