Ya Mo Oni Aima Maa gu Regbo Oni Nikaa Wisigo Ziazia Kekeapai ti Ni?
ROGO gu garã nasusi, Riigbu Bipasunge atingidipa gu ariapai i amangihe nibipa agu adunguratise nga ga dungurati nga gu nafu bakere regbo fu aboro tipa wisigo Ziazia Kekeapai na kini sakihe na gayó aborokporo. Ka si du nga oni nga bariikporo, si naida oni bi gupai nga, oni nawisigo Ziazia Kekeapai awisigo na diaroni watadu awironi dedede zanga kpa. Agu arogotise adunga agude beyo ya, si naida i mangisunge na gi regbo re tipa ka wisigo Ziazia Kekeapai kina sa. Agu awirina atamanganga rogatise ya, si naida i naamangasunge wenengai na gi regbo re tipa wisigo Ziazia Kekeapai nisase.
Badungu aboro aima duna ngbarago tiyo tipa gu mbakadapai nga ga gu Irisombori nga ga aborokporo nyemu. Nikpiapai, wirina nibakumba du rimoko nga Kevin, akepai ki yaa: “Ani ainongo gu tambuahe rengbe ani ka gasaha furoni rogo dungurati tipa gi bawene mbakadapai re te. Wangia ani abaakumba, ani ima sakapai tipa wai ani amangasunge na gu nyemu du gbua re tipa ka manga kina boro gupai Riigbu Bipasunge agumbaha nga kaa wisigopai na gaani aborokporo rogoho.”
Dee nga Jodi du kumbaari nga bakumba, akepai ki yaa: “Ani na awirani nga adegude biata, garã unvuru nga 15, tame nga 11 na garã kiyaro kidu nga 2. Ani ye bambeda kurogo gu dungurati awirina amanga gayó dunguratise rogo fugo nibee. Si naadia rani na bakere regbo gbiati bakere asadatise tipa ka mbakadatise tipa adunguratise naabaha. Nibi gu mbakadapai re, ani awere na gu kura nyemu berani tipa gu irisombori nga ga aborokporo!”
AJohn na JoAnn nga arogotise namangasunge ni abazakigene, akepai ki yaa: “Ani anaamanganga gaani wisigo Ziazia Kekeapai nga ga aborokporo ti aregbo dunduko te mbiko mbakadatirani tipa adunguratise nibakiakia. Gi vovo mbakadapai re nzunzu nga gamunihe be Yekova mbiko si nazambuasi rani rogo toro yo ka ani amangasunge na gu regbo re ngba ruru gene.”
Tony, nga bakuparanga garãko niima susa 20, asia Rago Ue tipa ka manga gako wisigopai nisase yuru. Ko namangasunge na gu kura uru rogo poso yo tipa ka mbakada agu adunguratise nga ga dungurati. Ono tie, Tony ayaa, “Mi anaangera kumbatayo tipa gu uru nga Rago Ue.” Tipagine? “Gu nyemu re nga gimi kparakpara uru mi asiaha.” Tony asakirogoyo niyaa: “Mi naadia asa ue tipa ka wisigo agu apai rengbe ka nyakasa gimi pagume na Yekova. Pa dia mi bakere regbo kuti wisigo Ziazia Kekeapai nasa re mi naaberã kurii agu averesi mi agedaha.” Sangbana gi gako wisigopai re nga gine? Ko nayaa, “Ga Yekova arugute narimo ku ngbadureyo dudunguroo susi gu nidumbata.” Gini kpiapai naundoko gumbako paha? “Rogo gu buku nga Insight, mi agedipai yo tipa gu bakure nadu dagba Davide na Yonatana. Mi awirikipai tipa ga Yonatana wene sino mangaapai. Gako kpiapai aundo re mi ini wai nzunzu du ndikidi bakure. Nirengo, mi naangera kumbatayo tipa ka wirika gu kura vovo apai Rago Ue nyemu!”
Zanga kapa, ga Mbori amoyambu dunduko nika gbia bakere undo agbia be mangayó sunge wenengai na gu regbo duho awere re tipa wisigo Ziazia Kekeapai gbiati gu irisombori nga ga aborokporo.