Yekova Naberãpa Roni Aberã

‘Oni bá agu apai nafuda roni ku auru Mbori; mbiko ko naberãpa roni aberã.’ —1 PETERO 5:7.

1. Rogo gini nyanyakipa apai yo du kparakparapai rogoho dagba Yekova na Satana?

YEKOVA na sinoko kia ti ga Satana. Gu boro nabi gupai nga Yekova ima yamba ni koyo du ko ni ka Yekova mbunga ni te, ono kina Bakitingbanga sa nasoga ni. Gi kparakparapai re si nitangaratangaraha rogo gu sigirasigira buku nayugobara apai. Nibi gu mangapai nga ga Satana a wa duhe nitangaratangaraha rogo gu buku nga Eyobo du rogo Ziazia Kekeapai yo, gu buku nga Encyclopædia Britannica (1970) naya wee: ‘Ga Satana sunge nga ka ta rogo kpotosende ka gbata aboro watadu gayo mangimangiapai tipa ka kitangbaanga yo mbikoho ni agu aboro namanga irairapai; rogo gi gene re, gako mangaapai nikparakparaha ti gu mangaapai nga ga “bangiri Yekova,” nga gu ninaata rogo kpotosende dunduko kini nyakasi agu apai duni ruruhe (2 Pekapai 16:9). Satana nabisirapa gu weneringise abisira nga ga aboro gbiati pa gayo wene mangaapai nga gu Mbori nambugene fuko ko asadihe kina vuru bete ringbisiringbisi regbo yo.’ Ii, nairiwo gu kparakparapai du dagba Yekova na Bakitingbanga re!—Eyobo 1:6-12; 2:1-7.

2, 3. (a) Wai du wene yuguyugu rogo gu fugoyo nga “Bakitingbanga” tipa gupai namangi Eyobo? (b) Wai Ziazia Kekeapai ayugo gupai nga Satana nandu kumbatayo kindi na kitangbaanga ga Yekova amoyambu auru kpotosende?

² Gu Fugo nga “Bakitingbanga” nga sasa gu pa-Giriki du rogo yo nga, “gu boro nakitangbaanga kura boro niziree,” watadu “gumbapai niziree ti rimo boro.” Gu buku nga Eyobo nayugo gupai nga Satana akitingbaanga ga Yekova ruru moyambu nangia Eyobo ya ko nairiso Mbori mbiko kina agu ahe du beko, si naya wee: “Satana ki karaga ha fu Yekova ki ya, ‘Eyobo nagunde ti Mbori gbua?’ ” (Eyobo 1:9) Gu pangbanga du rogo gu buku nga Eyobo nayugo gupai nga wa ko avura du ngba a’asada nifudifudi ko vurũ, Eyobo ambedi kina koyo du Yekova ni gbe. (Eyobo 10:9, 12; 12:9, 10; 19:25; 27:5; 28: 28) Fuo gu bakere asada nati kuriko re, ko aya fu Mbori wee: “Mi agi pa ro be kina gu giapai nga ga tue; ono awere bangire nabi ro.”—Eyobo 42:5.

³ Ya mo tona ti gu regbo nangia ga Eyobo da ku awere, Satana aima mbu kitangbaanga ga Mbori ruru amoyambu? Oó wa sa te. Gu buku nga Yugoti nayugo gupai fu rani nga ti gi yangara aregbo re, Satana nandu kumbatayo kindi na kitangbaanga ga Kristo mbedimbedi aKristano na nirengo gbiati kitangbaanga gu ruru abadiangbayo a. (2 Timoteo 3:12; Yugoti 12:10, 17) Wa duhe were, si naida gupai berani gbe nga ndikidi aKristano dunduko nga ka fu tirani fu gaani Mbori, nga guko naberãpa rani aberã, nga Yekova, kini irisi ko rogo dudunguro nyemuse, na rogo gi gene re, kini sa gu kitangbaanga aboro Satana amangaha niziree. Ho ani nika mangaha ni wo, si nika fu ngbarago ku ngbadu Yekova yo.—Asanza 27:11.

