Oni Yugu Gu Sino Nga ga Sungudopai!
“Mi asúnguda Mbori nga [ga] gi bata; gi Mbori agía pa re.”—MIKA 7:7.
1, 2. (a) Waigu gbegbere sino aimisi aYisaraere ngbakungbo yo? (b) Ginipai rengbe ka manga gu Kristano asonosanga ruru sino ya?
DUNGU apai gu duho rogo raka yo rengbe ani ka bihe kini kido kuti ni watadu zanga kido kuti ni, nibi wai du gaani sino sani. Ho aYisaraere aduni ngbakungbo yo, i afu mana fuyo rogo iiriwo gene. Si aidi i ngere pati yo kirikiri ka bi gu ngatarĩrago i adu rogo na ki duna tambuahe fu Yekova tipa fu ko gayo riahe fuyo. Ka gure ayugu wene sino. Kuba gure, i anatingidipa gu dungu ngbatunga arigo nadu Ezipeta yo na kini kpakanahe ya mana aangbanga ngbayo te. Nga gu gbegbere sino!—Pa Geda Aboro 11:4-6.
2 Gu sino nga ga Kristano rengbe kinawo areme a ka sa apai si ningere ni wenehe watadu si ningere ni gbegberehe. Zanga duna ruru sino, Kristano rengbe taata ka ingisa gani ngbarago, na gure rengbe ka duni kerepai, mbiko wa Nemaya agumbaha: “Ga Yekova ngbarago nga [gaani] . . . ome.” (Nemaya 8:10) Wene sino, nga ga ngbarago naundo rani ani du nyanyakii na si kini zugasi pazereda na kpamiatise rogo dungurati.—ARomo 15:13; AFiripoio 1:25.
3. Waigu ruru sino aundo Yeremaya ti aregbo nga ga fudifudiapai?
3 Wa ko avura kaa raka rogo kpakarakpakara aregbo, Yeremaya ayugu ruru sino. Zavura ho ko aduni ni dezire gu bagbegbereapai namangi ti regbo tigo Yerusarema rogo 607 Mbata fu Gaani Regbo, ko arengbe kindi a ka bi wene papara apai. Ka bangiri Yekova agonga ti aYisaraere te, na si adu nga gu rikaaboro re abata abata. Yeremaya akepai rogo gu buku nga Abia Kpenunga ki ya: “Ga Yekova inaapai anyasa nga wa sa te, gako weneringise adiga nga a te. Si ni vovo ho na awiso dũ; ga yososopai du ni bakere he.” (Abia Kpenunga 3:22, 23) Rogo agu apai namangi bakurukusayo dunduko, gu ga Mbori amoyambu nadu rogo bakpakarakpakaraapai agbata gupai nga ka kakuti wene sino, ka du a na ngbarago.—2 AKorindo 7:4; 1 ATesaroniko 1:6; Yakoba 1:2.
4. Gini sino Yesu adu nani, na waigu si aundo ko?
4 Fuo susa agarã sita kama fuo raka Yeremaya, Yesu agbia undo tipa hipai mbiko gako wene sino. Ani nagedaha ki ya: ‘Yesu ahi pa ngbunduru ngua mbiko gu ngbarago nadu fuko kumbatayo, ki basapa gaha zee, ki ima sunga pati kumbabe gu mbata nga ga Mbori.’ (AEbere 12:2) Ka si avurangia kina gini ngbatunga sogote watadu rungosi ka Yesu agbia tiko nani—zavura gu ima nangia ga ngbunduru ngua—ko amoi berãko tipa gu “ngbarago nadu fu ko ku mbata yo.” Gu ngbarago re angia gu mamu nga ga dia gbarasarimo kusayo ti ga Yekova bakere pagbia na pa sa rimo Ko si du ziazia wa sa na pa gu maabangirise a nga ga ye na dungu amaku fu agisangbaa rogo gu raka nika du kumbatayo.
