Oni Sonosi Gu Nyemuse Adigongo Ya

‘Ga nyemuse hipa apai anyasanga te. Nyemuse adigongo te.’—1 KOR. 13:7, 8.

1. (a) Wai i naayugo nyemuse rogo abuku na avidio? (b) Da aboro akpinyemuni gbe, na gine berewe i akpinyemuhe gbe?

BADUNGU apai aboro akekehe tipa guhe nga nyemuse. Badungu abia aboro asarihe kini aziapa nyemuse rogoho. Nyemuse nga guhe aboro dũ aidaha. Ono rogo dungu abuku na avidio, i nayugo kina kpia nyemuse yo gbua, na badungu agu abuku na avidio re duku rogo ababagaahe yo. Ono dungu aboro adunga na nyemu Mbori gbiati nyemu akurayó tiyó ya. Ani nabi gupai abi Ziazia Kekeapai ayawee si nikaa manga rogo gi yangara arame re nga aboro ‘nakpi kina nyemu tiyo, kidu niairakpinyemumarã, kini kpinyemu sangba borose susi nyemu Mbori.’—2 Tim. 3:1-5.

2. Gini zahe Ziazia Kekeapai afuhe furani nibipa gu ngbatunga nyemuse arunga ya?

² Mbori amangi aboro i duna nyemuse tiyó. Ono tie, Fugo Mbori naza rani ti ngbatunga gu nyemuse arunga ya. Ziazia Kekeapai nagumba gupai furani rengbe ka manga ka ngbatunga gu nyemuse re zibaha ngbaduraniyo. (1 Tim. 6:9, 10) Ya mo oni rengbe ka tingida gupai gu mokedi nangia Pauro akehe fu Dema? Wa si avura du nga ko adu na Pauro, ko atona ka kpinyemu agu ahe nga ga zegino kisusi. (2 Tim. 4:10) Gu mokedi nangia Yoane aima za aKristano ti ngbatunga gu nyemuse re. (Oni gedi 1 Yoane 2:​15, 16.) Gu boro nakpinyemu zegino na agu ahe du rogoho gbiati agu agene si amanga apai ngbaha, ní arengbanga ka kpinyemu Mbori gbiati agu apai nga ga Mbori te.

3. Ginipai du furani nimbumbuhe ani mangihe, na gini asanahe si aida ani gbia akaragapai kuti ni?

³ Ani nga aboro gi zegino re te, wa vura duhe vurũ nga ani naraka kina rogoho. Sidu, si nimbumbupai furani ani he gu gbegberẽ bipai du zegino nani tipa nyemuse. Si ninyanyakipa pai ani bandatirani ani andu kadu na gu ngbatunga nyemuse arunga ya. Ono ada si aida ani duna gu nyemuse tipa yó du mburuhe rii arugute? Gini apai rengbe ka undo rani ani sonosi gu nyemuse nahi apai dunduko, nga gu nyemuse adigongo a ya? Wai gipai re aundo rani awere na gizo kumbatayo? Si naida kina Ziazia Kekeapai karagapai furani kuti agi asanahe re tipa ani nimangipai ringbisihe kuti gaha arugute.

Sonosa Nyemuse Tipa Yekova

4. Wai rengbe ani ka sonosa nyemuse tipa Mbori?

⁴ Ka sonosa tunga hee nga ka mbakada baha na ki rũhe si sono. Ho basopobino asopa gani bino ni ki rũ gani tunga, ní naberã gupai nga gu gani tunga re nika kura akura ki sono. (Eb. 6:7) Wakina gure a, si naida gaani nyemuse tipa Mbori sono. Ginipai rengbe ani ka mangaha tipa ka sonosaha? Gupai si aidaha nga ani mbakadi ngbaduraniyo, nga gu ba ani arũ tunga ga Mbori Kindo rogoho. Ani rengbe ka manga gipai re nigeda ani Ziazia Kekeapai wenengai tipa ka kiiso gaani inohe. (Koro. 1:10) Padu ani pati agu adunguratise nga ga dungurati dedede na kini fu akaragapai, si nigupai rengbe ka undo rani a ani kiisi gaani inohe. Oni sananga tironi ki yaa, ‘Ya mo mi naaʹasada tire kindi ka kiiso gimi inohe?’—Snz. 2:1-7.

