Gu Gene Yekova Angbe Fu Rani Kumbatayo Rogo
“Mo . . . ngbe fere ku mbata yo ngba ruru gene.”—ATAMBUAHE 27:11.
1, 2. (a) Waigu Yekova angbe kumbatayo fu gako aboro areme? (b) Ginipai si akodaha tipa ka gbia undo wenengai be adunguratise?
YEKOVA nga Mburu imarago na rengo, a wa ani awirikihe rogo gu paparaha ye mbata fu gere. Fugo Ko nahasa gene fu rani wa ani andu ngba ruru gene. Yekova nangbe kumbatayo fu rani ni yugo ko pai fu rani tipa gako agene. (Atambuahe 119:105) Wa kina gu bake Atambuahe nadu mbata kusayo, ani nakaragapai na tambuahe tipa wai Mbori ayugo gene fu rani na kini kparikpee niyaa: “Ako Yekova, mo yúgu pa ga gene fere, ki ngbe fere ku mbata yo ngba ruru gene.”—Atambuahe 27:11.
2 Gene sa nga gu Yekova ayugopai fu rani ngbaha areme nga rogo agu adunguratise nga ga aKristano. Ani nagbia undo wenengai be gi mbakadapai re (1) ni du ani pati ni dedede, (2) ni dega ani turani wenengai kuti gu mbakadapai re, na (3) ni karaga ani pai wenengai sa agu apaparaha du tipa agipai? Kurii gure, ani nakaragapai na tambuahe ho ani agbia agu aberãpai ni nga gu i afuhe tipa si undo rani ani nye ku “ngba ruru gene”?
Waigu Du Gaoni Padu Pati Adunguratise?
3. Waigu namangisunge sa ti aregbo dunduko asonosi gu wene sino nga ga du pati adunguratise dedede?
3 Gu kura abatungusipa Kindo aima digo nidu pati adunguratise dedede tona kinaho i aduni kindi ni agude. “Ho ani aasona ni na aunvurami rogo agu agarã nangia ga 1930, si aidanga gupai berani nga ani nisasanahe kangia ani andu ku pati dunguratise yo te,” wogu namangisunge sa ti aregbo dunduko nga ga aDezire Yekova ri agumbaha. “Ani aini gupai nga ani nika ndu andu, kinagu sa ka ani duna kaza. Gaani aborokporo anakpanga pati adunguratise te.” Wa kina gu denebi nangia Ana, gi dawirani re ‘naakpanga wa gu sa’ rogo ga Yekova ba iriso te.—Ruka 2:36, 37, NW.
4-6. (a) Tipagine kura abatungusipa Kindo naakpa tini pati adunguratise? (b) Tipagine duhe tini na nyanyakipaha ka du pati adunguratise?
4 Oni dagba agu aboro nidu dedede pati agu adunguratise nga ga aKristano, watadu oni ima da ni aguyo aamanganga gipai re dedede ya? Bete aKristano nga aguyo naberẽ gupai nga i naadu adu pati adunguratise dedede adiberã ka inoho singia i namangaha wo nirengo. Tipa bete aposo, i akepa agu adunguratise nibasasa nga gu i adu pati ni. Ho i angere ni berewe rii gu kekepai re ti digido gu regbo nga gu i aringbisipaha, ngbayo azere ka bi bange agu adunguratise nga gu i akpa pati ni.
5 ‘Si airiwonga te,’ wogu rengbe kura boro ka gumbaha. ‘Aboro areme rogo bakere kpakarakpakaraapai sidu si ni taatapai fuyo tipa i du pati adunguratise dedede te.’ Si nirengo nga ani naraka rogo gu regbo duna bakere kpakarakpakaraapai rogo. Na kurii gure, gu kpakarakpakaraapai re nikaa kio kina kumbatayo. (2 Timoteo 3:13) Ono anga gure nasaha tie na nyanyakipaha gbe ani nidu dedede pati adunguratise tee? Zanga ri wene riahe dedede nga ga toro tipa si undo rani, ani arengbanga ka maabangirani ka ru nyanyakii barabangiri gu kpakarakpakarapai nga gu gi sinoraka re asa gupai nga ani hi he te. Oni ngere, zanga koda ani tirani dedede na akuarani, ani rengbe ka duni asadiasadi rani ka mbu “ga ruru aboro gene” nabaha! (Asanza 4:18) Rengo ngaha, ho ani ada ni kporo yo ti digido gu uru nga ga nyanyaki sunge, mbugo rengbe ka sa rani ka ani dunga dedede na gu sino nga ga du pati dunguratise ya. Ono tie, ho ani adu ni pati adunguratise, zavura gupai nga ani na mbugo, ani nagbia undo tipa tirani, na ani kini ngarasi agu akuarani nga aKristano Bambu Kindo yo.
