Oni Duna Gu Berã Nadu Ti Kristo
“Oni mongo du adu na akuaroni ti berã sa ku sangba Kristo Yesu yo.”—ROM. 15:5.
1. Tipagine si aida ti ni ani duna ga Kristo berã?
YESU KRISTO ayaa: “Oni yé fuo re . . . ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni.” (Mt. 11:28, 29) Gi wene yambahe nga ga Yesu re, si nayugopa gako nyemuse. Anga boro ho rengbe ka fu kpiapai furani tipa nyemuse susi Yesu te. Wa ko avurangia Wiri Mbori kidu na bakere ome gbiati tandu, nunga aboro anaamangako amanga, gbe, aguyo nadu rogo azingo.
2. Gini apai ani nika wisigoho tipa ga Yesu aberã?
2 Rogo gi kekeapai re na agu akuraha ue naye fuo gere, ani nika wisigopai tipa wai rengbe ani kadu na “ga Kristo berã” na ki kakuti ni tipa kaa mangaha rogo gaani raka. (1 Kor. 2:16) Ani nika wisigoapai bisue du rogo asino Yesu nga: zera na umbasitise, gako weneringise, giasangba Mbori, wingbaduse, na gako nyemuse.
Oni Wiriki ga Yesu Zezeredi Asino
3. (a) Ginipai Yesu ayuguhe fu gako abawiriki tipa umbasitise? (b) Ginipai Yesu anaamangaha ho gako abawiriki anaamanganga gupai ni ko anaagumbaha fuyó ya?
3 Yesu nga rengberengbe Wiri Mbori, naidi na nyemuhe ka ye ku auru kpotosende no ka mangasunge dagba aboro-ingapai. Si adu nga bete agu aboro re nika imiko aimo kusa. Ono, wa si avura duwo, Yesu adu kindi na kina ngbarago, na kidu na rugatise. (1 Pet. 2:21-23) Pa ‘ngera’ ani kuti gu kpiapai nga ga Yesu naundo rani ani mangi kina gu bangisapai re a, ho kpakpa aboro aingapai ni kuti rani. (Eb. 12:2) Yesu ayambu apefuoko i ‘dí gako gonga ku gorõyoyo’ na ki wirikipai beko. (Mt. 11:29) Ginipai i arengbe ka wirikaha? Gu bambatapai i arengbe ka wirikaha nga, Yesu angia bayee boro, na ko aduna zerangbaduse koyo du yo ni wa i avura kaa ingapai vurũ. Rogo gu yuru nadumbata fu kpio Yesu, ko azundu ndu gako abawiriki. Gure nga ko aayugopai fuyó tipa i du ni “airazerangbaduse.” Si angia gupai ka bangirise agonga ti ni ya. (Oni gedi Yoane 13:14-17.) Kusa, ho aPetero na Yakoba gbiati Yoane aarengbanga ni ‘kaa angera’ angera kindi zanga rame ya, nunga yó amangi Yesu ka ko azinganga kutiyó ya. Ko asanahe ki yaa: “Simona mo ra? . . . Oni ngere ki nikpari, oni ka rima ku rogo asada. Toro nakpi nyemu he ni rengo, borose anyaka nga ya.”—Mk. 14:32-38.
4, 5. Wai rengbe ga Yesu kpiapai ka undo rani ani mangipai na aboro zavura ho i amanganga gupai ni du niruruhe ya?
4 Ginipai rengbe oni ka mangaha ka si du nga kuaroni idipase namanga abaangira na oni rogo apai, watadu ní nga gu boro ngbaduni aima niipo, watadu ní adianga agu arugute niipo ‘ruru kangara moyambu’ afuhe te? (Mt. 24:45-47) Wa vura duhe nga, ani rengbe arengba ka mbupai fu agu aboro du rogo zegino tipa gu irairaapai i amanga rani nani mbiko wangia yó kpakpa aboro, anga kinawo duhe taata ka mbupai fu awirinarani te. Ka si du nga gu irairaapai akuarani amanga rani nani nafu kina gberarago furani, si naida ani sana tirani ki yaa, ‘Gini gene rengbe mi ka berã wenengai ngbaha kurii “ga Kristo berã”?’ Ani asadi ka maa gupai ku berã rani yo nga, rago anaagberãnga ti Yesu fu gako abawiriki ti agu aregbo i anaakpa ti manga agu apai ko anaaida i mangihe te.
