“Nunga Akuaroni” Nimangi Roni Amanga Gbe

ANGA regbo ho badungu aboro adu na nyemu i bi nungayo na ki undoyo susi gudu awere re te. Areme, aboro nambu be angbongi, akaza, arungo, gu mangaapai nga ga abakuondiko, avura, gbiati agu agberango naye be gu mangaapai nga ga ome zegino. Nunga nga ka inopa ga boro rungo, ki bi rungoni, na kidu na nyemu ka undo ní. Nunga rengbe ka fu wasa fu gu boro du rogo fudifudipai, si rengbe ka zeresa egerã, na ki fu wasa fu gu boro du rogo rungo, a wa nzerẽ uru naafu wasa fu boro ti regbo dubo.

Ani rengbe ka yugo gaani nunga tipa aboro rogo gaani mangaapai na gaani afugo, nga kaa berãpa akuarani na kini undoyo ho i aida undo ni. Anga si naida ani duna nunga kina gaani aborokporo, abakurearani, na agu aboro ani nainidi tirani naayó te. Ono zavura agu aboro ani ainongo yó ya, si naida ani duadu na nungayo a. Yesu Kristo, nadu na bakere nunga tiko, ko asanahe ti regbo gu gako Tungusapai Nadu rii Bagangara yo ki yaa: “Ka oni kpi nyemu kina gu ni nakpi nyemu roni, gaoni mosoro nga gine?” Ko aya berewe wee: “Agu apai dunduko oni akpi nyemu aboro nimangi he fu roni, oni nimángi kina ha fu yo a.”—Mt. 5:46, 47; 7:12.

Gipai ko agumbaha re, nga gu aboro naayambaha nga Gu Rugute Duwa Dahabu, ani nagedaha rogo Ziazia Kekeapai yo. Badungu aboro idi kuti gupai nga Ziazia Kekeapai nga gu bawene hee rengbe ka undo boro ní du niboro nunga. Ziazia Kekeapai nanyakasa gupai gbe nga, gaani sunge du nga ka undo agu aboro arengbanga ka undo tiyó ya. Ziazia Kekeapai nafura tipa Bakehe nga Yekova Mbori, nga Bamangirani a, ki yawee ko nga boro nunga kisusi aboro dunduko.

Nikpiapai, ani nagedapai tipa ko kini yaa: “Ko ninasara ngbanga fu awirinyaure na fu adekurugbo, ki nikpi nyemu kungba boro, rogo fu riahe fu ni na roko.” (Pa Rug. 10:18) Yekova ‘nasapa ruru sarangbanga fu aguyo i namanga yó [nibiriki]; kini fu riahe fu aboro gomoro.’ (Tam. 146:7) Yekova afu rugute tipa agu aboro naga kurogo kura ringara adunga gene beyo ya ki yaa: “Gu kungba boro sungu ku dagba roni adú fu roni wa wiri ringara dagba roni, oni ki nikpi nyemu ni a wa oni akpi nyemu tironi.”—Pa Mot. 19:34.

Ono tie, anga si nitaatapai ti aregbo dunduko tipa kadu na nunga te. Pauro akepai fu agu aKristano nadu Korosai yo ki yaa: “Oni aima mbu gu kuru boro, na gani mangaapai. Oni aukadi gu vovo boro, i ambakadi ni ni vovo ni sa inahe wa du kpia gu ko nafu ni. . . . Ziazia amangure, wa du oni ni ga Mbori siasia yo, oni úkadi ngbadu inapai.”—Koro. 3:9, 10, 12.

Si ki tadu were, anga si nitaatapai boro yugu nunga koyo du kurani ni, watadu ka inapai funi te. Inapai nga papara “gu vovo boro” si aida aKristano ukadi ní. Pauro araki rogo gu bariwara ngbii nangia Roma. Aboro Roma agasi ngba manga gbegberẽ apai. Si du ko angarasi akurako aidipase ti ni i mangi bakere ariapai rogo gayo raka tipa kadu na bakere nunga aboro tiyó, kini inipai fuyó.

Gu Wenepai Nunga Aye Nani

Gu kura aboro nabi agu akurayo duna nunga wa airamungo, na ni agu aboro rengbe pai arengba ka gbiayo niipo. Ya mo rengo du nga gupai re?

