‘Oni Naangera Ngera Kindi,’ Bambiko Regbo Sapangbangaa Ima Da!
‘Oni naangera ngera kindi, bambiko oni ainanga nigu uru gaoni Gbia ka ye te.’—Matayo 24:42.
1, 2. Gine Yesu aringbisipa gako ye kuti ni teketeke?
GINIPAI ka oni mangihe ka oni ini gupai nga iradĩ natapita yee, kini rimi kurogo abambu ngbaome rogo gaoni dagbarago kini dĩ ahe? Tipa ka banda abadiangbaroni na gaoni nyanyakipa ahe, si aida gupai beroni nga oni naasinziri rago asinziri kindi. Oni nika sinzirirago bambiko, iradĩ naakedanga waraga akeda ka tingidapa gu regbo ni nika ye ti ni te. Kuba gure, ni naaye yee nigbuko na ti gu regbo oni aberãnga paha ya.
2 Yesu ayugupai na kpiapai bara dunguhe nimanga ko sunge na agu agene nga ga iradĩ. (Ruka 10:30; Yoane 10:10) Nibipa agu apai si adu nga si nika manga ti digido zegino na agu apai nika manga mbata fu rago sapangbangaa, Yesu afu gi zahe re: ‘Oni naangéra ngera kindi, bambiko oni ainanga nigu uru gaoni Gbia ka ye te. Ono oni íni gere ya ka irakporo aini gu rago iradĩ ka ye ti ni, ka ni angere, ka ni aidanga i kuadi gani bambu ya.’ (Matayo 24:42, 43) Sidu, Yesu aringbisipa gako ye kuti pada iradĩ, ti gu regbo ani aberãnga paha ya.
3, 4. (a) Ginipai si aida ani mangihe tipa ka degaturani kuti ga Yesu arugute tipa gako ye na ki irisihe? (b) Gini asanahe nakura?
3 Gu yugopai na kpiapai re adaada, bambiko anga boro ho naini gu ndikidi rame-diwi si adu nga Yesu nika ye ti ni te. Mbata fu gu regbo re, Yesu agumbapai kina rogo gu bangisa sangbanebi re ki yaa: “Boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” (Matayo 24:36) Si du Yesu azinahe ti ni fu agu aboro naadegatuyo kutiko ki yaa: “Oni mbákadi tironi . . . tie; bambiko Wiri boro naye ti gu saa oni aberã nga pa ha ya.” (Matayo 24:44) Agu aboro si adu nga i nika degatuyo kuti ga Yesu arugute na kini irisihe, i aima mbakadatiyo na kini mangiapai ti genehe, ti gu regbo si adu nga ko nika ye ti ni ka manga ga Yekova sapangbangaa.
4 Bete nyanyakipa asanahe nakura nga: Ya mo ga Yesu arugute gbua fu kina aboro zegino, watadu si naida aida a ndikidi aKristano ‘naangera ngera kindi’? Tipagine duhe ti ni ninyanyakipa pai ani ‘naangera ngera kindi,’ na wai rengbe ani ka manga gupai re?
Rugute Tipa Ada?
5. Wai ani aino gupai nga, gu rugute nga ‘oni naangera ngera kindi,’ si tipa ndikidi aKristano?
5 Zanga kapa, si nirengo nga ga Gbia ye adu nitunguotunguoho fu aboro zegino wa paye iradĩ, bambiko i kisi tuyo ki basapa gu zahe du tipa gu bakere gberangbii naye. (2 Petero 3:3-7) Ono tie, ya mo si aduwa paye iradĩ fu ndikidi aKristano? Gu mokedi nangia Pauro akepai fu akurako aidipase ki yaa: “Oni . . . [ima ino] tigaoni nzunzu ya rago Gbia naye wa iradĩ naye yuru.” (1 ATesaroniko 5:2) Anga kapa ho berã rani yo tipa gupai nga, “rago Gbia naye” te. Ono ya mo gupai re naumbasipa gu gaani zingo du tipa kaa ngera angera kindi? Oni kparia gupai nga, kina ga Yesu abawiri sa ko agumba gupai fuyo nga: “Wiri boro naye ti gu saa oni aberã nga pa ha ya.” (Matayo 24:44; gu kekeapai du nibibirihe na nikikindigihe re, ani du kehe wo.) Mbata kusayo, ho Yesu azungadi gako abawiriki ni tipa i naagbata kina Kindo kindi, ko afu rugute ki yaa: “Oni mbákadi tironi a wo; bambiko Wiri boro naye ti gu saa oni aberã nga pa ha ya.” (Ruka 12:31, 40; gu kekeapai du nibibirihe na nikikindigihe re, ani du kehe wo.) Anga si ziazia nga Yesu aaberãpa apefuoko ho ko afu rugute ni ki yaa: ‘Oni naangera ngera kindi’ tee?
