Waigu Rengbe Gaani Irisombori ka Sa Ngbarago ti Mbori?

A wa i asakipai tipaha rogo gu wirikapai du mbata fu gere, anga apambori dunduko nasa ngbarago ti Mbori te. Ono wa vura duhe wo, ani ima rengba ka iriso Bakusirani ngba gu gene nasa ngbarago tiko. Gini ngbatunga “ziazia idapambori [watadu pambori]” nasa ngbarago ti Mbori? (Yakoba 1:27) Ani bingo gupai Baibiri ayugoho.

1. Si naida mburu gaani irisombori ru rii gine?

Si naida mburu gaani irisombori ru rii Ziazia Kekeapai. Yesu aya fu Mbori wẽ: ‘Ga pai nga rengo.’ (Yoane 17:17) Bete apambori amanganga pai kuti gu rengo du rogo Fugo Mbori nga Baibiri gako toro adu kugiipa kehe te. I namaa kina agu ayugopai nga ga aboro gbiati asino yo kubaha. Ono rago angbanga ti Yekova na agu aboro “mbu gu rugute nga ga Mbori” te. (Mo gedi Marako 7:9.) Kuba gure, ani nasa ngbarago ti Mbori ho ani amaamburu gaani irisombori ni rii Baibiri na kini pekefuo gaha arugute.

2. Waigu si aida ani irisi Yekova?

Wangia Yekova Bakusirani, ko ima rẽ ani fu gaani kparakpara iriso fu kina ko sa. (Yugoti 4:11) Gipai re nayugo gupai nga ani du wa ka ani kpinyemuko na kini irisi kinako sa, na ki zanga mangasunge na ai kpiahe.—Mo gedi Yesaya 42:8.

Si naida gaani irisombori du ‘ni ziaziaha’ fu Yekova. (ARomo 12:1) Gipai re nayugo gupai nga si naida ani raki ringbisihe kuti gu gako arugute du tipa ruru mangapai. Ni kpiapai, agu aboro nakpinyemu Yekova i nakpinyemu ka pekafuo gu gako arugute du tipa rogatise. I nane gbegberẽ mangaapai, wa ngbatunga gu nga vugundö watadu ingamangasunge na kere angua watadu bakere mbirabuda.a

3. Tipagine si aida ani irisi Yekova ti ni kina sa na akuarani aidipase?

Gu gaani adunguratise ninaamanga na aposo dunduko nafu momu furani ani ‘támbua Yekova . . . dagba rimbasa.’ (Atambuahe 111:1, 2) Gene sa ani amanga gipai re ngbaha nga ka taasa rimo Mbori rogo bia yo. (Mo gedi Atambuahe 104:33.) Yekova naida gupai nga ani naandu tipa adunguratise mbiko ko ima kpinyemu rani na ko ima ino gupai nga si nika undo rani ani raki nye anye kindi na ngbarago. Ho ani adunguratirani ni ku ba adunguratise yo ani nangarasa kura aboro na i kini ngarasi rani a.

MO WIRIKI KURA DUNGU APAI

4. Si aidanga ani mangisunge na akpiahe rogo gaani iriso yo te

VIDIO: Ya Mo Mbori Naida na pa Mangasunge na Akpiahe Rogo Irisombori yo? (3:26)

• Ginipai namangi ho bete gu ga Mbori aboro nadu ti agu aregbo i aake Baibiri ti ni aasadi ka irisoko na akpiahe?

Kura bete aboro aasadi ka mbeda na Mbori ni mangayo sunge na akpiahe rogo gayo irisombori yo. Ya mo pa mangayo ho wo aarengbanga ka turuso ko tiyo te? Mo gedi Gate 20:4-6 na Atambuahe 106:35, 36, tifuoho, mo ki sakipai tipa agi asanahe re:

• Gini ahe watadu akpiahe mo nabi aboro i nimangisunge na ni rogo gayo irisombori yo?

• Waigu Yekova abi pa mangasunge na akpiahe tipa ka irisoko?

• Gamo bipai nga gine tipa mangasunge na akpiahe tipa ka irisombori?

5. Ka ani airiso kina Yekova sa, ziree aberãpai adunga na maapai kurirani te

VIDIO: Rengo Afu Ranirii Fuko (5:16)

Mo gedi Atambuahe 91:14, na tifuoho, mo ki sakipai tipa gi sanahe re:

• Ginipai Yekova nakidohe ka mangaha furani ho ani ayugo gupai ni nga ani ima kpinyemuko ni iriso ani kina ko sa?

6. Ani nairiso Mbori ba gaani adunguratise yo nga ga dungurati

Ani natambua Yekova na kini nyakasi akuarani ni bi ka ani abia na kini fu akaragapai ba gaani adunguratise yo. Mo gedi Atambuahe 22:22, na tifuoho mo ki sakipai tipa agi asanahe re:

• Ya mo mo naagbia ngbarago ti gia agu akaragapai du ba adunguratise yo?

• Ya mo mo nakpinyemu ka mbakada tiro ka fu karagapai?

7. Yekova nadu na ngbarago ho ani ape gupai ni fu kura aboro ani nawirikihe

Dungu agene duho rengbe ani ka gumbapa agu arengo nga ga Baibiri ngbaha fu kura aboro. Mo gedi Atambuahe 9:1 na 34:1, na tifuoho mo ki sakipai tipa gi sanahe re:

• Ginipai mo nawirikihe rogo Baibiri mo akpinyemu ka fura tipaha fu kura boro?

GINIPAI MO NAWIRIKIHE?

Ani nasa ngbarago ti Bakusirani ho ani airiso kina ko ni sa, na kini tambuako ba adunguratise yo, na kini gumba gupai fu kura aboro ani nawirikihe.

Fugöpai

• Waigu rengbe ani ka wirika wai ka iriso Mbori ngba gu gene ko aidaha?

• Tipagine si aida ani irisi kina Yekova ti ni sa?

• Tipagine si aida ani irisi Mbori ti ni wa sa na agu aboro naida ka sa ngbarago tiko?

MO WETEKE GU KURA APAI

Rogo gu pangbanga nga “Mi Berewe ni Kanga fu Kpiahe Te,” mo bingo wai kura dee sa ambu irisakpiahe.

“Ziazia Kekeapai Rengbe Arengba ka Aria Gaoni Raka” (Ngbaõbambu Sinziri, Bamburu 1, 2011)

Mo wiriki gupai rengbe ka undo ro mo fu akaragapai ba agu adunguratise yo nga ga dungurati.

“Ani Tambua Yekova Dagba Rimbasa Aboro” (Ngbaõbambu Sinziri, Ngi 2019)

Mo bingo wai paranga kumba agbia undo be agu adunguratise nga ga dungurati wa si avuranga du vurũ nga si aadunga taata ko naandu tipaha te.

Yekova Angere Fuo Re (3:07)

Dungu aboro idi kuti gupai nga wagiwagi ngua nayugopa aKristano, ono ya mo si naida ani mangisunge na ni rogo gaani irisombori yo?

“Tipagine ADezire Yekova Amanganga Sunge na Kpiahe Rogo Gayo Irisombori yo ti Ni Ya?” (Gu kekeapai du rogo gaani bangiriba nga ga Internet)