5 Ani makianga gupai nadu tipa gu mokedi nangia Petero. Ho Yesu ayambuko ni rogo kurungba tipa ko ndu ri ime, Petero aima ndu nirengo tipa wiri bete regbo. Fuo gure, Petero angana yuge ko ki tona ka rindo. Ya mo ngbadu Yesu aimi ko ki ya fuko wee: “Ka mo nirindongo arindo tipa ka ruga tiro nani”? Oó. Gupai Yesu amangihe nga ko “[a]tãi beko ni ba sa, ki zi ko, ki ya fu ko, ‘Ako mo na toni idapase, tipagine mo asaka kpotoro yo ti ni?’ ” (Mt. 14:28-31) Ka singia si naida ani hi gu zanga idapase nga ga wirinarani, ya mo si aidanga ani undo ní ní gbia idapase nibakerehe tee? Si nga gupai du ziazia rogo ga Yesu mangapai na Petero si aida ani wirikihe.
6. Ginipai Yesu ayuguhe fu gako abawiriki tipa kiopase?
6 Petero adu kina dagba agu aboro naatikango tipa gu boro nga bakumbayo. Yakoba na Yoane aaida ka sungo pati Yesu rogo gako Kindo, guni ku kumbabeyo, na guni ku garebeyo. Ho Petero gbiati kura abawiriki agihe ni, rago agberẽ agberã tiyó. Yesu aini gupai nga, i ainidi tiyó na gi berã re be agu aboro i asono dagbayo. Ko ayambu yó ki ya fuyó wee: “Oni ini he ya agu yo nazoga aGendiria i namanga yo a wa i nakpi nyemu he; gayo abanyaki ki nyakasi yo. Ka si dú nga wo dagba roni yo ya. Ono gu ni nakpi nyemu ka du ni bahe dagba roni, ni adú ni gaoni moyambu. Gu ni nakpi nyemu ka du mbata yo fu roni, ni adú ni gaoni kanga.” Yesu agbeberã yó kuti gako kpiapai ki yaa: ‘Wiri boro aayenga i nimangi pako te, ko aye ka manga pa aboro, ka tumo dunguyo niʹungako.’—Mt. 20:20-28.
7. Wai rengbe ani nibasasa dunduko ka sa gupai nga kodatise du rogo dungurati?
7 Pa berã ani kurii gu umbasitise Yesu adu nani rengbe ka undo rani ani nibi tirani ‘nitooni boro’ dagba awirinarani. (Ruka 9:46-48) Ka ani aabi tirani wo, si rengbe ka sa gupai nga ani duna wene kodatise dagbarani. Yekova nakpinyemu gupai nga awiriko ‘nisungu sa na berã sa.’ (Tam. 133:1) Yesu akpari fu Bako Ko undo ndikidi aKristano i du nikpamiakpamiayo, tipa wa ka ‘aboro zegino ini ya Bako nakediko, Bako nakpinyemuyo, wakinagu ko akpinyemu Yesu.’ (Yo. 17:23) Sidu, gaani kodatise nasa gupai nga aboro ini rani ni apefuo Kristo. Tipa ka gbia ngbarago be gi kodatise re, si naida ani naabi ga akuarani zangarengba a wa Yesu anaabihe. Yesu anaambupai ambu fuyó na ko ayugu gupai nga, ka ani aambupai fu aboro, si ka Mbori mbupai ti ni furani.—Oni gedi Matayo 6:14, 15.