6. Tipagine si aida ti ni ani ‘naangera ngera kindi?’
6 Tipagine si aida ti ni ani ‘naangera ngera kindi’ na ‘ki mbákadi tirani’? Yesu asakirogoyo ki yaa: “Ni gu rago re akumba adu ati yo ue; i ki di gu ni, ki he gu ni. Ade adu pati mbia ue nisa ahe; i ki di gu ni, ki he gu ni.” (Matayo 24:40, 41) Agu aboro ima mbakadatiyo du, i ka ‘dia’ yo watadu i ka batasa yo, ho i ka gbarasa gu zegino ni nga ga azangasinombori. I ‘ahe’ kura aboro ahe tipa gbarasa yo bambiko i naaora nigbangbati fuo kina gu gayo apai ngbatiyo. Agi apai re rengbe arengba wenengai ka koda agu aboro nadumbata na inohe ono nga aguyo naakanga kuti ngera kindi ya.
7. Ginipai pa zanga ino ani gu regbo digido zegino nika ye ti ni ambu rani ani mangihe?
7 Pa zanga ino ani gu ndikidi uru nga ga digido gi zegino re nafu mamu fu rani ani yugu gupai nga, ani nandusunge fu Mbori na ziazia ndu mangaha. Wai rengbe gipai re kadu wo? Si rengbe kadu nga digido zegino nawira si nika dia gbanga regbo mbata fu daha. Si ni gupai nafu kina gberarago nga, gu bete aKristano duna gi berãpai re, i ima mbu gayo nyemu mangasunge fu Yekova zaaza si zere. Ono, wa vura duhe wo, mbiko gaani kparatise fu Mbori, zanga kapa, ani ima fu tirani fu Yekova ka ndu gako sunge. Agu aboro ini Yekova ima kparia gupai nga, ka i tona manga gako sunge zaaza ti kina digido regbo gbua, si angbanga tiko te. Ko nabi gupai abi du ngbaduseyo.—1 Samuere 16:7.
8. Wai nyemu Yekova afõ rani ani naangera ngera kindi?
8 Bambiko ani nakpinyemu Yekova nirengo, ani nagbia bakere ngbarago rogo manga gupai ko akpinyemuhe. (Atambuahe 40:8; Matayo 26:39) Na ani nakpinyemu ka manga ga Yekova sunge nyeanye kindi. Anga gu maabangirise re gbua naapaha kusende mbiko gupai nga ani duwa ka ani sungu mbata tipa bete gbanga regbo susi gu ani awiri kaa berãpaha te. Gupai nyakipaha kisusi nga, ani naangera ngera kindi bambiko ani nangera kumbatayo na nyemuhe tipa gupai nika manga rogo ga Yekova uru tipa digiso gako ringbisapai. Gaani ndikidi nyemu fu ngbarago fu Mbori nafõ rani ani mangisunge na Fugo ko na ki moi gako Kindo rogo bambata ba rogo gaani raka. (Matayo 6:33; 1 Yoane 5:3) Ani makianga wai pa nye ani kaa ngera angera kindi narengbe kadu na ome kurii agu aberã ani naadiaha na gu gene ani araka gaani raka ngbaha na aʹuru nibasasa.
Wari Gaoni Raka Andu Kuhoni?
