Oni Nye Rogo Ga Mbori Nyemuse!
‘Oni, abadiangba, oni bánda tironi rogo ga Mbori nyemuse yo, kini ngere kumbatayo tipa nyenye unga.’—YUDA 20, 21.
1, 2. Wai rengbe oni ka nye rogo ga Mbori nyemuse?
YEKOVA akpinyemu aboro akpi gbe, si du ko afu bangisa Wiriko ti ni tipa wa ka agu aboro ka idi pako gbia nyenye unga. (Yoane 3:16) Nairiwo ngbatunga gu nyemuse Mbori akpinyemu rani nani re! Ka si du nga oni nga ga Yekova moyambu, zanga kapa, oni naida ka gbia ngbarago agbia be ngbatunga gu nyemuse re nyeanye kindi.
2 Gu bawiriki nangia Yuda akusipa wai rengbe oni ka nye rogo ga Mbori nyemuse yo. Ko akehe ki yaa: “Oni ta sonosa tironi rogo gaoni ziazia idapase, nikpari rogo Ziazia Toro yo, oni bánda tironi rogo ga Mbori nyemuse yo, ki ningere fuo ga gaani Gbia Yesu Kristo inapai sa nyenye unga.” (Yuda 20, 21) Pa wisigo oni Fugo Mbori na kini tungusi wene pangbangaa nika undo roni oni sonosi tironi rogo “ziazia idapase,” nga gu oni agbiaha be agu ayugopai nga ga aKristano. Tipa ka nye rogo ga Mbori nyemuse, si naida oni kparikpee “rogo Ziazia Toro yo,” watadu ka maa tironi kutii gaha ome. Tipa i fu maku furoni nga ga nyenye unga, si naida oni du a na idapase kuti gu motumo tumorii nga ga Yesu Kristo.—1 Yoane 4:10.
3. Tipagine adunga kura aboro areme ti ni berewe ni aDezire Yekova ya, nga aguyó naduadu mbata wo?
3 Kura aboro kinaho nadu adu mbata na idapase, ono ka i anyenga rogo ga Mbori nyemuse ya. Mbiko gupai nga i amere gene ingaapai yo, i berewe ni aDezire Yekova te. Wai rengbe oni ka sa gupai nga ka ngbatunga gupai re mangingo tipa roni ya? Pa berã oni kurii gi memeapai naye re nika undo roni oni ne ingapai na ki bandatironi rogo ga Mbori nyemuse yo.
Oni Yugu Nyemuse Tipa Mbori
4. Wai nyakipa giasangba Mbori?
4 Oni yugu gaoni nyemuse tipa Mbori nigia oni sangbako. (Matayo 22:37) Gu mokedi nangia Yoane akepai ki yaa: “Gi nga du [ani] na nyemu Mbori re, nga ka ani kuti gako rugute. Gako rugute asusa nga omerani te.” (1 Yoane 5:3) Pa gia oni sangba Mbori nika nyakasa roni oni dibe asada na si rengbe ka sa roni oni duna bakere ngbarago. Bake apapara Atambuahe ayaa: “Boro maku nga gu boro ata nga rogo ga gbegberẽ aboro rondo ya, . . . ono gani ngbarago du rogo gu rugute nga ga Yekova.”—Atambuahe 1:1, 2.
5. Gaoni nyemuse koyo du Yekova ni nika sa roni oni naamangaapai ngba gini gene?
5 Gaoni nyemuse koyo du Yekova ni nika sa roni oni he manga gu kere ingapai rengbe ka ye na gbarasarimo kutiko. Gu kumba nangia Agura akparikpee ki yaa: “Ka mo fú nga rungo fere watadu aũkumuko a ya; ono mo rígi re ni kina gu riahe rengbe fere; mi ka mbi, ki oro rimoro, ki ya, ‘Da nga Yekova?’ watadu mi ka du ni rungurungo boro, ki dĩ he, ka gbarasa rimo gi Mbori.” (Asanza 30:1, 8, 9) Oni diberã ka zanga ‘gbarasarimo Mbori.’ Kuba gure, oni asadi tironi dedede kaa manga gu ruruapai nafu taarimo fuko.—Atambuahe 86:12.
