Ngbaduroniyo Nafõ Roni Oni Mangipai Wa Gu Yesu Anamangaha?

“Ko . . . ki bi bakere rimbasa, nungayo ki nimangi ko amanga bambiko i adu wa agu [avusende] adu nga na babandara ti ra ya; ko ki tona yugu dungu apai fu yo.”—MARAKO 6:34.

1. Tipagine duhe tini ni sino aboro ka yugo wene asino?

ROGO gu pangbanga dunduko nga ga aboro, dungu aboro gudu ho nayugu wene asino. Oni rengbe arengba ka rugatironi na gupai duhe tini wo. Yekova Mbori na asino tiko ko ayugoho nga nyemuse, weneringise, gamahe, na gu kura asino nga gu ani abihe na nyanyakipaha. I akusi aboro rogo kpia Mbori. Ani rengbe ka rugatirani tie na ndu gupai dungu aboro ayugo bete nyemuse tini, na weneringise, na nunga, na gu kura asino Mbori, ani ki rugutirani a na ndu gupai dungu aboro ayugo gupai nga ga sangbakpotoyo tini. (Bambata Pai 1:26; ARomo 2:14, 15) Ono tie, oni rengbe ka ino gupai nga, gu kura aboro nayugo agi asino re taata susi gu kurayo.

2. Gine nga bete wene asunge nga gu rengbe aboro ka mangaha, isoke kini berẽ gupai nga i nawirika Kristo?

² Si nawira oni ima ino agu akumba na adee nga aguyo ninaandu ka bi aboro kaza watadu kini undoyo, ki duna inapai fu gbarĩgbarĩ aboro, watadu kini gamu ahe fu rungorungo aboro kpaima. Oni berẽnga pa agu aboro a nga aguyo gayo nunga afõngbaduyo yo i niimangisunge na gayo raka rogo agu agbata nga ga aboro ngbataka watadu agu agbata i angerefuo awirinyaure rogo, agu aboro naundosunge rogo abambu-ngua watadu naundosunge rogo agu arago i angera rogo fuo agu aboro nakaza sa kpio, watadu aguyo na’asada nyanyakii ka undo aguyo adunga kporo tiyo ya watadu ka undo agu aboro oro kurogo kura ringara. Nirengo, gu kura aboro dagba agiyo re naberã gupai nga i nawirika Yesu, nga guko namoi kpiapai fu aKristano. Ani nageda gupai rogo abuku Wene Pangbanga nga Kristo ahusi aboro kaza na ki rigi agu aboro nadu na gomoro. (Marako 1:34; 8:1-9; Ruka 4:40) Ga Yesu yugo nyemuse, berãpase, na nunga angia yugo “ga Kristo berã,” nga guko tigako naawirika Bako nga ga ngbangbaturũ ko.—1 AKorindo 2:16.

3. Tipa ka duna rengberengbe bipai tipa ga Yesu wene asunge, ginipai si aida ani wisigihe?

³ Ono, oni binga gupai nga dungu agu aboro nga aguyo ga Yesu nyemuse gbiati nunga afõngbaduyo yo nabasapa nyanyaki papara ga Kristo berã? Ani rengbe ka gia tiiworo gipai re ni wisigo ani Marako kapita 6. Ani nageda gupai yo nga i aye na aboro kaza fu Yesu ko husi yo. Rogo gu kekeapai du vuruhe yo, ani ini gupai yo a nga, fuo bi Yesu gu dungu akutu aboro naye fuoko re gomoro nimangiyo, ko arigi yo ngba iiriwo gene. (Marako 6:35-44, 54-56) Husa aboro kaza na riga agu aboro nadu na gomoro angia bakere yugo nyemuse nga ga nunga, ono ya mo si angia gu bangua agene nga gu Yesu anaundo kura aboro rogo? Sidu waigu rengbe ani ka wirika ko rogo gako rengberengbe kpiapai nga ga nyemuse, weneringise, na nunga, a wa ko awiriki Yekova?