Ani Di gu Sino Kugume nga ga Sungudopai
5. Gini ngbatunga kpiapai rengbe gu sino nga ga sungudopai ka undo rani ani duna ruru bipai rogo?
5 Ka ani sonosi sino berã wa gu nga ga Yesu, ani zanganga duna ga Yekova ngbarago te, ka si vura du nga apai amanganga rogo gu gene na ti gu regbo ani amaabangirani si mangi tini vurũ te. Gu nebi nangia Mika ayaa: “Tipa re, mi angéra koyo du Yekova ni, mi asúnguda Mbori nga [ga] gi bata.” (Mika 7:7; Abia Kpenunga 3:21) Ani rengbe a ka yugo gu sino nga ga sungudopai. Rogo gini gene? Rogo dungu agene. Pai sa nga, ani rengbe ka berã gupai nga gu wirina duna pagbia beni, ni mangi ingahe na kini berẽhe ya si naida i rugu ni niipo. Gu sino nga ga sungudopai nika sa rani ani wisigi gupai nga, ‘Ya mo ni mangi ingahe nirengo, watadu mi du duna ingahe? Kangia ni mangi ingahe, si rengbe ka du nga Yekova nambu agu apai re ambu si nimangi mbiko ko naberãha ya gu boro re ambakada sino ni ambakada, na kini berẽhe ya si aidanga i fu nyanyaki arugute funi tee?’
6. Waigu rengbe gu sino nga ga sungudopai ka undo gu boro nasota na gu fudifudipai du tipa ni?
6 Si rengbe na ida gupai nga ani duna gu sino nga ga sungudopai ka pai duho nafuda rani watadu ka ani aasota ka diabe kura rungbura sa. Ani yaa ani sana Yekova tipa ko undo rani, ono gupai re kini ndu kindi kumbatayo. Ginipai tie ka mangi? Si naida ani nimangi gupai kindi du ku vuru berani tipa ka nyasa gupai re na fuo gure ki duna idapase kuti gu fugo Yesu nga: ‘Oni nisánahe kindi tipa he, i ki fuhe fu roni; oni nigbáta he kindi, oni ki bihe; oni ningóka ngbadimo kindi, na i ki uru he fu roni.’ (Ruka 11:9) Oni nikparikpee kindi, na kini sungudi Yekova. Ti gu regbo da bangiriko na rogo gu gene da bangiriko, Yekova akaragapai sa gaoni akparakpee.—1 ATesaroniko 5:17.
7. Rogo gini gene rengbe gu sino nga ga sungudopai ka undo rani ani bi gu giriso gaani giarogo Baibiri yo nga gu nasona kina kumbatayo?
7 Wa agu asangbanebi nga ga Baibiri amanga, gaani giarogo Kekeapai yo nada ziazia. Ono tie, ti kura aregbo, ani rengbe ka berã gupai nga, regbo ruga kurapai ima ima kisusi. Kangia si ambedanga ka kura ti gu regbo ani aidaha tini te, ani na nyemu sungudo gupai re? Ani tingidi gupai nga, si aru aru bangiri Yekova kaa yugo ‘ziazia gbugbu apai nga ga Kristo’ tooni tooni rogo aregbo nibasasa na vuru gu regbo nasusi agarã 4,000. (AEfeso 3:3-6) Ya mo ndupai ho tie berani, ka du zanga zerangbaduse? Ani nakapa kuti gupai nga Yekova sia ‘ruru kangara moyambu’ tipa ni ‘fu gayo riahe ti ragoho’ fu gako aboro? (Matayo 24:45) Tipagine ani akiso gene tini be gaani ngbarago nga ga Mbori mbiko gupai nga ani agianga rogo kura apai yo dunduko te? Ani tingidi gupai nga, Yekova du nadiaberã tipa gu regbo na gu gene ko ka yugo gako apai nga ga “rondo” rogo.—Amosa 3:7.
8. Waigu ga Yekova zerangbaduse nafu undo fu dungu aboro?
8 Kpoto kura aboro yo rengbe ka zera mbiko i naberãha ya fuo dungu agarã nga ga ruru sunge, i arengbanga ka raka kumbatayo ki bi “gu bakere iiriwo rago nga ga Yekova” te. (Yoere 2:30, 31) Si ki vura du wo, ani rengbe arengba ka ngarasa yo ho i abi gu papara apai ni duni wenehe. Petero afu rugute ki ya: “Oni . . . ini he ya gu hipai nga ga gaani Gbia si nga gene bata.” (2 Petero 3:15) Ga Yekova zerangbaduse mbugene fu dungu amirioni kura ruru ngbadu aboro yo tipa i wiriki rengo. Anga gure ni bawenepai kisusi tee? Kurii gure, wa Yekova nikaa du kindi na zerangbaduse, kinawo a regbo nikaa du berani ni bakerehe tipa ani ‘mangi pa gaani bata tigaani ni gunde na kio.’—AFiripoio 2:12; 2 Petero 3:11, 12.