8. Ginipai rengbe ani ka wirikaha be gu kpiapai nga ga gu ga Mbori amoyambu nadumbata kusayo?
8 Ani rengbe ka wirikapai nibakerehe ti gu idapase nga ga agu aboro naima dia dungu agarã kuti pekafuo Yesu. Wakina Yesu, gi ga Mbori amoyambu re ima rugatiyo na gu zangarengba nga ga akurayó. I rugutiyo na gupai nga, pa yugoyo gu nunga duwa ga Kristo naundo rani ani “hi gu mumungo pai ahi nga ga rurungbura aboro,” nga gu naye na kodatise rogo dungurati. Kurigure, si nanyakasa dungurati tipa si naayugo ga Kristo berã. Agu aboro du rogo dungurati naida kina gu bangisapai re mangi tipa awirinayo a wa gu mokedi nangia Pauro aaidaha tipa agu aKristano nadu Roma yo. Ko ayaa: “Gu Mbori nga ga zera ko na wasa, ko idi ya oni mongo du adu na akuaroni ti berã sa ku sangba Kristo Yesu yo. Oni taasi rimo gu Mbori nga ga Gbia Yesu Kristo ko nga Bako kina ku bani sa ni ngbaroni.” (Rom. 15:1, 5, 6) Nirengo, gaani irisombori naye na taarimo fu Yekova.
9. Tipagine si aida ani du ti ni na ziazia toro tipa ka pekafuo gu kpiapai nga ga Yesu?
9 Yesu ayawee ‘zerangbaduse’ kina sa na zera, nga papara zuzu ga Mbori toro. Sidu tie, wa ani kaa ndu kindi kumbatayo na wirikapai tipa ga Yesu kpiapai, ani naida ga Yekova ziazia toro tipa si undo rani ani wiriki ga Yesu kpiapai wenengai. Si naida ani kpari tipa ga Yekova ziazia toro na kini mangi asadatise nyanyakii tipa kadu na zuzuhe tirani, nga “nyemuse, na ngbarago, na zereda, na hipai, na mangapase, na weneringise, na du ngangarã [“idapase,” NW ], na zera, rugatise.” (Gara. 5:22, 23) Ka ani aawirika gu kpiapai nga ga umbasitise na zera Yesu amoihe furani, ani sa ngbarago asa ti gu Barani du ngbangbaturũ yo.
Yesu Anaamanga Aboro Niweneringise
10. Wai Yesu ayugu weneringise?
10 Weneringise nga papara zuzu ziazia toro. Yesu anaamanga aboro niweneringise. Aboro anaagbata Yesu ko kini ‘di yó kugume’ wenengai. (Oni gedi Ruka 9:11.) Ginipai rengbe ani ka wirikaha ti gu weneringise Yesu ayuguhe? Gupai ani awirikaha nga, gu boro duna weneringise, ní namanga aboro rogo pabakure, ngba zezeredi gene, na kidu na nunga tiní. Wo Yesu adu. Nunga aboro anaamangako amanga “bambiko i arungo, ki nigbandaka, wa kina agu akandoro adu nga na babandara ti ra ya.”—Mt. 9:35, 36.
11, 12. (a) Oni gumbanga gupai namangi nayugopa ga Yesu nunga. (b) Ginipai rengbe oni ka wirikaha be gu kpiapai gumbayo paha re?
11 Yesu anaamangapai aamanga tipa ka undo agu aboro nungayo anaazioko. Ani bingo pai sa namangi. Dee adu yo kureri aga tipa agarã 12. Ri aima ino gupai nga, ringbisihe kuti ga Moize aNdiko, gari kaza asari ri du nibibiriko boro, na gu boro a ka zadi ri, ní kidu nibibiriko boro. (Pa Mot. 15:25-27) Wa si avura duwo, pa wo rimo Yesu gbiati gu gene ko aamanga aboro ngbaha asari ri bi gupai nga, ko arengbe arengba ka husa ri. Ri ayaa: “Ka mi zadi kina gako remu mi abáta abata.” Ri andu nibasa zanga gunde ki zadi gako remu, ri ki bi gupai nga ri ima hu.