Yekova Nagbata Agene ka Undo Rani

4, 5. (a) Kuba gupai Satana amangaha, ginipai Yekova angera tigako tipaha auru kpotosende? (b) Ka singia ani nika bi ga Yekova nunga tipa undo rani, ginipai rẽarẽ fu rani tipa ani mangihe?

⁴ Bakitingbanga nata auru kpotosende, kini gbata boro ka kitangbaanga ni na ka rita ni. (Eyobo 1:7, 9; 1 Petero 5:8) Kuba gure, Yekova nagbata gene tigako ka undo agu aboro naida gako ome. Gu nebi nangia Anani aya fu Bakindo Asa wee: “Bambiko bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni.” (2 Pekapai 16:9) Nga gu kparakparapai du bangbanda ga Satana kpariapai nisogote na ga Yekova ngera fuo aboro rogo nyemuse!

⁵ Anga Yekova namaa rani amaa rogo gbuko yo tipa ka bi gaani irairaapai na gu ani azanga mangaha te. Bake Atambuahe akepai ki ya: “Ka si nidu wa mo nakparia pa irairaapai, Ako Gbia [Yekova], da rengbe na ru?” (Atambuahe 130:3) Gu karagapai si ayugoho nga: anga boro sa ka ru te. (Batungusipai 7:20) Ka ani mbedi koyo du Yekova ni na ngbadurani yo dunduko, bangiriko nika du ku rirani, angianga tipa ka bi rani nigbegbere aboro ya, ono ka bi gaani asadatise na ka karagapai kuti gaani akpee tipa undohe na pa vu rani ti ingaapai. Gu mokedi nangia Petero akepai ki ya: “Bambiko bangiri Gbia du fuo ruru aboro, na tuko nihahaha tipa gayo akpe. Kpakpu Gbia du kuti amangi gbegberẽpai.”—1 Petero 3:12.

6. Wai du gupai nangia ga Davide nipa wasa ki du nipa rugute fu rani a ti bangisa regbo sa?

⁶ Davide angia kpakpa boro na ki ingipai a nikerehe. (2 Samuere 12:7-9) Ono ko afu ngbadukoyo fu Yekova na ki mbedi koyo du ko ni rogo kakaka kparakpee. (Atambuahe 51:1-12) Yekova agi gako kparakpee ki mbupai fuko, wa si avura du wo, Davide aima bi gbegbere sangbana gu ingapai ko amangihe. (2 Samuere 12:10-14) Si naida gipai namangi fuko re du fu rani nipa wasa na nirugute a ti bangisa regbo . Si nga pa wasa ka ino gupai nga Yekova naida ka mbupai fu rani ti gaani ingaapai ka ani sa gaani berã nirengo, ono si nga nyanyakipai ani rugutirani na gupai nga, ingaapai dedede naye na kere asangbanaha. (AGaratio 6:7-9) Ka singia ani na kpinyemu ka mbeda koyo du Yekova ni, ani du wa ka ani du tuturũ gbe wa rengbehe ti agu ahe nafu gberarago fuko.—Atambuahe 97:10.

Yekova Nayamba Gako Aboro Koyo Du Ko Ni

7. Gini ngbatunga riko aboro Yekova angera tipa yo, na rogo gini gene ko ayamba yo ngbaha koyo du ko ni?

⁷ Davide akepai rogo gako Atambuahe yo sa ki ya: “Bambiko ka Yekova vura du ni tumbatumba ko vurũ, ko naaida pa payapaya aboro; ono ko naaina ga airaenda pai tuturũ.” (Atambuahe 138:6) Teketeke wa kina gupai re, gu kura Atambuahe naya wee: “Da du wa Yekova nga gaani Mbori, du gako basunga ari yo, naumbasi tiko ka ngana agu ahe du ngbangbaturũ yo na ku auru kpotosende no a? Ko natumba rurungbura boro nvutu yo, ki nitumba irazingoahe guguda kuke yo.” (Atambuahe 113:5-7) Ii, gu Bakusiahe duna tanduapai dunduko rogo zegino naumbasi tiko ka ngera ku sende no auru kpotosende, na bangiriko kini bi “payapaya aboro,” “irazingoahe,” na agu aboro “nauka omeyo ki nikpari mbiko gu kere gbegberẽ asino nga gu du ni mangimangi he rogo” zegino. (Yezekere 9:4) Ko nayamba ngbatunga aguyo re koyo du ko ni rogo Wiriko yo. Ho Yesu aduni auru kpotosende, ko aya wee: “Anga boro sa ka ye kono du mi ni gbua te, kina Buba nakedi re ka gbe ni . . . A nga boro sa ka ye kono du mi ni gbua te, kina gu ka Buba fu he afu fu ni.”—Yoane 6:44, 65.