Ngbadukoyo Afõko Ko Mangipai sa agu Azingo nga ga Aboro Rogo Toroyo

4. Gini rago gupai amangi rogo du rogo Marako 6:30-34?

⁴ Yesu aduna nunga tipa agu aboro nadu pati ko ni bambata pai mbiko gayo azingo nga ga toro. Agu azingo re aduna banyanyakipaha gbe, kisusi agu azingo nga ga borose. Ani wisiginga gu tangarapai du rogo Marako 6:30-34. Gupai ke yo ho yo re amangi pangba gu Baime nga Gariraya, mbembedii na gu Pumbo Susiri nangia ga 32 ti Gaani Regbo. Amokedi aduna ngbarago, na i aduna nyanyaki ndupai beyo tipa ka duna ngbarago. Fuoho aturonga te wa i anyasi gayo gbanga nunguro, i aye fuo Yesu, zanga tikö, ki duna nyanyaki nyemu gumba agu apai fuko namangi yo. Ono tie, rimbasa aboro adungura tiyo. I aduni badungu yo gbe ki sa gupai nga ka ba ri riahe watadu ongoda dunga ti Yesu na gako abawiriki ya. Yesu aya fu amokedi wee: “Oni yé ni sa roni ku nvuo yo, ka ongoda toni.” (Marako 6:31) Ni bita yo kurungba, nawira mbembedii na Kaparanauma, i asi gu Baime nga Gariraya kurogo gu rago aboro adunga rogo ya. Ono rimbasa aboro aima ora pangba baime ki ima da mbata fu kurungba. Waigu Yesu arengbe ka karagapai? Ko aduna gberarago mbiko gupai nga aboro afudi ko rogo gu rago ko aida ka du rogo nisako? Wa gu sa te!

5. Ga Yesu berã angia gine koyo du gu rimbasa aboro ni nga aguyo naye koyo du ko ni, na ginipai ko amangihe ni karagapai sani?

⁵ Ngbadu Yesu yo afõko ho ko abi gi rimbasa aboro ni bangeyo angia akutu re, kodihe na aboro kaza, nga aguyo naapido ko nyanyakii. (Matayo 14:14; Marako 6:44) Ni dungura ko berãko kurii gupai nasa Yesu ko duna nunga na wai Ko amangipai, Marako akepai ya: “Ko ki . . . bi bakere rimbasa, nungayo ki nimangi ko amanga bambiko i adu wa agu [avusende] adu nga na babandara ti ra ya; ko ki tona yugu dungu apai fu yo.” (Marako 6:34) Yesu abinga kina ndurumo aboro gbua te. Ko abi aboro nibasasa nga aguyo nadu na zingo rogo toroyo. I adu wa kina agu avusende nga agura ingi ka boro adunga ho ka undora ya, ki zanga gu babandara rengbe ka ngbembatayo fu ra kurogo gu rago ami naari iwo nvuo rogo watadu ka bandara. Yesu aini gupai nga agu abarumbatayo rogo pambori na zanga nunga nga aguyo si aidi i niingerefuo avusende, ono nga aguyo nadu zanga nunga, i anabisirapa kungbo aboro abisira nirengo na kini basapa gayo azingo nga ga toro. (Yezekere 34:2-4; Yoane 7:47-49) Yesu aida ka manga yo kia, kini mangi gu bawenepai fuyo nga gu ko arengbe ka mangaha. Ko atona ka yugopai fuyo tipa ga Mbori Kindo.

6, 7. (a) Ginipai abuku Wene Pangbanga ayugo ni ga Yesu bambata mangapai sa ga aboro azingo? (b) Ginipai nafõngbadu Yesu yo ko nitungusipai na kini yugupai?

⁶ Ani kparianga pa wai si aye timburu kuraha gbiati gupai si ayugoho tipa gupai naye ni bambataha rogo gu tangaratangarapai du wa gure. Ruka nake gere, nangia munganga na ki duna nyemu gupai nyanyakii nga kpoto aboro du wenengai. “Rimbasa aboro . . . ki nipeke [Yesu]. Ko ki di yo ku gume, ki nigumba pa ga Mbori [kindo, “NW” ] fu yo, agu yo naida [ka] hu be kaza ko ki husi yo.” (Ruka 9:11; AKorosaio 4:14, pigipigi kekeapai nga gaani.) Wa vura duhe nga si wo tipa gu tangaraapai dunduko nga ga iiriwoapai te, tipa gere, ginipai gu tangarapai naye be toro nga ga Ruka agumbapaha ni bambata pai? Si angia gu rengopai nga Yesu ayugupai fu agu aboro re.