12 Yesu aima ino gupai nga boro zadiko, sidu, ko kini ka ngereka patiko ka ino da du zadiko. Si nawira gupai nga, gu dee re aagunde agunde mbiko kuo ri ndiko. Sidu, ri ati pati nduko kini kio, ki gumba kina rengo fuko dunduko. Ya mo Yesu azingi kuti gi rungorungo dee re? Wagusa te! Ko aya furi wee: “Vungu, ga idapase batasi ro; mo ndu zezeredi ki bati be ga kere kaza.” (Mk. 5:25-34) Nairiwo wai gipai re afu wasa fu gu dee re!
13. (a) Wai ga Yesu sino berã adu kia ti ga aFarusi? (b) Wai Yesu anaamanga agude?
13 Yesu aamanganga sunge na gako pagbia kurii aboro ngba gbegberẽ gene wa gu aFarusi anaamangaha te. (Mt. 23:4) Kuba gure, ko anaayugopa ga Yekova agene fu aboro rogo weneringise, na zerangbaduse. Yesu akpinyemu gako abawiriki gbe, na ko anaamanga yó rogo weneringise, na kingia ndikidi bakureayo. (Snz. 17:17; Yo. 15:11-15) Zavura agudee, si adu fuyó taata i naaye fuo Yesu, na ko anaagbia ngbarago agbia mbiko yó. Ko anaayanga wee ko aduna bakere sunge beko ka regbo adunga beko tipa ka sungo na agude ya te. Wa ga Yesu abawiriki adu wakina agu abarumbatayo rogo pambori i aaraka dagbayó, i aidi ka za aboro rogo kura uru sa ka i yengo na rukutu awiriyo koyo du ko ni ko zadi yó ya. Rago aangbanga ti Yesu na gupai gako abawiriki amangihe re te. Ko aya fuyó wee: “Oni hé rukutu agude i ye fuo re; ka oni káraga nga yo ya; bambiko i wa avuru ga Mbori ngbii.” Fuo gumbako ho were, ko ayugu nyanyakipa pai fuyó ki yaa: “Ya mi fu roni ni rengo, ka boro adia nga ga Mbori ngbi wa toni gude ya, ni rimi nga koyo wa sa te.”—Mk. 10:13-15.
14. Gini undo agude agbiaha be wene sino aboro?
14 Zanga kapa, ho agu agude re asono ni ki da ni akumba na adee, i aduna ngbarago ka tingidapa wai Yesu Kristo ‘aʹaka yó beko, ki moi beko auru yó, ki fu maku fuyó.’ (Mk. 10:16) Kina gu bangisapai re du tipa agude areme a. Ho i atingidapa agu abaakumba ni nayugu nyemuse fuyó, i a na nyemu yó tiyó. Gupai nyakipaha gbe nga, agu agude i ayugu ndikidi nyemuse fuyó mbuyo rukutu re, i nga agu aboro ini gupai nga, ga Yekova toro kurii gako aboro.
Ani Duna Weneringise Rogo Gi Kere Zegino Re
15. Tipagine si airiwongo ti ni tirani ka bi gupai nga aboro areme na weneringise tiyó te ya?
15 Dungu aboro nayawee i na regbo beyo ka manga akurayó rogo weneringise te. Ga Yekova aboro nagbia tiyó na gu sino mangaapai nga ga zegino aboro amangaha sukuru yo, basunge yo, tingba nunguro, na gene sunge tungusapai yo. Gbegberẽ sino rengbe arengba ka ba gberarago tirani, ono ka gure iriwongo tirani ya. Ga Mbori toro adu kugii gu mokedi nangia Pauro ko kepai ka fu arugute furani ani banda tirani mbiko “rogo kusa rago,” ndikidi aKristano nikaa kodatiyo akoda na agu ‘aboro nakpi kina nyemu tiyó, na du ni airasakparakpa.’—2 Tim. 3:1-3.