5. (a) Wai rengbe ani ka wirikapai tipa Yekova? (b) Ginipai rengbe oni ka gumbaha tipa ga Yekova ruru sarangbanga, tatamana, na ome?

⁵ Yekova nayugo asinoko furani rogo Fugoko nga Ziazia Kekeapai. Ka ani aawisigo Ziazia Kekeapai na kini gbia inohe tipa Yekova, ani nika rugatirani wenengai naapa gako ruru sarangbanga, ome, tatamana, na gako bakere nyemuse. Yekova namanga gako apai dunduko niruruhe, na gako andiko nikina ruruhe a. (Pa Rug. 32:4; Tam. 19:7) Ho ani awisigo agu ahe ni Yekova amangihe, si nasa rani ani rugutirani wenengai naapa gako bakere tatamana. (Tam. 104:24) Agu ahe du rogo haurago, si nayugo gupai a nga Yekova na bakere tandu na ome kisusi.—Yes. 40:26.

6. Wai Mbori ayugu gako nyemuse tipa rani, na gipai re nasa rani ani mangi wai?

⁶ Ginipai rengbe ani ka gumbaha tipa gu bangua sino Mbori nga nyemuse? Gako nyemuse ima kio kisusi. Ko ayugu gu gako nyemuse re nifuko wiriko ko kpi nimotumo tipa ka kusa gorani be ingapai na kpio. (Oni gedi ARomo 5:8.) Aboro dunduko rogo zegino rengbe ka gbia undo be gi motumo re ka si du nga i na idapase kuti Wiri Mbori. (Yo. 3:16, 36) Gupai Mbori amangihe nga ka fu Yesu nimotumo tipa gaani aingapai re, si naida si fõngbaduraniyo ani kpinyemuko a.

7, 8. (a) Ginipai si aidaha berani tipa ani yugu nyemuse tipa Mbori? (b) Gini apai navura nimangi awirinarani i kini irisi ga Mbori arugute kindi?

⁷ Wai rengbe ani ka yugo gaani nyemuse tipa Mbori nibi gu weneapai dunduko ko namangihe tipa rani? Ziazia Kekeapai nakaragapai kini yaa: “Gi nga du [ani] na nyemu Mbori re, nga ka ani kuti gako rugute. Gako rugute asusa nga omerani te.” (1 Yo. 5:3) Nirengo, nyemu Mbori nasa rani ani irisi gako arugute. Gure nga ndupai sa dagba agu akuraha ani naamanga dezirepai ti ni tipa rimoko na tipa gako Kindo, na gi gaani sunge re naundo dungu aboro. Ho ani amanga gi sunge re ni na ngbaduraniyo dunduko, gure nga gopai nga ani nairisa ga Mbori andiko na wene ndu mangaha.—Mt. 12:34.

⁸ Awirinarani rogo zegino dunduko ima kpatagara kuti irisa ga Mbori andiko si ki vura du vurũ nga aboro aidanga naayó te na aguyo nasoga gu pangbanga asoga nga ga Kindo. Wa vura du apai wa gure tipa yo, i ambunga manga gayó sunge te. (2 Tim. 4:5) Wakina gure a, ani na nyemu ka undo aboro i niʹirisi gako arugute.

Gupai Nasa Rani Ani Kpinyemu Gaani Gbia Nga Yesu Kristo

9. Gini apai Yesu ahihe, na gine nasako ko hihe?

⁹ Kurii gupai nga ga kpinyemu Mbori, badungu nduapai kinaho a ani akpinyemu Wiriko ti ni. Wa ani aavuranga bi Yesu ya, ho ani awirika apai ni tipa ko, gaani nyemuse tipa ko nakio akio. (1 Pet. 1:8) Gini bete apai Yesu ahihe? Wa ko aamanga gupai Bako akpinyemu auru kpotosende ane, aboro asogoko zanga nduhe, ki rungosiko, ki kitingbaanga ko niziree, ki gberẽ ngbayo yo fuko, na ki wasi ko gbegberẽe. (Oni gedi Yoane 15:25.) Gu nyemuse Yesu adu nani tipa Bako asako ko hi agu apai re dunduko. Gako nyemuse nasako a ko idi Bako fu ko nimotumo tumorii tipa aboro.—Mt. 20:28.

