Ndu Tingidapa Ga Gbia Riahe Nga Ga Nyemu Nga Gine?

“Mi adi pai be Gbia nga gu mi afu fu roni a.”—1 AKORINDO 11:23.

1, 2. Gine Yesu amangihe rogo gu yuru nangia ga Pumbo Susiri rogo gu garã nangia 33 ti Gaani Regbo?

BANGISA Wiri Yekova ambedi ka manga nyanyakipa pai gbiati gu kura akumba 11 a nga aguyo ‘nazi tiyo kuti ko ti regbo gako a’asada.’ (Ruka 22:28) Regbo gupai re angia Rago Biama Sunge nyemu, rogo Marungu ti rameru 31, rogo gu garã nangia 33 ti Gaani Regbo. Na si nawiraha gbe nga, kpakpu diwi adu gidigidi kini hasirago ariyo rii Yerusarema. Gu regbo re adu ngbutuko fuo nyasa Yesu Kristo Pumbo Susiri na gako amokedi. I aima fu gene fu gu basamungu nangia Yuda Keriota ko kuru, ono si angianga regbo tipa gu kura abawiriki ga te. Tipagine? Mbiko Yesu ambedi ka manga gupai nadu na nyanyakipaha gbe. Ginipai nangiaha?

² Wa duhe nga gu bake Wene Pangbanga nangia Matayo adu kina yo ti regbo gupai re, ani gedinga fugo ko. Ko akepai ki ya: “Yesu ki di kpokuta ki fu tambuahe, ki kuadi he; ko ki nifu he fu abawiriki, ki ya, ‘Oni dí he ki ri he, gere nga borore.’ Ko ki di inga, ki fu tambuahe, ki fu he fu yo, ki ya, ‘Oni mbíri he ambira ti ngba gere dunduko; bambiko gere nga kurere nga ga vovo ndika, i niuka ha tipa roni na dungu aboro sa dia gbegberẽapai ti yo.’ ” (Matayo 26:26-28) Ya mo si adu nga gipai re i nika mangaha bara sa gbua? Gini nyanyakipa pai nadu rogoho? Ya mo pai ho si ayugoho fu rani areme?

‘Oni Nimangi Gere Kindi’

3. Tipagine du gupai ti ni Yesu amangihe rogo gu yuru nangia ga Nisana ti rameru 14, rogo 33 ti Gaani Regbo ninyanyakipa apai?

³ Gupai Yesu Kristo amangihe rogo gu yuru nangia ga Nisana ti rameru 14, rogo gu garã nangia 33 ti Gaani Regbo, adunga gbua nga gu kungbopai boro nimangi zanga ni mbakadi tini ambakada tipaha te. Gu mokedi nangia Pauro asakipai tipaha ho ko aake waraga ni fu gu mbedimbedi aKristano nadu Korinda yo, nga gu rago i aamanga gu kpiapai kindi rogoho Yesu afuhe fuyo fuo susa agarã susi 20 kusa. Wa si avura du nga Pauro adunga na Yesu gbiati agu amokedi nadu 11 rogo gu garã nangia 33 ti Gaani Regbo te, si nirengo nga ko aima ino pai tipa gupai namangi ti gu regbo re ngba kura amokedi. Kurii gure, a wa gopai ayugoho, ga Mbori toro aima sigiraha ku berã Pauro yo rogo yuguyugupai. Pauro ayaa: “Mi adi pai be Gbia nga gu mi afu fu roni a, wa Gbia Yesu adi kpokuta ni gu yuru i akusi pa ko ni re; ho ko atambua he ni ko ki kuadi he, ki ya, ‘Gere nga borore, nga gu du fu roni; oni ta manga gere nitingidi pa re.’ A wo [ko adi] inga fuo riahe, niya, ‘Gi inga re nga vovo ndika rogo kurere; oni mángi gere, ni gu rago oni ka nimbiri he, nitíngidi pa re.’ ”—1 AKorindo 11:23-25.

