Wai Si Aida Ani Naabi Aboro Wa Ga Yekova Uru Ambeda?
“Gbia narungbura nga pati gako kidohe . . . te; ono ko du na gbanga hipai fu roni, [mbiko] ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.”—2 PETERO 3:9.
1, 2. (a) Wai Yekova abi aboro areme? (b) Agini asanahe rengbe ani ka sana tirani nani?
GA Yekova amoyambu na gu sunge beyo nga ga “sa arikaaboro dunduko ni abawiriki.” (Matayo 28:19) Wa ani amanga gi sunge i afuhe fu rani re na kini pidipa ye ‘ga Yekova bakerepa uru,’ si naida ani naabi aboro wa gu ko abi yo. (Zefania 1:14) Wai ko abi aboro? Fugo gu mokedi nangia Petero nayaa: “Gbia narungbura nga pati gako kidohe, wa agu yo naberã pa rungbura, te; ono ko du na gbanga hipai fu roni, [mbiko] ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Petero 3:9) Mbori nabi aboro wa du yo nibasasa ni agu aboro rengbe arengba ka sa gayo berã. Ko “nakpi nyemu aboro bati dunduko, ki ye sa gu [ndikidi] inahe nga ga rengo.” (1 Timoteo 2:4) Oni ngere, Yekova a na ngbarago tiko ho “gbegberẽ boro [a]sa tini [ni] ti gani pai ki nye ni ungani”!—Yezekere 33:11.
2 Ya mo ani nitirani nabi aboro wa gu Yekova abi yo? Ani nabi aboro nibasasa rogo angbatunga yo na dagba rikaaboro dunduko wa i ni agu aboro nika sa tiyo ni “akandoro [rogo] gako banambu” a wa gu ko abi yo? (Atambuahe 100:3; Amokedi 10:34, 35) Ani wisiginga kpiaapai ue nga gu nayugopa nyakapa du ani na bipai wa ga Mbori. Rogo agu apai ue re dunduko, gbarasarago aima du nga si amanga amanga, na Yekova ki ima gumba paha fu gako amoyambu mbata fu regboho. Gi kpiaapai re na nyanyakipaha, gbe, wa ani apidopa ye ga Yekova bakerepa uru.
Abarayama Aduna ga Yekova Bipai
3. Gine nangia ga Yekova bipai tipa agu aboro naaraka Sodomo yo na Amora yo?
3 Bambata kpiapai nafura tipa gu ruru iriiripa bakumba nangia Abarayama gbiati gu gbegbere abakporo nangia Sodomo na Amora. Ho Yekova agi “tawawa [ni] mbiko Sodomo na Amora,” ko aguaringa nibasa ka gbarasa agu abakporo re gbiati araki rogoho te. Ko awisigi agu apai nadu rogoho mbata. (Bambata Pai 18:20, 21) Ko akedi amaraika ue ku Sodomo yo, na i ki zoro kua Roto yo nangia ruru kumba. Rogo gu yuru amaraika ada rogoho, “akumba bakporo dunduko . . . [a]ke bambu kirikiri, aparanga na gbinza yo a,” kini idi ka kodaba na agu amaraika re. Si adu tie ziazia nga, gu gbegbere mangimangiapai nangia ga araki rogo gu bakporo re aima gbera si ki rẽ tipa kina gbarasaha. Ono, wa si avura du wo, agu amaraika re asana Roto ki yaa: “Kura gamo aboro erẽ berewe? Akumba ku awiro, na awiro nga akumba, na awiro nga ade, na agu aboro dunduko nga gamo yo rogo bakporo? Mo kúsi yo rogo gi ba re.” Ani nabi gupai rogo gipai re nga, Yekova azakigene tipa ka batasa bete agu aboro naaraka rogo gu bakporo re, ono ti yangaraha, kina Roto na awiriko ue nangia adegude nabati be gu gbarasarago re.—Bambata Pai 19:4, 5, 12, 16, 23-26.
4, 5. Tipagine Abarayama azungodi Yekova ti ni tipa agu aboro naaraka Sodomo yo, na ya mo gako bipai tipa agu aboro re adu wa kina ga Yekova?