⁷ Gere nirengo na ngbanya dagbaha na gu nyakasapai nga gu ani abihe rogo Marako 6:34. Gu veresi re nayugopa wai ziazia nibambataha nunga afõngbadu Yesu yo ko mangipai. Ko ayugupai fu aboro, kini mangipai tipa gayo azingo nga ga toro. Ti tonatona gako sunge, Yesu ayaa: “Mi nandu ka tungusa gu wene pangbanga nga ga ga Mbori [kindo] rogo kura akporo a; bambiko si du i akedi re tipa ha.” (Ruka 4:43) Ono tie, ani rengbe ka duna ingahe ka ani aberã gupai nga Yesu anamanga sunge tungusa gu pangbanga nga ga Kindo wa kungbo sunge, wa ka i ya ko anandu kaa tungusapai mbiko wa si adu nga ko mangihe wo zanga du ko na nyemu mangaha. Oó, gako nyemuse nga ga nunga tipa aboro nangia gu banguapai nanafõngbadukoyo ko nitungusi wene pangbanga fuyo. Zavura tipa agu aboro nadu na kaza, aguyo gbegbere atoro anarungosi yo, rungorungo aboro watadu agu aboro nadu na gomoro—gu yangara wenepai kisusi nga gu Yesu arengbe ka mangaha fuyo—angia ka undoyo i inipa ga Mbori Kindo, ki idipaha, na ki nikpinyemu gu rengo du tipaha. Gu rengo re aduna banyanyakipaha mbiko pa gu sunge nga ga Kindo rogo dia gbarasarimo kusayo ti ga Yekova bakere pagbia na rogo ye na nyenye amaku fu aboro.

8. Ga Yesu berã angia gine tipa gako sunge tungusapai na yugopai?

⁸ Ga Yesu zaza tungusapa Kindo angia nyanyaki papara ndu gupai ko aye tini ku auru kpotosende no. Mbembedii na digido gako sunge nga ga kpotosende, Yesu aya fu Pirato wee: “Gi pai i avungu re sa ni re, gi pai mi aye sa ni re ku zegino, nga ka du ni dezire rengo. Agu yo nga ga rengo yo i nagia fugore.” (Yoane 18:37) Ani bi gupai rogo agu apaparaha ue ye mbata fu gere nga, Yesu angia gu boro nadu na bakere nunga—ki duni gu boro nangerafuo aboro, ni gu boro rengbe aboro ka mbeda koyo du ni ni, ki duna berãpase, ni gu boro rengbeyo ka kido kuti ni, na kurii gure dunduko, ni boro nyemuse. Si naida ani rugutirani na agu asinoko re ka ani aida nirengo ka giarogo ga Kristo berã yo. Si na nyanyakipaha kinawo a ka ino gupai nga ga Kristo berã nakoda ino gupai nga ko anabi gako sunge tungusapai gbiati yugopai ni bambata pai.

Ko Arugu Kura Aboro I Mangi Dezirepai

9. Si adu nga tungusapai na yugopai angia bambata pai fu ada?

⁹ Maa tungusapai na yugopai ni bambata pai—wa gu mangapai nayugopa nyemuse gbiati nunga—adunga tipa kina Yesu sa te. Ko arugu apefuo ko i wirikipa gako ndu mangapai, agu apai ko anabipaha ni bambata apai, na ki wiriki gako mangaapai. Ni kpiapai, fuo sia Yesu gako amokedi 12, ginipai si adu nga i mangihe? Marako 3:14, 15 naya fu rani wee: “Ko ki ka kuti yo bawe na ue, i nisungu na ko, ko nikekedi yo, i nitungusi pai, i du na tandu danda adaimona.” (Pigipigi kekeapai nga gaani.) Oni nabi gupai si aidi si du ni bambata pai tipa amokedi?

10, 11. (a) Ho Yesu akeda amokedi ni, gine ko aya fuyo i mangihe? (b) Ni keda amokedi i ndu, banguapai angia gine?