4. Tipagine si aida aKristano tingidipa Ga Gbia Riahe Nga ga Nyemu ti ni?

⁴ Fugo Ruka nga bake buku Wene Pangbanga naya wee Yesu arugu gako abawiriki ki ya: “Oni mangi gere nitingidi pa re.” (Ruka 22:19) Nirengo, i naafura tipa gi mangapai re dedede ni Tingidapa Kpio Kristo. Pauro ayambuhe a nga, Ga Gbia Riahe Nga ga Nyemu, nga gu rimo daada mbiko i asigiraha yuru. (1 AKorindo 11:20, NW ) I nazinahe fu aKristano i naatingidapa Ga Gbia Riahe Nga ga Nyemu. Ono tipagine i asigira gipai re ti ni?

Ndu Gupai I Asigiraha ti Ni

5, 6. (a) Gine nangia ndupai sa dagba agu akuraha nasa Yesu ko sigirapa Ga Gbia Riahe Nga ga Nyemu? (b) Oni funga gu kura ndupai i asigira Ga Gbia Riahe Nga ga Nyemu ti ni.

⁵ Ndupai sa dagba agu akuraha nasa gupai nga i sigira Ga Gbia Riahe Nga ga Nyemu nakoda gu ringbisapai nadu tipa pa kpio Yesu. Ko akpi ka dia gbarasarimo kusayo ti gu bakere pagbia nga ga Bako du ngbangbaturũ yo. Rogo gi gene re, Kristo kini sa Satana Bakitingbanga ni iraziree, nga guko ninaakitangbaanga aboro ya i namangasunge fu Mbori mbiko kina agu ahe Mbori afuhe fuyo. (Eyobo 2:1-5) Pa kpi Yesu niruru ko zanga manga irairapai ayugu gi kitangbaangase re niziree na ki sa ngbadu Yekova si ngi.—Asanza 27:11.

⁶ Gu kura ndupai i asigira Ga Gbia Riahe Nga ga Nyemu ti ni adu tipa ka tingida rani na pa gupai nga, pa kpio Yesu nigu rengberengbe boro nazanga ingapai, amangi tipa ‘tumo dungu aboro ni ungako.’ (Matayo 20:28) Ho bambata kumba aingipai ni kuti Mbori, ko agbarasipa gu rengberengbe unga ka du be atitako na agu amaabangirise dunduko ka i adu nani. Ono tie, Yesu ayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Nirengo, “mosoro ingapai nga kpio; ono ga Mbori gamunihe gbua nga nyenye unga rogo Kristo Yesu yo gaani Gbia.” (ARomo 6:23) Padu ani pati Ga Gbia Riahe Nga ga Nyemu natingida rani na pa gu bakere nyemuse Yekova ayuguhe gbiati Wiriko rogo gu kpio Yesu akpi nimotumo. Nga wai si aida ani duna tambuahe tipa gu nyemuse re!

Gini Regbo Si Aida I Mangi Tingidapa Kpio Yesu?

7. Gu fugo nga ‘a wa oni [mbedimbedi aKristano] ka niri gi kpokuta’ du ti regbo Ga Gbia Riahe Nga ga Nyemu na kini mbiri gu imekakue du tipaha, rogoyo nga gine?

⁷ Nibipa Ga Gbia Riahe Nga ga Nyemu, Pauro ayaa: “A wa oni ka niri gi kpokuta re, nimbiri he ti ngba gi inga re, oni nataka pande ga Gbia kpio da ho ko ka ye ni.” (1 AKorindo 11:26) Si adu nga, mbedimbedi aKristano nibasasa nikaa ri gu kpakuto du ti regbo Ga Gbia Riahe Nga ga Nyemu na kini mbiri gu imekakue du tipaha dati kpio yo. Ngba gi gene re, si adu nga i nika duna idapase kuti gu mbakadapai du tipa gu motumo tumorii nga ga Yesu na kini takipande gi gayo idapase re ku barabangiri zegino na ku barabangiri Yekova Mbori.