8, 9. (a) Tipagine si aida gupai ti ni nga ani ye koyo du Yesu ni dunduko? (b) Gini memepai gbe duho tipa gu mbakadapai nga ga motumo tumorii?

⁸ Si naida aboro ye dunduko koyo du Yesu ni ki duna idipase kuti gu motumo tumorii ko angbe aboro nani be ingaapai bambiko i avungu yo ni aboro ingaapai, i ki du nikparakpara yo ti Mbori. (Yoane 3:36) Si naida i mbakadi gayo pagume dagbayo na Mbori. (2 AKorindo 5:20) Anga Mbori asungu asungo ka pido aboro ingaapai i zungadi tiyo fuko tipa ko berẽ gupai ka ko mangihe tipa i duna ko rogo zereda yo te. Gu mokedi nangia Pauro akepai ki ya: “Mbori amoi dezire gako nyemuse fu rani nikpi Kristo tipa rani wa ani adu ni aboro ingaapai. . . . Bambiko ho ka ani adu ni ni avura, ka ani azeredi na Mbori mbiko kpio Wiriko, gu susi, si nga, wa ani nazeredi ani abáta abata mbiko ungako.”—Rom. 5:8, 10.

⁹ Gu mokedi nangia Yoane aidi pa gu iiriwo rengo du tipa Mbori nga gu nambakadapai dagba ko na aboro i ye koyo du ko ni, nike ko gupai nga: “Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino, ani du ni ungarani mbiko ko. Gi nga nyemuse re, nga nyemu Mbori adu nga ti rani te, kina rani du nyemurani ti ko, ko akedi Wiriko ko du ni motumo gaani ingaapai.” (1 Yoane 4:9, 10) Pa gi mbakadapai re aenge yo du Mbori ni angianga be aboro ya. Ya mo oni aberãnga pa ye koyo du gu Mbori ni nayugu nyemuse fu rani nga agu aboro naangianga kina “aingipai” sa ya ono ki du fuko ni “akare” a? —Yoane 3:16.

Si Naida Ani Gbata Yekova

10, 11. (a) Ginipai si aida ani mangihe ka gbata Yekova? (b) Wai si aida ani bi pa gu zegino nga ga Satana?

¹⁰ Rengo ngaha, anga Yekova namanga rani amanga ngbaome ani ye fuo ko te. Ani du wa ka ani gbata ko, ‘ani gbata ko, ki bi ko, nirengo ko aturanga na ani wa sa te.’ (Amokedi 17:27) Si naida ani idi kuti gu rengo du Yekova nani ka sana rani ani fu tirani fuko. Gu bawiriki nangia Yakoba akepai ki ya: “Were oni fú tironi fu Mbori; ono oni ká fu bakitingbanga, ko ki oro be roni. Oni mbédi na Mbori, ko ki mbedi na oni. Oni gírisi beroni, oni nga aboro ingapai; oni mbákadi kpotoroni yo, oni nga aboro berãpai ue.” (Yakoba 4:7, 8) Ka ani dindikonga ti ru ani ngutete kuti Bakitingbanga na ki zanga du niruru rani fu Yekova ya.

¹¹ Gere nayugo gupai nga ani turusi tirani ti gu gbegbere zegino nga ga Satana. Yakoba akepai a ki ya: “Oni aruga nga tironi na ni ya ngbanya na zegino si nga sogote fu Mbori, te? Si du gu ni ka kpi nyemu duni badia zegino ni sa tini ni vura Mbori.” (Yakoba 4:4) Kuba gure, ka singia ani nakpi nyemu ka duni abakurea Yekova, ani du wa ka ani sogima gupai nga, gu zegino nga ga Satana nika soga rani asoga.—Yoane 15:19; 1 Yoane 3:13.