¹⁰ Kusa, Yesu asa aguyo nadu 12 i nihusi kura aboro na kini dandi gbegbere atoro. (Matayo 10:1; Ruka 9:1) Fuo gure, ko ki kedi yo i mangi nunguro fuo gu ‘ingiingi avusende nga ga ngbatunga aYisaraere ra.’ Ka manga gine? Yesu arugu yo ya: “Wa oni ka ndu, oni ta tungusa pai, niya, ‘Gu [kindo] nga ga ngbangbaturũ si mbedi.’ Oni husi akaza, ki nizingisi kangba aboro, ki nigirisi aboro ngbataka, ki nidandi adaimona.” (Matayo 10:5-8; Ruka 9:2) Ginipai, nzunzu i amangihe? “I ki ndu ki [1] nitungusi gu pai nga aboro sa gayo berã. [2] I ki nidandi dungu adaimona, ki nimbembedi gu dungu aboro naakakaza ni nzeme ki nihusi yo.”—Marako 6:12, 13.

¹¹ Wa duhe nga rogo apai dunduko i agumbanga pa yugopai ni bambata pai te, ya mo gbeberã kuti gu tangaratangarapai gumbayo paha kuari re nga durugopai kisusi tipa agu apai si aida i moihe mbata watadu gu ndu mangapai koditihe kurogo? (Ruka 10:1-8) Wenepai, si aidanga ani umbasi bange wai gumbayo pa yugopai mbata fu husa aboro te. Ani wisiginga pa agu apai du vuru gu kapita re. Ngbutuko mbata fu keda ko agu amokedi nadu 12, nunga rimbasa aboro afõngbadu Yesu yo. Ani nageda gupai nga: “Yesu ki[ni] ta ata dagba abaakporo na akporo dunduko, ki niyugu pai rogo gayo abambutiria, ki nitungusi gu wene pangbanga nga ga ga Mbori [kindo], nihusi ngbatunga akaza na ngbatunga awokote dunduko. Ono ho ko abi arimbasa ni, nungayo ki mangi ko, bambiko i arungo, ki nigbandaka, wa kina agu [avusende] adu nga na babandara ti ra ya. Ko ki ya fu gako abawiriki wẽ, ‘Zuzuhe ni bakere he ni rengo, ono abamangisunge ni kina umba yo. Oni kpári tie fu Gbia du zuzuhe ni gako, ko kedi abamangisunge ku rogo gako ati zuzuhe.’ ”—Matayo 9:35-38.

12. Gu iiriwo asunge nangia ga Yesu na ga amokedi arengbe ka manga gini kurapai?

¹² Ni du yo na ko, amokedi arengbe ka dia bete ga Kristo berã. I arengbe ka ino gupai nga padu yo nirengo na nyemu aboro tiyo na nunga aboro ki du tiyo akodi gupai nga i tungusipai kini yugupai tipa Kindo—gure si aidi si duni gayo bangua papara wene asunge. Ni mangapai ringbisihe kuti gure, gu wene asunge nga gu nadu tipa borose, wa ngbatunga gu nga husa aboro kaza, amangipai susi gu gbua nga ka undo agu aboro naidaha. A wa rengbe oni ka berãpaha, pa husa aboro na pa fu riahe fuyo rogo iiriwo gene rengbe ka gbe kura aboro. (Matayo 4:24, 25; 8:16; 9:32, 33; 14:35, 36; Yoane 6:26) Ono tie, kurii gupai nga gu sunge re ni undo aboro ti kina kpotoyo, agu asunge re asa agu aboro nanabihe i idi gupai nga Yesu angia Wiri Mbori, ki duni gu “nebi” nga guko Mose agumba pako.—Yoane 6:14; Pa Fu Rugute ni Ue he 18:15.

13. Gini sunge gu sangbanebi du rogo Pa Fu Rugute ni Ue he 18:18 anyakasipaha tipa gu “nebi” nga guko si adu nga ko nika ye?

