‘Agu Aboro Duna Nyemu Nyenye Unga’ Naida Na Wene Pangbangaa

“Agu aboro dunduko nadu na nyemu gbia nyenye unga, asa tiyó ni aidipase.”—AMO. 13:48, NW.

1, 2. Wai agu aKristano nadumbata amangipai sa gu ga Yesu sangbanebi nayawee i nika tungusa gu wene pangbangaa nga ga Kindo auru kpotosende dunduko?

GU KITABU du rogo Ziazia Kekeapai nga Amokedi, si na nyanyakipa apangbangaa rogoho du tipa wai agu aKristano nadumbata amangipai sa gu ga Yesu sangbanebi nayawee i nika tungusa gu wene pangbangaa nga ga Kindo auru kpotosende dunduko. (Mt. 24:14) Agu abatungusipai nadu zaaza amoi kpiapai fu agu aboro nika ye ti fuoyo pekefuoho. Nisangbana gu zaaza tungusapai ga Yesu abawiriki amangihe Yerusarema yo, badungu akutu aboro aye kurogo gu dungurati nga aKristano nadu rogo bambata sa kama agarã, gbiati “bakere rimbasa aboromotumo” a.—Amo. 2:41; 4:4; 6:7.

² Amokedi aundo badungu aboro i idi na gu pambori nga ga aKristano. Nikpiapai, Firipo andu ku Somorona yo rimbasa aboro ki ya tuyo ka gia agu apai ko aagumbaha. (Amo. 8:5-8) Pauro ata rogo badungu arago na badungu abatungusipai kini tungusi gu pangbangaa nga ga aKristano Kupurio yo, Asia Minor yo, Makedonia yo, ringara aGiriki yo, na Itaria yo. Rogo agu abaakporo ko atungusipai rogoho, badungu aYuda na aGiriki nada ni aidipase. (Amo. 14:1; 16:5; 17:4) Tito amangisunge a Kurete yo. (Tito 1:5) Petero adu a na bakere sunge beko ko aamangaha Babera yo, na ti gu regbo ko ake gako bambata waraga vuru gu regbo nadu bangbanda 62 na 64 F.B.K., aboro aima rugatiyo naapa gu sunge tungusapai nga ga aKristano Pondo yo, Garatia yo, Kapadokia yo, Asia yo, na Bitunia yo. (1 Pet. 1:1; 5:13) Nairiwo gu wene aregbo nangiaha re! Agu aKristano nadu rogo bambata sa kama agarã re adu zaaza gbe rogo sunge tungusapai, si ki sa gupai nga avurayo tona yawee i ima ‘gbarasa zegino’ naabaha dunduko.—Amo. 17:6; 28:22.

3. Agini apai namanga areme mbiko gu tungusapai nga ga abatakipande Kindo, na agi apai re nasa roni oni du wai?

³ Ti gi gaani regbo du awere re a, gu dungurati nga ga aKristano nasona kumbatayo ngba iiriwo gene. Ya mo oni naagbianga wasa ho oni naageda apai ni tipa aDezire Yekova na agarã dunduko na ki bi wai sunge tungusapai andu kumbatayo rogo zegino dunduko tee? Ya mo ngbarago aziongo roni mbiko ino oni gupai nga abatakipande Kindo awisigi Ziazia Kekeapai na aboro bangeyo naima susa amirioni sita rogo gu garã nangia 2007 tee? Kurigure, bange agu aboro nadu pati Tingida Pakpio Yesu gugorö nayugo gupai nga, aboro wa amirioni bawe angianga aDezire Yekova ya aima du na nyemu wene pangbangaa si du i andu ti ni koyo. Gere nayugo gupai nga, bakere sunge kinaho kindi si aida ani mangihe.

4. Ada naida na gu pangbangaa nga ga Kindo?

⁴ Areme, ‘agu aboro dunduko duna nyemu gbia nyenye unga,’ i naida na gu pangbangaa nga ga rengo, a wa si amangi rogo bambata sa kama agarã. (Amo. 13:48, NW) Yekova du nagbe agu aboro re kurogo gako riigbu. (Oni gedi Agai 2:7.) Gini bipai si aida ani du nani kindi tipa gu sunge nga ga aKristano tipa ani rengbe kaa manga gu sunge dungura aboro re wenengai gbe?