12. (a) Gini afugo wasa Davide akehe? (b) Gini rugute Yekova afuhe rogo gu nebi nangia Azaraya?

¹² Ho ga Satana zegino asoga rani ni rogo gu kura agene, si naida ani mbédi ko yo du Yekova ni rogo kparakpee, kini sana ko tipa ko undo rani. Davide, nga guko naini pa ga Yekova batasa aboro kuti gupai nadu tipa kina ko bara dunguhe, akepai fu rani tipa gaani wasa ki yaa: “Yekova du mbembedi na agu yo dunduko nakpara fu ko, na agu yo dunduko ninakpara fu ko nirengo. Ko nadigisa gu nyemuahe nga ga agu yo nagunde ti ko; ko nagia gayo kpe ku ari a, ki nibatasi yo. Yekova nabanda agu yo dunduko nakpi nyemu ko; ono gbegberẽ aboro ko agbárasa yo dunduko.” (Atambuahe 145:18-20) Agi Atambuahe re nayugo gupai fu rani nga Yekova rengbe arengba ka batasa rani nibasasa ho du ani ni ngba asada na gupai nga ko abatasa gako aboro abatasa nidungura dungura yo ti regbo “bakere gberãngbi.” (Yugoti 7:14) Yekova nika mbeda na ani ka si du nga ani nika mbeda koyo du ko ni. “Ga Mbori toro” adu ku gii gu nebi nangia Azaraya ko ke gupai rengbe ani ka berãpaha nigu rengo rengbe ka mangasunge rogo apai yo dunduko: “Yekova nidu na oni, kina ho du oni ni na ko. Ka oni agbáta ko, oni abí ko abi, ono ka oni mbu ko, ko ambú roni a.”—2 Pekapai 15:1, 2.

Si Naida Ani Bi Yekova Nindikidi Boro

13. Wai rengbe ani ka yugo gupai nga, Yekova fu rani nindikidi boro?

¹³ Gu mokedi nangia Pauro akepai tipa Mose ki ya: “Ko aru nyanyaki, nibi gu ko ka bangirise abi nga ko ya.” (AEbere 11:27) Rengo ngaha, Mose abinga Yekova nzunzu nibangiriko te. (Gate 33:20) Ono Yekova adu fuko nindikidi boro si du si adu ti ni wa ka i ya ko aima bi Ko. Teketeke a, fuo susa regbo gu asada Eyobo adu rogoyo, ko abi Yekova na gu bangirise nga ga idapase giangiri, nigu Mbori nambugene tipa gako ruru amoyambu i du rogo asada ono ki duni gu boro ka mbunga yo ya. (Eyobo 42:5) Ziazia Kekeapai naya tipa Enoka gbiati Noa wee, ‘i anata na Mbori.’ I anamangaha wo rogo gbata yo agene ka fu ngbarago fu Mbori na kini irisi sangbako. (Bambata Pai 5:22-24; 6:9, 22; AEbere 11:5, 7) Ka si du nga Yekova nindikidi boro fu rani wa gu ko adu fu Enoka, Noa, Eyobo, gbiati Mose, ‘ani nika ruga tirani na pa ko’ ngba gaani agene dunduko, na ko nika ‘manga gaani agene niruruhe.’—Asanza 3:5, 6.

14. Rogo gu fugo yo nga ka ‘kakuti’ Yekova nga gine?

¹⁴ Ti gu regbo nadu mbata fu rimo aYisaraere ku Ringara Mokido yo, Mose afu ga Mbori rugute fuyo ki ya: “Oni apéka fuo kina Yekova gaoni Mbori, ki nigunde ti ko gbe, ki nika kuti gako arugute, ki nigi fugoko, oni amánga kina pa ko, ki ka kina kuti ko.” (Pa Fu Rugute ni Ue he 13:4) Si adu nga i péke fuo Yekova, i gunde tiko, ki ka kuti ko. Nibipa gu fugo kusi yo rogoyo herẽ nga ka ‘kakuti,’ gu kura boro sa duna bakere inohe tipa Ziazia Kekeapai atingidipai ki ya wee, “gu fugo re si rogo pa-Ebere nayugopa ndikidi dawedawe pagume.” Bake Atambuahe ayaa: “Ga Yekova rondo du fu agu yo nagunde ti ko.” (Atambuahe 25:14) Gi wene ndikidi dawedawe pagume na Yekova re nika duni gaani ka si du nga ani nabi ko nindikidi boro na nikpinyemu ko gbe si ki sa rani ani gunde ti manga agu apai nafu gberarago fuko rogo apai yo dunduko.—Atambuahe 19:9-14.