9. Tipagine duhe ti ni nga, agu aboro du rogo zegino, si naida i kparia gu nyanyakipai du tipa gi gaani aregbo re niipo?
9 Dungu aboro areme ima kparia gupai nga, kere fudifudiapai na bagbegbereapai namanga na aʹuru dũ, na i awiranga kadu na ngbarago be gu gene kina boro gayo raka andu ngbaha te. Ono tie, ya mo i ini gine nirengo nga rogo agu apai yo namanga rogo zegino tipa rani? Ya mo i kparia gupai nga, ani naraka rogo “digida rago”? (Matayo 24:3) Ya mo i idi kuti gupai rengbe na arago dũ aboro amangaha nigbangbati, nizuũ, zavura nigu sino berã nga ga zangasinombori ya si nayugo agi aregbo re ni “kusa rago”? (2 Timoteo 3:1-5) Si naida i rugutiyo niipo naapa nyakapa agi apai re dunduko, na ka makiapa agu agene gayo raka andu ngbaha.
10. Ginipai si aida ani mangihe ka yugo gupai nirengo nga ani nangera ngera kindi?
10 Na ani tigaani, ginipai si aida ani mangihe? Rogo aʹuru nibasasa, ani nagbia tirani na agu adiaberã du tipa gaani sunge, tipa wasa kpotorani, tipa gaani aborokporo, na tipa gaani irisombori. Ani ima ino gupai Ziazia Kekeapai agumbaha, na ani namanga nyanyaki asadatise ka mangasunge nani. Sidu, si naida ani sana tirani nga: ‘Mi aima mbugene fu agu abakabangirise nga ga raka si di re kusayo ngbagene gu gimi asásá nga ga toro? Mi nambugene fu agu anyemu tatamana nga ga zegino, na gaha aberãpai, si niyugu agu apai fere mi asiaha ka mangaha?’ (Ruka 21:34-36; AKorosaio 2:8) Si naida ani naandu kumbatayo kindi kaa yugo gupai nga, ani nakido kuti Yekova na ngbaduraniyo dũ, zanga kido ani kuti gaani rugatinapai nisarani. (Asanza 3:5) Rogo gu gene re, ani nika kakuti “gu unga nga ndikidi unga,” nga nyenye unga rogo ga Mbori vovo zegino.—1 Timoteo 6:12, 19.
11-13. Giniapai rengbe ani ka wirikaha be gu kpiaapai namangi (a) rogo agu aʹuru nangia ga Noa? (b) rogo agu aʹuru nangia ga Roto?
11 Ziazia Kekeapai na dungu kpiaapai rogoho ni arugute nga agu rengbe ka undo rani ani naangera ngera kindi. Oni makianga gupai namangi ti rago Noa. Mbata mbu gbanga regbo kindi kumbatayo fu manga Yekova pai, ko abi gupai nirengo nga ko aima fu zahe fu aboro. Ono kpara kusayo Noa na gako aborokporo, kura aboro adeganga tuyo te. (2 Petero 2:5) Nibipa gipai re, Yesu ayaa: “Wa si adu rago Noa, wo pa ye Wiri boro nikadu. Bambiko, wa si adu ni gu rago naadu mbata fu ngirimo akangbi re, i aniri he nimbiri he, nirogo ade nifuku ade sa roga yo, ki da ti gu uru Noa arimi ni ku kurungba yo, ka i aina nga ha ya daho ngirimo akangbi aye ni ki nirogo yo dunduko ku sa yo; wo ye Wiri boro nikadu.” (Matayo 24:37-39) Ginipai rengbe ani ka wirikaha be gupai re? Kangia gu kura aboro dagbarani nambugene fu berãpa zegino, zavura kina berãpa gu kungboapai nga ga raka, si di gu mangaapai kusayo nga ga toro nga gu Mbori angarasa rani ani bandaha rogo bambata ba rogo gaani raka, si naida ani berẽ nyanyakii tipa wai ani araka gaani raka.—ARomo 14:17.