6. Ginipai rengbe ka manga ka si du nga oni nataino aino kini mangi ingaapai?
6 Oni naakpara dedede fu gu Baroni du ngbangbaturũ yo tipa ko undo roni oni dibe gu asada rengbe ka sa roni oni mangi ingaapai. (Matayo 6:13; ARomo 12:12) Oni naapekafuo ga Mbori arugute kindi tipa pai andu ka ká na gene be gaoni akpee. (1 Petero 3:7) Ka oni taino aino kini mangi ingapai, sangbanaha rengbe kadu nikerehe, bambiko ka pepai nimasaku, Yekova nakiso gene be abasamungu na bakere dubo, tipa ka gayo kpee susi nga koyo du ko ni ya. (Abia Kpenunga 3:42-44) Sidu, oni duna umbasitise, na kini kpari fu Mbori tipa ko undo roni ka oni mangingo gupai rengbe ka ká na oni ti mbeda naako ya.—2 AKorindo 13:7.
Oni Yugu Nyemuse Tipa Wiri Mbori
7, 8. Wai pa giasangba ga Yesu rugute narengbe ka undo boro ní ne ingaapai?
7 Oni yugu nyemuse tipa Yesu Kristo nigia oni sangba gako arugute, mbiko si nika undo roni oni he ti kurogo ingaapai. Yesu ayaa: “Ka oni ka kuti gi rugute, oni nye anye rogo gi nyemuse; wa ka mi kuti ga Buba rugute, ki nye rogo gako nyemuse.” (Yoane 15:10) Wai rengbe pa raka oni ringbisihe kuti agu afugo Yesu re ka undo roni oni nye rogo ga Mbori nyemuse?
8 Pa gia oni sangba agu afugo Yesu re nika undo roni oni kakuti ruru mangaapai. Ga Mbori ndiko fu aYisaraere ayaa: “Ka mo mángi nga bari ya.” (Gate 20:14) Ono Yesu akusipa gu bangua rugute nadu kugii gu ndiko re niyako wee: “Gu ni nangana de ni nyemu ri ni ima manga bari na ri kpotoni yo.” (Matayo 5:27, 28) Gu mokedi nangia Petero ape gupai nga bete agu aboro nadu rogo gu dungurati nadu rogo bambata sa kama agarã, ‘bangiriyo aima hiko na pa bari, i kini ingisi aguyó nawo.’ (2 Petero 2:14) Nizanga du oni wa yó, oni rengbe ka ne manga gu ingaapai nga ga kodaba ka oni akpinyemu Mbori na Kristo na kini gisangba yó, na ki diberã ka nye rogo pagume naayó.
Oni Mbu ga Yekova Toro Si Nungusi Roni
9. Nibipa ziazia toro, ginipai rengbe ka manga ka boro nye kuti manga ingapai?
9 Oni kpari tipa ga Mbori ziazia toro na ki mbuhe si nungusi roni. (Ruka 11:13; AGaratio 5:19-25) Ono ka oni nye kindi kuti manga ingaapai, Mbori rengbe arengba ka dia gako toro tironi. Fuo Davide mangi ingapai na Bataseba, ko ahõmbupai be Mbori ki yaa: “Ka mo ba nga re bara bangiro ku sa yo, ki di ga Ziazia Toro ti re ya.” (Atambuahe 51:11) Wa Bakindo Saura adu nigu boro ingapai naaidanga ka sa gani berã ya, Mbori adi gako toro tiko kusayo. Saura amangi ingapai nibatasa ko rimbasa akandoro na rimbasa abagara gbiati bakindo aMareko. Fuo gure, Yekova adi gako ziazia toro ti Saura.—1 Samuere 13:1-14; 15:1-35; 16:14-23.
