Pa Ka Ani Kuti Gaani Ruru Mangaapai Nafu Ngbarago Fu Yekova
“Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re.”—SNZ. 27:11.
1, 2. (a) Gini kitangbaangase Satana aye nani ringbisiyo paha rogo gu kitabu nga Eyobo? (b) Gine nayugo gupai nga Satana aasoapai kindi kuti Yekova tingbafuo kpio Eyobo?
YEKOVA ambu gene fu Satana tipa ko ba asada fu gako ruru moyambu nangia Eyobo. Nisangbana gipai re, Satana aimi ga Eyobo anyaa gbiati awiriko na ki ye na kaza fuko. Ono ho Satana atikango ga Eyobo ruru mangaapai ni, ko aaberãpa kura aboro aberã a angianga kina Eyobo sa ya. Satana ayaa: “Kpoto tipa kpoto! Agu ahe dunduko du be boro ni afu kina ha tipa ungani.” Gupai Satana agumbaha re, si akusi gu ngbanga nabipa agu aboro dunduko naraki ti gu regbo re ka da ku areme a, angianga kina Eyobo sa ya.—Eyo. 2:4.
2 Fuo susa agarã wa 600 tingbafuo gu asada Satana aye nani sa Eyobo, Soromo akepai ki yaa: “Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re.” (Snz. 27:11) Gu fugo re nayugo gupai tie ziazia nga Satana aasoapai kindi kuti Yekova ti gu regbo re. Kurigure, i abi Satana rogo gu yuguyugupai i afuhe fu Yoane ko nikitingbaanga ga Mbori amoyambu tingbafuo ba yó ko kusayo ngbangbaturũ yo fuo sigira yó ka Mbori Kindo rogo gu garã nangia 1914. Zavura areme, nga digido gi yangara arame re, Satana natikango kindi ya ga Mbori aboro arengbanga ka nye kuti gayó ruru mangaapai te!—Yugo. 12:10.
3. Gini nyanyakipa apai rengbe ani ka wirikaha rogo gu kitabu nga Eyobo?
3 Ani wisigingo apai biata rengbe ani ka wirikaha rogo gu kitabu nga Eyobo. Nibambatapai, gu asada naye fu Eyobo re ayugu gu boro nzunzu nga kare kuti aboro na ninaasoga ga Mbori aboro. Gu kare re nga Satana Bakitingbanga. Uepai nga, ka ani vura gbiatirani na kina gini ngbatunga asada, ani aka aka kuti gaani ruru mangaapai ka ani du na wene pagume na Mbori. Biatapai nga, ho asada ayeni fuo rani, Mbori nasongoda rani asongoda a wa ko amangihe tipa Eyobo. Yekova namanga gipai re areme rogo Fugoko, vurube gako riigbu, na gako ziazia toro.
Ka Bangirani Gonga ti Gi Vurarani Re Ya
4. Da si aida i bira ní tipa agu apai namanga rogo zegino?
4 Dungu aboro aidanga kuti gupai nga Satana kina ti ni te. Wa i avura nigunde be agu apai namanga rogo zegino, i ainongo gupai nga Satana Bakitingbanga du naye nani te. Kina rengo ngaha nga, kina aboro naye na badungu agu apai nafuda yó. Bambata avungurani nangia Adamu na Eva aidi ka ra niriyo angianga kutiibe Mbori ya. Natona ti gu regbo re ka da ku areme, aboro naamanganga apai nitatamana te. Wa vura duhe wo, si naida i bira Bakitingbanga abira mbiko ko nanangi Eva ri samungu kuti Mbori. Ko, gbiati kura aboro ambakadipai tipa aboro du kutii beyo. Wa duhe nga Satana nga “mbori gi zegino re,” agu aboro du rogoho nayugo kina gu bangisa asino du tiko nga, rukö, papaya, kpi boro, ngbaduse, biriki, na samungu. (2 Kor. 4:4; 1 Tim. 2:14; 3:6; oni gedi Yakoba 3:14, 15.) Ngbatunga agu asino re nasa aboro i guari sa avura du mburuhe rii agu apai nga ga birĩ zogarago na pambori, asogote, iraira mangaapai, na ruguzuruguzu apai, nga agu apai naye na dungu arungo fu aboro.
5. Ginipai du ani na nyemu ka mangaha na gu inohe du ani nani?
5 Nakiipa gu inohe du ani nani nga ga Yekova amoyambu re! Ani ima rugatirani naapa gu boro si aida i bira ní tipa gu gbegberẽ apai namanga rogo zegino. Fuo duhe tie were, ya mo si aidanga ani du na nyemu ka tingida aboro naapa gu boro naye na fudifudiapai fu aboro tee? Ya mo anga ani na ngbarago ka songodapai kubara Yekova yo nga ndikidi Mbori na ka yugo wai fu aboro ko andu ka imo Satana na ki di gbegberẽ apai kusayo tee?