4 Awere tie, ani karaganga tirani kusayo kuti gu regbo Yekova afura tipa gu diaberã ko adu nani ka wisigo agu apai nadu rogo agu abakporo nangia Sodomo na Amora. Gu regbo re du tie Abarayama azungodi Mbori ti ni ki yaa: “Ka agu yo du rogo gu bakporo re 50 ni ruru yo, mo agbárasa yo ka mo ahé nga gu ba re mbiko gu ruru aboro 50 re du rogo ho ya? Si turu aturã ti ro ka manga wo, nga [mo] mongo gbarasi ruru aboro na gbegberẽ aboro, ya ruru aboro ka du wa gbegberẽ aboro! Turu gu pai re aturã ti ro! Ka Basapungbanga zegino dunduko mángi nga gu pai ru aru te?” Gu gumbagumbapai nga, “turu gu pai re atura ti ro,” Abarayama agumbaha bara ue. Kuti gupai Abarayama aima ruga tiko na paha nitiko, ko aima ino gupai nga, ka Yekova rengbenga ka gbarasa ruru aboro kodi yo na gbegbere aboro te. Ho Yekova aya ni wee ko gbarasinga gu bakporo nangia Sodomo te ka “ruru aboro [du rogoho] 50,” Abarayama aumbasi gu bange aboro re tooni tooni daho si adani ti bawe gbua.—Bambata Pai 18:22-33.
5 Ya mo ka Yekova arengbe ka degatuko kuti ga Abarayama zungodihe wa ka ga Abarayama bipai adu kia ti gako bipai? Wagusa te. Nidu Abarayama ‘nibadiangba Yekova,’ si ziazia nga, ko aima ino ga Yekova bipai na ko ki duna kina gu bangisa bipai re a. (Yakoba 2:23) Ho Yekova amoi berã ko ni fuo Sodomo na Amora, ko aduna nyemu ka wisigo ga Abarayama akpee sarawati. Tipagine? Mbiko gu Barani du ngbangbaturũ yo “akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.”
Ga Yona Bipai Tipa Aboro Adu Nibakparakparaha Kia
6. Ginipai aboro Nineve amangihe kuti ga Yona tungusapai?
6 Awere tie, ani wisiginga gu ue kpiapai nangia ga Yona. Gu bakporo Mbori asiaha tipa ka gbarasaha angia Nineve. I aya fu gu nebi nangia Yona wee ko takipande gupai nga, gu gbegbere mangimangiapai nangia ga agu aboro nadu rogo gu bakporo re aima ‘da kubarabangiri Yekova.’ (Yona 1:2) Kodihe na agu agbaria naduku pangbaha yo, Nineve angia bakere bakporo nirengo, “rame nduge rogo ho adu biata.” Ho Yona airisi sangba Yekova ni niyangaraha na ki rimi ku Nineve yo, ko azi tiko kindi kuti tungusapai niyaa: “Rame koyo kina 40, i ki gbarasi Nineve!” Si ki ta du were, “aboro Nineve ki idi pa Mbori; i ki taki pande pa gina riahe, ki nivo mbuzaroko.” Zavura bakindo Nineve, ko asa gako berã a.—Yona 3:1-6.
7. Wai Yekova abi gu sino saberã nangia ga aboro Nineve?
7 Gupai aboro gu bakporo re amangihe adu kia ti gu aboro Sodomo amangihe! Wai Yekova abi aboro Nineve fuo sa yo gayo berã? Yona 3:10 nayaa: “Mbori ki sa tiko ti manga gu gbigbitapai nga gu ko aya ko amanga yo na ni; ka ko amanga nga ha ya.” Yekova ‘asa tiko’ na gu rogoyo nga, ko ambupa manga gupai ko aida ka manga aboro Nineve nani mbiko i a’aria gayo gene mangaapai. Yekova a’arianga gako andiko te, ono ko a’aria gako diaberã fuo bi ko gupai nga, aboro Nineve asa gayo berã.—Maraki 3:6.