Wagusa te! Guhe nasa boro ní du na ndikidi nunga, si nga bakere nyemuse, nga gu nyemuse naenga yo du Mbori ni, bambiko ko nga nyemuse. ‘Mbori nga nyemuse.’ (1 Yo. 4:16) Si ruaru i yambu Yekova nga “Ba inaapai, nga Mbori wasa dunduko.” (2 Kor. 1:3) Gu fugo i asaha kurogo pa-Zande nga “inaapai,” kura rogoyo nga “ka bi rungo boro, kadu na nunga boro mbiko gu fudifudipai du ní rogoho.” Yekova a “naina pai fu aboro gbangbati na aboro ingapai”!—Ruka 6:35.

Bakusirani nakpinyemu gupai nga ani du a na agu asino tirani nga ga weneringise, wa gu nga nunga. Ani nageda gupai rogo Mika 6:8 nga: ‘Ako boro, ko yugu guhe foro ngba angba; gine Yekova aida bero? anga kina mangapai niruruhe, na ka kpinyemu weneringise tee?’ Asanza 19:22 nayaa: “Gu pai i akpi nyemu he be boro nga, ni du ni irarengo [“ní du niboro weneringise,” NW].” Yesu Kristo nadu na asino tiko wakina ga Bako teketeke, ko afu rugute wakina gure fu apefuoko, ki yaa: “Oni ini pai fu aboro a wa Baroni naina pai fu aboro.” (Ruka 6:36) Gu kura sasa fugo Ziazia Kekeapai nagumba gu veresi re ngba kura gene kini yaa: “Oni duna nunga aboro, a wa du Baroni na nunga aboro.”—The Jerusalem Bible.

Wene ndupai kinaho si aida ti ni ani duna nunga, wa duhe nga nunga naye na bakere mosoro fu boro. Ani naaino dedede nga rengo du Asanza 11:17 agumbaha kini yaa: “Gu boro naina pai ni namanga wenepai tipa kina mbisimoni.” Ho ani ainapai ni fu gu boro du rogo zingo, Mbori nabihe nigu bawenepai mangi ani he fuko. Ho airisiko ainapai ni fu aboro, si nasako ko inipai a fuyó. Bakindo Soromo ayaa: “Gu boro du na nunga rungorungo boro ti ni nafu he fu Yekova, tipa gani wene mangapai ko afú mosoro [afu] fu ni.” (Snz. 19:17) Pauro ayaa: “Oni íni he ya gu wene pai boro nimangi, kina ha ni ka dia be Gbia.”—Ef. 6:8.

Nunga na ome ti ni ka sa zereda si nye dagba aboro, na ka undo aboro i mbakadi gu tagbagaapai du dagbayo. Si rengbe ka undo aboro i mbakadi gu zanga giatise du dagbayo, na si ki zaki gene tipa guni mbupai fu kurani. Zanga giatise rengbe ka kura mbiko gupai nga ani agumbanga agu apai du kpotoraniyo ngba gu gene ani aidaha ka gumbaha te, watadu boro arengbanga ka rugatini wenengai naapa gupai ani namangihe te. Gere nga gu regbo nunga aye ka banda zereda. Si nitaatapai ka mbupai fu gu boro aboro naini ní nga boro nunga du nga ní. Nunga nasa rani ani ndu kuti gu rugute Pauro afuhe fu aKristano ki yaa: “[Oni] nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga.”—Koro. 3:13.

Nunga Nga Bi Rungo Boro

Nunga na ome ti ni a ka zeresa rungosiro. A wa ani nabihe, si nayugo padu boro na nunga koyo du agu aboro ni narungo na kaa rungo naayó wa sa rogo gayo ambugo. Nunga nakoda gupai nga kaa berãpa agu aboro ngbaduraniyo narungo, na ki mangipai tipa ka undo agu aboro re.

Ka Kristano du na nunga, gure nga ní nawirika Yesu. Ko anaadia regbo adia tipa ka undo aboro rogo borose yo na rogo toroyo a. Ho ko anibi gupai ni nga aboro rogo zingo, ko anigbata gene ninunga tipa ka undoyo.

Oni bingo gupai namangi ho Yesu abi agu aboro ni naarungo rogo toroyo. Gupai namangi nga: “Ho ko abi arimbasa ni, nungayo ki mangi ko, bambiko i arungo, ki nigbandaka, wa kina agu akandoro adu nga na babandara ti ra ya.”—Mt. 9:36.