6, 7. (a) Da na naye na arungosi kuti ndikidi airisimbori? (b) Wai rengbe ani ka pekafuo gu kpiapai nga ga Eriu?
6 Satana du naye na arungosi a kuti ga Mbori aboro. Ko ima diaberã ka asada rani. Yesu Kristo aya fu Simona Petero wee: “Ako Simona, Simona, mo bí, Satana akpi nyemu ka dia roni ka igita roni wa tunga.” (Ruka 22:31) Wakina gure a, agurani dunduko nakpinyemu ka pekafuo Yesu, ani duwa ka ani gbiatirani na aʹasada. Petero aya tipa Bakitingbanga wee ko wakina “bahu nata ki nipoi, nigbata boro ka rita ni.” Pauro ayaa: “I arúngosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.”—1 Pet. 5:8; 2 Tim. 3:12.
7 Wai rengbe ani ka yugo nani nga, bangirani agonga ti vurarani te ho gberango namangi kuarani idipase ni? Kuba gupai nga ani turũsi tirani ti gu wirinarani re, si naida ani du wakina Eriu, naafura na Eyobo wa ndikidi bakureako. Si naida ani koditirani na gu wirinarani re ka sovura kuti gu vurarani nga ga Satana re. (Snz. 3:27; 1 Tesa. 5:25) Gupai ani aida ka mangaha nga ka undo gu wirinarani re ní kakuti gani ruru mangaapai ka kina ginipai vura kaa manga ní amanga vurũ, si ki tadu wo, ngbarago kini zi Yekova.
8. Tipagine Satana asanga Eyobo ti ni ko mbu mangasunge fu Yekova ya?
8 Gu bambata he Satana agbarasipaha be Eyobo angia gako zogozogo anyaa. Pa agu anyaa re aima nyaka gbe, na si nawira gupai nga ami ko anaaraka mbiko ra. Ono tie, Eyobo anaafu anyaa afu a nimotumo. Ho Eyobo anaafu amotumo ni tipa awiriko, “ko anaguari ngbatutu wiso ka fu zozo motumo tipa yo wa du yo dunduko ni ba sa sa; bambiko Eyobo aya, ‘Isoke, awire nga akumba ingipai ki gumba gbegberẽpai ku kpotoyo yo fu Mbori.’ Were Eyobo anamanga kindi.” (Eyo. 1:4, 5) Gure nga Eyobo anaafu anyaa nimotumo fu Yekova dedede. Fuo Satana tona ka ba asada fuko, ko aarengbanga berewe ka manga gipai re te. “Nyanyakipa ahe” aadunga berewe be Eyobo ka ko aairiso Yekova nani te. (Snz. 3:9, NW) Ono tie, ko arengbe arengba ka iriso Yekova ningbako, na ko aima mangaha wo!
Oni Sonosi Dawedawe Pagume na Yekova
9. Gini nyanyakipahe kisusi du berani?
9 Singia ani nga kumukokumuko aboro watadu rungorungo aboro, paranga aboro watadu sosono aboro, kpotorani wenengai watadu si wenengai te, ani rengbe arengba ka sonosa wene pagume na Yekova. Ka ani vura kaa gbiatirani na aʹasada kina wai vurũ, ka ani duna wene pagume na Yekova, si nika undo rani ani kakuti gaani ruru mangaapai na ki sa ngbarago ti Yekova. Zavura agu aboro atainongo rengo wenengai ya, i naaru aru nyanyakii ti regbo aʹasada ki kakuti gayó rurupai.
10, 11. (a) Ginipai wirinarani sa amangihe kuti gu fudifudiapai nagbia ri? (b) Gini wene karagapai Valentina afuhe tipa ga Satana soapai?
10 Oni bingo gupai nadu tipa kura wirina sa rimori angia Valentina Garnovskaya, nadu dagba gu badungu aDezire Yekova nadu Russia yo nakakuti gayó rurupai ti regbo kere aʹasada a wa Eyobo amangi. Rogo gu garã nangia 1945, ho garãri aduni wa 20, wirina sa amangi dezirepai furi. Ko andu berewe fuori bara ue tipa ka fura na ri riipa agu apai du rogo Ziazia Kekeapai, na fuo gure, ri aabingo ko berewe te. Wa si avura duwo, Valentina atona kaa tungusapai fu gari amurakporo. Mbiko gi gari tungusapai re, i azi ri ki ndu na ri ku bataya zizi aboro yo tipa agarã muambe. I akusi ri rogo 1953, na ri ki tona tungusapai nibasa berewe. I azi ri berewe, ki saringbanga ri, ki moi ri ku bambukiso yo tipa agarã bawe. Fuo raka ri rogo kura bataya sa tipa bete agarã, i akedi ri kurogo gu kuraha. Rogo gu bataya re, awirina adu kina yo ni adee nadu na Ziazia Kekeapai beyo sa. Rogo kura uru sa, wirina sa ayugu Ziazia Kekeapai fu Valentina. Si angia iiriwopai kisusi! Oni bingo gipai du re nga, wa Valentina abi Ziazia Kekeapai kina be gu wirina namangi dezirepai furi rogo 1945, ri aabingo ho berewe te dati kina gi regbo ri abihe bataya yo re!