8. Tipagine rago agbere ti ni ti Yona?
8 Ho Yona akparia gupai ni nga Yekova agbarasanga Nineve te, ko abi apai a wa Yekova abihe? Oó, mbiko i naya fu rani wee: “Si agberẽ agberã ti Yona ki susi, ko ki zingi azinga [gbe].” Gini kurapai berewe Yona amangihe? Gu pangbangaa re nayaa: “Ko ki kpari fu Yekova ki yaa, ‘Ako Yekova, mi nazungadi ro, a nga gere nga gu pai mi agumba ha ho mi adu ni rogo gi[mi] ringara te? Si du mi aipisi tire ti ni ka ora ku Tarusisa yo; bambiko mi aini he ya mo nga Mbori du na undahe na inapai, nga bayee tipa zinga, ki du na weneringise kpaima, na satise ti gbigbitapai.’” (Yona 4:1, 2) Yona aima ino pai tipa ga Yekova asino. Ono tie, ti gu regbo re, rago agbere ti ko, sidu ka ko adunga na ga Mbori bipai tipa agu aboro Nineve nasa gayo berã re ya.
9, 10. (a) Ginipai Yekova ayuguhe fu Yona? (b) Tipagine rengbe ani ti ni ka ya wee Yona aima ida na ga Yekova bipai niyangaraha?
9 Yona akuru kusayo Nineve yo, ki dua basura, na ki sungu tii nzeremehe “da ho ko ka bi gu pai ni nikamanga bakporo.” Yekova asa nagbanga si wadi rii ga Yona basura tipa ka fu nzereme fuko. Ono tie, rogo gu uru naye fuo gure, giri gi nagbanga re augu kusayo. Ho Yona aduni na zinga be gipai re, Yekova aya fuko wee: “Ru he aru foro mo zingi tipa wawa nagbanga? . . . Ka mi aini nga pai fu Nineve te? nga gu bakere bakporo re, du aboro rogo ho wa 120,000 nga agu yo aina nga pa kparaka kumbabeyo ti garebeyo ya, na rimbasa zogozogo anya gbe rogo ho a?” (Yona 4:5-11) Nga gu wenepai Yona awirikihe be gipai re tipa ga Yekova bipai tipa aboro!
10 I akenga pai tipa ga Yona karagapai kuti ga Mbori gumbapai tipa ko duna nunga tipa aboro Nineve te. Ono, wa si avura du wo, si ziazia nga, gu nebi re aima aria gako bipai tipa aboro Nineve. Ani da kuti gu digisopai re mbiko gupai nga, Yekova amangisunge na ko ko ke gi pangbangaa re.
Gini Sino Berã Du Oni Nani?
11. Wa ka i niya Abarayama ho ti ni, wai ka ko niwiri kaa bi agu aboro du areme?
11 Areme, ani nangera bangirani na gu kura gbarasarago, nga gbarasa gi gbegbere zegino re rogo gu bakerepa uru nga ga Yekova. (Ruka 17:26-30; AGaratio 1:4; 2 Petero 3:10) Wa ka i niyaa Abarayama naraka araka areme, wai ka ko naabi agu aboro naraka rogo gi zegino re nga gu i nika gbarasaha bambeda? Si nawiraha nga, ka ko naabaka kina bangiriko tipa agu aboro atagianga “gi wene pangbanga nga ga ngbi [kindo, NW] re” kindi ya. (Matayo 24:14) Abarayama azungodi Mbori gbetegbete bambiko gu ruru aboro naduku aduka Sodomo yo. Ya mo ani nitirani nabakabangirani tipa agu aboro rengbe ka ká gu mangaapai nga ga gi zegino du tiibe Satana re ka i fu mamu fuyo tipa i sa gayo berã na ki mangisunge fu Mbori?—1 Yoane 5:19; Yugoti 18:2-4.
12. Tipagine duhe ti ni taata ani sonosi gu bipai du wa ga Yona tipa agu aboro ani agbia yo gene gaani sunge tungusapai yo, na gine rengbe ani ka mangaha tipaha?
12 Si gu ru aru ani duna kakaka nyemu bi digido gbegbereapai. (Abakuka 1:2, 3) Ono, wa vura duhe wo, si taata boro sonosi gu ngbatunga sino berã du wa ga Yona, nga ka du sakparakpa tipa agu aboro rengbe arengba ka sa gayo berã. Wo rengbe gipai re ka du, gbe, ka ani agbia kina agu aboro dedede du kpasiaka, nga aboro sogote, watadu naida ka ta kina kpata na ani ho ani andu ni ku kpuyo yo na gu pangbangaa nga ga Kindo. Gipai re rengbe ka sa rani ani naamanga kina nyomoro tipa fura na agu aboro Yekova aida aida kindi ka dungura yo rogo gi gbegbere zegino re. (ARomo 2:4) Ka si du nga fuo wisigo ani tirani wenengai ani bi gupai nga, wiri sino gudu kinaho tirani tooni wa gu nadu ti Yona mbata tipa aboro Nineve, si naida ani kparikpee tie tipa undo tipa ani rengbe ka aria gaani bipai si du wa ga Yekova.