Oni Rugu Tironi na Pa ga Yekova Bandahe?

15, 16. (a) Wai Atambuahe 34 ayugo gupai nga Yekova naberãpa rani aberã? (b) Ginipai si aida ani mangihe ka si du nikpakarakpakarapai fu rani tipa ani tingidipa gu wene mangaapai nga ga Yekova tipa rani?

¹⁵ Gu kura biriki Satana amanga rani nani nga ka sa rani bangirani go ti gu rengo nga, Yekova, nga gaani Mbori, nangera angera fuo gako ruru amoyambu dedede. Gu Bakindo aYisaraere nangia Davide arugutiko na pa gu bandahe du be Yekova wenengai na zavura ho ko aduni ngbaapai yo vurũ. Ho si aduni fuko nidingisoro ko mangi tiko wa kina ira popo ku bangiri Bakindo Asisi nangia ga gu ringara nangia ga Gada, ko akusi bia sa, nibawene bia atambuahe, nga gu nakodi agi afugo nga ga idapase re: “Ako, ani táasi rimo Yekova na oni, ani mongo kíisi pa rimoko! Mi agbata Yekova, ko ki karagapai fere, ki batasi re be gimi agunde dunduko. Ga Yekova maraika navo gbu pati agu yo nagunde ti ko [ko] ki batasi yo. Ako, oni ía Yekova ka bi ko ko du ni wene ko! Boro maku nga gu ni ninafu tini ku be ko! Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai. Gbigbitapai namanga ruru boro ngenge; ono Yekova nabatasa ni be he dunduko.”—Atambuahe 34:3, 4, 7, 8, 18, 19; 1 Samuere 21:10-15.

¹⁶ Ya mo oni idi pa ga Yekova ome nga ga batasa aboro? Oni rugutironi na pa gu bandahe nga ga gako amaraika re? Ya mo oni íanga Yekova nitironi ki bi gupai nga ko niwene ko? Gini regbo nangia gu yangara regbo oni arugu tironi na gupai berã roni yo nzunzu nga Yekova mangi wenepai fu roni? Oni asadinga ka tingidapaha. Ya mo si adu rogo gu yangara kporo oni andu kurogoho na sunge tungusapai, ti gu regbo oni aberẽ gupai nga ka oni manginga wiripai berewe te? Isoke gaoni sakaapai avura du nibawenehe na gu irakporo re. Ya mo oni atingidinga pa fu tambuahe fu Yekova tipa gu kura ome ko afuhe fu roni nga gu oni aduna zingoho na tipa gu mosoro ko afuhe fu roni? (2 AKorindo 4:7) Ngba kura gene, si rengbe ka du fu roni nikpakarakpakarapai tipa oni tingidi pa kura kparakpara weneapai nibasasa nga gu Yekova amangi he fu roni. Si rengbe ka du nga oni berẽpa gu poso sa susi kusa yo, na pa diwi sa, na pa gara sa, watadu gu susi gure. Ka singia gure nga gupai du tipa roni, tipagine ka oni amanganga asadatise ti ni ka mbéda na Yekova na ki binga wai ko angbe fu roni kumbatayo na kini rugu roni ya? Gu mokedi nangia Petero afu rugute fu aKristano ki ya: “Oni úmbasi tironi tie . . . tii gu nyanyaki be yo nga ga Mbori . . Oni bá agu apai nafuda roni ku auru ko yo; mbiko ko naberã pa roni.” (1 Petero 5:6, 7) Nirengo, iriwo apai ati ati tironi nibipa wai ko aberãpa roni!—Atambuahe 73:28.