Wakina gure a, agu aKristano duna nunga naʹasadatiyo niipo ka undo agu aboro du rogo zingo rogo borose yo na rogo toroyo a. Gu mokedi nangia Petero akepai ki yaa: “Oni du kina ku bani sa, nunga akuaroni ki nimangi roni, oni ki kpi nyemu akuaroni wa awirinaroni, ki du na weneringise.” (1 Pet. 3:8) Nikpiapai, ho gu kura wirina na diako nga airarungo aguari ni kpuyo ka ga kurogo kura rago mbiko kaza, agu akurayo aidipase nadu rogo gu rago re afu bambu fuyó i raki tiihe tipa adiwi sita zanga i tumo marã atumo tipaha. Gu wirina re ayaa: “Aira gu bambu re anaaye kaa bi rani na aʹuru dunduko, na agu apai i anaagumbaha ayugu gupai nga i ima diarani kugume wenengai na i naida ani nibi gu kporo re wakina kpurani.”

Ndikidi aKristano naberãpa kungbo aboro aberã a. I nadia regbo ka undo agu aboro i ainongo yó ya, kini mangisunge na omeyo ka undoyo, watadu ki fu agu ahe du beyo fuyó. Rogo gu papara kekeapai ye mbata fu gere, aDezire Yekova du nangia agu akumba nadu bisue nafutiyo ka undo gu kungbo aboro angua atiwi kurii gayo bambu re.

Sidu, gu dungurati nga ga aKristano ima hi be nunga gbiati weneringise. Agu aboro du rogo dungurati nagbata gene ka undo akurayo mbiko gu nyemuse du yó nani. Mbiko gu badungu fudifudiapai du rogo zegino, si naida oni naaberãpa awirinyaure aberã na adekurugbo na kini bi rungoyo. Ya mo gene beroni wa ka oni undo agu aboro re mbiko gu rungo du yó nani, singia kaza, zingo wene bambu, watadu gu kura fudifudiapai?

Oni bingo gupai nadu tipa kumba na diako ringara aGiriki yo. Gu kumba re aawoka be gu kere kaza na yosorasi papara boro. Aboro adiko na diako ki ndu naayó kurogo gu bambungua nadu tuturũu gbe. Ono i anaagbia wiri marã ti kina gayo ndimo i anaakataha kini bagihe. Ono da narengbe ka manga gu sunge re fuyó mbuyo ku bambungua yo? Gu dungurati du rogo gu rago re aguari ka manga gu sunge re. I andu ki kati gayo ndimo ki bagihe ki ndu na marãha fuyó, tipa ka i bakingo bangiriyo ya.

Ani rengbe ka yugopa gaani nunga tipa aboro ngba dungu agene. Nikpiapai, agu aKristano nga aboro nunga, i rengbe ka bihe nga gupai kura boro aidaha ti kura regbo nga aboro ye ka bi ní kpuni yo nga aguyo nika degatuyo ninunga ka gia gupai ní agumbaha, ki bi rungoni, na ki fu wasa funi rogo Ziazia Kekeapai yo.—Rom. 12:15.

Oni Ye ka Bi gu Nunga Du Dagba Ndikidi AKristano

Gu dungurati nga ga aKristano rogo zegino dunduko nga riigbu nga ga zereda gbiati wasa, nga gu riigbu du aboro rogoho na nunga gbiati weneringise. Ndikidi aKristano bi gupai nga nunga nakoda aboro, ono sakparakpa nakparaka aboro. Si ki tadu were, wa i aida ka wirika gu Bayo du ngbangbaturũ yo, i naʹasada tiyó ka yugopa gayo bakere “nunga” rogo mangaapai yo.

ADezire Yekova nayamba roni na ngbarago oni ye fuoyo ka bingo gu nunga, nyemuse gbiati weneringise du rogo gayo riigbu. I idi kuti gupai nga oni nika bi gu gayo riigbu re nigu ba du nibawenehe tipa kadu rogoho.—Rom. 15:7.

[Gu kpiahe du ti kpewaraga 5]

Pauro aya fu agu aKristano nadu Korosai yo wee i ukadi tiyó na ngbadu inapai [nga nunga]

[Gu kpiahe du ti kpewaraga 7]

Ho Yesu abi agu aboro ni nadu rogo zingo, nungayo aziko ko ki gbatagene ka undoyo