Ka Oni Sianga Aboro Asia Ya

5. Gini ngbatunga aboro ngbaa ti Yekova?

⁵ Agu aKristano nadu rogo bambata sa kama agarã arugutiyo na gupai nga “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.” (Amo. 10:34, 35) Gu boro naida kadu na wene pagume dagbani na Yekova, si naida ní duna idapase kuti gu motumo tumorii nga ga Yesu. (Yo. 3:16, 36) Na gupai Yekova akpinyemuhe nga “aboro bati dunduko, ki ye sa gu inahe nga ga rengo.”—1 Tim. 2:3, 4.

6. Ginipai si aida abatungusipa Kindo bandatiyo ti mangaha, na tipagine?

⁶ Si nigbegberẽpai ka abatungusi wene pangbangaa asiaka aboro asiaka na wene pangbangaa mbiko rangi kpotoyo, ngbatungayo, gayo sunge, wai du bibi yó, gu pambori du yó rogoho, watadu mbiko gu kura apai. Oni wisigingo gipai re mbata nga: Ya mo anga oni na ngbarago mbiko gupai nga gu boro nayugu rengo furoni nibambataha, ní aasoganga roni watadu ka bi roni nigbegberẽ boro tee? Tipagine tie ka oni asiaka aboro asiaka ti ni na gu wene pangbangaa rengbe ka fu unga fu gu boro idi nani?—Oni gedi Matayo 7:12.

7. Tipagine si aidanga ani sapungbangaa agu aboro ti ni ani agbia yó ho ani atungusapai ni ya?

⁷ Yekova aima maa Yesu nibasapungbanga; sidu, rengo berani ka sapangbangaa boro te. Gupai re daada, bambiko ani wa Yesu te. Ani rengbe ka sapangbangaa boro gbua mbiko ‘gupai bangirani nabihe’ watadu ‘gupai turani nagihe,’ ono Yesu tigako naino agu apai du ngbadu boro yo na agu apai du berãni yo ko kini ru ka sapangbangaa ní.—Yes. 11:1-5; 2 Tim. 4:1.

8, 9. (a) Gini ngbatunga boro nangia Saura mbata fu ko dani Kristano? (b) Ginipai gupai namangi tipa Pauro ayugoho furani?

⁸ Angbatunga aboro dunduko nasatiyo niga Yekova amoyambu. Boro sa dagba agu aboro re aboro naini pani gbe angia, Saura boro Taruseu, nga guko nasa rimoko kusa nga Pauro. Pauro angia Farusi. Ko anaasoga aKristano nikerehe. Wa ko aidi kuti gupai nga aKristano aangianga ndikidi airisimbori te, si nasako ko niirungosi akanisa. (Gara. 1:13) Kuti gu bipai nga ga boro, ka si adu nga aboro dunduko nika sa tiyó ni aKristano, ko kangia gu yangara boro ka sa tiní ni Kristano. Ono tie, Yesu abi wenepai ngbadu Saura yo, na ko ki siako ko mangi gu sunge nadukia. Nisangbana gipai re, Saura kini da niboro sa dagba gu zaaza aboro kisusi nadu rogo gu dungurati nga ga aKristano rogo bambata sa kama agarã.

⁹ Ginipai gupai namangi tipa Pauro ayugoho furani? Si rengbe kadu nga, rogo gu rago ani atungusapai rogoho, aboro kina yó ani abiyo nga i arengbanga ka ida na gupai ani atungusaha te. Ka si vura du nga ani nakapa akapa nga boro ho dagbayo rengbe kadu nindikidi Kristano te, si aidanga ani mbu sakapai naayó rogo Ziazia Kekeapai te. Ti kura aregbo, kina boro agu aboro ani aaberãha nga i arengbanga ka ida na gaani pangbangaa re te, i naida nani. Gaani sunge nga kaa tungusapai kindi fu aboro dunduko ‘zanga piriga.’—Oni gedi Amokedi 5:42.

Amaku Napido agu Aboro Natungusapai ‘Zanga Piriga’

10. Tipagine si aida ti ni ani naatungusapai atungusa fu agu aboro kina iriwo yó ati tirani? Oni gumbanga agu apangbangaa namangi rogo gaoni dagbarago nibi gipai re.