10, 11. Nibi gupai Kristo amangihe furani, ginipai ani nadiberã ka mangaha?

¹⁰ Ga Yesu gene raka na agu apai ko amangihe nafõngbaduraniyo afõ. Ho ani aberã ni kurii agu apai Yesu namangihe tipa rani, gaani nyemuse koyo du ko ni nakio. Wangia ani apefuoko, si naida ani naasonosa ngbatunga gu nyemuse duwa ga Kristo re kindi niraka ani ringbisihe kuti gu rugute ko afuhe ki yawee ani tungusipa Kindo na kini sa aboro ni abawiriki.—Mt. 28:19, 20.

¹¹ Gu nyemuse Kristo ayuguhe tipa rani nasa rani ani mangi nyanyaki asadatise tipa ka nyasa gu sunge tungusapai i afuhe furani mbata fu digido zegino da. (Oni gedi 2 AKorindo 5:​14, 15.) Gu nyemuse Kristo ayuguhe nasako ko digisi gupai Mbori aringbisihe tipa ngbatunga aboro dunduko. Na gu kpiapai Kristo ambuhe furani ani pekefuoho naundo rani nibasasa ani mangisunge a tipa ka digiso gu ga Mbori ringbisapai re. Tipa ani duna diabese rogo gipai re, si naida ani du na kakaka nyemuse tipa Mbori. (Mt. 22:37) Pa manga ani agu apai Yesu ayuguhe na kini irisi gako arugute nika yugo gupai nga ani na ndikidi nyemuko na ani ima diaberã tipa ga Mbori bakere pagbia a wa Yesu amangihe.—Yo. 14:23, 24; 15:10.

Ndu Ngba gu Gene Ngbaa Kisusi

12. Ginipai Pauro aaberãha na gu fugo nga ‘gene ngbaa kisusi’?

¹² Gu mokedi nangia Pauro angia gu boro nanaawirika Kristo. Wa ko aapekafuo Kristo wenengai gbe, ko afura zukazuka zanga gunde ho ko ayani fu awirinako wee i wirikiko. (1 Kor. 11:1) Wa ko avura ngarasa agu aKristano nadu Korinda yo i naagbata agu agamahe nga ga toro kakaka, wa gu nga tandu husa akaza na fura rogo dungu afugo, boro aawirikanga ha awirika ya, ko ayugu gupai fuyó nga nyanyakipahe kinaho nasusi gure si aidi i gbataha. Rogo 1 AKorindo 12:31, ko agumbapa guhe re ki yaa: “Mi ayúgo gu gene ngba susi furoni.” Agu averesi naye fuo gure nayugo gupai nga, gu gene ngba kisusi re nga gu gene nga ga nyemuse. Rogo gini gene si angba kisusi? Pauro aima sakarogoyo. (Oni gedi 1 AKorindo 13:​1-3.) Ka si adu nga ko aduna tandu beko ka manga badungu apai na ki mangi agu apai duna tandu ono ka ko adunga na nyemuse ya, gine kangiaha? Si dunga nihe te! Ziazia toro asako ko gumba gi nyanyakipa pai du kusende re. Nairiwo wai gupai ko agumbaha re aundo rani!

13. (a) Gini averesi du tipa gu garã nga 2010? (b) Ngba gini gene nyemuse adigongo ya?

¹³ Pauro afura tipa guhe nga nyemuse, na guhe angianga nyemuse ya. (Oni gedi 1 AKorindo 13:​4-8.) Awere tie, oni berẽnga kuriipa gaoni nyemuse, singia si nzunzu nga ngbatunga gu nyemuse si aida oni du nani. Oni berẽnga gbe kurii gu yangara afugo du rogo veresi 7 na gu bambata afugo du rogo veresi 8 nga gu nayaa: ‘Ga nyemuse hipa apai anyasanga te. Nyemuse adigongo te.’ Gure nga agu averesi du tipa gu garã nga 2010. Rogo veresi 8, Pauro ape gupai nga, agu agamahe nga ga toro nakoda agu apai duwa gumbapai nisangbanebi, fura rogo agu afugo boro awirikanga ha awirika ya, nga agu apai naamanga ti regbo tonatona gu pambori nga ga aKristano anyasa anyasa watadu adigo adigo. Ono si adu nga nyemuse tigaha adigongo te. Yekova nga mburu nyemuse na digidoko ti ni te. Sidu, nyemuse adigongo te. Si nika nyeanye kindi nisino gu gaani Mbori nga nyenye Mbori.—1 Yo. 4:8.

