Yosiya Akpinyemu ga Mbori Andiko

Yosiya ada ni bakindo Yuda ho garãko adu ni muambe. Ti agu aregbo re, aboro anaamanga sino ngua na kini irisi kpiahe. Ho garã Yosiya adu ni 16, ko aˈasadi ka wirika wai ka iriso Yekova ngba wene gene. Ho garãko adu ni 20, ko atona ka gbarasa agu akpiahe na abamotumo naadu rogo ringara dunduko. Na ho garã Yosiya adu ni 26, ko amangi mbakadapai tipa i mbakadi ga Yekova Yekaru.

Gu gbiamotumo nangia Erekiya agbia gu kaikai waraga naadu na ga Yekova aNdiko rogoho Yekaru yo, si rengbe ka du nga gu kaikai waraga re, Mose naakehe. Safana nangia ga bakindo bakeapai aye na gu kaikai waraga re fu Yosiya na ko ki tona ka gedaha na fugoko kuari. Wa Yosiya aadegatuko, ko abi gupai nga aboro aima digo nibasasangba Yekova tipa dungu agarã. Bakindo Yosiya aya fu Erekiya wẽ: ‘Rago angbanga ti Yekova na ani te. Mo ndu ki fura na ko. Yekova nika pe gupai furani si aida ani mangihe.’ Yekova akaragapai vurube gu nebi nangia Uruda nga: ‘Agu aboro du Yuda yo ima mbu re. I nika gbia mbusa agbia, ono angianga ti gu regbo du Yosiya ni bakindo ya, mbiko ko ima yugo umbasitise.’

Ho Bakindo Yosiya agi gu pangbanga re ni, ko andu ku yekaru yo na ki yambu aboro Yuda dunduko ku rogo ba sa. Fuoho, ko ki gedi ga Yekova aNdiko na fugoko kuari fu aboro ringara dunduko. Yosiya na aboro dũ akidohe ka giasangba Yekova na ngbaduyo yo dunduko.

Aboro Yuda aamanganga Pumbo Susiri te tipa dungu agarã. Ono ho Yosiya agedi ga Mbori aNdiko ni nga si naida i nimangi Pumbo Susiri na agarã dunduko, ko aya fu aboro: ‘Ani nika manga Pumbo Susiri fu Yekova.’ Fuoho, Yosiya amangi mbakadapai tipa ka manga dungu amotumo na ka mbakada aboro tipa i naabi bia yekaru yo. Fuoho, aboro amangi Pumbo Susiri, na i ki mangi gu Pumbo Nga ga gu Kpakuto Zanga Agbooro ti ngbafuo ho, nga gu namangi tipa arame saba. Pumbo Susiri ho naadu wa ha te tona ti rago Samuere. Yosiya aima kpinyemu ga Mbori aNdiko nirengo. Ya mo rago naangba tiro kaa wirikapai tipa Yekova?