Wai Du Rengbe Mo Kada Ni Bakurea Mbori?

1, 2. Gini aboro nangia bete abakurea Yekova?

DA DU mo aida ni du ni bakureamo? Gu boro mo akpinyemuni. Gu boro nagia ro wenengai na mo kini gi ni wenengai a. Gu boro du na wene asino tini nga agu asino ngba tiro.

² Yekova Mbori nasia bete aboro asia i du ni abakureako. Ni kpiapai, Abarayama angia boro sa dagba abakurea Yekova yo. (Yesaya 41:8; Yakoba 2:23) Yekova aima ida na Davide a. Ko aya kpoto Davide yo adu ‘wa gu ko akpinyemuhe.’ (Amokedi 13:22) Na gu nebi nangia Daniere, Yekova ‘akpinyemuko gbe.’—Daniere 9:23.

3. Tipagine Abarayama, Davide, na Daniere adu ti ni ni abakurea Yekova?

³ Wai du Abarayama, Davide, na Daniere ada ni abakurea Yekova? Yekova aya fu Abarayama: “Mo [gi] sangbare.” (Bambata Pai 22:18) Yekova nada ni bakurea agu aboro nagiasangbako. Zavura rikaaboro dunduko, i ima rengba kada ni abakureako. Yekova asakipai fu gu rikaaboro nangia aYisaraere nga: “Oni gí sangbare, mi ki du ni gaoni Mbori, oni ki du ni gimi aboro.” (Yeremaya 7:23) Sidu, si naida mo gisangba Yekova ka mo aida nzunzu kada ni bakureako.

YEKOVA NABANDA ABAKUREAKO

4, 5. Wai du Yekova abanda abakureako?

⁴ Baibiri nape gupai nga Yekova nangera tipa agu agene rengbe ko “ka yugo tiko na pa [gako] nyaka fu agu yo du kpotoyo yo ziazia koyo du ko ni.” (2 Pekapai 16:9) Rogo Atambuahe 32:8, Yekova nakido abakureako nga: “Mi arába ro ki yugu pai foro ngba gu gene mo ka ndu ngba ha; mi arúga ro ni maa bangire ti ro.”

⁵ Bakere vura Mbori gudu ho naida ka ká na ani ti du ani ni abakurea Mbori. Ono Yekova naida ka banda rani. (Mo gedi Atambuahe 55:22.) Ni du ani ni abakurea Yekova, si naida ani mangisunge fuko na kpotoraniyo dunduko. Ani niruru rani fuko zavura ti regbo kpakaraapai. Na ani na kina gu bangisa kido bake papara Atambuahe adu na ni ho ko ape gupai ni tipa Yekova nga: “Bambiko ko du ku kumbabere, mi awõ nga te.” (Atambuahe 16:8; 63:8) Wai du Satana aˈasada ka ká na ani ti du ni abakurea Mbori?

SATANA AKITINGBANGA ABORO

6. Gini ziree Satana apehe tipa aboro?

⁶ Rogo Kapita 11, ani awirikipai yo nga Satana akitingbanga Yekova ki ya iraziree nga ko na sinoko angbanga te mbiko ko aambunga Adamu na Eva i sia gupai nitiyo du ni ruruhe na gu du ni irairaha te. Gu buku nga Eyobo nayugo gupai a furani nga Satana nakitangbaanga agu aboro naida ka zio bakure na Mbori. Satana nape gu ziree nga i namangasunge fu Mbori mbiko agu ahe Mbori afuhe fuyo angianga mbiko i nakpinyemu ko ya. Satana nata ngbaduko nga ko ima rengba ka sa aboro dunduko kusayo ti Mbori. Ani bingo gupai rengbe ani ka wirikaha ti Eyobo na wai Mbori abandako.

7, 8. (a) Gini bipai Yekova adu na ni tipa Eyobo? (b) Ginipai Satana apehe tipa Eyobo?