9. Ka ani duna angbanda rogo gupai rengbe ani ka mangaha rogo ga Yekova sunge yo, waigu rengbe gu sino nga ga sungudopai ka undo rani ani duna hipai rogo gupai re?
9 Gu sino nga ga sungudopai naundo rani ka kpotoraniyo zerenga ho rungosi, kaza, gbinza, watadu kura fudifudipai aka ni na gene berani ti manga gu sunge nga ga Kindo ya. Yekova naida gupai berani nga ani mangisunge ko na ngbaduraniyo dunduko. (ARomo 12:1) Ono tie, Wiri Mbori, nga guko du “nunga rurungbura boro . . . ti ko na [nunga] irazingo ahe a,” aidanga pai berani susi gu rengbe ani nzunzu ka mangaha te; Yekova amangangaha wo a te. (Atambuahe 72:13) Sidu, i nangarasarani ani mangi gupai rengbe ani arengba ka mangaha, kini sungudi apai daho si ka ariatihe ni—singia rogo gi sinoraka re watadu rogo gu nika ye. Ani tingidi gupai nga: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko, na ti gu pai oni amangi fu gako aboro, a wa oni namanga pa yo awere kindi.”—AEbere 6:10.
10. Gini gbegbere sino nga ga zanga sinombori si aida gu boro duna gu sino nga ga sungudopai tini ka nehe? Oni sakinga rogoyo.
10 Gu sino nga ga sungudopai naundo rani a ani ne ruko. Bete agu aboro nada ni abasamungu kuti ndikidi pambori aadunga na nyemu sungudopai te. I avura berã gupai nga apai gu duho si aida riigbu ariaha, singia rogo giarogo Baibiri yo watadu rogo gu mbakadaapai du rogo riigbu. Ono i akpa ti ino gupai nga ga Yekova toro nafõngbadu ruru kangara moyambu yo tipa manga ariapai ti gu regbo da bangiri Ko, angianga ti gu regbo ani aberãha ya si naida i mangihe tini ya. Na agu a’ariapai dunduko ka i mangihe, si du wa ka si duna ngbanya dagbaha na gupai Yekova akpinyemuhe, angianga gaani aberã ya. Abasamungu kuti ndikidi pambori nambu gene fu ruko si irasi gayo berã na ki sa yo i koto. Ono wa ka i adi ga Kristo sino berã kugume, ka i abanda gayo ngbarago abanda na ki nye dagba ga Yekova aboro.—AFiripoio 2:5-8.
11. Waigu rengbe ani ka mangasunge na regbo sungudopai si fu undo, kini pefuo ga da kpiapai?
11 Rengo ngaha, duna gu sino nga ga sungudopai ayugonga gupai nga ani duni airanyomoro watadu ki sungu asungo gbua te. Apai kinaho si aida ani nimangihe. Ni kpiapai, si naida ani mangisunge gbe rogo wisigo Baibiri nisarani na sidu kini yugu nyemu agu apai nga ga toro wa kina gu gu ruru anebi nadu mbata na zavura amaraika a anayugoho. Ni fura ko tipa ngbatunga gu nyemupai re, Petero ayaa: “Tipa gi bata re anebi anasana he ti ni ki niwisigi paha nyanyaki . . . Agi apai re amaraika akpi nyemu ka wisiga ha.” (1 Petero 1:10-12) Anga kina wisigopai nisase nyakipaha sa te, ono du pati adunguratise dedede na kparakpee a na banyanyakipaha kinawo. (Yakoba 4:8) Agu aboro inipa gayo azingo nga ga toro ni dia yo gu riahe nga ga toro dedede kutii kpotoyo yo na kini kodi tiyo na agu akurayo nga aKristano, i nayugo gupai nga i ima dia gu sino berã nga ga Kristo.—Matayo 5:3.
Oni Duna Ruru Bipai
12. (a) Gini ranirii Adamu na Eva agbataha? (b) Sangbana ndu aboro ngba gu gene nga ga Adamu na Eva ningia gine?