¹⁰ Pa bi ani aboro kina ti kpotoyo na gayó mangapai rengbe arengba ka nanga rani. Nikpiapai, Ignacioa du Amerika yo atona wisigo Ziazia Kekeapai na aDezire Yekova ho ko aduni bambukiso yo. Aboro anaagunde beko mbiko gu kereapai ko anaamangaha. Si ki tadu were, gu zizi aboro nanaambakada ahe kini bagihe fu agu akurayo i adu naayó bambukiso yo, i anaadia Ignacio naayó i ndu ka rogoda gayo marã be agu aboro nadi bape beyo ka i aidanga ka gasaha niipo ya. Ono tie, wa gi kere bamangi gbegberẽ apai nangia Ignacio re aasona rogo toroyo na kini mangi agu apai ko awirikaha, ko ada niwene boro. Boro ho ko aidihe funi berewe ní ndu naako ka rogoda gani marã be aboro-bape te. Ignacio aidihe fu gu rengo du rogo Ziazia Kekeapai gbiati ga Mbori toro si sa asinoko. Ko nafu tambuahe a fu Mbori na fu agu abatungusipai naʹasaditiyo ka wisigo Ziazia Kekeapai naako.

11. Tipagine ani naandu ti ni berewe fuo agu aboro ani aima gumba wene pangbangaa mbata fuyó?

¹¹ Ndupai sa dagba agu akuraha ani naandu ti ni kaa biko agu aboro ani aima gumba wene pangbangaa mbata fuyó ka i aidanga nani ya nga, agu apai du tipa aboro, si naʹariatihe aʹaria, na aboro nasa sinoyo asa. Tona ti gu yangara regbo ani andu ka biyo, aguyo kina dagbayo kere kaza aima manga yó, i ambuyo ti sunge-marã, watadu gayo aboro nakpiki. (Oni gedi Batungusipai 9:11.) Gu kereapai namanga rogo zegino rengbe ka fõngbadu aboro yo i berẽ nyanyakii tipa gupai nika manga tipa yó kumbatayo. Ngbatunga agu aʹariapai re rengbe ka sa gu boro naadunga na nyemu wene pangbangaa mbata ya, watadu nasogoho asoga, ní idi nani. Si ki tadu were, si aidanga ani zanga gumba wene pangbangaa fu aboro ti wene aregbo dunduko te.

12. Wai si aida ani naabi agu aboro ani atungusapai fuyó, na tipagine?

¹² Sino aboro du nga kaa sapangbangaa akurayo. Ono tipa Yekova tigako, ko nakparia aboro nibasasa dunduko. Ko nabi gu weneapai du rogo aboro yo dunduko nibasasa. (Oni gedi 1 Samuere 16:7.) Ho ani atungusapai ni, si naida ani asaditirani kadu wakina ko a. Badungu apai namangi rogo zegino nayugo gu weneapai namanga mbiko zanga sapangbangaa agu aboro ani atungusapai fuyó.

13, 14. (a) Tipagine kura nazakigene ambu nduge ti ni fuo gu degude ri agbia ri gene tungusapai yo? (b) Ginipai rengbe ani ka wirikaha ti gipai namangi re?

¹³ Ho gu nazakigene nga Sandra aatungusapai ni kini tanga nani ti akporo rogo kura kisanga sa du Caribs yo, ri agbia degude nga Ruth. Ruth angia kere nado gu pumbo i amangaha na agarã dunduko nga gu i ayambaha nga carnival celebrations. I aima tambua rimo Ruth bara ue rogo gu ringara re nibambata bawene nadogbere. Ri adu na bakere nyemu gu wene pangbangaa Sandra agumbaha furi, na ri ki idi Sandra niye fuori kaa wisigo Ziazia Kekeapai na ri. Sandra nagumba gupai namangi kini yaa: “Ho mi arimi ni kutii ga Ruth zombe yo, bangire ati ti bakere surari na aroko pumbo tiri, gbiati agu ahe i afukuhe furi tipa ka tambua rimori nibambata bawene nadogbere. Gupai mi aberẽhe nga, ngbatunga gu boro aboro naini ní wa gure, na gu boro fuu tiní wa gure sa gu pumbo re, nyemu rengo arengbanga kadu tiní te. Sidu, mi kini mbu nduge fuori.”