⁷ Da nangia Eyobo? Ko angia gu wenesino kumba naaraki agarã 3,600 kusayo. Yekova ape gupai nga ti gu regbo re boro ho naadu wa ko auru kpotosende te. Eyobo adu na bakere irisa tipa Mbori, na ko aima soga gbegberẽpai. (Eyobo 1:8) Nirengo, Eyobo angia ndikidi bakurea Yekova.

⁸ Satana ape ziree nga Eyobo aamanganga sunge fu Mbori gbua te. Satana aya fu Yekova: “A nga kina ro naadua gbata [watadu ndugu] pati ko kirikiri na gako kporo, na pati gako ahe dunduko, te? Mo nafu maku ku ri aũbeko si du moi gako ahe pai ti ni zegino. Mo táĩ nga bero awere, ki zadi nga agu ahe du be ko dunduko, ko agbérã ngbako yo foro kina ku bangiro.”—Eyobo 1:10, 11.

9. Ginipai Yekova ambugene fu Satana ko mangihe?

⁹ Satana akitingbanga Eyobo nga ko namangasunge fu Yekova tipa kina agu ahe rengbe ko ka gbiaha. Satana ape gu kurapai a nga ko ima rengba ka sa Eyobo ko mbu mangasunge fu Yekova. Yekova aaidanga kuti gu ga Satana pai re te, ono ko ambugene fu Satana tipa ko asadi Eyobo ka bihe singia nyemuse naasa Eyobo ko zi bakure na Yekova.

SATANA AZUBO EYOBO

10. Wai du Satana azubo Eyobo, na ginipai Eyobo amangihe?

¹⁰ Ni bambatapai, Satana agbarasipa agu anya dunduko naadu be Eyobo. Fuo gure, Satana ki imi dungu ga Eyobo amoyambu. Pa ga Eyobo ahe agbere nabaha. Gu yangara zubohe Satana amangihe angia ka imo awiri Eyobo bawe. Ono Eyobo anye niruru ko fu Yekova. “Rogo agi apai re dunduko Eyobo amanga nga ingapai te, ko agumba nga gbegberẽpai kuti Mbori a te.”—Eyobo 1:12-19, 22.

11. (a) Gini kurapai Satana amangi Eyobo na ni? (b) Ginipai Eyobo amangihe?

¹¹ Satana aambunga gi gako zubohe re te. Ko azubo Mbori niya ko wẽ: “Mo taĩ bero ki zadi memeko na pasioko, ko agbérã ngbako yo foro kina ku bangiro.” Sidu, Satana aukadi Eyobo na kere iigirã kaza. (Eyobo 2:5, 7) Kurii agi apai re dũ, Eyobo adu niruru ko fu Yekova. Eyobo aya: “Daho mi ka kpi ni mi ambu nga pa gi du ni irarengo te.”—Eyobo 27:5.

12. Wai du Eyobo ayugu na ni nga Satana nga iraziree?

¹² Eyobo ainongo wiripai tipa ga Satana kitangbangase te watadu ndu gupai ko arungo ti ni ni bakerehe te. Ko aberẽhe tigako nga Yekova du ye na agu arungo re kutiko. (Eyobo 6:4; 16:11-14) Ono wa si avura du wo, Eyobo anye niruru ko fu Yekova. Awere, si aima du gbaiga nga Eyobo aaberãnga kina pa ti ko te. Ko angia bakurea Mbori mbiko ko aima kpinyemu Mbori. Agu apai dunduko Satana akitingbanga ko na ni re angia ziree!

13. Surungba ga Eyobo padu ni ruruse angia gine?

¹³ Wa vura duhe nga Eyobo aainongo gupai naamanga ngbangbaturũ yo te, ko adu niruru ko fu Mbori na ki yuguhe nga Satana angia gbegberẽ boro. Yekova aima fu mosoro fu Eyobo tipa du ko niruru bakure.—Eyobo 42:12-17.

