Vovo Ngbatunga Riahe

YA MO mo ini gu he agu aboro re adunguraha sande? Si wakina misimisi morogumba. Ono misimisi morogumba ngaha te; riahe du.

Gere awere nga aYisaraere di regbo wa diwi sa fuo kura yo Ezipeta yo. I ngbakungba yo. Riahe akuranga rogo gi rago re wenengai te, sidu, aboro kini tona ka kpakanahe niya: ‘Ka ani akpiki be Yekova Ezipeta yo, si ka ngba. Yo ani anaari ai gu riahe ni ani aidaha.’

Yekova ki ya: ‘Mi akeda riahe ngbangbaturũ yo furoni.’ Na gere nga gupai Yekova amangihe. Fuo girorago, ho aYisaraere abi gi pisi he ni nati ngbangbaturũ yo re, i kini sasana tiyo dagbayo niya: ‘Ginihe nga gere?’

Moize ki ya: ‘Gere nga gu riahe Yekova nakedihe furoni oni rihe.’ Aboro ayambu rimoho nga MANU. Si adu ngbaseyo wakina gu kpakuto i namangihe na anyege.

Moize ki ya fu aboro: ‘Oni rogodihe, aboro dunduko ni basasa kuti gu bakio riahe i naarihe.’ Gere nga gupai i anaamangaha na awiso dũ. Ho uru anifoi ni, gu manu naninye sande anizaraga ki gberẽ.

Moize ape gupai a nga: ‘Boro ho si aida ní igi manu ka rihe rogo kura uru te.’ Ono kura aboro abasa gupai re abasa. Mo ini gupai namangi? Ho rago anigiri ni, gu manu i aigihe i anibi gupai nga kina agbirẽ du rogoho dunduko, na si kini fũ afũ!

Ono uru sa rogo poso Yekova aya wẽ aboro nidi manu nga gu i nika rihe tipa aˈuru ue. Gu uru re nangia sita uru. Gu uru re gu du areme nga Rago Bisue. Yekova aya aboro dihe rogo gu uru re ki rihe ki igi kuraha tipa gu uru ngbefuoho, bambiko ko afunga ha ni gu uru re te. Ho i aniigi manu ni tipa saba uru, agbirẽ anaadunga rogoho te na si anaafũngo te! Gure angia kura iiriwopai!

Yekova arigi aYisaraere na manu tipa agu agarã 40 dunduko i adihe ku ngbakungba yo.