8. Da kuti gini bagizo regbo si adu nga mbedimbedi aKristano nikaa ri Ga Gbia Riahe Nga ga Nyemu?

⁸ Da kuti gini bagizo regbo si adu nga mbedimbedi aKristano nika manga pumbo Tingidapa Kpio Kristo? Pauro ayaa: “Da ho ko ka ye ni,” du rogoyo ziazia nga, i nikaa mangaha kindi daho Yesu ka ye ni ka dia mbedimbedi apefuo ko ku ngbangbaturũ yo nizingisa ko yo bekpio ti gu regbo ko nika “duho na ome kindo beko.” (1 ATesaroniko 4:14-17, NW ) Gipai re na ngbanya dagbaha na agu afugo Yesu agumbaha fu gako ruru amokedi nadu 11, nga gu fugo nayaa: “Ka mi ndu ka mbakada ba fu roni, mi ayé [aye] berewe, ki rogo roni fuo re; ho du mi ni, oni [a]du a ho.”—Yoane 14:3.

9. Ginipai agu afugo Yesu du nikekehe rogo Marako 14:25 ayugoho?

⁹ Ho Yesu asigira Tingidapa Kpioko ni, ko ata taabeko kuti gu inga nadu na imekakue rogoho kini ya fu gako ruru amokedi wee: “Ya mi fu roni ni rengo, mi ambíra nga rindi bakakue berewe dati gu mi ka mbira ha ni vovo ho rogo ga Mbori ngbi yo te.” (Marako 14:25) Wa duhe nga, Yesu ambiranga ndikidi imekakue ngbangbaturũ yo te, si tie ziazia nga, gu ngbarago imekakue naarukubaha ti kura aregbo, nangia gupai ko aaberã paha. (Atambuahe 104:15; Batungusipai 10:19) Si adu nga, pa dungura yo tiyo kurogo ga Mbori Kindo, angia regbo ngbarago, nga gupai ko aduna maabangirise tipa ka gbiaha gbiati apefuo ko.—ARomo 8:23; 2 AKorindo 5:2.

10. Bara wai si aida i naadogoda manga pumbo Tingidapa Kpio Yesu?

¹⁰ Ya mo si naida i naadogoda manga pumbo tingidapa kpio Yesu na adiwi dunduko, rogo aposo dunduko, watadu na a’uru dunduko? Oó. Yesu asigira Ga Gbia Riahe Nga ga Nyemu rogo uru Pumbo Susiri na fuo gure i ki imi ko, nga gu uru i anamanga pumbo rogoho ‘ka tingidapa’ batasa aYisaraere rogo gu garã nangia 1513 Mbata fu Gaani Regbo be sunge akanga Ezipeta yo. (Gate 12:14) I anamanga Pumbo Susiri bara sa gbua rogo garã, rogo gu ga aYuda diwi du rimoru nga Nisana ti rameru 14. (Gate 12:1-6; Pa Amotumo 23:5) Gipai re nayugo gupai nga, si naida i naatingidapa kpio Yesu ti kina agu aregbo i anamanga Pumbo Susiri ti ni, nga bara sa rogo garã, angianga na adiwi dunduko, rogo aposo dunduko, watadu na a’uru dunduko ya.

11, 12. Ginipai kuru pangbanga agumbaha tipa gu Tingidapa Kpio Yesu i anamangaha mbata?

¹¹ Si ki ta du tie were, ruhe aru i naamanga pumbo Tingidapa Kpio Yesu bara sa rogo garã rogo gu diwi nga Nisana ti rameru 14. Buku sa naya wee: “I anayamba agu aKristano nadu Asia Minor yo ni [Aboro Bawe-na-Biama] mbiko gu sino yo nangia ga manga gu pumbo nga pascha [Ga Gbia Riahe Nga ga Nyemu] rogo gu diwi nga Nisana ti rameru 14 zanga kpa . . . Gu ramediwi re rengbe ka ti ku Rago Bisue Sunge watadu kurogo kura a’uru nga ga poso.”—The New Schaff-Herzog Encyclopedia of Religious Knowledge, Gu Biama Kpakutoho, kpewaraga 44.