11 I akusi Valentina bambukiso yo rogo 1967, na ri ki kpara gari raka fu Yekova na ki zi bapatiza. Ri atungusipai zaaza vuru gu regbo ri adu ngbariri re da kurogo 1969. Ono tie, rogo gu garã re, i azi ri berewe ki moi ri ku bambukiso yo tipa agarã biata. Wa apai avura du were tipa ri, ri aatungusapai kindi. Mbata fu ri nyasi rogo 2001, ri aundo aboro 44 i ini rengo. Ri adi agarã dunduko naabaha nga 21 ku bambukiso yo. Ri aima du na nyemu ka mbupa apai dunduko kodi ranirii tipa ka kakuti gari ruru mangaapai. Ho ri ambedi ni na kpio, ri ayaa: “Ba aadunga bere nga gimi mi anaaraka rogoho te. Gimi ahe dunduko adu gbua rogo mangu sa. Wa apai avura du were tipa re, mi adu na ngbarago rogo mangasunge fu Yekova.” Nangbaa gu karagapai Valentina afuhe tipa ga Satana soapai kuti Mbori re, nga gu boro nayawee aboro arengbanga ka nye niruruyo fu Mbori ka i du rogo fudifudiapai te! (Eyo. 1:9-11) Ani ima rugatirani na gupai nga ri aima fu ngbarago fu Yekova. Sidu, ko napido gu regbo ko ka zingisa ri gbiati kura aboro i raki berewe.—Eyo. 14:15.
12. Gine nyemuse asa rani ani mangihe rogo gaani pagume na Yekova?
12 Mburu gaani pagume na Yekova rii gu nyemuse du ani nani tipa ko. Asino Mbori ima ngba tirani, sidu, ani namanga agu apai rengbe ani ka mangaha tipa ka raka na ngbanya kuti gako ringbisapai. Ani akpinga nyemu Yekova tipa ahe wa gu Bakitingbanga agumbaha te. Gi nyemuse du ani nani tipa Mbori re nanyakasa rani ani kakuti gaani ruru mangaapai ti regbo asada. Mbori tigako kini ‘banda gako siasia aboro.’—Snz. 2:8; Tam. 97:10.
13. Wai Yekova abi agu pai ani amangaha?
13 Nyemuse nafõngbaduraniyo ani irisi rimo Yekova, ka ani vura kaa bi tirani nga ani arengbanga ka manga bakerepai te vurũ. Ko nabi gu wenepai du ngbaduraniyo, na ko arengbanga ka sapangbanga rani tipa gupai ani arengbanga ka mangaha ya te. Anga kina gupai ani amangaha nyakipaha te, ono ndu gupai a ani amangaha ti ni. Wa gberarago avura zio Eyobo na ko ki hi dungu apai, ko aya fu abadiangbako wee ko aakpinyemu ga Yekova agene akpi. (Oni gedi Eyobo 10:12; 28:28.) Rogo gu yangara kapita nga ga gu kitabu nga Eyobo, Mbori ayugupa gako zinga kuti Erifaza, Biridada, na kuti Sofara bambiko i aagumbanga rengo te. Ti kina gu bangisa regbo re, Yekova ayawee ko aima ida na ga Eyobo pai, ki ya tiko bara biama wee “gi moyambu” na ki ya fuko wee ko kparikpee tipa agu abakureako nadu biata re. (Eyo. 42:7-9) Ani naamanganga pai wakina Eyobo tipa Yekova idi na ani a.