GU GENE SATANA AKITANGBANGA RO NGBAHA

14, 15. Ginipai Satana akitangbanga aboro dunduko na ni?

¹⁴ Mo ima rengba ka wirika nyanyakipa pai ti gupai namangi Eyobo re. Areme, Satana nakitangbaanga rani nga ani nairiso Yekova tipa kina agu ahe ko afuhe furani. Rogo Eyobo 2:4, Satana aya: ‘Agu ahe dunduko du be boro ni afu kinaha tipa ungani.’ Sidu, Satana nakitingbanga aboro dunduko nga i airisongo Mbori gbua te, anga kina Eyobo sa te. Kama agarã fuo kpio Eyobo, Satana aasenga Yekova kindi na kini kitingbanga gako amoyambu. Ni kpiapai, rogo Asanza 27:11, ani nageda gupai yo nga: “Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti [watadu nasenga] re.”

¹⁵ Mo rengbe ka sia ka giasangba Yekova na kidu ni bakureako tipa ka yugo na ni nga Satana nga iraziree. Ka si vura du vurũ nga si naida mo mangi bakere ariapai rogo gamo raka yo tipa kadu ni bakurea Mbori, mo ini gupai nga gu diaberã re ima ngba kisusi! Gu diaberã re nga nyanyakipa pai. Satana nape gupai nga mo arengbanga kadu niruru ro fu Mbori ka si du nga mo rogo kpakaraapai te. Ko naasada ka nanga rani tipa ka ani dunga niruru rani fu Mbori ya. Rogo gini gene?

16. (a) Gini abirĩ Satana amangasunge na ni tipa ka ká na aboro ti mangasunge fu Yekova? (b) Wai du rengbe Satana ka saro mo mbu iriso Yekova?

¹⁶ Satana namangasunge na dungu abirĩ tipa ka rugusa rani ti zio bakure na Mbori. Ko nazubo he “wa bahu nata ki nipoi, nigbata boro ka rita ni.” (1 Petero 5:8) Ka ngbaro zerenga ka bi gupai nga abakureamo, agumero, watadu gu kura aboro nika asada ka sa ro mo mbu wirika Baibiri gbiati manga gupai du niruru he ya. Mo ima rengba ka bi tiro wa i nazubo ro azubo.a (Yoane 15:19, 20) Satana nasa tiko asa a “ni maraika imarago.” Sidu, ko ima rengba ka nanga rani ani basasangba Yekova. (2 AKorindo 11:14) Gu kura birĩ berewe Satana amangasunge na ni tipa ani mbu iriso Yekova nga ka sarani ani bi tirani nga ani arẽnga tipa ka mangasunge fu Yekova te.—Asanza 24:10.

MO IRISI GA YEKOVA ARUGUTE

17. Tipagine ani akpinyemu Yekova ti ni?

¹⁷ Ho ani agiasangba Yekova ni, ani nasa Satana ni iraziree. Ginihe rengbe ka undo rani ani du na giasangba? Baibiri naya: “Oni kpí nyemu Yekova nga gaoni Mbori na kpotoroni yo dũ, na mbisimoroni dũ, na omeroni dũ.” (Pa Fu Rugute ni Ue he 6:5) Ani nagiasangba Yekova mbiko ani ima kpinyemuko. Wa gaani nyemuse tipa Yekova nikaa sona, ani nika ida ka manga agu apai dunduko ko asana rani tipa ani mangihe. Gu mokedi nangia Yoane aya: “Bambiko gi nga du na nyemu Mbori re, nga ka ani kuti gako rugute. Gako rugute asusa nga omerani te.”—1 Yoane 5:3.

18, 19. (a) Gini bete apai duho Yekova aya tipaha wẽ si ni gbegberẽhe? (b) Wai du ini ani he nga Yekova asananga rani ani mangi gupai omerani arengbanga na ni ya te?