Gu Nyemuse Gaha Hipai Anyasanga Ya

14, 15. (a) Wai rengbe nyemuse ka undo rani ani hi arungosi? (b) Tipagine wirina sa aambunga gako idapase ti ni ya?

¹⁴ Ginipai nasa aKristano i naahi apai ahi i ki vura kaa gbiatiyo na aʹasada gbiati fudifudiapai vurũ? Gupai naundo yó nga gu nyemuse du yó nani du mburuhe rii rugute. Anga gu nyemuse re gbua nga fuhe fu agu aboro duna zingo te, ono si nga gu ngbatunga nyemuse nasa boro ní kakuti gani ruru mangaapai na ki idi ka kpi ka si du nga i naida ka imo ní tipa pa Kristo. (Ruka 9:24, 25) Oni berẽnga kuriipa agu awirina i arungosi yó rogo agu abataya nangia ga zizi aboro ti regbo Ue Vura Nga ga Zegino na tingbafuoho.

¹⁵ Kpiapai tipa gipai re nga gu namangi paranga ni Dezire Yekova Germani yo rimoko angia Wilhelm. Kuba gupai nga ko mbu gako idapase, ko anye kindi niruruko si ki vura du vurũ nga i nandu ka imoko. Ko ake yangara sangbako fu gako aborokporo ki yaa: “Gupai nyakipaha gbe nga, ani kpinyemu Mbori a wa Bairarani nga Yesu Kristo agumbaha. Ka ani ru nyanyakii kubarako yo, ko fu mosoro afu furani.” Kusa, rogo Ngbaõbambu Sinziri, boro sa dagba gako aborokporo akepai ki yaa: “Wa fudifudiapai avura kaa manga, gupai bi ani he nga ani ima peresapa kpinyemu Mbori mbatayo fu apai dunduko.” Gure nga gupai awirina ada kuti ni nga aguyo narungo awere bambukiso yo rogo agu aringara nga Armenia, Eritrea, Korea ku sudiyo, gbiati gu kura aringara. Agi awirina re ru nyanyakii rogo gayó nyemuse tipa Yekova.

16. Gini arungosi nagbia agu awirina du Malawi yo?

¹⁶ Rogo dungu arago, arungosiro ngba arikoho dunduko aima du nikere aʹasada fu awirinarani. Agu aDezire Yekova du Malawi yo ahi kere sogote tipa agarã 26, i ki mangiyo na kere gbegberẽ apai, na irangbii ki zahe ti gayó sunge tungusapai. Yekova aima fu mosoro fuyó tipa gayó hipai. Ho arungosi atona ni, aDezire Yekova adu rogo gu ringara re nga 18,000. Fuo agarã 30, bangeyo ange kisusi gure bara ue. I adu nga 38,393. Kina ngbatunga gupai re namangi rogo kura aringara a.

17. Gini apai kura awirina naagbiatiyo nani, na gine ninaaundo yó i hipai?

¹⁷ Ho aboro asoga ga Mbori aboro ni nibadona, si ima igira gbe. Ono ho bangisa Kristano agbia sogote ni be gani aborokporo, si ima igira gbe berewe. Fudifudiapai rengbe ka ye fu boro be gu kurani ní araka na ní sa, watadu be agumeni. Anga Yesu aima yawee gipai re nika manga amanga tee? Ii, wo ko agumbaha, na badungu aboro gipai re amanga yó. (Mt. 10:35, 36) Kura paranga aboro ima rungo be agu avunguyo angianga aDezire Yekova ya. Badunguyo i aima do yó a kporo, ono awirinayo nga aDezire Yekova ki di yó kugume wenengai. Aguyo kinaho agumeyo aima zunga tiyó ki yawee ka i yambungo yó berewe nga agumeyo te. Gine ninaaundo ngbatunga agu awirina re i hipai? Anga kina nyemu awirina sa ninaaundo yó te, ono guhe ninaaundo yó gbe nga nyemu Yekova na nyemu Wiriko.—1 Pet. 1:22; 1 Yo. 4:21.