16. Wai rengbe ani ka sonosa agu asino duwa ga Kristo rogo dungurati?
16 Ono tipa ndikidi aKristano tigayo, i nafu wasa fu akurayó rogo dungurati. Ka ani wiriki gu kpiapai nga ga Yesu, si nika undo rani ani du na wene sino. Wai rengbe ani ka mangaha wo? Bambatapai nga, dungu aboro rogo dungurati si aida ani naaundo yó aundo na kini nyakasi yó, bambiko i nagbiatiyo na akaza na akpakarapai rogo raka yo. Rogo gi “kusa rago” re, gu kpakaraapai re nikaa kio kina kumbatayo ono anga si nivovopai te. Ti agu aregbo i aakeka Ziazia Kekeapai ti ni, aKristano anaagbiatiyo agbia na ngbatunga agu akpakarapai re. Mbiko agi apai re, si naida ani naamanga weneapai wa agu aKristano nadumbata. Nikpiapai, Pauro angarasi aKristano i ‘nyákasi aguyo nawo, i sóngodi aguyo narungbura, i hipai nigbangaha fu aboro dunduko.’ (1 Tesa. 5:14) Gupai re nakoda manga agu asino duwa ga Kristo.
17, 18. Gini bete agene rengbe ani ngbaha ka wirika gu weneringise nga ga Yesu?
17 Si naida aKristano ‘nidi awirinayo kugume,’ kini mangiyo a wa ka Yesu naamangayo, kini berãpa agu aboro i aima inoyo bakuruyo na aguyo i abingo yó mbata ya. (3 Yo. 5-8) A wa Yesu aduna bakere nunga aboro tiko, kinawo a si aida ani du.—Yes. 32:2; Mt. 11:28-30.
18 Ani nibasasa dunduko si aida ani naayugo weneringise na kini berẽpa ga akurani apai. Si naida ani gbatagene gbiati amamu tipa ka mangaha. Pauro angarasi aKristano ki yaa: “Tipa gu nyemuse nga ga awirina oni ngbá angba yee na akuaroni; tipa irisa, oni mói kina akuaroni mbata yo.” (Rom. 12:10) Si naida ani pefuo gu kpiapai Kristo amoihe, kini mangi aboro rogo weneringise kini wiriki wai kadu na “ndikidi nyemuse” tipa yó. (2 Kor. 6:6) Pauro aringbisapa gu nyemuse duwa ga Kristo na agi afugo re: “Nyemuse nahi pai ni gbanga ha, ki du na weneringise; nyemuse akpi nga he te; nyemuse aabia nga tihe te, azaraga nga tihe te.” (1 Kor. 13:4) Kuba gupai nga ani naakpikopai kuti awirinarani, si naida ani irisi gu rugute nayaa: “Ringironi ngbá angba fu akuaroni, yee kpotoroni yo, oni nivú akuaroni avu, a wa Mbori avu roni rogo Kristo yo a.”—Ef. 4:32.
19. Gini weneapai namanga ho ani awirika ga Kristo kpiapai ni?
19 Ka ani mangi asadatise ka sonosa agu asino duwa ga Kristo ti aregbo dunduko, si nika ye na amosoro furani. Berewe a, si nasa gupai nga, ga Yekova toro naamangasunge wenengai rogo dungurati. Kurigure, ho ani apefuo gu kpiapai ni Yesu amoihe na kini undo kura aboro i nimangi kina gu bangisapai re, si nafu ngbarago fu Mbori. Sidu tie, si naida ani mangi nyanyaki asadatise kaa manga agu asino duwa ga Kristo.
Oni Rengbe ka Sakarogoyo?
• Wai Yesu ayugu gupai nga ko nga ‘bayee boro niʹirazerangbaduse’?
• Wai Yesu ayugu weneringise?
• Gine nga gu bete agene rengbe ani ngbaha ka yugo gu wene sino gbiati gu weneringise duwa ga Kristo rogo gi gbegberẽ zegino re?
[Gu kpiahe du ti kpewaraga 11]
Ho gu idapase nga ga wirinarani nazere ni wagu si adu tipa Petero, si naida ani aundo ní
[Gu kpiahe du ti kpewaraga 13]
Wai rengbe ani ka sa dungurati si du niwene ba nga ga weneringise?