¹⁸ Ono gini bete apai duho Yekova aya furani si ni gbegberẽ he? Akpiapai nga gaha gu du rogo gu sanduki nga “Mo Sogo Agu Apai Yekova Asogaha.” Ti tonatonaha, mo rengbe ka bihe nga bete agi apai re agberãnga te. Ono ho mo ageda averesi ni rogo Baibiri na kini berẽkuriihe wenengai, mo nika rugatiro aruga na ndu gupai si aida ani gisangba ga Yekova andiko ti ni. Mo ima rengba ka bi tiro a nga si naida mo mangi bete aˈariapai rogo gamo raka yo. Wa vura duhe vurũ nga si ima rengba ka kpakara ti kura aregbo, ka mo mangi agu aˈariapai re, mo nika du na zereda gbiati gu ngbarago naye be padu niruru bakurea Mbori. (Yesaya 48:17, 18) Wai du ini anihe nga si taata ka manga agu aˈariapai re te?

¹⁹ Yekova arengbanga ka sana rani ani mangi gupai nga gu ani arengbanga namanga ha ya te. (Pa Fu Rugute ni Ue he 30:11-14) Ni du ko ni ndikidi bakurearani, ko ima ino rani kisusi wai ani naini tirani. Ko ima ino gaani ngarã na arungbura. (Atambuahe 103:14) Gu mokedi nangia Pauro nangarasa rani nga: “Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.” (1 AKorindo 10:13) Ani rengbe kadu na gu kido nga Yekova nika fu gu ome afu furani dedede ani aidaha tipa ka manga gupai du niruru he. Ko nika fu “gu bakere tandu susi” foro tipa ka undoro mo hi agu akpakarapai re. (2 AKorindo 4:7) Fuo Yekova undo Pauro ti ngbatunga agu aregbo re, ko aya: “Mi rengbe na manga apai dunduko rogo gu ko nanyakasa re.”—AFiripoio 4:13.

MO KPINYEMU GUHE MBORI AKPINYEMUHE

20. Gini asino si aida ani wirikihe na tipagine?

²⁰ Kangia ani naida kadu ni abakurea Yekova, si naida ani mbu manga gupai Yekova aya si ni gbegberẽhe, ono si naida ani mangihe amanga susi gure. (ARomo 12:9) Abakurea Mbori nakpinyemu agu apai ko akpinyemuhe. I fura tipa yo rogo Atambuahe 15:1-5. (Mo gedihe.) Abakurea Yekova nawirika asinoko na kini yugu “nyemuse, ngbarago, zereda, gbanga hipai, weneringise, wene sino, idapase, zera, rugatise.”—AGaratio 5:22, 23.

21. Wai du rengbe mo ka yugo agu asino Mbori akpinyemuhe?

²¹ Wai du rengbe mo ka yugo gu wene asino re? Si naida mo wiriki gupai Yekova akpinyemuhe ni geda mo Baibiri na kini wisigihe dedede. (Yesaya 30:20, 21) Wa mo nikaa manga gipai re, gamo nyemuse tipa Yekova nika sona, na wa gamo nyemuse tipa ko nikaa sona, si nika saro mo gisangbako.

22. Ka mo gisangba Yekova, surungbaha nika ngia gine?

²² Agu aˈariapai si nika ida mo mangihe rogo gamo raka yo rengbe kadu wa ura kuru roko tiro kusayo na ki vo vovoho. Baibiri nape gupai nga si naida mo “mbu gu kuru boro [watadu borose]” na ki ‘ukadi gu vovo boro.’ (AKorosaio 3:9, 10) Ka si vura du nga si ima kpakara, ho ani amanga agi aˈariapai re ni na kini gisangba Yekova, ko na kidohe ka fu “bakere mosoro” furani. (Atambuahe 19:11) Nirengo, mo sia ka giasangba Yekova na ka yugo na ni nga Satana nga iraziree. Mo irisi Yekova, angianga mbiko agu amaku du kumbatayo ya, ono mbiko mo ima kpinyemuko. Gure nika saro mo da ni ndikidi bakurea Mbori!