¹³ Tipagine si adu tini na nyanyakipaha nga Yesu angia gu “nebi” re? Wenepai, gini bangua sunge i agumbapaha kumbatayo tipa gi nebi re? Si adu nga i aino gu “nebi” re ti husa aboro ngba iiriwo gene watadu kusa riahe mbiko nunga tipa agu aboro nadu na gomoro? Pa Fu Rugute ni Ue he 18:18 agumba gupai kumbatayo nga: “Mi afú nebi sa fu yo dagba awirinayo yo, wa mo [Mose]; mi amáa gimi apai ku ngbani, ni agúmba agu apai dunduko fu yo nga gu mi ka ruga ni na ni.” Teketeke a wa amokedi awirikipa duna weneringise na kini yuguhe, ka i arengbe ka digisoho kuti gupai nga si aidi ga Kristo berã yugutihe a rogo gayo sunge tungusapai gbiati yugopai. Gure kangia gu bawenepai kisusi nga gu ka i amangihe fu aboro. Ngba gu gene re, aboro kaza na airarungo ki rengbe ka gbia nyenye aundo, angianga kina gu gbua nadigi kuti gu guru raka nga ga aboro watadu riahe sa watadu ue ya.—Yoane 6:26-30.

Ani Sonosi ga Kristo Berã Areme

14. Waigu du pa duna ga Kristo berã ni rimisirimisihe kurogo pa gaani sunge tungusapai yo?

¹⁴ Boro ho dagba rani rengbe ka bi ga Kristo berã ya si adu sa tipa kina aguyo nadu rogo bambata kama agarã—tipa kina Yesu na gako abawiriki nga aguyo gu mokedi nangia Pauro akepai tipa yo ya: “Ani du na ga Kristo berã ti rani” te. (1 AKorindo 2:16) Na ani rengbe ka ida gupai zanga kapa nga ani tii dingisoro ka tungusa wene pangbanga na ka sa aboro ni abawiriki. (Matayo 24:14; 28:19, 20) Si ki vura du wo, si ni wenepai ka berãkurii ndu gupai ani amanga gu sunge tini re. Si aidanga si du gbua mbiko si ni gupai si aida ani mangihe te. Nyemuse tipa Mbori nga gu bambata ndupai ani amanga sunge tini, na nirengo, du wa Yesu nakoda gupai nga nunga fõ ngbaduraniyo tipa ani tungusipai na kini yugupai.—Matayo 22:37-39.

15. Tipagine du nunga tini ni ruru papara gu gaani sunge ani amangaha gbayaga?

¹⁵ Nirengo, si dedede taata ka duna nunga tipa agu aboro adunga na ani ti gaani aida ya te, gbe ka ani agbia agu aboro nga aguyo adunga na nyemu giapai tiyo ya, naka aka, watadu nasogote rani. Si ki vura du wo, ka si du nga gaani nyemuse gbiati nunga tipa aboro nika nyasa, gupai nga gu nafõngbaduraniyo ani mangi gaani sunge nga ga aKristano rengbe ka nyasa a. Waigu tie rengbe ani ka sonosa nunga tipa aboro? Ani rengbe ka asada ka bi aboro a wa Yesu anabiyo, “wa kina agu [avusende] adu nga na babandara ti ra ya.” (Matayo 9:36) Anga gure naringbisapa gu dungu aboro du areme tee? Agu ababanda avusende nga ga zire pambori yo aima gindigo yo na ki sa yo ni airavurari rogo toroyo. Ni sangbanaha, i ainonga pa gu ruru rugute nga gu du Baibiri yo te, watadu agu apai nga ga Paradiso nga gu ga Mbori Kindo nika ye nani ku auru gaani kpotosende a te. I nagbia tiyo na gu kpakarakpakaraapai nga gu namanga rogo raka yo na auru dunduko—kodihe na rungo, zanga giatise dagba aborokporo, akaza, na kpio—zanga i duna gu maabangirise nga ga Kindo. Ani duna guhe be rani nga gu i azingo tipaha: nga gu wene pangbanga nabatasa unga nga gu du tipa ga Mbori Kindo nga gu i naima sigiraha awere ngbangbaturũ yo!

16. Tipagine si aida tini ani tungusi wene pangbanga fu kura aboro?

¹⁶ Ho oni aberã ni rogo gi gene re tipa gu zingo rogo toroyo nga ga agu aboro du pati roni, ngbaduroniyo afõnga roni tie tipa oni idi ka manga gupai dunduko nga gu rengbe oni ka mangaha tipa ka fura fuyo tipa ga Mbori aringbisapai nga ga nyemuse tee? Ii, gaani sunge nga sunge nunga. Ho du ani ni na nunga tipa aboro a wa Yesu adu nani, si ayugo tihe ti woro fugo rani, kpakpurani yo, na rogo gaani gene yugopai. Agi apai dunduko re nika sa gaani pangbanga ni bawenehe ti ‘aguyo dunduko duna berã sa nyenye unga.’—Amokedi 13:48, NW.