¹² Nifura gu bakeke kuru apangbanga nga John Laurence von Mosheim tipa agu apai nanamanga rogo gu ue kama agarã, ko aya wee Aboro Bawe-na-Biama anamanga pumbo Tingidapa Kpio Yesu rogo Nisana ti rameru 14 mbiko “i abi gu kpiapai nga ga Kristo nindiko fuyo i mangihe.” Gu kura bakeke kuru apangbanga naya wee: “Gu mangaapai nangia ga agu akanisa nga ga Aboro Bawe-na-Biama adu kina sa wa kina ga gu kanisa nadu Yerusarema yo. Rogo gu ue kama agarã, agi akanisa re anamanga Pascha nitingidapa gu bata kpio Kristo aye nani.”—Studia Patristica, Gu Bisue Kpakutoho, 1962, kpewaraga 8.

Guhe Kpakuto Arukubaha

13. Gini ngbatunga kpakuto Yesu amangisunge nani ho ko asigira Ga Gbia Riahe Nga ga Nyemu ni?

¹³ Ho Yesu asigira Tingidapa Kpioko ni, “ko . . . [a]di kpokuta, ho ko afu tambuahe ni, ko ki kuadi he, ki fuku he fu [gako amokedi].” (Marako 14:22) Gu kpakuto nadu ti gu regbo re angia gu ngbatungaha i aguari pati rihe ti regbo Pumbo Susiri rogo gu yuru re. (Gate 13:6-10) Wa duhe nga i amangi gu kpakuto re zanga agbooro, si adu wa katara bakinde na niguhe nakuo taata, sidu si ki idi i kukuodihe tipa ka kparakaha ti aboro. Ho Yesu azugosi bange kpakuto ni tipa dungu akutu aboro, si angia guhe i arengbe ka kukuoho akukuo, mbiko ko akukuodihe tipa i kparakaha ti aboro. (Matayo 14:19; 15:36) Si tie ziazia nga, pa kuodi gu kpakuto nadu tipa rihe ti regbo Tingidapa Kpio Yesu adunga na nyanyakipa pai tipaha nga ga toro te.

14. (a) Tipagine daha ada ti ni tipa gu kpakuto i amangasunge nani ti regbo Tingidapa Kpio Yesu du zanga agbooro rogoho? (b) Gini ngbatunga kpakuto si aida i mangisunge nani ti regbo Ga Gbia Riahe Nga ga Nyemu watadu si aida i mangihe tipaha?

¹⁴ Nibipa gu kpakuto Yesu amangisunge nani ho ko aasigira Tingidapa Kpioko ni, ko ayaa: “Gere nga borore, nga gu du fu roni.” (1 AKorindo 11:24; Marako 14:22) Si adaada gu kpakuto re zanga agbooro rogoho. Tipagine? Mbiko agbooro rengbe ka yugopa gbigbitapai, gbegberepai, watadu pa ingapai. (1 AKorindo 5:6-8) Gu kpakuto re arukuba gu kpoto Yesu nadu nirengberengbehe zanga ingapai, nga gu nadaada ko fuhe nimotumo tumorii. (AEbere 7:26; 10:5-10) ADezire Yekova nata maa gipai re ku berãyo yo kini pefuo gu kpiapai Yesu amoihe nimanga yo sunge na gu kpakuto adunga agbooro rogoho ya ti regbo Tingidapa Kpio Yesu. Ti kura aregbo, i naamangasunge na gu baba kpakuto nga ga aYuda du kia nga gu i akodanga agbooro na matangburu gbiati apara-akondo kurogoho ya. Ka si adunga wo ya, i rengbe ka manga gu kpakuto zanga agbooro rogoho niputa yo bete ngungo na ime ngbarangbara (nga ngungo geme, rogo gu rago ka si du rogoho). Na fuo gure, si ki idi i fio gu kpaku-ngungo re ki gbaragi rogoyo si du nzaranzara, na ki moihe rogo fofõi ngbadi nga gu mbedi yo vuruhe yo na bete nzeme, na ki mbuhe daho si ka uga ni na ki da ba kuoho.

