Wai Padu Ni Adekurugbo Afudi Adee Ue

SANDRA nga dekurugbo naraka Australia yo. Ho kumbaari akpi ni mbata fu bete agarã kusayo, gupai namangi Sandra nibambataha nga ri akigi gbegberee. “Pa ino mi gupai nga mi ima zanga kumbaami nga bawene bakureami nitunguotunguoho afudi re kisusi. Mi arengbanga awere ka tingidapa wai nzunzu mi aguari bambungua yo ka ga ki da kporo yo te, na mi arengbanga a ka tingidapa gupai mi amangihe rogo yangara gu uru re te. Rogo gu bete aposo naye fuo gure, gu gunde nazire asatihe kurogo gu ima kpotose naapiriganga ya.”

Sandra na nakureari tini nga unvuru furi, nga Elaine, nga guri naima duni dekurugbo tipa agarã wa sita. Elaine angerefuo kumbaari, nangia David, tipa adiwi sita mbata fu kpio ko be gu kaza nga kenisa. Gari nunga anyaki gbe ki da ti gupai nga gbutuko fuo kpio kumbaari, vurari azi ri tipa guru regbo. Kusa fuo agarã ue, ri ati kusande dagba dungu aboro. Gari monganga aabinga guhe naayugopa kaza kutii kpotoriyo te. Ono tie, ko abi gupai nga Elaine anahi gari nunga ahi zanga fura tipaha fu kura aboro, si du ko afu gu rugute tini furi nga ri ndu ku kpuri yo ki asadi tiri nyanyakii ka kpara ni aume. “Mi adi bete regbo mbata fu nunga gbandaka kusayo ngbadureyo,” wogu Elaine agumbaha, kini gbia gupai kuti ni nga, ho mi anidu ni nisare, “mi anindu a ku bambu rame yo ki dadi rire na ga David arokoo.”

Ii, pa kpio kumba be dee nga guko ri akpinyemu ko gbe rengbe ka ye na dungu apai nibakiakia, mbiko padu dee ni dekurugbo nga kina raka zanga kumbaani sa te. Ni kpiapai, tipa bete regbo, Sandra aabinga tiri kurogo gu bari ri adu rogo mbata te. Wa kina gu kura zakperezakpere dungu adekurugbo narungo be pa kpio akumbaayo, ri abi tiri ni gu boro du gbayaga fu apai, na ni gu boro agbanga bani a ya. Sandra natingida gupai nga: “Mbiko inido mi tire na gupai nga kumbaami naamanga yangara adiaberã, mi anye nisare nitunguotunguoho kaa manga agu adiaberã re. Mi anaranga wenengai te. Mi aduna mbugo na ome re ki bati. Si adu nikpakarakpakarapai fere ka ino gupai nzunzu ka mi mangi.”

Apai namanga aboro na auru dunduko rogo zegino kirikiri wa kina gu namangi Sandra na Elaine. Akaza, abeno, avura, runosi tunga aboro, na gu ngbatunga azuu dunduko namanga rogo arago nakiiso bange adekurugbo.a Dungu agi adee re nahi gayo nunga kukiri, zanga ino gupai ka i mangihe. Ginipai rengbe abakure na agume ka mangaha ka undo aguyo nambakada gayo raka kuti gu nga ga adekurugbo? Gu papara kekepai naye fuo gere rengbe arengba ka fu undo.

[Gu rukutu kekepai du bandu kpewaraga yo]