13. Tipagine rengbe ani ti ni ka ya wee Yekova naberãpa agu aboro aberã du areme?
13 Yekova naberã aberã tipa agu aboro ata tonanga ka mangasunge fuko ya, na ko nadegatuko adega kuti agu akpee nga ga gu gako aboro naima kpara tiyo fuko. (Matayo 10:11) Nikpiapai, ‘Mbori akaragapai akaraga’ kuti gayo akpee. (Ruka 18:7) Kurii gure, Yekova adigiso gako akidohe adigiso gbiati gako aringbisapai ti gako regbo. (Abakuka 2:3) Gi gako mangaapai re nika koda dia gbegbere apai kusayo auru kpotosende, a wa ko agbarasi Nineve fuo araki rogoho karaga tiyo berewe kuti gbegbere mangaapai.—Nauma 3:5-7.
14. Gine si aida ani ta mangaha kini pidi ga Yekova bakerepa uru?
14 Ya mo ani asungo na zerangbaduse wa ani apido gu bakerepa uru nga ga Yekova, kini dingiso tirani kuti manga gupai ko akpinyemuhe daa kinaho i ka dia gi gbegbere zegino ni re kusayo? Ani aruganga tirani na pa bakio wai sunge tungusapai nika manga na afutufutuhe mbata fu da ga Yekova uru te, ono gupai ini ani he nga, i nika tungusa gu wene pangbangaa atungusa nga ga Kindo rogo agu arago dunduko aboro araka rogoho da kuho Mbori aidaha kuho ni mbata fu da digido zegino. Na nirengo, si naida ani naabakabangirani tipa ‘agu ahe ngba angba’ Yekova nika ye aye nani kurogo gako bambu wa ko andu kumbatayo kindi kaa hiisoho na taarimo.—Agai 2:7.
Gaani Bipai Niyuguyuguhe Ziazia Rogo agu Apai Ani Amangaha
15. Gine rengbe ka kiiso gaani ngbarago tipa ka tungusa wene pangbangaa fu aboro?
15 Isoke si vura du nga ani naraka dagba agu aboro adunga na nyemu gaani sunge tungusapai tiyo ya, na ka ani adunga na gene berani tipa ka ndu kurogo gu ba du bakere zingo rogoho tipa atakipande Kindo ya. Ani ya aboro gu duho bawe rogo gu rago ani atungusapai rogoho rengbe ani arengba ka gbia yo mbata fu digido zegino da. Ya mo ani naberãha ya agu aboro du bawe re ima rẽ ani gbata yo? ‘Nunga’ rimbasa aboro azi Yesu “bambiko i arungo, ki nigbandaka, wa kina agu akandoro adu nga na babandara ti ra ya.” (Matayo 9:36) Niwisigo ani Ziazia Kekeapai na kini gedi gu kekeapai wenengai du rogo Ngbaõbambu Sinziri na Awake!, ani rengbe arengba ka duna dudungurobipai tipa gu kereapai namanga rogo gi zegino re. Na kurii gure, gupai re rengbe ka kiiso gaani ngbarago tipa nyemu tungusa wene pangbangaa fu aboro. Berewe a, padu ani na tambuahe tipa agu abuku du mburuhe rii Ziazia Kekeapai nga agu abuku ‘ruru kangara moyambu’ afuhe, rengbe ka ngarasa rani ani tungusipai fu aboro kini rogodi akapa kusayo riyo yo rogo agu arago ani atungusapai rogoho.—Matayo 24:45-47; 2 Timoteo 3:14-17.