¹⁴ Fuo bete regbo kusa, Ruth andu ku Bambu Kindo yo tipa dunguratise. Ho dunguratise anyasi ni, ri asana Sandra ki yaa, “Tipagine mo ambu ye ti ni fuore?” Sandra ahõmbupai beri na ri ki ringbisipa gu regbo ri nika nandu fuori tipa i tona wisigo Ziazia Kekeapai berewe. Ruth asono niipo rogo toroyo, ri ki rogodi agu asurari nangia ga pumbo kusayo, ki tona manga agu asunge dunduko du rogo dungurati, na ki kpara gari raka fu Yekova. Nirengo, Sandra aima ino gupai kusa nga, gupai ri amangihe mbata nga ka mbu nduge fuo Ruth re, gbegberẽpai du nangiaha.

15, 16. (a) Ginipai namangi ho natungusipai atungusipai ni fu tame kumbaari tipa badungu agarã? (b) Tipagine si aida gupai ti ni nga, agu apai du tipa gumerani, ka si sanga rani ani zanga tungusapai funi ya?

¹⁵ Weneapai kinaho a namangi fu badungu aboro mbiko tungusa yó pai fu gu gayo aborokporo adunga naayó ti idapase ya, zavura ho i aaberãha ni nga i arengbanga ka ida na wene pangbangaa te vurũ. Oni bingo gupai nadu tipa Joyce, nga Kristano Amerika yo. I aima digo nibafu tame kumbaari ku bambukiso yo fuo susa garãko bawe-na-ue. Fugo Joyce nga: ‘Aboro aayawee wiri wenepai ho rogo gako raka te, bambiko ko anaadia kere angua kutii kpotokoyo, kingia iradĩ, na kini mangi badungu gbegberẽ apai. Ono wa ko avura du wa gure, mi anaagumba gu rengo kindi fuko du rogo Ziazia Kekeapai tipa agarã 37, ono ka ko aidanga nani ya.’ Gu bakere asadatise rii aamangaha tipa ka undo gu gume kumbaari re aima kusa wenepai fuo badungu agarã bambiko ko atona ka wisigo Ziazia Kekeapai na aDezire Yekova na ki mangi bakere ariapai rogo gako raka. Bambeda kusayo, garãko nada nga 50, ko azi bapatiza. Fugo Joyce nga: “Ho ko azi bapatiza ni, mi akpari be ngbarago. Mi na bakere ngbarago mbiko gupai nga mi aambunga tungusapai fuko vuru gu dungu agarã yo re te!”

¹⁶ Si rengbe kadu nga oni namanga ndundu amanga ka gumba gu rengo nga ga Ziazia Kekeapai fu agumeroni mbiko agu apai du tipa yó. Ono tie, ngbatunga gu ndundu re aamanganga Joyce ri ki mbu fura na tame kumbaari riipa Ziazia Kekeapai te. Nirengo, boro ho rengbe ka ino gupai du ngbadu kurani yó te. Si rengbe kadu nga gu boro re nagbata rengo agbata nzunzu. Sidu tie, ka oni kánga na wene pangbangaa beni ya, bambiko si rengbe ka sa gupai nga ní gbia rengo.—Oni gedi Asanza 3:27.

Gu Buku Naundo Rani Rogo Wisigo Ziazia Kekeapai

17, 18. (a) Ginipai agu apangbangaa naye rogo zegino dunduko ayugoho tipa gu buku nga What Does the Bible Really Teach? (b) Gini weneapai namangingo furoni ho oni aamangasunge ni na gi buku re?

¹⁷ Agu apangbangaa naye rogo zegino dunduko, si nayugo gupai nga, badungu agu aboro duna wene ngbaduyó yo, i naida na gu buku nga What Does the Bible Really Teach? Penni nga nazakigene Amerika yo, ri tona wisigo Ziazia Kekeapai na badungu aboro rogo gi buku re. Aboro ue dagba agu aboro re aasungo na gu sosono aboro nangia abangbasia aboro kanisa. Penni aainongo gupai i nika mangaha ho i nika gia agu arengo ni nga ga Ziazia Kekeapai du rogo gu buku nga Bible Teach te. Wa si avura duwo, ri nagumba gupai namangi kini yaa: “Wa duhe nga agu apai du rogo gu buku re si nivunduvunduhe te, na si ziazia, na si na memeapai rogoho, i aima ida nikina ipo kuti gupai i aawirikaha ki ya rengo du ngaha, zanga kango watadu vunduvunduapai.”