12 Ho Mbori akusi bambata aboro ue ni, ko ambu gu rengo nga ga rũ andika tipa rurupai na irairapai kina kubeko. (Bambata Pai 2:16, 17) Adamu na Eva aida ka duna ranirii zanga ga Mbori rugute, na sangbana gere nga gu zegino ani abihe pati rani areme re. Gu mokedi nangia Pauro ayaa: “Gbegberẽpai [ingapai, NW ] akuru ku zegino mbiko boro sa, kpio ki du mbiko gbegberẽpai [ingapai, NW ]; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Gu pangbanga nga ga aboro tipa agu agarã sita kutu susi natona ti regbo Adamu ima yugo gupai nga afugo Yeremaya nga rengo: “Mi inihe wenengai, ako Yekova, ya gu boro i ambakadi ni rogo sende, gani gene kubeni te. Anga si fu gu boro nata tipa ka ruga gani diandue te.” (Yeremaya 10:23, NW ) Ka idaha ya afugo Yeremaya nga rengo ayugonga gupai nga aboro ima idaha ya pai dibe yo te. Si nga ndikidipai. Si nasakapai tipa gu dungu kama agarã dunduko “boro nidu . . . ni gbia ku ri kura ni ka imisa ni” bambiko aboro naazogatiyo na ranirii zanga ga Mbori arugute.—Batungusipai 8:9.
13. Gini ruru bipai du aDezire Yekova nani tipa gupai rengbe aboro ka mangaha?
13 Nibi gu raka du aboro rogo re, aDezire Yekova ini gupai nga angbanda kinaho tipa agu apai rengbe aboro ka mangaha rogo gu sinoraka du awere re. Wene sino rengbe arengba ka undo rani ani banda gaani ngbarago, ono anga si nga ziga tipa apai dunduko te. Rogo tonatona agu agarã nangia ga 1950, boro Amerika ni barumbatayo rogo pambori akusi gu buku i abagihe gbe, rimoho angia Gu Ome nga ga Wene Berãpai (rogo pa-Ngirisi). Gu buku re afu gu berã nga aboro rengbe arengba ka diabe badungu aũkota ka i mangipai tipaha na ruru berã. Nirengo, wene berã gu ngbaangba. Ono agu apai namangi aboro nayugo gupai nga inohe, birĩ, kumuko, na gu kura apai nakiso gene akiso be agu apai rengbe ani ka mangaha wa du ani nibasasa. Na rogo zegino nabaha, apai ima kio kisusi gu rengbe aboro ka nyasa riipaha wenengai—ka i vura duna kina gini wene berã vurũ!
14. Ya mo aDezire Yekova na gbegbere sino tiyo? Oni sakinga rogoyo.
14 Bambiko pa bi aDezire Yekova ngbatunga agu apai re rogo ruru gene bipai, aboro nakitangbaanga yo ti kura aregbo ya i na gbegbere sino tiyo. Kuba gure, i na nyemu gupai tiyo nga ka gumba pa Guko fu aboro rengbe ka mbakada gayo raka nyeanye kindi. Rogo gipai re a, i nawirika gu sino berã nga ga Kristo. (ARomo 15:2) Na i namanga gu sunge nyanyakii nga ga undo aboro i duna wene ngbanya dagbayo na Mbori. I ini gupai nga ti digidoho, gere akusa bakere wenepai kisusi.—Matayo 28:19, 20; 1 Timoteo 4:16.
15. Waigu gu sunge nga ga aDezire Yekova ambakada ga aboro raka?
15 ADezire Yekova azanganga maaberãyo fuo agu apai namanga dagba aboro te—gbe nga gu bibiriko mangapai adunga kuti Kekeapai ya—nga gu ke pati yo kirikiri. Mbata fu gu boro duna nyemu rengo da ni guni sa dagba aDezire Yekova yo, ni nimangi a’ariapai, dedede nga ka diabe gu gbegbereapai naima ziobaha tini nga gu angbanga ti Mbori ya. (1 AKorindo 6:9-11) Sidu, aDezire Yekova aundo agu aboro ngbaduyo yo akaragapai tipa i dibe kpibuda, i mbu inga mangasunge na kere angua nga gu naima ziobaha tiyo, i mbu wasiro, na gu ba ake naima ziobaha tiyo. Ngbatunga agu aboro na’aria asino yo re awiriki wai ka ngerafuo gayo aborokporo nitiyo na rogo ruru gene. (1 Timoteo 5:8) Ho i aundo aboro nibasasa ni na aborokporo ngba gi gene re, si naumbasi gu kpakarakpakaraapai du dagba aboro—ka agu aboro angenga berewe kere angua aima ziobaha tiyo ya, na agu avura du dagba aborokporo ki du gbua ni betehe, na gu kura dungu apai. Ni du yo ni agu aboro ringara duna irisa tipa ndika na ni undo yo kura aboro tipa i aria gayo raka si duni wenehe, aDezire Yekova naumbasi gu sunge nga ga agu abamangisunge fu irangbii du gayo sunge nga kaa ngerafuo gu fudifudiapai du dagba aboro.