12 Oni berẽnga a tipa agu aʹuru nangia ga Roto. Gu bagbata nangia Sodomo, nga gu Roto aaraka rogoho na gako aborokporo, si adu nikumukokumukoho, ono kidu na zingo ruru mangaapai rogoho. Si du Yekova akedi gako amaraika ti ni i gbarasi gu rago re. Agu amaraika re azinahe fu aRoto na gako aborokporo i oro Sodomo yo kusayo na ki zanga ngera kugiiyo yo. Fuo agu amaraika re ngarasa yo, i aguari nirengo rogo gu bakporo re kusayo. Ono tie, tipa dia Roto, wa gopai ayugoho, ri aaberãpa kpuri kindi ku Sodomo yo. Nibasapai, ri angere kusayo, na mbiko manga ri gipai re ri akpi. (Bambata Pai 19:15-26) Nisangbanebi, Yesu afu rugute fu rani tipa gaani raka kumbatayo ki yaa: “Oni tíngidi pa dia Roto.” Ya mo ani namangapai na ngbanyaa kuti gu rugute re?—Ruka 17:32.
13 Agu aboro nanaairisa sangba ga Mbori arugute, i nanaabata. Kinawo si amangi tipa Noa na gako aborokporo gbiati Roto na awiriko nangia adegude. (2 Petero 2:9) Wa ani abi gu zahe du rogo gi kpiaapai re na nyanyakipaha, gu pangbangaa du rogoho nga ga bata fu akpinyemu ruru mangaapai, si nangarasa rani a. Gupai re nahiiso ngbaduraniyo na ndikidi maabangirise tipa digiso ga Mbori kidohe tipa “vovo angbangbaturũ na vovo kpotosende, nga gu ruru apai nikanye rogo ho.”—2 Petero 3:13.
Gu ‘Rago Nga ga Sapangbangaa Ima Da’!
14, 15. (a) Gine gu “rago” nga ga sapangbangaa akodaha? (b) Ginipai si aidaha tipa ami mangihe ka ‘gunde ti Mbori na kini fu taarimo fuko’?
14 Wa ani nikaa ngera angera kindi, ginipai rengbe ani kadu na maabangirise tipaha? Gu buku Ziazia Kekeapai nga Yugoti, si naringbisapa agu apai nikaa manga tooni tooni nidigisidigisi ga Mbori ringbisapai. Pa manga ani pai na ngbanyaa kuti gupai si agumbaha ninyanyakipa pai, ka si du nga ani nika yugo gupai nga, ani ima mbakadatirani tipa gipai re. Sangbaanebi naringbisapa agu apai ziazia nga gu nika manga ti “rago Gbia,” nga gu natona ho i amoi Kristo ni ri mbatabakindo ngbangbaturũ yo rogo gu garã nangia 1914. (Yugoti 1:10) Yugoti nagbeberã rani kuti maraika sa nga guko duna “nyenye [wene] pangbanga ngbako yo ka tungusa ha.” Ko natakapandehe nibakere fugo niyaa: “Oni gúnde ti Mbori, ki taasi rimoko; bambiko rago [watadu saa] gako sapangbanga da.” (Yugoti 14:6, 7) Gu “rago” nga ga sapangbangaa re, si nga wiri guru regbo; si nakoda apai ue nga sarangbangaa gbiati digiso sangba agu asarangbangaa re tibaraha dũ, nga agu apai duku paha niyuguyuguhe rogo gu sangbaanebi re. Ani naraka awere rogo gu regbo re.
15 Awere, mbata fu digo gu saa nga ga sapangbangaa re, i nazinahe fu rani niyaa: “Oni gúnde ti Mbori, ki taasirimoko.” Gine gipai re akodaha? Ndikidi gunde ti Mbori duwa ka si fõ rani ani naane manga gbegbereapai. (Asanza 8:13) Kangia ani nagunde ti Mbori, ani adegaturani adega kutiko na bakere irisa. Ani adunga na kura dungu bakere asunge berani kaa mangaha, si ki sa gupai nga ani mbu geda Fugo ko nga Ziazia Kekeapai dedede te. Ani abinga gako arugute na umbapaha te, nga agu arugute du tipa padu pati agu adunguratise nga ga aKristano. (AEbere 10:24, 25) Ani akakuti gu mamu nga kaa takapande gu wene pangbangaa nga ga ga Masiya Kindo, na kini mangihe wo zaaza. Ani nikaa kido kuti Yekova na ngbaduraniyo dũ ti aregbo dũ. (Atambuahe 62:8) Wa ani akparia gupai nga, Yekova nga Bakindo Zegino dunduko, ani nafu irisa fuko nira ani nigorani fuko ninyemuhe nigu Bakerepa Bakindo du gaani raka kutii beko. Ya mo oni nagunde ti Mbori nirengo na kini fu taarimo fuko rogo ngbatunga agi agene re dunduko?