10. Tipagine si aidanga oni berẽ kina kandara berãpa manga ingapai ti ni ya?
10 Ka oni berẽnga kina kandara berãpa manga ingapai ya. Gu mokedi nangia Pauro akepai ki yaa: “Ka ani ingi pai ni nyemu he fuo dia ani gu inahe nga ga rengo ku gume, kura motumo du nga ho tipa ingaapai berewe te.” (AEbere 10:26-31) Nairiwo gu parungo ka ngiaha ka oni taino aino kini mangi ingapai!
Oni Yugu Ndikidi Nyemuse Tipa Akuaroni
11, 12. Ngba gini agene rengbe padu boro na nyemuse gbiati irisa ka sa ní ka ní mangingo bäri watadu meteka ya?
11 Pa kpi oni nyemu akuaroni nika sa gupai nga ka oni mangingo bäri watadu meteka ya. (Matayo 22:39) Ngbatunga gu nyemuse re nika banda kpotoroniyo ka oni kpingo nyemu diakumba watadu kumbakudee ya. Bambiko pa manga oni he wo rengbe ka sa gupai nga oni mangi bäri. (Asanza 4:23; Yeremaya 4:14; 17:9, 10) Si naida oni duwa gu ruru kumba nangia Eyobo, nga gu ko naaidanga ka ngana kura dee na sanza bangirise ya, fuo kina diako sa te.—Eyobo 31:1.
12 Padu oni na irisa tipa wai du rogatise niziazia he nika undo roni ka oni mangingo kere ingapai ya. Mbori aringbisi gupai nga, gu rogatise du niʹiriʹirihe gbiati gu kodaba du dagba kumba na diako, si du tipa vunga agude. (Bambata Pai 1:26-28) Oni tingidi gupai nga, agu abarapa boro du tipa kodaba, i amangihe tipa vunga agude, nga gupai du niziaziaha. Airameteka na airabäri nabasa sangba Mbori, kini umbasi pa kodaba, ki zanga irisa tipa padu rogatise niziazia he, na i kini ingipai kina kuti boroyo. (1 AKorindo 6:18) Ono padu boro na nyemuse tipa Mbori na tipa akurani na kini gisangba Mbori nika sa ní ka ní rimisingo tiní kurogo gupai rengbe ka sa gupai nga i kusi ní kusayo rogo gu dungurati nga ga aKristano ya.
13. Ngba gini gene gu boro namanga wasiwasi kodaba ‘agbarasa kina pa gani ahe’?
13 Si naida ani di gbegberẽ berã rirani yo kusayo tipa ka ani abanga gberarago watadu rungo ti agu aboro ani akpinyemu yó ya. Asanza 29:3 nayaa: “Gu ni du na ngbanya na adebari[, ní] nagbarasa kina pa gani ahe.” Gu kumba namanga bäri ka ko aidanga ka sa gako berã ya, ko nagbarasapa gako pagume na Mbori na kini gbarasipa gu nyemuse du dagbako na diako gbiati awiriko. Diako rengbe ka mbuko ka si adunga ni ingapai furi ya. (Matayo 19:9) Singia kumbakudee du watadu diakumba du mangi ingapai, pa gburuwa ramukporo rengbe ka ye na bakere gberarago fu guni nga boro wenesa, fu awirini na fu kura aboro a. Pa ino ani gu gberango wasiwasi kodaba aye nani nika sa rani ani ne gu asada rengbe ani ka gbiatirani nani nibipa wasiwasi kodaba.