Oni Kakuti Gbata Yekova Kindi

17. Ginipai duho rẽarẽ fu rani ani mangihe ka singia ani nikaa gbata Yekova kindi?

¹⁷ Si naida ani banda gaani pagume dagbarani na Yekova si naandu andu kindi kina kumbatayo. Yesu akparikpee fu bako ki ya: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yoane 17:3) Si naida ani duna asadatise be rani tipa ani di gu inohe du tipa Yekova na Wiriko. Ani nakpinyemu gu undohe naye bambiko kparakpee na be ziazia toro tipa ka giarogo “gu dudungura apai [yo] nga ga Mbori.” (1 AKorindo 2:10; Ruka 11:13) Ani naida gu rugute a naye be ‘ruru kangara moyambu’ tipa riga gaani aberã na gu riahe nga ga toro nga gu i naafu he “ti ragoho.” (Matayo 24:45) Ngba gu gene re, Yekova naruga rani tipa ani nigedi Fugo ko na a’auru dunduko, kini du pati gaani adunguratise nga ga aKristano dedede, na ki du tingba sunge tungusapa ‘gu wene pangbanga nga ga Kindo’ na ngbaduraniyo dunduko. (Matayo 24:14) Nimanga ani he wo, ani nikaa gbata gu gaani Mbori kindi nga gu ko naberãpa rani aberã nga Yekova.

18, 19. (a) Ginipai si aida ani diberã ka mangaha? (b) Ka ani ru nyanyakii ka sogote Bakitingbanga na kini gbata Yekova kindi, wai ka i fu maku fu rani?

¹⁸ Satana namanga agu apai dunduko rengbe ome ko nani ka ye na arungosi, sogote, mbugo rogo agene dunduko ku rii ga Yekova aboro. Ko na’asada tiko ka gbarasapa gaani zereda na gaani ru gigirii barabangiri gaani Mbori. Ko akpinga nyemu gu gaani sunge nga ga ngera tipa ruru ngbadu aboro yo si naandu kumbatayo na ani kini undo yo i ye koyo du Yekova ni tipa i rugu tiyo na pa gu bakere pagbia nga ga Yekova te. Ono ani du wa ka ani duna diaberã tipa ka nye niruru rani fu Yekova, kini kido kuti ko tipa batasa rani be gu gbegbere ko. Nimbu ani Fugo Mbori si nirugu rani, na ani ki nye zaaza rogo gu gako riigbu i abihe abi auru kpotosende, ani rengbe ka ino gupai nirengo nga ko nika duna ani dedede tipa kaa songoda rani.—Yesaya 41:8-13.

¹⁹ Sidu, ani runga tie dunduko kuti Bakitingbanga na gako abiriki mangaapai ti aregbo dunduko, na kini gbata gaani wene sino Mbori, nga Yekova, nga guko nika kpanga ti ‘nyakasa rani, ki ngarasi rani’ ya. (1 Petero 5:8-11) Nimanga ani wo ani nika ‘bánda tirani rogo ga Mbori nyemuse yo kini ngere tipa gu inapai nga ga gaani Gbia Yesu Kristo sa nyenye unga.’—Yuda 21.

Gaoni Karagapai Nga Gine?

• Rogo gu fugo nga “Bakitingbanga” nga gine, na wai Bakitingbanga araka ringbisihe kuti rogo gu rimoko re?

• Wai du Yekova akia ti Bakitingbanga rogo gu gene yo ko amakia araki auru kpotosende rogoho?

• Tipagine si aida gupai ti ni nga boro du wa ka ni idi na pa motumo tumorii ho ni aye ni koyo du Yekova ni?

• Rogo fu fugo nga ka kakuti Yekova nga gine, na wai rengbe ani ka nye kaa gbata ko kindi?

[Gu kpiahe du ti kpewaraga 15]

Wa si avura du nga Eyobo adu rogo asada, ko arugutiko na gupai nga Yekova aberã pako aberã

[Gu kpiahe du ti kpewaraga 16]

Geda Ziazia Kekeapai na a’auru dunduko, na du pati agu adunguratise nga ga aKristano dedede, ki du zaaza rogo sunge tungusapai yo, si natingida rani na gupai nga Yekova naberã pa rani aberã