6 AEbere 10:25 nafura tipa kura nyanyaki ndupai nga gu si aida tini ani du pati adunguratise dedede. Yo ngaha re, gu mokedi nga Pauro nangarasa akurako aKristano tipa i nidungura tiyo adungura ‘ki nimangi he susi, wa bi yo ho ya gu uru re si nambeda.’ Ii, si aidanga bangirani go wa gu sa ti gu rengo nga ‘gu uru nga ga Yekova’ ima mbeda te. (2 Petero 3:12) Kangia ani ka digisoho kuti gupai nga digido gi sinoraka re koyo kindi tuturũ, ani rengbe ka tona ka mbugene fu gaani apai tipa si kisi gene be agu apai nga ga toro nga gu si aidaha, ngbatunga gu du wa padu pati adunguratise. Fuo gure, a wa Yesu azahe, ‘gu uru re ki da wa kina gbina naza.’—Ruka 21:34.
Oni Duni agu Aboro Nadegatuyo Wenengai
7. Tipagine duhe tini na nyanyakipaha tipa agude moiberãyo pati adunguratise yo?
7 Anga si rengbe kuho kaa du kina pati adunguratise sa te. Ani du wa ka ani adegaturani wenengai, kini moiberãrani kuti gupai i agumbaha yo. (Asanza 7:24) Gere nakoda awirani a. Ho gude andu ni ku sukuru yo, i naida gupai beni nga ni degetuni kuti bayugupai, zavura ho gu kurapai sa nga gu i awirikaha angbanga ni tini vurũ ya, watadu ho si awira gupai ni nga ni arengbanga ka giarogoyo te. Bayugupai ima ino gupai nga ka gu gude re asadi tini ka maaberãni, ni rengbe arengba ka gbia kandara bete undo be gu wirikapai re. Anga si tie ni wenehe, tipa agu agude garãyo narengbe tipa sukuru i moiberãyo sa gu yugopai nga gu i afuhe pati agu adunguratise nga ga dungurati kuba gupai nga ka mbu agude i ti ni rame nibasa fuo tona adunguratise tee? Rengo ngaha, dagba gu wene arengo nga gu du rogo Kekeapai yo, gu kura “apai rogo ho yo ni kpakarakpakara ha tipa rugati na paha.” (2 Petero 3:16) Ono si aidanga ani bi ga gude birĩ tipa wirikapai wa guhe anyakanga paha ya te. Mbori abingoho wo te. Ti agu aregbo i ake Baibiri, ko arugu gako paranga amoyambu tipa i ‘nidege tuyo, kini wirikipai, kini gunde ti Yekova, kini berẽpa manga agu apai nga ga gi rugute re dunduko,’ nga gu zanga tikö, bete agu akuraha aduni kpakarakpakaraha tipa agude girogoyo. (Pa Fu Rugute ni Ue he 31:12; oni ringbisingaha na Pa Amotumo 18:1-30.) Ya mo Yekova naidapai tooni ti gure be agu agude du areme?