14. Nibipa manga irairapai, ginipai ani awirikaha rogo Asanza 6:30-35?
14 Wadu he nga he ho rengbe boro ka fuhe ka dada bäri nani te, si aidanga boro rimisi tiní kurogo gi gbigbita mangaapai nga ga gbangbati re te. Asanza 6:30-35 nayugo gupai nga, baraho rungo iradĩ animangi aboro amanga ni mbiko ní adĩhe mbiko gomoro, ono i anaapayasipa gu boro apayasi naanimangi bäri tigani bambiko wene berã adunga tiní te. Ní “nagbarasa kina tini.” Tii ga Moize aNdiko, si aniidi i imi ngbatunga gu boro re aimo. (Pa Amotumo 20:10) Gu boro namanga bäri naye na igirã fu kura aboro tipa ka mbiisa gani nyemu kodaba gbua, na gu boro namanga bäri ka ní aidanga ka sa gani berã ya, ka ní nyenga rogo ga Mbori nyemuse te, ono i nado ní ado kusayo rogo gu dungurati nga ga aKristano du nigigirihe.
Sangbakpotoroniyo Nye Nigigirihe
15. Ginipai du tipa gu sangbakpotoyo duna sirõ ti ni si kidu wa i atirikoho na “ngidiri marã”?
15 Tipa ka nye rogo ga Mbori nyemuse, si aidanga ani mbu sangbakpotoraniyo si kpi te. Si tie ziazia nga, si aidanga ani idi na gu bipai nga ga zegino tipa ruru mangapai te, na si naida ani duna rubangirise rogo ngbatunga agu apai ani asiaha ka mangaha, ngbatunga agu duwa abakure, agu awaraga ani agedaha, na gu ngbatunga ambaro ani angihe. Pauro azahe ki yaa: “Rogo kusa rago . . . [gu kura aboro] nikati ku sa yo ti idapase, niidi pa agu atoro nga airanangahe, na gu yugopai nga ga adaimona, rogo ga agu aboro biriki yo nagumba zire, sangbakpotoyo yo ki du na sirõ be ngidiri marã.” (1 Timoteo 4:1, 2) Gu sangbakpotoyo duna sirõ ti ni si kidu wa i atirikoho na “ngidiri marã,” si wakina gu gbitiri kpoto boro duna kina sirõ dunduko, na kidu tautau, ka si arengbanga ka inopa pai ya. Ngbatunga gu sangbakpotoyo re arengbanga berewe ka za rani ani du tuturũu ti abasamungu kuti ndikidi pambori gbiati agu abangiriba rengbe ka sa rani ani ti kusayo ti idapase te.
16. Tipagine duhe ti ni ninyanyakipa pai ani duna gigiri sangbakpotoyo?
16 Pa bata ani naruriipa du ani na gigiri sangbakpotoyo. (1 Petero 3:21) I aima giriso sangbakpotoraniyo be kpikpi mangaapai vurube gaani idapase kuti gu kure Yesu nauka, tipa ‘ani mangi pa unga Mbori.’ (AEbere 9:13, 14) Ka ani taino aino kini mangi ingapai, sangbakpotoraniyo du nibibirikoho na ka ani arẽnga berewe tipa ka manga ga Mbori sunge ya. (Tito 1:15) Ono mbiko gu undahe nga ga Yekova, ani rengbe arengba kadu na gigiri sangbakpotoyo.
Gu Kura Agene Rengbe Ani ka Ne Iraira Mangaapai Ngbaha
17. Gini undo duti ‘pekafuo Yekova na kpotoseyo dunduko’?
17 Oni ‘peke Yekova na kpotoroniyo dunduko,’ a wa Kareba amangihe nadu rogo gu ringara aYisaraere nadumbata. (Pa Fu Rugute ni Ue he 1:34-36) Oni mangi gupai Mbori akpinyemuhe beroni, na ka oni berẽnga kina kandara berãpa rihe rii gu “mbisa nga ga adaimona ya.” (1 AKorindo 10:21) Oni sogo samungu kuti ndikidi pambori. Oni naari he na tambuahe kina rii gu mbisa nga ga Yekova. Ka oni aamangaha wo, airaziree abayugupai ingisinga roni te, watadu gu ome nga ga gbegberẽ atoro. (AEfeso 6:12; Yuda 3, 4) Oni naaberã kurii agu apai nga ga toro, wa gu nga wisigo Ziazia Kekeapai, du pati adunguratise, gbiati sunge tungusapai. Ka oni apekafuo Yekova na kpotoroniyo dunduko na kini mangi ga Gbia sunge zaaza dedede, oni duadu naa kido nga oni nika gbia ngbarago agbia.—1 AKorindo 15:58.