16. Tipagine aDezire Yekova naarimisonga tiyo tini kurogo gu mangaapai nga ga zegino tipa ye na ariapai ya?
16 Sidu, ya mo aDezire Yekova ima aria gu sino mangaapai du rogo zegino? Wenepai, vuru agu agarã bawe nga gu susi, bange agu aDezire du zaaza akii ti gu bete bangeyo nangia 3,800,000 ki da ti gu bangeyo du mbembedii kuti 6,000,000. Gure nayugo gupai nga bange aguyo nada ni aDezire vuru gu regbo re adu nga 2,200,000, nga aguyo dungu yo dagbayo yo ambu iraira mangaapai ho i ada ni ni aKristano. Badungu aboro ambakadi gayo raka! Si ki vura du wo, gi namba re ni wiri umbaha gbe ho i aringbisaha ni na wai namba aboro akii rogo zegino vuru gu bangisa regbo re—nga 875,000,000! ADezire Yekova abihe ni mburu ngbarago kaa undo agu aboro ngbaduyo yo akaragapai, wa vura ino yo gupai nga kina bete aboro gbua dagba ngbatunga aboro nika dia gu gene nandu sa unga vurũ. (Matayo 7:13, 14) Wa vura duhe nga aDezire nasungudo agu a’ariapai nika manga rogo zegino nabaha kurogo gu weneapai nga gu rengbe kina Mbori sa ka mangaha, i arimisonga tiyo kurogo gu mangaapai nga ga zegino tipa ka ye na ariapai te, nga gu i naatonaha dedede na wene sogimaapai ono si kini nyasi dedede rogo biriki watadu zuu.—2 Petero 3:13.
17. Ginipai Yesu anamangaha ka undo agu aboro nadu pati ko, ono ginipai ko amangangaha ya?
17 Rogo dia yo gi gene re, aDezire Yekova nayugo kina ngbatunga gu kido kuti Yekova nadu ti Yesu ho ko aduni auru kpotosende. Mbata kusayo rogo bambata kama agarã, Yesu anamanga gu iiriwoapai nga ga husa aboro. (Ruka 6:17-19) Zavura akpikpiyo, ko azingisi yo a. (Ruka 7:11-15; 8:49-56) Ono ko adianga gu fudifudipai kusayo nga kaza watadu ka diabe gu vurarani nga kpio te. Ko aini gupai nga gure angianga ga Mbori wene regbo tipa mangaha wo te. Mbiko du ko na bakere tandu nga ga rengberengbe boro, Yesu arengbe arengba ka manga dungu apai tipa ka nyasa na gu kpakarakpakaraapai nangia ga birĩ zogarago na gu kpakarakpakaraapai nadu dagba aboro. Si nawiraha ya bete agu aboro nadu ti gako regbo aaida gupai nga ko di ome zogarago kubeko na ki nyasi na gi kpakarakpakaraapai re, ono Yesu aka gupai re. Ani nagedaha ki ya: “Ho aboro abi gu pai ni i aina pai ti ni ko amangi re, i ki nimo ka ya, ‘Gi kumba re ko nga gu nebi ni rengo naye ku zegino!’ Yesu ki nimo ka ina ha ya i nikaye ka zia ko, ka sa ko ni bakindo, ko ki di tiko berewe ku ri bagangara yo ni sa ko.”—Yoane 6:14, 15.
18. (a) Waigu Yesu naayugo gu sino dedede nga ga sungudopai? (b) Waigu ga Yesu sunge a’ariatihe natona rogo 1914?
18 Yesu aka gupai nga ka rimiso tiko kurogo agu apai nga ga birĩ zogarago watadu ka rimiso tiko dunduko kina kurogo mangasunge rungorungo aboro mbiko ko aini gupai nga regbo ata danga fuko ko di gu ome kubeko nga ga bakindo na kini mangi agu asunge nga ga husa aboro dunduko rogo arago dunduko te. Zavura fuo dakpa ko ku ngbangbaturũ yo ki duna gu unga nga ga toro nga gu kaa kpinga ya, ko aduna nyemu gupai nga ka sungudo ga Yekova ringbisiringbisi regbo mbata fu tona ko ka mangapai. (Atambuahe 110:1; Amokedi 2:34, 35) Ono tie, natona ti gu regbo i amoi ko auru mbatabakindo ni Bakindo ga Mbori Kindo rogo 1914, ko nandu kumbatayo ‘ki ta dia be apai ki nindu ka dia be apai.’ (Yugoti 6:2; 12:10) Nga gu tambuahe du ani nani tipa rafu gako sunge bakindo, baraho gu kura aboro nga aguyo nayaa aKristano nga yo asia gupai ni nga ka nye zanga ino ga Baibiri ayugopai tipa Kindo!
