Yangara Wene Bakindo Yisaraere Yo

GARÃ Yosiya adu gbua muambe ho ko ada ni ni bakindo nga ga gu kindo nga ga aYisaraere naadu na atunga rogoho ue. Gure nga ko angia wiri tooni gude. Ti tonatona gako zogarago, kura aboro kinaho nanaaundo ko rogo zogarago.

Fuo Yosiya zogorago tipa agarã saba, ko atona ka gbata Yekova. Ko apekefuo gu kpiapai nga ga wene abakindo wa Davide, Yosefata na Izikiya. Fuo gure, garãko ki du kindi wa 19, ko amangi bakerepai.

AYisaraere adu na bakere gberarago tipa bagbanga regbo. I anaairiso kungbo ambori. I anaanugadi fu akpiahe. Sidu, Yosiya aguari na gako akumba ki ndu ki tona nyasariipa irisokpiahe kusayo. Bakere sunge du nangiaha bambiko dungu aboro naairiso kungbo ambori. Yosiya gu mo abi surako na gako akumba re i nikuadi akpiahe.

Fuo gure, Yosiya amoi akumba biata i ningere kuriipa mbakada ga Yekova yekaru. I adungura marã be aboro ki fuhe fu agi akumba re i mangi gu sunge re na ni. Wa i aamanga sunge yekaru, gbiamotumo nangia Erikiya abi banyanyakipa he. Si angia gu ­kitabu nga ga andiko Yekova aya fu Moize ko kehe bakuru kusayo gbe. Si aima inga tipa badungu agarã.

I andu na gu kitabu re fu Yosiya, ko ki sana kura boro ní gedihe. Ho ko agihe ni i nigedihe, ko abi gupai nga aYisaraere aima mbu irisa ga Yekova andiko. Rago agberẽ tiko mbiko gipai re ni kerehe, ko ki siri gako roko, a wa mo abihe re. Ko ki ya: ‘Ga Yekova zinga rirani, bambiko abarani aairisanga gako andiko te.’

Yosiya aya fu Erikiya ko asadi ka ino gupai Yekova nika mangaha tipa yo. Erikiya ki ndu koyo du denebi ni rimori angia Uruda, ki sana ri. Ri agumba sangba Yekova fuko ko ga na ni fu Yosiya, nga: ‘Yerusarema na agu aboro du rogoho dunduko nika gbia mbusa bambiko i irisi kungbo ambori na ringara hi be gbegberẽ apai. Ono mbiko gupai nga mo tigamo nga Yosiya mangi wenepai, gi mbusa re ayengo awere te, kina fuo kpio ro.’