Wai Rengbe Ani Kadu na Nunga Aboro Rogo Gi Kere Zegino Re?

KUMBA sa Burundi yo ati sande na gu kaza nga mararia si kini mangiko sa kina kpio. Si aidi gupai nga i oro naako ku bambungua yo nikina ipo. Ono wai ka ko aru kada bambungua yo, wa tarambiri aadunga ho ka i aoro naako koyo nani ya? Bawene abakureako ue aye ka undoko. I asungusi ko rii ngbagida, ki tona ka turã ko tipa asaa bisue ti katakata gene dagba ambia na rii agangara. I andu naako koyo du baasi ni si ki ndu naako kurogo gu bambungua nambedi ho. Fuo bete arame, ko ki hu be gako kaza.

Ho bakere bavugumo amangi ni Amerika yo rogo Buza 2005, nga gu nakuadi abambu na ki imi aboro, akumba bisue abi kura bambu sa angua atiwi kuriihe. Agu akumba re angia kungbo aboro ira gu bambu re aainongo yó ya. I mangisunge nigu uru re tona wiso ku nyemu, ki ye na amasini tipa ka yepa agu angua re ki titindihe kusayo. Ira gu bambu re ayaa: “Mi ainongo gu tambuahe ka mi fuhe fu agu akumba re si ki rengbe na gayo sunge te.”

Agu apai i naatakapandehe gbe rogo aũgbandaka apangbangaa nga kina kereapai. Gi kereapai i naatakapandehe re nasa gupai nga ka aboro berẽnga pa gu wene mangaapai nga ga nunga gbiati weneringise aboro amangaha na aʹuru dunduko ya. Ono gipai re aʹarianga gu rengo nga, aboro rogo arago dunduko duna nyemuse tiyó gbiati nunga te.

Padu boro na nunga rengbe ka wira gupai adunga taata ka mangaha rogo gi zegino duna sakparakpa rogoho gbiati gbegberẽ sino re ya. Gupai moipai rogo aboro yo nga, sakparakpa gbiati gbegberẽ sino nazaka gene fu boro ní duna diabese rogo gani raka. Badungu aboro nandu kuti gupai nga si nipatatamana boro du niʹiigirã ní ti gu nga kadu niboro nunga. Ngbaduse gbiati kiisopatise nga agu apai nagbarasapa nunga niipo.

Si ki tadu wo, badungu aboro kini peresi kina patiyo mbatayo zanga berãpa kura aboro. Agu aira ome nidu rogo ambaro yo, na aguyo nata akpata, aboro naaya tipa yó wee i nga “ndikidi akumba” bambiko nunga tiyó te. Gu kura abazogo naamanga apai wakina gure a.

Sidu tie, si naida ani sana tirani na agu asanahe nga: Tipagine si aida ti ni ani duna nunga aboro? Ya mo nunga naye na wenepai? Gine rengbe ka undo rani ani duni aboro nunga? Gu papara kekeapai naye fuo gere nika karagapai kuti agi asanahe re.

[Gu kpiahe du ti kpewaraga 3]

• Ya mo gu boro duna nunga akurani, iramungo du nga ní?

• Ya mo nunga naye na wenepai?

• Rogo gini agene rengbe oni ka yugo gupai nga nunga aboro kina tironi?