Guhe Imekakue Arukubaha

15. Ginihe nadu rogo gu inga Kristo amangisunge nani ti gu regbo ko asigira Tingidapa Kpioko?

¹⁵ Fuo Yesu tai gu kpakuto nazanga agbooro rogoho fu gako abawiriki, ko adi inga ku beko, “ho ko afu tambuahe ni ko ki fu he fu yo; i ki mbiri he ti ngbaha dũ.” Fuo gure, Yesu ki sakirogoyo fuyo ki ya: “Kurere nga gere nga ga ndika nga gu nauka tipa dungu aboro.” (Marako 14:23, 24) Gine nadu rogo gu inga re? Gu imekakue naima ngbi, angianga kungbo nzinziri imekakue gbua ya. Ho Ziazia Kekeapai afura ni tipa imekakue, si afuranga tipa nzinziri imekakue nga gu angbinga ya te. Nikpiapai, gu imekakue ima ngbi, angianga nzinziri imekakue ya, rengbe ka sara vuru “kuru mangu imekakue,” a wa Yesu agumbaha. Na berewe a, asogo Kristo akitingbaanga ko ya ko angia “bambiri imekakue.” Ka gure angia gu kitangbaangase adunga rogoyo ti ni ya wa ka si adu nga kungbo nzinziri imekakue gbua ko anambiraha. (Matayo 9:17; 11:19) Eerẽ imekakue aboro anambiraha ti regbo Pumbo Susiri, na si nangia guhe Kristo amangisunge nani ho ko asigira Tingidapa Kpioko ni.

16, 17. Gini ngbatunga imekakue ngbaa tipa i mangisunge nani ti regbo Tingidapa Kpio Yesu, na tipagine ngbaha ti ni?

¹⁶ Guhe nadu rogo inga arukuba gu kure Yesu nauka, sidu, kina zamba bangiri imekakue sa nga wene kpiahe tipaha. Ko nitiko ayaa: “Kurere nga gere nga ga ndika nga gu nauka tipa dungu aboro.” Na gu mokedi nangia Petero akepai ki ya: “Oni [nga mbedimbedi aKristano] ini he ya i atumo nga roni ni agu ahe nikagberã, wa feda na dahabu, be gu kungba apai oni agi ngba abaroni te; ono i atumo roni ni gu kikipa kure nga ga Kristo, wa gu wiri [vusende] zerenge kpotoru azerenga, adu nga wiri he ti ru ya.”—1 Petero 1:18, 19.

¹⁷ Zanga kapa, zamba bangiri imekakue nangia guhe Yesu amangisunge nani ka sigira Tingidapa Kpioko. Ono tie, gu kura zamba bangiri aimekakue du areme adanga tipa gipai re te mbiko i nakoda kura eerẽ abuda kurogoho watadu i nagbia gu kura ahe kurogoho. Kure Yesu aima rengba nisaha, ka si aidanga i gbia kurahe kuti ni ya. Sidu, gu ngbatunga aimekakue i agbia kura ahe kuti ni adanga tipa gipai re te. Gu zamba bangiri imekakue du rogo gu inga du tipa mangasunge nani ti regbo Tingidapa Kpio Yesu, si naida si zanga nzinzirihe rogoho na ka si dunga nigu kodi yo kura ahe kurogoho ya. Awirina rengbe arengba ka mangasunge na gu zamba bangiri imekakue wari yo ho kporo si ki ngbi, watadu agu akuraha du rimoho nga red burgundy na claret.