¹⁸ Pat nga batungusipai ringara aNgirisi yo, ko atona ka wisigo Ziazia Kekeapai na dee naoro be vura rogo kura ringara sa Asia yo. Gu dee re aoro kusayo rogo gari ringara ho agu abanzengere nga abasamungu azi kumbaari ni na awiiri nga akumbagude, ka ri abingo yó berewe ya. Gari unga adu ngbapai, aboro aima zokoda kpuri, na badungu akumba ki pi na ri ngbaome. Agi apai re dunduko nasa ri ri bi gupai nga ndupai ho ri araka ti ni te, na ri aberẽpa imo tiri bara dunguhe. Ono wa ri atona ka wisigo Ziazia Kekeapai na gu batungusipai re, si afu maabangirise furi. Fugo Pat nga: “Wa du agu apai du rogo gu buku nga Bible Teach re nitaataha tipa ka giarogoyo, na gu wene akpiapai du rogoho a, si asa ri ri mangi bakere ariapai.” Gu dee re asono kumbatayo niipo rogo toroyo, ri ki rẽ tipa kadu nigu natungusipai ataziongo bapatiza ya, na ri ki gumbaha nga ri naida ka zio bapatiza ti regbo gu bakere dunguratise nika ye tingbafuo gu regbo re. Nairiwo gu pa ngbarago ngaha nga ka undo agu aboro duna nyemu rengo i rugutiyo naapa gu maabangirise Ziazia Kekeapai afuhe!

“Ka Ani Mbú Nga be Manga Rurupai Ya”

19. Tipagine si aida gupai ti ni nga ani naatungusapai awere kakaka?

¹⁹ Ho uru asusa ni sa, pa tungusa gu wene pangbangaa nga ga Kindo naapa sa aboro ni abawiriki naida ani naatungusaha kakaka susi gu nidumbata. Rogo garã sa, badungu akutu aboro duna nyemu nyenye unga tiyó naida na gupai ani atungusaha. Ono tie, “gu bakere rago nga ga Yekova . . . [si] mbembedi,” si kini yugu gupai nga, agu aboro du kindi rogo bitimo, i tipa “imo yo.”—Zef. 1:14; Snz. 24:11.

20. Giniapai si aida ani diberã ka mangaha wadu ani nibasasa dunduko?

²⁰ Ani rengbe arengba ka undo aboro awere vuru gu wiri regbo nye koyo re. Ono tipa ani mangi gipai re, si naida ani pekefuo gu kpiapai nga ga agu aKristano nadu rogo bambata sa kama agarã, nga aguyo ‘naapiriganga ti yugo pai na tungusapa Yesu ya ko nga Kristo ya.’ (Amo. 5:42) Oni pekefuo gayo kpiapai nitungusa oni pai kindi rungosiro ki vura du vurũ, nimaa oni berãroni fuo gaoni “abirĩ yugopai,” na nitungusa oni pai fu aboro dunduko zanga siaka yó! “Ka ani mbú nga be manga rurupai ya,” bambiko ka ani amangaha kindi, ani nika gbia gu badungu amaku boro agbiaha mbiko gupai nga Mbori idi na gani pai.—2 Tim. 4:2, NW; oni gedi Agaratio 6:9.

[Gu rukutu kekeapai du bandu kpewaraga yo]

Gaoni Karagapai Nga Gine?

• Ada naida na wene pangbangaa?

• Tipagine si aidanga ani sapungbangaa agu aboro ti ni ani agbia yó ho ani atungusapai ni ya?

• Gini weneapai namanga ho abatungusipai amangasunge ni na gu buku nga What Does the Bible Really Teach?

[Gu kpiahe du ti kpewaraga 17]

Badungu akutu aboro naida na wene pangbangaa