18. Wai gunde ti Yekova nika mangapai na gaoni sino mangaapai?
18 Oni diberã ka “tumo na mangapase nga gu ngba gbe fu Mbori, ni umbasiti na gunde [ti Mbori].” (AEbere 12:28) Gunde ti Yekova nika fõngbadu roni yo oni ká gu gbegberẽapai dunduko rengbe ka ru barabangironi. Si nika undo roni oni naamangaapai na ngbanyaa kuti agu arugute Petero afuhe fu akurako mbedimbedi aKristano nayaa: “Wa oni nakpara fu gu ko nga Ba, akpara nga dagba aboro ya, ono ko nasapa ngbanga aboro kuti gayo mangaapai, oni súngu rogo gu ba du oni rogo ho ni kina gunde ti ko.”—1 Petero 1:17.
19. Tipagine si aida ti ni oni naamanga agu apai kindi oni awirikaha rogo Fugo Mbori yo?
19 Oni naamanga agu apai kindi oni kaa awirikaha rogo Fugo Mbori yo. Si nika undo roni oni ne manga kere ingapai, bambiko oni adu dagba “agu yo rengbe gayo berã na wisiga pa wenepai na gbegberẽpai, mbiko manga yo pai na ni.” (AEbere 5:14) Kuba gupai nga kaa fura bau na kini mangiapai bau, si naida oni du na rubangirise tipa kaa ta wa iratatamana, “oni ki banda gaoni saa tipa manga apai” rogo gi gbegberẽ aʹuru re. Oni ‘naaruga tironi kindi naapa guhe Gbia akpinyemuhe,’ na oni kini mangihe kindi.—AEfeso 5:15-17; 2 Petero 3:17.
20. Tipagine si aidanga ani moi ngbadurani ti ni fuo ga akuarani ahe ya?
20 Ka oni moingo ngbaduroni fuo ga akuaroni ahe wagu tooni ya. Rugute sa dagba agu Arugute Nadu Bawe nayaa: “Ka mo kpí nga ga kuaro kporo ya; ka mo kpí nga dia kuaro ya, na gani moyambu, na gani nagbindi, na gani babagara, na gani dongi, na agu ahe dunduko nga ga kuaro.” (Gate 20:17) Gi rugute re anaabanda ga boro kporo, diani, gani amoyambu, gani anyaa, na gu kura gani ahe. Ono gupai nyakipaha gbe nga gupai Yesu agumbaha nga ngbaduse nabirikosi boro abirikosi.—Marako 7:20-23.
21, 22. Gini apai si aida Kristano mangihe tipa ka banda tiní ti manga ingapai?
21 Oni bandatironi tipa ka nyemu ahe sanga roni oni mangi ingapai ya. Gu bawiriki nangia Yakoba akepai ki yaa: “Boro [ni]du ni asadiasadi ni, ho gu nyemuhe ata gbe ni ni nga ga borose ku sa yo, ki ninangi ni. Gu nyemuhe nga ga borose, fuo du he na mobara, si ki vungu ingapai, ingapai ho da ha ni ti sosonoho, si ki kusi kpio.” (Yakoba 1:14, 15) Nikpiapai, ka si du nga boro anaambira eerẽ buda ambira mbata, ní rengbe ka diaberã tipa ka buda dunga kpuni ya. Tipa ka zanga ti kurogo meteka, Kristano rengbe ka ida ka guari rogo gu ba ní amangasunge rogoho na gu kura boro rengbe ka rimiso ni kurogo meteka re watadu ka mbu gu sunge ní amangaha tipa ka ndu ka gbata gu kuraha.—Asanza 6:23-28.
