Yesu Asia Saura

Saura angia boro gu ringara nga Roma i avunguko Taruseu yo. Ko angia gu Farusi naima ino ga aYudo andiko wenengai, na ko aima soga aKristano. Ko anaazio agu aKristano nga akumba na adee rogo akpuyo kini ba yo ku bambukiso yo. Zavura gu regbo rimbasa aboro zuu asopodi gu bawiriki nangia Setefano na mbia sa kpio, Saura aru kinaho kaa bi yo na ni.

Ono rago aangbanga ti Saura nazio kina agu aKristano sa naadu Yerusarema yo te. Ko asana gbiamotumo ko kedi ko ku rogo gu gbata nga Damaseke tipa wa ka ko rengbe ka zio agu aKristano naadu yo. Ho Saura aambeda ni na gu gbata re, bakere imahe ki hasi rago ahasa pati ko kirikiri, ko ki ti sande. Ko agi fugo si niya: ‘Saura, tipagine mo arungosi re ti ni?’ Saura ki sanahe nga: ‘Da nga mo?’ Karagapai ki du nga: ‘Mi nga Yesu. Mo ndu ku Damaseke yo, mo awirika gupai yo si aida mo mangihe.’ Ti gu regbo re nibasa, bangiri Saura avurari, i ki ziko kina ti beko ka ndu na ko ku rogo gu gbata re.

Ruru Kristano adu Damaseke yo rimoko angia Anania. Yesu agumba gupai fuko rogo yuguyugupai yo nga: ‘Mo ndu kua Yuda yo rogo gu gene i ayambaha nga Ruruhe.’ Anania aya: ‘Gbia, mi ima ino apai dunduko tipa pa gu kumba re! Ko naba gamo abawiriki ku bambukiso yo!’ Ono Yesu aya: ‘Mo ndu fuoko. Mi ima sia Saura ko tungusi wene pangbanga fu dungu ngbatunga arikaaboro.’

Sidu, Anania agbia Saura ki ya fuko: ‘Saura, wirinami, Yesu kedi re mi zaki bangiro.’ Ti kina gu regbo re, Saura atona ka ngera berewe. Ko awirikipai tipa Yesu na ki da ni pefuoko. Ho Saura azi bapatiza ni ki da ni Kristano, ko atona ka tungusapai bambutiria yo wa sa na akurako aKristano. Ya mo mo naberãnga pa wai iriworago ati ti aYudo ka bi gupai nga Saura nayugopai fu aboro tipa Yesu? I aya: ‘Anga kina gu kumba du re du ninaazio ga Yesu abawiriki te?’

Saura atungusipai fu agu aboro naaraka Damaseke yo tipa agarã biata. AYudo asogo Saura na i kini ta bura tipa ka imoko. Ono awirina aima inopa gu buro re na i ki undo Saura tipa ko oro beyo. I amoiko ku baga yo, ki zogo ko ri ngbadimo ndugu bakporo ku zagiyo.

Ho Saura andu ni ku Yerusarema yo, ko aˈasadi ka kodatiko na agu awirina naadu yo. Ono i aagunde agunde be ko. Fuoho, gu wenesino bawiriki rimoko angia Barunaba aye na Saura fuo amokedi na ki pe gupai fuyo nga, Saura ima sa berãko nirengo. Saura atona ka tungusa wene pangbanga zaaza na gu dungurati naadu Yerusarema yo. Kusa, ko ada ni Pauro.