18. Tipagine Yesu amanganga iiriwopai ti ni nibipa gu kpakuto gbiati imekakue ko amangisunge nani ti regbo Tingidapa Kpioko ya?

¹⁸ Ho Yesu aasigirapa ri gi riahe ni re, ko amanganga iiriwopai ka aria kpakuto nindikidi pasioko na ki aria imekakue nindikidi kureko te. Ri boro pasio kurani watadu mbira kure kurani nasa ni ni bari-aboro, nga gu mangapai nakuo ga Mbori ndiko. (Bambata Pai 9:3, 4; Pa Amotumo 17:10) Yesu adu kindi na pasioko nabaha ti kpotoko gbiati kureko a. Gu uru naye fuo gure fuo susa bebere uru, nadu kindi nga kina gu bangisa uru nga Nisana ti rameru 14 kuti ga aYuda geda ramediwi, nangia gu regbo ko afu kpotoko nirengberengbe motumo, na i ki uka kureko. Sidu tie, agu ahe i amangasunge nani ti regbo Tingidapa Kpio Yesu, du gu sa nga kpakuto, si narukuba pasio Kristo na imekakue tigaha kini rukuba kureko.a

Ga Gbia Riahe Nga ga Nyemu, Si Nga gu Riahe Dungu Aboro Akoda Tiyo ka Ngbabehe

19. Tipagine rengbe awirina ti ni ka mangasunge na dungu asaani gbiati dungu ainga ti regbo Ga Gbia Riahe Nga ga Nyemu?

¹⁹ Ho Yesu asigira Tingidapa Kpioko ni, ko ayambu gako ruru amokedi i mbiri imekakue ti ngba bangisa inga sa. Gu Wene Pangbanga Matayo akehe naya wee: “[Yesu] ki di inga, ki fu tambuahe, ki fu he fu yo, ki ya, ‘Oni mbíri he ambira ti ngba gere dunduko.’ ” (Matayo 26:27) Nimanga Yesu sunge na “inga” gbua sa, angianga dunguhe ya, ayenga na kpakarakpakarapai fuko te, mbiko wa gopai ayugoho, aboro adu gbua ti gu regbo re 11 nambiri imekakue ti ngba gu inga re, na i dunduko nasusungu pati bangisa mbisa, sidu, ka si adunga nimbumbupai ka tataa gu inga re fu kura aboro ya. Rogo gi garã re, dungu aboro nika dungura tiyo kurogo aba tipa Ga Gbia Riahe Nga ga Nyemu rogo adungurati nga ga aDezire Yekova bangehe nasusi 94,000 rogo zegino dunduko. Wa duhe nga i nika manga agi adunguratise re nidunguhe rogo bangisa yuru sa, bangisa inga sa arengbanga ka du tipa aboro dunduko te. Ono kina gu bangisapai re nika manga rogo kikindigi adungurati wa i ka mangasunge na dungu ainga tipa i rengbe ka tataa gi imekakue re fu aboro dunduko ka si adianga bakere regbo ya. Teketeke a, i rengbe ka mangasunge a na dungu asaani ka maa agu akpakuto re rogoho. Pai ho rogo Ziazia Kekeapai nayugo gupai nga, si naida i mbakadi gu inga re ngba kparakpara gene te. Wa vura duhe wo, si naida gupai nga, gu inga gbiati gu saani re duni iriiri aũsunge tipa gu iriiri regbo re. Si adu nipatatamana ka i ahiisonga gu inga re kuti ngbaha si ki sa gupai nga imekakue uka wa i atataaha ya.

20, 21. Tipagine rengbe ani ti ni ka ya gu riahe i naarihe ti regbo Tingidapa Kpio Yesu si nigu riahe dungu aboro akoda tiyo ka ngbabehe?