16. Wai rengbe ani ka yawee gu sarangbangaa i asarihe kuti gu Babera duna ome ti ni gumba yo paha rogo Yugoti 14:8 aima du nidigisidigisihe?
16 Gu buku nga Yugoti kapita 14 naringbisapa gu kura apai nga gu nika manga ti gu regbo nga ga sapangbangaa. Gu Babera duna bakere ome ti ni, nga ngbii zire pambori, si gumba yo paha mbata ki yaa: “Kura maraika, nga gu ue ko, ki ta peka fuo ko, niya, ‘Si ti, gu bakere bakporo nga Babera, si ti.’ ” (Yugoti 14:8) Ii, kuti ga Mbori bipai, gu Babera duna bakere ome ti ni, si aima ti. Rogo gu garã nangia 1919, i azaki ga Yekova mbedimbedi amoyambu be gu zio nga ga gu yugopai gbiati mangaapai nangia ga Babera, nga gu nadu na ome kurii aboro na arikaaboro tipa dungu akutu agarã. (Yugoti 17:1, 15) Natona tingbafuo gu regbo re, agi aboro i azaki yo be Babera re, arengbe ka futiyo tipa kaa gbaraga ndikidi irisombori. Sunge tungusa gu wene pangbangaa nga ga ga Mbori Kindo aima rengba na arago rogo zegino dũ natona ti gu regbo re daaku awere.—Matayo 24:14.
17. Ginipai si aida ani mangihe ka kura kusayo rogo gu Babera duna ome ti ni?
17 Gu kura apai kinaho berewe kindi tipa ga Mbori sarangbangaa kuti gu Babera duna ome ti ni. Regbo yangara gbarasaha nika da ada bambeda. (Yugoti 18:21) Ruhe aru wa Ziazia Kekeapai azinahe fu aboro rogo arago dunduko niyaa: “Oni kúru yo du ri ni [nga gu Babera duna ome ti ni] . . . ka gaoni ngbanya dú nga na gari ingaapai ya.” (Yugoti 18:4, 5) Wai ka ani kuru kusayo rogo gu Babera duna ome ti ni? Gipai re naida gupai berani susi gu gbua nga ga zanga kodatise na zire pambori. Gu maapai kurii kura aboro nga ga gu Babera duna ome ti ni, si rogo dungu agu apumbo gbiati agu asino aboro udi aboro ho gbe, rogo gu ga zegino sino nga ga mbugene tipa wasiwasi kodaba, rogo gbaraga agu ambaro nakodapa sangbaatoro, na kura dunguapai. Tipa ani naangera ngera kindi, si ninyanyakipa pai wa duhe tibaraha ue nga, rogo gaani mangaapai gbiati agu apai du nyemuhe ngbaduraniyo, ani yugu gopai nga ani nirengo nikparakpara rani ti gu Babera duna ome ti ni rogo apai yo dunduko.