16. Wai rengbe ani ka mbakada ngbanya gaani sunge tungusapai?
16 Gu bakabangirise du ani nani tipa agu aboro rengbe arengba kindi ka karagapai wenengai kuti gu pangbangaa nga ga Ziazia Kekeapai nabatasa unga, rengbe ka fõngbaduraniyo ani aria agu aregbo ani andu fuoyo ti ni na ki aria agu agene a ani atungusapai fuyo ngbaha. Wa ani atungusapai, ani agbianga dungu aboro kporo ti agu aregbo ani andu fuoyo tee? Kangia wo duhe, si rengbe ka ida gupai tie berani nga ani mbakadi ngbanya gaani sunge tungusapai ni aria ani agu aregbo ani andu ti ni fuo aboro na agu aba ani amanga dezirepai rogoho fuyo. Abaziatio naandu ka ba gayo apio ti agu aregbo rengbe yo ti ni ka zio atio. Ya mo ani arengbanga ka mangapai wa kina gure rogo gu gaani sunge zio atio nga ga toro tee? (Marako 1:16-18) Tipagine ka oni a’asadanga ka manga dezirepai ti ni nyemu ya, na ka mangaha rogo terefuni ka si du nga irangbii azanga he ti mangaha rogo gaoni dagbarago te? Gu kura awirina bi gupai nga, aba rugusa atarambiri, agu aba atarambiri aru rogoho ka zogosa aboro na ka rogoda aguyo, agu aba i ababaga abanzimi rogoho, na ababagaahe, si nga wene aba tipa ‘zio atiyo.’ Padu ani na gu sino berã du wa ga Abarayama tipa aboro nada a ziazia ho ani amanga dezirepai ni zanga sogimaha aso ti regbo agu amamu namanga fu rani.
17. Rogo gini agene rengbe ani ka ngarasa amokedi na kura aboro rogoho nga aguyo natungusapai rogo agu aringira angianga gayo ya?
17 Dungu aboro kindi atagianga gu pangbangaa nga ga Kindo ya. Ku pati tungusapai fu agi aboro re, ya mo ani rengbe ka duna nunga yo tirani zavura ho du ani ni kpurani yo? Awere, ya mo ani ini pa agu amokedi watadu agu aboro natungusapai awere ti aregbo dunduko rogo agu aringara angianga gayo ya? Ka si du wo, si adu niwenepai ka ani keke awaraga fuyo kini yugu gaani tambuahe tipa gayo asunge. Wai rengbe pa manga ani he wo ayugo gupai nga, ani naberã aberã tipa aboro dunduko? Agu awaraga nga ga ngarasahe na tambuahe ani akekaha fu amokedi re rengbe ka ngarasa yo i nye kuti ngba gayo sunge tungusapai, sidu, si kini undo kura dungu aboro i ye ka duna gu inohe nga ga rengo. (Abasapungbanga 11:40) Ani rengbe arengba a ka kparakpee tipa amokedi na tipa agu aboro du rogo kura aringara duna gomoro tiyo tipa rengo. (AEfeso 6:18-20) Gu kura gene rengbe ani rogoho ka yugo gupai nga ani naberã aberã tipa kura aboro nga ka fu marã nigamahe tipa gu sunge tungusapai aDezire Yekova amangaha rogo zegino dunduko.—2 AKorindo 8:13, 14; 9:6, 7.
Oni Rengbe ka Ga na Kporo Kurogo Kura Ba?
18. Gini apai bete aKristano amangihe ka sonosa agu apai nga ga Kindo rogo gu ringara i araka rogoho?
18 I afu maku fu agu aboro naga na ramukporo kurogo gu kura aba du azingo rogoho nibakerehe tipa atakipande Kindo mbiko gayo asadatise na ki mbupa gayo apai tipa gi sunge re. Ono tie, gu kura aDezire Yekova tigayo, baraho i anye ni kina rogo gayo ringara, awiriki kura fugo-aboro tipa wa ka i undo agu aboro rogo toroyo ye kurogo gayo ringara nape gu fugo re. Mosoro kina ti ni tipa ngbatunga gu bakere asadatise re nirengo. Nikpiapai, agu aDezire du saba naundo aboro China Texas yo, du Amerika yo, adi aboro kugume 114 nga aguyo naye tipa Ga Gbia Riahe Nga ga Nyemu rogo gu garã nangia 2001. Agu aboro naundo ngbatunga gu badona aboro re bi gupai nga, ahe ima zama rogo gayo ati tipa i kehe.—Matayo 9:37, 38.