Yekova Nasongoda Gako Ruru Amoyambu Asongoda
14. Wai Yekova aundo Eyobo ko rugu gako aberã?
14 Wa Eyobo avurangia kpakpa boro, ko aima kakuti gako ruru mangaapai. Ti kura aregbo ho ko aduni rogo bakere rungosi, gako aberã aarunga te. Nikpiapai, ko aya fu Yekova wee: “Mi kpari foro, ka mo akaraga nga pai fere ya. . . . Mo narungosi re na gu bakere ome du ti bero.” Kurigure, Eyobo aanyakasa gupai gbe ngawee ko aamanganga gbegberẽpai te ho ko ayani wee: “Gbegberẽ boro nga mi te” na “wa adu nga pa zuu bere ya, gi kpe du ni gigiri he.” (Eyo. 10:7; 16:17; 30:20, 21) Wa si avura duwo, Yekova aundo Eyobo ninyemuse. Ko asasana Eyobo na badungu asanahe gu tingbafuo kuraha tipa ka sa ko ka ko berẽnga pa tiko gbe ya. Na si asako a ko inipa wai umbapa boro ti ga Mbori. Eyobo aima sa berãko nibi agu apai Yekova agumbaha fuko.—Oni gedi Eyobo 40:8; 42:2, 6.
15, 16. Rogo gini agene areme Yekova ambakadapai tipa ka undo gako amoyambu?
15 Yekova areme na mbakadapai beko tipa si undo rani. Nikpiapai, Yesu Kristo afu motumo tumorii si ki moi mburupai tipa Mbori rengbe ka mbupai furani ti gaani aingapai. Riimburu gu motumo tumorii re, ani rengbe arengba kadu na wene pagume dagbarani na Mbori wa vura du ani nga kpakpa aboro vurũ. (Yak. 4:8; 1 Yo. 2:1) Ho du ani ni rogo asada, ani rengbe ka kparakpee fu Mbori tipa ko fu ziazia toro furani si nyakasi rani. Kurigure, ani na Ziazia Kekeapai berani naabaha dunduko, ka ani aagedaha na kini berẽkurii agu apai ani agedaha, si nika sa gupai nga ani mbakaditirani tipa gu asada ka ye sa gaani idapase. Wisigopai naundo rani ani rugutirani naapa gu ngbanga du tipa ga Yekova bakere pagbia gbiati pa ka ani kuti gaani ruru mangapai.
16 Kurigure, ani nagbia undo be gu riahe nga ga toro Yekova afuhe vurube ‘ruru kangara moyambu.’ (Mt. 24:45-47) ADezire Yekova rogo zegino na adungurati beyo du bangehe wa 100,000. I namanga adunguratise rogo agu adungurati re tipa si nyakasi rani tipa gu asada ka ye sa rani. Ani dinga kpiapai namangi tipa degude nga Dezire Yekova du rimori nga Sheila naraka Germani yo a wa ani ka bihe rogo gu gene waraga naye fuo gere.
17. Wai gupai namangi tipa degude ayugopa wai duhe nipatatamana kaa ndu tipa adunguratise?
17 Rogo kura uru sa sukuru yo, bayugupai aadunga rogo gu riko Sheila adu rogoho te tipa bete regbo. Akurari aidi ka ngimbaro na ũsoroka. Sheila atabi gupai nga agude tona gipai re, ri kini guari nibasa ka kura. Ri adu na ngbarago kusa fuo giari pa gupai namangi agu agude re. Gupai namangi nga, fuo tona agude sunge soroka, adaimona aye ku dagbayó, agi agude re ki tona ka manga mbangirimbangiri. Ginipai naundo Sheila ri diberã ka kura niipo kusayo dagba agu agude re? Ri ayaa: ‘Ngbutuko mbata fu gipai re, ani asakipai Bambu Kindo yo tipa gu kerepai du ti ũsoroka. Sidu, mi aima rugatire naapa gupai si aaida mi mangihe. Mi aidi ka fu ngbarago fu Yekova a wa Ziazia Kekeapai agumbaha rogo Asanza 27:11.’ Si aima ngba wa Sheila adu ba dunguratise yo kini degeturi wenengai.
18. Ginipai oni nadiberã ka mangaha?
18 Si naida ani diberã wa du ani dunduko ka kakuti agu arugute ani agbiaha be ga Mbori riigbu. Ani rengbe ka gbia gu undo ani aidaha ka ani andu kupati adunguratise yo dedede, geda Ziazia Kekeapai, wisigo agu awaraga du mburuhe rii Ziazia Kekeapai, kparakpee, na kodatirani na akuarani aKristano. Yekova naida ani du na diabese rogo gaani raka na ko naa kido nga ani anye anye niruru rani. Nangbaa gu momu du berani tipa kaa taasarimo Yekova, ki ka kuti gaani ruru mangaapai, na ka sa ngbarago ti Yekova!
Oni Natingidaha?
• Gini gbegberẽ apai na aʹasada Satana aye nani?
• Gini ũkumuko kiipaha bangirani gbe?
• Gine nga mburu gu pagume du ani nani na Yekova?
• Gine nga gu bete agene Yekova aundo rani areme ngbaha?
[Gu kpiahe du ti kpewaraga 15]
Ani rengbe arengba ka undo akuarani airisimbori i kakuti gayó ruru mangaapai