17. (a) Gine nga gu bete agene rengbe ani ka yugo gaani nyemuse gbiati nunga rogo fu kura aboro? (b) Tipagine adungaha tini ni gupai nga ga sia manga kina wene asunge watadu sia manga kina sunge tungusapai gbayaga tini ya?

¹⁷ Na wai tie, si naida ani yugu gaani nyemuse na nunga rogo gaani gene raka nabaha. Gere nakoda pa du ani na weneringise fu aguyo adunga gene beyo ya, aboro kaza, na airarungo—kini mangi gupai rengbe ani ka mangaha a wa rengbe ome rani nani tipa akpurasi gayo rungo. Si nakoda gaani asadatise rogo fugoyo na rogo mangapai tipa ka dia gu rungo kusayo nga ga aguyo abadiangbayo nakpiki. (Ruka 7:11-15; Yoane 11:33-35) Si ki vura du wo, si aidanga ngbatunga gu yugo nyemuse re, na weneringise, na nunga, da ni bangua gaani wene asunge, wa gu abaundo aboro amangaha te. Gu duna nyenye nyakapaha gbe, nga agu a’asadatise agu asino Mbori nga gu gumbayo paha kuari re afõngbaduraniyo ani mangihe, ono nga gu nayugotihe rogo ga aKristano sunge tungusapai na yugopai. Ani tingidi gupai Yesu agumbaha tipa agu abarumbatayo rogo pambori nangia ga aYuda yo: “Oni nafu sa dagba bawe nga ga danda na anisi na kumina, oni ki he manga gu pai kii dagba arugute, nga sapangbanga, na inapai, na idapase; ono ka oni amangi agi apai re ka oni ahe nga manga gu kura ha a ya.” (Matayo 23:23) Tipa Yesu, anga manga gu sa watadu gu kuraha nadu tipa ko te—singia undo aboro na agu azingo nga gu naamanga yo ti boro yo watadu yugo agu apai fuyo nga gu nafu unga rogo toro te. Yesu amangihe dunduko ue. Si ki vura du wo, si ziazia nga gako sunge yugopai angia nyanyakipa pai kisusi, bambiko gu wenepai nga gu ko amangihe rogo gi gene re arengbe tie ka duna nyenye undo.—Yoane 20:16.

18. Ginipai si aida pa wisigo ani ga Kristo berã fõngbaduraniyo ani mangihe?

¹⁸ Nga gu riko tambuahe rengbe ani ka du nani tipa gupai nga Yekova ima yugo ga Kristo berã fu rani! Mbiko gu undo nga ga abuku Wene Pangbanga, ani rengbe ka ino agu aberã, asino, asunge, na agu apai gu babakere kumba kisusi nga guko naraki amoihe ni bambata pai. Si nabi kina rani tipa ka geda gupai nga gu Baibiri agumbaha tipa Yesu, kini berẽkuriihe, na kini mangihe. Ani tingidi gupai nga, ka ani aida ka mangapai nzunzu wa Yesu, ani du wa ka ani wiriki wai ka berã, ka bi apai, na ka wisigo apai a wa ko amangihe, kuti gu ome rani rengbe ani ka mangaha kuti ni nga kpakpa aboro. Sidu, ani dinga berã tie ka sonosa ga Kristo berã na kini yuguhe. Anga gene ho tipa raka ngbaa kisusi, gu gene ngbaa ka manga aboro rogo kisusi, duho be rani na be kura aboro ka mbeda na guko Yesu ayugu kpiako ni rengberengbehe, nga gaani weneringi Mbori, nga Yekova te.—2 AKorindo 1:3; AEbere 1:3.

Waigu ka Oni Karagapai?

• Gini dudungurobipai Baibiri afuhe tipa wai Yesu anamangapai fu agu aboro nadu rogo zingo?

• Ginipai Yesu anyakasihe ho ko akeda apefuoko ni?

• Waigu rengbe ani ka yugo “ga Kristo berã” rogo gaani mangaapai?

[Gu kpiahe du ti kpewaraga 16]

Gine nga gu babawene pai kisusi nga gu rengbe aKristano ka mangaha tipa kura aboro?