18. Wai gu nyemuse gaha hi pa pai anyasanga ya aundo agu arogotise nga aKristano?

¹⁸ Kura badungu apai kinaho namanga aboro naida gupai nga boro duna ngbatunga gu nyemuse gaha hipai anyasanga ya. Nyemuse ninaaundo arogotise i irisi gu fugo Yesu nga: “Gu Mbori akpamia re ka boro kpara nga ha ya.” (Mt. 19:6) Ho ‘pai afuda’ agu arogotise ni nga aKristano, si naida i tingidi gupai nga, Yekova nga nyanyakipa boro rogo gayó ramukporo. (1 Kor. 7:28) Fugoko nayawee ‘ga nyemuse hi pa pai anyasanga te,’ na agu arogotise duna gi sino re tiyó, i naziotiyo wenengai kini mbakadi gayó ramukporo.—Koro. 3:14.

19. Ginipai awirina naamangaha ti regbo agu agberango naye be gu mangapai nga ga ome zegino?

¹⁹ Nyemuse naundo rani ani hi apai dunduko ti regbo agu agberango naye be gu mangapai nga ga ome zegino. Gure nga gupai namangi ho bazigizo amangi ni Peru yo na gu bakere bavugumo namangi Amerika yo. Badungu awirinarani akpuyo agberẽ na gayó ahe. Nyemuse afõngbadu awirinayo yo rogo dungu apapara zegino i undo aguyo gberango amangiyo re, ki dudua gayó abambu na aBambu Kindo a kubaha. Gu mangaapai re nayugo gupai nga, awirinarani nakpinyemu akurayó akpi na kini berẽ payo ti aregbo dũ, ka kina ginipai vura manga amanga vurũ.—Yo. 13:34, 35; 1 Pet. 2:17.

Nyemuse Adigongo Te

20, 21. (a) Tipagine nyakipa nyemuse ti ni gbe? (b) Tipagine oni nadiberã ti ni kadu na nyemuse ti aregbo dũ?

²⁰ Dagba ga Yekova aboro areme, ani nabi gupai abi duhe ti ni nipatatamana ani ndu ngba gu gene ngba kisusi, nga ga nyemuse. Nirengo, pa nyemuse ima nyaka kisusi ti aregbo dũ. Oni kparianga wai Pauro anyakasipa rengo. Nibambatapai, ko fura tipa agu agamahe nga ga toro si adu nga si nika nyasa anyasa na ki yawee gu dungurati nga ga aKristano nika sona ki nyaki. Fuo gure, ko adigisi fugoko ki yaa: “Ono awere idapase du ho na maabangirise, na nyemuse; agi apai biata re; gu kii dagba ha nga nyemuse.”—1 Kor. 13:13.

²¹ Ho boro aduni na idapase tipa pai gupai re ki mangi, gure nga gu idapase re nadigo a. Gu maabangirise du ani nani tipa agu apai nika manga kumbatayo, si nika go ago ho ani ka bi agu apai ni re. Ono ginipai tipa nyemuse tigaha? Si adigongo te. Si nika nyeanye kindi. Wa ani kaa raka nyeanye kindi, ani nika rugatirani berewe gbe naapa ga Mbori nyemuse. Ka oni amanga gupai Mbori akpinyemuhe na kidu na nyemuse, oni raki araka nyeanye kindi.—1 Yo. 2:17.

Gaoni Karagapai Nga Gine?

• Tipagine si aida gupai ti ni nga ani bandatirani ti ngbatunga gu nyemuse arunga ya?

• Nyemuse rengbe ka undo rani ani hi gini apai?

• Rogo gini gene nyemuse adigongo ya?

[Gu kpiahe du ti kpewaraga 27]

Agu averesi du tipa gu garã nga 2010, si nga: ‘Ga nyemuse hipa apai anyasanga te. Nyemuse adigongo te.’ ​—1 Kor. 13:​7, 8.

[Gu kpiahe du ti kpewaraga 26]

Gu nyemuse adigongo ya naundo agu awirinarani du Malawi yo i hi arungosi