8. Gini apai kura avunguagude naamangaha tipa ka undo awiriyo i nidegetuyo pati adunguratise yo?
8 Agu avunguagude nga aKristano ini gupai nga agu apai awiriyo awirikaha pati adunguratise nahiso bete gayo azingo nga ga toro. Sidu, gu kura avunguagude nambakadapai tipa awiriyo ra ni guruhe mbata fu ndu yo ku pati adunguratise yo tipa ho i ka da ni Bambu Kindo yo, i ki zambua na ki duna nyemu wirikapai. Gu kura avunguagude rengbe ka guruso regbo bi terevizioni watadu ni tatamana ka ka nani ka i binga ha rogo agu anyemu nga ga adunguratise ya. (AEfeso 5:15, 16) Sidu ngbatunga agu avunguagude re naumbasi agu apai nasa awiriyo i zanga maaberãyo, kini ngarasi awiriyo i moiberãyo na kini wirikipai, ringbisihe kuti garãyo na gayo birĩ.—Asanza 8:32.
9. Ginipai rengbe ka undo rani ani sonosi gaani birĩ degatue?
9 Yesu aafura fu sosono aboro ho ko aya ni wee: “Oni moiberãroni tipa wai oni adegaturoni.” (Ruka 8:18, NW ) Rogo agi auru re, pa gumba gupai re ni taatapai dedede ti mangaha. Rengo ngaha, degatue wenengai nga nyanyaki sunge, ono ani rengbe arengba ka sonosa gu birĩ nga ga degatue wenengai. Wa oni adegaturoni sa gu gumbapai moi yo mburuhe rii Baibiri watadu gu paparaha du rogo dunguratise, oni asadi ka kusa memeapai kusayo. Oni moibangironi tipa gupai nga gu bagumbapai nika gumbaha fuo gure. Oni ngereke tipa gu bangiriapai nga gu rengbe oni ka mangasunge nani gene tungusapai yo watadu rengbe oni ka mangaha rogo gaoni raka yo. Berãroni yo, oni ngere berewe rii gu bangiriapai re wa i asakapai tipaha. Oni keke guruguru kekeapai.
10, 11. Waigu kura avunguagude aundo awiriyo tipa i da ni wene adegetue, na gini abirĩ nga gu bi oni he ya si nafu undo?
10 Boro nawirika wene birĩ degatue ho du garã ni ni kindi ni betehe. Zavura mbata fu i wiriki wai ka gedapai na ka kepai, i nangarasa bete agu agude garãyo ata rengbanga tipa sukuru ya tipa i “nike guruguru apai” ti aregbo adunguratise. I nagba he ti waraga ho i ayamba agu afugo ni nga gu i naima inido tiyo nani wa ngbatunga gu nga “Yekova,” “Yesu,” watadu “Kindo.” Rogo gi gene re, agude rengbe ka wirika wai ka dungura berãyo kuti gupai i agumbaha rii tambara yo.
11 Zavura sosono agude, si naida i ngarasiyo ti kura aregbo tipa i moiberãyo sa pai. Ni ino ko gupai nga wiriko garãko adu 11 aaberãpa kura wenepai ti regbo gu bakere dunguratise nga ga aKristano, ba gu kumbagude re afu Baibiri fuko na ki sana ko ko nigbata agu averesi nga gu bagumbapai aayugo baraha. Ba gu gude re, nga guko naakeka guruguru apai, aangana wiriko wa ko azadi Baibiri. Fuo gure, gu kumbagude re amoiberãko zaaza kuti gu mbakadapai nga ga bakere dunguratise.
Oni Fura Tipa I Gi Fugo Roni
12, 13. Tipagine duhe tini na nyanyakipaha ka du ti bika agu abia nga ga dungurati?
12 Bakindo Davide abibia ki ya: “Mi ake pati ga bamotumo kirikiri, nibi bia tambuahe ni wawa, ki gumba pa ga iiriwo mangaapai dunduko.” (Atambuahe 26:6, 7) Agu adunguratise nga ga aDezire Yekova nafu bawene amamu fu rani tipa ani fura tipa gaani idapase kuari. Gene sa nga gu rengbe ani ka manga gere rogo nga ni bika ani agu abia nga ga dungurati. Gere nga nyanyaki papara gaani iriso, ono ani rengbe taata ka basapaha.