²⁰ Wa vura duhe nga i namangasunge na dungu asaani nga ga kpakuto na dungu ainga nga ga imekakue, Ga Gbia Riahe Nga ga Nyemu nigu riahe kindi dungu aboro akoda tiyo ka ngbabehe. Rogo gu ringara aYisaraere nadu mbata, kumba anirengbe arengba ka mbakada gu riahe du tipa dungu aboro niye ko na nyaa ku pati ga Mbori bamotumo, yo i aniyere gororu ni. I anazo papara gu nyaa re rii bamotumo, ki fu papara ru fu gu boromotumo natumo na u, na gu papara ru fu agu awiri Arona nangia aboromotumo, gu boro nanaye na gu nyaa re nimotumo ki du a na papara ru beni tipa tini gbiati gani aborokporo. (Pa Amotumo 3:1-16; 7:28-36) Gu riahe i naarihe ti regbo Tingidapa Kpio Yesu a nigu riahe du tipa dungu aboro mbiko dungu aboro nakoda tiyo ka ngbabehe.

²¹ Yekova nakoda tiko a ku dagba agu aboro dungura tiyo ka ngbabe gi riahe re nigu boro nga Batona gu mbakadapai du tipaha. Yesu nga gu motumo i atumo na ko, mbedimbedi aKristano tigayo nga agu aboro nari gu kpakuto re na kini mbiri gu imekakue re. Pa ri yo riahe rii ga Yekova mbisa nayugo gupai nga, i rogo pazereda na ko. Na ngbanya kuti gipai re, Pauro akepai ki ya: “Gu inga maku ani nafu tambuahe tipa ha, a nga [si nga] gu ngbanya nga ga kure Kristo te? Gu kpokuta ani nakuadi, a nga gu ngbanya nga ga boro Kristo [ngaha] te? Bambiko ani wa du ani ngenge ani wa kpokuta sa, boro sa, bambiko ani namongo rogo[di] gu kpokuta du sa.”—1 AKorindo 10:16, 17.

22. Gini asanahe tipa gu riahe i naarihe ti regbo Tingidapa Kpio Yesu nye kindi tipa ani wisigihe?

²² Ga Gbia Riahe Nga ga Nyemu nga gu yangara pumbo nga ga pambori aDezire Yekova amangaha. Gipai re daada mbiko Yesu azinahe fu apefuo ko ki ya: “Oni ta manga gere nitingidi pa re.” Gu riahe i naarihe ti regbo Tingidapa Kpio Yesu, nasa rani ani natingidapa kpioko, nga gu kpio nadia gbarasarimo kusayo ti ga Yekova bakere pagbia. A wa ani niima bihe, ti regbo gi riahe dungu aboro akoda tiyo ka ngbabehe re, gu kpakuto re nayugopa gu kpoto Kristo ko afuhe nimotumo na gu imekakue re nayugopa gu kureko nauka. Ono, wa vura duhe wo, kina bete aboro gbua nari gu kpakuto re na kini mbiri gu imekakue re. Tipagine duhe ti ni wo? Ya mo Tingidapa Kpio Yesu na wiri rogoyo ti ni fu gu dungu aboro aringa gu kpakuto na kini mbiri gu imekakue du ti regboho re ya? Oni penga rengo, gine nzunzu si aida Ga Gbia Riahe Nga ga Nyemu mangihe fu roni?

[Gu rukutu kekeapai du bandu kpewaraga yo]

Gaoni Akaragapai Nga Gine?

• Tipagine Yesu asigira Ga Gbia Riahe Nga ga Nyemu ti ni?

• Bara wai si aida i naadogoda manga pumbo Tingidapa Kpio Yesu?

• Gini nyanyakipa pai duho tipa gu kpakuto adunga na agbooro rogoho ya i naarihe ti regbo Tingidapa Kpio Yesu?

• Gine gu imekakue i naambiraha ti regbo Tingidapa Kpio Yesu arukubaha?

[Gu kpiahe du ti kpewaraga 11]

Yesu asigira Ga Gbia Riahe Nga ga Nyemu?