Sungudopai—Mburu Gberarago Watadu Mburu Ngbarago?
19. Ti gini regbo sungudopai afu ‘kaza fu ngbadu boro,’ na ti gini regbo duhe ni mburu ngbarago?
19 Soromo aini gupai nga sungudopai rengbe ka sa gberarago ti boro. Ko akepai ki ya: “Ima na pa maabangirise nafu kaza ngbaduse.” (Asanza 13:12) Rengo ngaha, kangia boro nasungudo gupai adunga mburuhe tini ya, ngbaduni rengbe ka kaza ka gupai re amanganga ya. Ono tie, sungudo agu apai nga ga ngbarago—isoke wa gu nga pumbo rogatise, pa batika gude, watadu pa gbiatise na agu aboro ani akpinyemu yo—rengbe ka hiiso ngbaduraniyo na gu maabangirise nga ga ngbarago mbata fu da uru gupai re. Gu ngbarago re rengbe ka kio gbe ka ani mangisunge ni tatamana na regbo sungudo gupai re, kini mbakadi tirani tipa gupai naye re.
20. (a) Na kido, gini iiriwoapai ani asungudo ka bihe? (b) Waigu rengbe ani ka gbia ngbarago baraho ani asungudo ga Yekova aringbisapai ni si mangi?
20 Ho du ani ni na kido nabaha nga agu apai ani asungudoho amanga amanga—ka ani avuranga ino gu regbo vurũ si ka manga tini ya—regbo sungudo gupai re funga ‘kaza fu ngbaduse’ te. Ruru airisi Mbori ima ino gupai nga ga Kristo Zogarago Tipa Agarã Kutu ima mbeda ka da. I na kido ya i abi digido kpio abi na akaza. Na kakaka maabangirise, i nasungudo gu regbo na ngbarago i ka dia dungu kutu amirioni aboro kugume, kodihe na agu abadiangbayo naima kpiko. (Yugoti 20:1-3, 6; 21:3, 4) Ti gi regbo nga ga gbarasa aũkpotosende re, i nagbia ngbarago be gu ndikidi maabangirise nga ka bi Paradiso i nasigiraha auru kpotosende. (Yesaya 35:1, 2, 7) Nga gu pa tatamana tie ngaha kaa mangasunge na gu regbo sungudopai re na tatamana, ki “nimángi ga Gbia sunge zaza dedede”! (1 AKorindo 15:58) Oni ndu kumbatayo kindi kaa dia gu riahe nga ga toro. Oni sonosi gaoni dawedawe ngbanya dagbaroni na Yekova susi gu nidu mbata. Oni gbata kura aboro nga aguyo ngbaduyo yo afõyo i mangisunge Yekova. Oni ngarasi agu akuaroni nga aidipase. Oni mangisunge wenengai gbe na gu regbo Yekova nika mbuhe kindi. Fuo gure tie, ka sungudo Yekova afunga ‘kaza fu ngbaduroni’ ya. Kuba gure, si ahiiso ngbaduroniyo na ngbarago!
Oni Rengbe ka Sakarogoyo?
• Waigu Yesu ayugu gu sino nga ga sungudopai?
• Rogo gini apai si aida aKristano duna gu sino nga ga sungudopai?
• Tipagine du aDezire Yekova tini na ngbarago ka sungudo Yekova?
• Waigu rengbe ani ka sa sungudo Yekova ni mburu gaani ngbarago?
[Gu kpiahe du ti kpewaraga 23]
Yesu ahipai mbiko gu ngbarago nadu ni moimoihe barabangiriko
[Gu kpiahe du ti kpewaraga 24]
Zavura fuo dungu agarã nga ga sunge, ani rengbe arengba ka banda gaani ngbarago
[Gu kpiahe du ti kpewaraga 26]
Dungu amirioni aboro ambakadi gayo raka ni da yo ni aDezire Yekova