13 Kura agude nga aguyo ata rengbanga kindi ka gedapai ya nagumba agu afugo ngbariyo nga ga agu abia nga ga Kindo nga gu i nika bikaha rogo aposo nibasasa pati adunguratise. I na ngbarago tipa ka bika bia kina sa na sosono aboro. Ono tie, wa agude nika sona tooni, i rengbe ka duna gu sino nga ga zanga koda tiyo na aboro rogo bika agu abia nga ga Kindo. Zee namanga gu kura sosono aboro a tipa bika abia pati adunguratise yo. Ono tie, bika abia nga papara gaani iriso, a wa kina gu du sunge tungusapai ni papara gaani iriso. (AEfeso 5:19) Ani na’asada tirani nyanyaki tipa ka taasarimo Yekova rogo sunge tungusapai atiyo. Ani arengbanga tie ka taasarimo ko a ni tumba ani afugo rani kuari—singia ni dodoromaha watadu kia ti gure—rogo agu abia nga gu naye ngbaduseyo nga ga tambuahe tee?—AEbere 13:15.
14. Tipagine si aida wene mbakada agu apai tini nga gu ani awirikaha pati adunguratise yo mbu regbo kindi kumbatayo?
14 Ani nataasarimo Mbori a ho ani afu akaragapai ni ti regbo gu papara gaani adunguratise nga gu si aida agipai karagapai tipaha. Gere naho mbakadatise. Si nadia regbo tipa ka berã wenengai kurii dudunguro papara Fugo Mbori. Gu mokedi nangia Pauro, nangia wene bagedi Kekeapai, aini gere. Ko ake gupai nga: “Ako gu dungura nga ga gu ũkumuko nga ga Mbori tatamana na inahe!” (ARomo 11:33) Abairakporoo, si na nyanyakipaha nga oni undo gaoni aborokporo nibasasa i weteke gu tatamana nga ga Mbori, a wa duhe niyuguyuguhe rogo Kekeapai yo. Oni kpara bete regbo ti regbo gu wisigo Baibiri nga ga aborokporo tipa ka sakarogo kpakarakpakara bangiriapai na ki undo gaoni aborokporo tipa i mbakadi tiyo tipa adunguratise.
15. Gini aberãpai rengbe ka undo boro ni karagapai pati adunguratise yo?
15 Ka oni aida ka karagapai dedede ti regbo adunguratise, tipagine ka oni ambakadanga gupai oni aida ka gumbaha tini mbu regbo kindi kumbatayo ya? Anga si naida bapai te. Gu veresi nga ga Baibiri nga gu daada nga gu boro agedaha na ida watadu agu afugo sia yo ho wenengai nga gu boro agumbaha ngbaduniyo aduni gupai aboro ka duna tambuahe tipaha. Gu kura abatungusipai nasana banungusi wirikapai ko banda gu bambata karagapai fuyo du rogo kura genewaraga, tipa ka i zanganga gu mamu nga ga gumbapa gayo idapase ya.
Gu Boro Adunga Na Inohe Ya Nada Ni Iratatamana
16, 17. Gini rugute kura bakumba sa afuhe fu moyambu undo, na tipagine si adu tini na sangbanaha?
16 Pati agu adunguratise nga ga aDezire Yekova, i naatingida rani dedede na gupai nga ani gedi Fugo Mbori na auru dunduko. Mangaha wo nazambuasi rani. Si naundo rani a ani mangi agu adiaberã nga gu duna tatamana rogoyo, ki mbakadi agu aingahe du rogo sinorani, kini sovura kuti a’asada, na kini mbakadi gaani gene rogo toroyo kangia ani amoi ndurani ngba iraira gene.—Atambuahe 19:7.
