Ngbagene Damaseke

YA MO mo ini gu kumba pi sande re? Saura du. Ko du agu akumba nasopo Setefano na ambia amoi gayo aroko patiko ko nibandaha. Mo bingo gu bakere imarago re! Ginipai du namanga?

Fuo imoyo Setefano, Saura nangia gu boro nangbembatayo sa rungosi apefuo Yesu. Ko aatanga ti abambu kini gbefe yo ku zegiyo na kini ndu na yo ku bambukiso yo. Dungu abawiriki naoro ku rogo kura abaakporo na ki tona tungusa “wene pangbanga” yo. Ono Saura andu ku rogo kura abaakporo tipa ka gbia ga Yesu abawiriki. Gere nga ko aandu ku Damaseke yo. Ono wa ko adu ngbagene Damaseke, gere nga gu iiriwopai namangi:

Bakere imarago aye ngbangbaturũ yo ki hasi rago pati Saura. Ko ati ku sande, a wa mo abihe rogo sura re. Fugo ki ru ki ye ngbangbaturũ yo niya: ‘Saura, Saura! Tipagine mo arungosi re ti ni?’ Agu akumba naadu na Saura abi gu imarago re na ki gi gu fugo re, ono ka i agianga rogo gupai yo gu boro re aagumbaha ya.

Saura ki ya: ‘Da nga mo Baira?’

Gu boro re ki ya: ‘Mi du nga Yesu, nga guko mo arungosiko.’ Yesu apehe wo mbiko gupai nga ho Saura aarungosi gako abawiriki ni, si aaimisa Yesu si ki du wa kina boro ko du i arungosiko.

Saura ki sanahe ki ya: ‘Mi mangi wai Gbia?’

Yesu ki ya: ‘Mo guari ki ndu ku Damaseke yo. Yo i nika gumba gupai ni foro si aida mo mangihe.’ Ho Saura aguari ni kuari ki za bangiriko, ko aarengbanga ka bi he te. Ko aima vurari! Agu akumba naadu na ko aziko azio ti beko ka ndu na ko ku Damaseke yo.

Yesu ki ru ki fura na gako bawiriki sa naadu Damaseke yo ki ya: ‘Anania, mo guari ki ndu ku rogo gu gene yo i naayambaha nga Ruruhe. Mo rimi ku rogo gu kporo nga ga Yuda ki sanahe tipa kumba du rimoko nga Saura. Mi ima siako ko du ni kparakpara moyambu fere.’

Anania amangihe wo. Ho ko abi Saura ni, ko amoi beko riko ki ya: ‘Gbia kedi re fuoro tipa bangiro za na mo ki hi be ziazia toro.’ He ki ti bangiri Saura yo nibasa wa ire, ko ki tona ka ngera berewe.

Tona ti gu regbo re ka ndu ku mbatayo, Saura amangi bakere sunge tungusapai fu dungu arikaaboro. Ko aye ka da ni gu mokedi nga Pauro, nga guko ani ka wirika kura apai tipa ko kusa. Ono mbata fu gure, ani bingo gupai Mbori akedi Petero ko mangihe.