18. Nibi gupai ringbisi yo paha rogo Yugoti 14:9, 10, ginipai du agu aKristano nangera ngera kindi na rugatise ka nehe?
18 Rogo Yugoti 14:9, 10, ani nawirika kura ringbisapai berewe tipa gu ‘rago nga ga sapangbangaa.’ Gu kura maraika nayaa: “Ka boro irisi nyarinde na kpiaru, ki du na gau nogodinogodi he ti ngbanda kpakpuni, watadu ti beni, ni ambira gu imekakue nga ga gu zinga nga ga Mbori.” Tipagine? Bambiko “nyarinde na kpiaru” ni agu ahe narukuba ga aboro zogarago, nga gu aidanga naapa ga Yekova bakerepa gbia ya. Agu aKristano nangera ngera kindi, i namangapai na rugatise zanga mbutiyo i moipai kuriyo watadu i nogodihe ti ngbanda kpakpuyo, kangia rogo sino bipai yo watadu rogo mangapai yo, si kidu wa i ni akanga fu agu aboro naká ka idapa gu bakerepa gbia kisusi nga ga ndikidi Mbori nga Yekova. AKristano ima ino gupai nga, i aima sigira ga Mbori Kindo ngbangbaturũ yo, na si nika digiso agu azogarago dunduko nga ga aboro, na gupai nga si nika nyeanye tigaha kindi.—Daniere 2:44.
Ka Bangironi Gonga ti Gaoni Berãpa Mangapai Niipiipihe Ya!
19, 20. (a) Wa ani ambeda kuti digido yangara arame, ginipai rengbe ani ka inoho nirengo ya Satana nika asada ka mangaha? (b) Ginipai si aida ani diberã ka mangaha zanga nyomoro?
19 Wa ani ambeda kuti yangara arame, ambugo na aʹasada nikaa maapai kina kumbatayo kindi. Na wa ani araka kindi rogo gi kuru zegino re na kini rungo be gaani zangarengba, ngbatunga agu apai duwa zingo wasa-kpotose, kpio abadiangbarani, imisa rani rogo berã yo, gberarago ho du aboro ni sakparakpa kuti gaani asadatise ka tungusa Fugo Mbori fuyo, na gu kura dungu apai, si nikaa fuda rani afuda kindi. Ka bangironi ya gonga ti gupai nga, anga kura he ho Satana akpinyemuhe kisusi gu nga ka gbia mamu be agu ambugo namanga rani tipa ka ruho ka zomia rani ani mbu rengo, na ki mbu tungusa wene pangbangaa watadu ki mbu raka na ngbanyaa kuti ga Mbori andiko te. (AEfeso 6:11-13) Anga awere nga gu regbo ka bangirani go ti ni ti mangapai niipiipihe nibipa agu aregbo ani araka rogoho re te!
20 Yesu aima ino gupai nga, ani aduadu rogo bakere mbugo watadu asada tipa si sa rani ani mbu rengo, si du ko arugu rani ti ni ki yaa: ‘Oni naangera ngera kindi, bambiko oni ainanga nigu uru gaoni Gbia ka ye te.’ (Matayo 24:42) Fuo gure, ani dunga adu na bakere rugatise tipa gu ba du ani rogoho wa regbo nikaa susa. Ani bandatirani be ga Satana abirĩ nga gu rengbe ka sa rani ani zere rogo toroyo watadu ka mbu rengo. Ani dinga berã kaa tungusa gu wene pangbangaa nga ga ga Mbori Kindo zaaza bakere gbe susi gu ani naamangaha mbata na ki zanga nyomoro ti ni. Nirengo, ani kanga kuti gaani bipai tipa mangapai niipo wa ani airisa ga Yesu zinahe nga gu nayaa: ‘Oni naangera ngera kindi.’ Nimanga ani he wo, ani afu irisa fu Yekova na kidu dagba agu aboro duna gu maabangirise du tipa gako nyenye amaku.
Gaoni Karagapai Nga Gine?
• Wai ani aino gupai nga, gu ga Yesu arugute nga oni ‘naangera ngera kindi,’ si tipa ndikidi aKristano?
• Gini arugute du nikpiapai rogo Ziazia Kekeapai yo rengbe ka undo rani ani ‘naangera ngera kindi’?
• Gine nga gu rago nga ga sapangbangaa, na gine i azomia rani ani mangihe mbata fu mangaha?
Gu pangbangaa du rogo gi papara kekepai du tipa wisigoho re, mburuhe rii gu burosua nga Keep on the Watch! nga gu i akusihe ti regbo gu bakere dunguratise nga ga aʹuru biata i amangihe rogo zegino dũ vuru agu agarã nangia 2004/2005.
[Gu kpiahe du ti kpewaraga 26]
Pa gbarasa gu Babera duna bakere ome ti ni ima mbeda