17 Rogo dungu adungurati, agu abaakumba duna inohe gudu ho mbembedii tipa ka fu gu rugute nga ga Kekeapai i naringbisihe kuti agu apai nga gu si aidaha tipa rani. Gupai sa si aida ani mangihe nga ka ‘kusa ha’ beyo nigbata ani gu gayo rugute nga gu du mburuhe rii Baibiri. (Asanza 20:5) Rogo kura uru sa, zaaza moyambu undo sa asana bakumba tipa ko fu aberãpai fuko tipa wai rengbe ko ka duni gu boro duna sunge tini gbe rogo dungurati. Gu bakumba re, nga guko naima ino gu paranga kumba re wenengai, azara gako Baibiri rogo 1 Timoteo 3:3 (NW ), nga gu nagumba gupai nga agu abaakumba sia yo yo du wa ka i duna ‘weneberã.’ Ni weneringise, ko ayugu agu agene fu gu paranga kumba re rengbe ko ka duna weneberã rogo rogo gako pagume na gu kura aboro. Gu paranga wirina re azingi mbiko gu ndikidi rugute nga gu ko agbiaha re? Wa gu sa te! Ko asakirogoyo ya: “Gu bakumba re amangisunge na Baibiri, . . . sidu, mi aini gupai nga gu rugute re aaye be Yekova.” Gu moyambu undo re aduna tambuahe tipa ka manga gu rugute re, sidu awere, ko nasona kumbatayo wenengai.
18. (a) Ginipai naundo kura paranga Kristano sa ri sovura kuti asada ho ri aduni sukuru yo? (b) Gini averesi nga ga Baibiri nga gu ninaaye ku berãroni yo ho oni agbia tironi ni na asada?
18 Fugo Mbori rengbe ka undo paranga aboro a tipa i “óro be ga paranga gbegberẽ nyemuahe.” (2 Timoteo 2:22) Paranga Dezire Yekova sa nga guri nanyasi bakere sukuru bambeda arengbe ka sovura kuti asada vuru agu agarã dunduko ri adu sukuru yo ni makia ri gu kura averesi nga ga Baibiri na kini mangihe. Ri anaberã dedede tipa gu rugute nga gu duni kekehe rogo Asanza 13:20 nga gu nayaa: “Gu boro nata na boro tatamana ni adú ni iratatamana a.” Ni mangapai ringbisihe kuti ni, ri aduna rubangirise tipa ka zio bakure sa na kina agu aboro duna dudunguro irisa tipa agu andika nga ga Kekeapai. Ri aberẽhe ki ya: “Mi kia ti gu kura aboro te. Ka mi rimisitire ku dagba gbegbere badona aboro, mi aduna nyemu gupai nga ka sa ngbarago ti anakureami, na gure rengbe ka ndu na mi sa fudifudipai.” Gu ga Pauro rugute nga gu duni kekehe rogo 2 Timoteo 1:8 aundo ri a. Ko akepai ki ya: “Ka zee mángi nga ro mbiko dezire gaani Gbia ya, . . . Ono mo hí pai ahi gbe rogo wene pangbanga yo.” Ni mangapai ringbisihe na gu rugute re, ri afura fu agu akurari i adu na yo rogo bangisa riko tipa gari aida nga gu du mburuhe rii Baibiri ti agu aregbo dunduko nga gu nada ada. Ti agu aregbo dunduko i anisana ri tipa ri gumba tingidapai fu agu akurari ri aduna yo rogo bangisa riko, ri anisia gu riipai nga gu nafu gene furi ri mangi dezirepai ni birĩ tipa ga Mbori Kindo.
19. Tipagine paranga kumba sa arengbanga tini ka ru nyanyakii barabangiri agu a’asada nga ga gi zegino re ya, ono ginipai nafu ome nga ga toro fuko?
19 Kangia ani ainga ti “ga ruru aboro gene,” Fugo Mbori rengbe ka undo rani tipa ani rugu ndurani. (Asanza 4:18) Paranga kumba nga guko naraka Afrika yo aini gere ti kina boro gupai nadu tipa tiko. Ho guni sa dagba aDezire Yekova yo andu ni ka biko, ko aidi pa wisigo Baibiri. Ko aduna ngbarago be gupai ko aawirikaha, ono ni kina ipo, ko arimisi tiko kurogo gbegbere kpamiatise sukuru yo. Fuo gure, ko ki ingi kurogo gbegbere sino raka nga ga wasiwasi apai. “Sangbakpotore yo aarungosi re kindi, sidu si ki idi gupai nga mi mbu nduge ku pati adunguratise yo,” wogu ko akusihe. Kusa, ko atona ka du berewe pati adunguratise. Gu paranga kumba re akusi gi fugo naye re: “Mi abi gupai nga bangua ndupai tipa agi apai dunduko re aye be gupai nga mi akoba be gomoro rogo toroyo. Mi aawisigonga pai nisare te. Si du mi arengbanga tini ka ru nyanyakii barabangiri asada ya. Fuo gure, mi atona ka geda Ngbaõbambu Sinziri na Oni Zingi Rameyo! Tooni tooni, mi agbia gimi ome berewe rogo toroyo na ki girisi gimi raka. Gere angia wene dezirepai fu agu aboro nga aguyo nabi agu a’ariapai mi amangihe. Mi azi bapatiza, na mi awere na ngbarago.” Ginipai nafu ome fu gi paranga re ko dibe gako rungbura nga ga borose? Ko agbia gako ome berewe rogo toroyo be wisigo Baibiri dedede nisako.