22 Ka oni dinga kina kandara bambata diandue nga ga ingapai ya. Agu abuga nga ga kodaba gbiati sungo na gbegberẽ aberã berãse yo, si rengbe arengba ka sa boro ní mangi meteka watadu bäri. Gumba rukutu aziree rengbe ka sa boro ní naagumba bakere ziree na si ki ndu nani sa kpasaka gumba ziree nga ingapai. Rukutu adíi rengbe ka zeresa sangbakpoto boroyo ki da ti gupai nga ní kuru nikere babio. Zavura gupai nga ka mbu agu aberã nga ga abasamungu kuti ndikidi pambori si rimi kurogo boroyo tooni, si rengbe ka sa gupai nga ní samungu kuti ndikidi pambori.—Asanza 11:9; Yugoti 21:8.
Ka Oni Mangi Ingapai, Ginipai ka Oni Mangihe?
23, 24. Gini wasa ani agbiaha be agu apai du nikekehe rogo 2 Pekapai 6:29, 30 na Asanza 28:13?
23 Aboro dunduko namanga ingapai amanga. (Batungusipai 7:20) Ono ka si du nga oni mangi kere ingapai, oni rengbe ka gbia wasa be gu ga Bambiko Soromo kpee ko afuhe ti gu regbo i aakpara yekaru fu Yekova. Soromo akpari fu Mbori ki yaa: “Gu kpetambuahe, na gu kpesarawati gu boro ka kpara, watadu gamo aboro aYisaraere dunduko, nga agu yo ka ini pa gayo gberãngbi ni ba sa sa, na gayo rungosi, i ki zara beyo kono du gi bambu re ni; mo gíhe ngbangbaturũ yo nga ga banye, ki vu yo, ki nifu he fu aboro dunduko rengbe na gayo apai, nga agu yo ini mo pa kpotoyo yo, bambiko mo, kina ro ini gupai du kpoto awiri aboro yo.”—2 Pekapai 6:29, 30.
24 Ii, Mbori ima ino agu apai du kpoto boroyo, na ko nambupai ambu fu aboro. Asanza 28:13 nayaa: “Gu boro naoka gani tiandika ni aú nga te, ono gu ni nakusa ha ki nimbu he, ni abí inapai.” Ka boro sa berã ní ti gani ingapai na ní ki mbu mangaha, Mbori inipai aino funi. Ono kangia oni zere rogo toroyo, gini kurapai berewe rengbe ka undo roni oni nye rogo ga Mbori nyemuse yo?
[Gu kpiahe du ti kpewaraga 8]
Yuda ayugu wai furani rengbe ani ka nye rogo ga Mbori nyemuse yo
[Gu kpiahe du ti kpewaraga 9]
Pa gburuwa ramukporo rengbe ka ye na bakere gberarago fu gu badiarogatise nga boro wenesa na fu awiriyo
[Gu kpiahe du ti kpewaraga 10]
Oni ‘peke Yekova na kpotoroniyo dunduko,’ a wa Kareba amangihe
[Gu kpiahe du ti kpewaraga 11]
Oni naakpara dedede tipa undo ka diabe asada
Gaoni Karagapai Nga Gine?
• Wai rengbe ani ka nye rogo ga Mbori nyemuse?
• Wai padu ani na nyemuse tipa Mbori na tipa Kristo narengbe ka undo rani ani ne manga ingapai?
• Tipagine padu ani na nyemuse tipa akuarani asa gupai nga ka ani mangingo bäri watadu meteka ya?
• Gini bete agene duho rengbe ani ka ne iraira mangapai ngbaha?