19. Ginipai ngbaa tipa oni mangihe ka oni aberãpa nduge kurogo kura ringara tipa ka sonosa sunge tungusapa Kindo yo?
19 Isoke si nawira mo na gamo aborokporo naberã wa rẽ oni arẽ ka ga na ramukporo kurogo gu ba du zingo rogoho nibakerehe tipa abatungusipa Kindo. Rengo ngaha, nibambatapai, si naida boro “sungu mbata, ka geda paha.” (Ruka 14:28) Wo duhe gbe ho boro aberãpa ga ni na ramukporo kurogo kura ringara. Gu boro naberãpa ngbatunga gu gate kporo re, si daada ni sana tini na ngbatunga agu asanahe du wa gu naye re: ‘Mi arengba yo ka songoda gimi aborokporo? I rengbe ka idaha fere mi sungu rogo gu ringara re tipa gu bagizo regbo daada? Mi ima ino ka pe gu fugo aboro apehe rogo gu ringara re, watadu mi na nyemu ka wirikaha? Mi ima berãpa gu faarago na zerarago du yo gbiati gu sino mangaapai nga ga agu aboro du yo? Ya mo mi adu nirengo “nigu boro nika ngarasa” agu akuare aidipase du rogo gu ringara re ono angianga ka du nitindiro kuriyo ya?’ (AKorosaio 4:10, 11) Tipa ka ino bakio gu zingo du rogo gu ringara oni aberãpa nduge kurogoho re, si daada oni ke waraga kurogo gu biroo nga ga gu be-basunge nga ga aDezire Yekova nangera kurii sunge tungusapai rogo gu rago re.a
20. Wai paranga Kristano afu tiko ka undo akurako aidipase na kura aboro rogo gu ringara nangianga gako ya?
20 Kristano sa nga guko naima digo nimangisunge dudua aBambu Kindo Japan yo agi gupai nga, zingo adu Paraguay yo tipa wene abamangisunge i dua bambu irisombori yo. Mbiko wa ko angia bakuparanga na ki duna ome aparanga tiko, ko andu kurogo gu ringara re na ki mangisunge yo tipa adiwi muambe na kingia gu yangara boro naamangasunge ti aregbo dunduko ti gu bambu re. Ti gu regbo ko adu yo, ko awiriki pa aboro Spain, na kini wisigi Ziazia Kekeapai na aboro kpuyo. Ko abi gupai nga, zingo adu yo tipa atakipande Kindo rogo gu ringara re. Wa ko avura karaga tiko ku Japan yo, ko aimanga yo te ko ki karaga tiko berewe ku Paraguay yo tipa ka dungura aboro i niye kutii kina boro gu Bambu Kindo re tipa irisombori.
21. Gine si aida si du nigu banguapai ani abakabangirani tipaha na si aida si du nga gaani bipai wa ani apido ga Yekova bakerepa uru?
21 Mbori nika bi gupai abi nga, gako amoyambu nika mangasunge tungusapai wenengai sirisiri na ngbanya kuti gupai ko akpinyemuhe. Areme, ko naipiso gu yangara sunge keahe nga ga toro. (Yesaya 60:22) Sidu tie, wa ani apidopa da ga Yekova uru, ani mangisunge keahe zaaza na kini bi aboro a wa gu gaani Mbori nga boro nyemuse abiyo.
[Gu rukutu kekeapai du bandu kpewaraga yo]
a Dedede, si adanga fu roni oni guari nisaroni ka ga na ramukporo kurogo gu ringara irangbii aima ká rogoho tipa sunge tungusapai te. Pa manga oni he wo rengbe ka ye na kina fudifudiapai fu agu abatungusipa Kindo namangasunge nigbuko rogo ngbatunga agu arago re.
Oni Natingidaha?
• Wa ani apido ga Yekova uru, wai si aida ani naabi aboro?
• Gine nangia ga Abarayama bipai tipa gu ruru aboro navura kaa raka Sodomo yo?
• Wai Yona abi aboro Nineve fuo sa yo gayo berã?
• Wai rengbe ani ka yugo gupai nga, ani na ga Yekova bipai tipa agu aboro atagianga wene pangbangaa ya?
[Gu kpiahe du ti kpewaraga 16]
Abarayama anabi aboro a wa Yekova abi yo
[Gu kpiahe du ti kpewaraga 17]
Yona aye ka duna bangisa bipai wa ga Yekova tipa aboro Nineve
[Gu kpiahe du ti kpewaraga 18]
Padu ani na bakabangirise tipa aboro nasa rani ani aria agu aregbo ani andu ti ni fuoyo na ki aria agu agene a ani atungusapai fuyo ngbaha