20. Waigu rengbe paranga boro ka sovura kuti agu azubohe nga ga Satana?
20 Paranga aKristano, oni areme nizubozuboroni! Kangia oni ka sovura kuti ga Satana azubohe, oni du wa ka oni adia gu riahe nga ga toro dedede kutii kpotoroni yo. Bake Atambuahe, nangia kina paranga nitiko a wa gopai ayugoho, arugu tiko na gipai re. Ko afu tambuahe fu Yekova tipa fu ko Fugo ko, tipa ‘paranga boro rengbe ka giriso gani gene.’—Atambuahe 119:9.
Agu Agene Dunduko Mbori Nika Ngbe fu Rani Ngbaha, Ani Andu Kina Ngbaha
21, 22. Tipagine si aidanga tini ani digisihe kuti gupai nga gu gene nga ga rengo nibakpakarakpakaraha kisusi ya?
21 Yekova angbembatayo fu gu rikaaboro nangia aYisaraere Ezipeto yo kurogo Ringara Mokido. Gu gene ko asiaha avura duni gu bakpakarakpakara gene nga gu si aidanga si du wo ya, kuti gu bipai nga ga aboro. Kuba gupai nga ko ndu na yo ngba gu gene nawiri du taata, nga gu naandu nibasa bangiri gu Baime nga Mediterena, Yekova andu na gako aboro ngba gu kpakarakpakara gene nadu ngbii ngume yo. Ono tie, gere angia weneringise be Mbori nirengo. Wa si avura duni guruhe, gu gene nga ga bangiri baime re arengbe ka ndu na aYisaraere kurogo gu ringara nga ga kere aFereseto. Ni sia ko gu kura gene, Yekova abanda gako aboro be gupai nga i ka ima ti kurogo vura na aFereseto.
22 Teketeke a, gu gene nga gu Yekova angbe fu rani kumbatayo ngbaha areme rengbe ka wira gupai nga si nikpakarakpakaraha ti kura aregbo. Na aposo nibasasa, ani na ringbisiringbisi regbo tipa agu asunge nga ga aKristano, kodihe na agu adunguratise nga ga dungurati, wisigopai nisase, na sunge tungusapai atiyo. Gu kura agene rengbe ka wiraha ya si taata gbe. Ono tie, ni peka ani kina fuo gu gene nga gu Mbori angbe fu rani kumbatayo ngbaha ka ani rengbe tini ka da rogo gu rago nga gu ani amangasunge nyanyakii ka da rogo. Sidu tie, ani ndunga tie kumbatayo na dia gu nyanyakipa yugopai nga gu naye be Yekova na ani ki nyenga “ngba ruru gene” nyeanye kindi!—Atambuahe 27:11.
Oni Rengbe ka Sakarogoyo?
• Tipagine si aida tini ani du pati agu adunguratise nga ga aKristano dedede?
• Ginipai rengbe avunguagude ka mangaha tipa ka undo awiriyo i moiberãyo pati adunguratise yo?
• Duni wene badegetue nakoda ginipai?
• Ginipai rengbe ka undo rani tipa ani karagapai pati adunguratise yo?
[Caption on page 16]
Du pati agu adunguratise nga ga aKristano naundo rani ani banda ga Yekova uru berãrani yo
[Gu kpiahe du ti kpewaraga 18]
Dungu agene gudu ho tipa ka taasarimo Yekova pati agu adunguratise nga ga aKristano