Oni Naapeka Toro Na Kini Raki Ringbisihe Kuti Gaoni Kparatise
“Oni péke Toro, ka oni amánga nga gu nyemuhe nga ga borose ya.” —GARA. 5:16.
1. Gini bapatiza aboro azihe rago Pendekote?
HO I abapatizi apefuo Yesu ni ti rago Pendekote rogo gu garã nangia 33 F.B.K., i atona fura rogo dungu afugo nga agu afugo i aawirikanga ha awirika ya. Aboro abi gupai ziazia nga i ima gbia gu iiriwo gamunihe nga ziazia toro. (1 Kor. 12:4-10) Gine nangia sangbana gi gamunihe re, na sangbana gu gumbapai gu mokedi nangia Petero amangihe? Badungu aboro ‘ngbaduyó yo akua akua.’ Mbiko gu zungodihe Petero azungodiyo nani, i asa gayó berã, na ki zi bapatiza. Pangbanga gupai re nayaa: “Agu yo naka kuti gako pai i ki bapatizi yo; ni gu rago re i ki gedi agu yo na yo i ki du wa ka i du 3000.” (Amo. 2:22, 36-41) A wa Yesu aruguyo nga si naida i bapatizi yó rogo ime ti rimo Mbori nga Baa na Wiri na Ziazia toro.—Mt. 28:19.
2, 3. (a) Oni gumbanga pa gu kparakparapai du dagba bapatizi boro na ziazia toro na ka bapatizi ní ti rimo ziazia toro? (b) Tipagine du pa zio bapatiza rogo ime ti ni ninyanyakipa pai fu ndikidi aKristano areme?
2 Ono tie, ya mo kparakparapai ho dagba bapatizi yó boro na ziazia toro gbiati bapatiza yo ní ti rimo ziazia toro? Ii, kparakparapai kinaho. Agu aboro i abapatizi yó na ziazia toro, i navunga yó berewe nitoro i du ni awiri Mbori. (Yo. 3:3) I nambeda yó nitoro i du ni abakindo ngbangbaturũ yo gbiati aboromotumo, na i nga papara kpoto Kristo nga ga toro. (1 Kor. 12:13; Gara. 3:27; Yugo. 20:6) Gu bapatiza nga ga toro re du Yekova atona mangaha rago Pendekote ho ko asia aboro ni i ndu ka zogarago na Kristo. (Rom. 8:15-17) Ono gine nga bapatiza boro rogo ime ti rimo ziazia toro nga gupai ninaamanga ti aregbo gu bakere dunguratise nga ga ga Yekova aboro?
3 Bapatizi boro rogo ime nga gu bambatapai ndikidi aKristano amangaha ka yugo gupai nga i ima kparatiyo fu Yekova nga gayó Mbori. Kina gu bangisapai re a du tipa agu aboro i ayamba yó i ndu ku ngbangbaturũ yo. Ono bapatizi boro rogo ime nga gu nyanyakipa pai amirioni akumba na adee amangaha ti gi gaani regbo re nga agu aboro duna maabangirise ka raka nyeanye kindi auru kpotosende. Zanga bipa ga boro maabangirise, pa dia boro bapatiza ti rimo Baa na Wiri na ziazia toro nga nyanyakipa pai si aida boro mangihe tipa Mbori idi na gani pai. Sidu, agu aKristano dunduko zi bapatiza ngba gi gene re, si naida i ‘naapéka toro.’ (Oni gedi AGaratio 5:16.) Ya mo oni napeka toro na kini raki ringbisihe kuti gaoni kparatise?
‘Peka Toro’ Nga Gine?
4. Gine nzunzu nga ‘peka toro’?
4 Pa peka boro toro nakodapa ida ní na gu mangaapai nga ga toro rogo gani raka na ka mbuhe si mangi ariapai rogo gani raka. Watadu ka mbuhe si naayugo gene funi rogo gani raka. AGaratio kapita 5 nape pa gu kparakparapai du dagba mbutise kutii gu ome nga ga toro na gu nga ga borose.—Oni gedi AGaratio 5:17, 18.
5. Pa mbu oni ziazia toro si naayugo gene furoni naida oni mbu gini mangaapai?
5 Ka oni mbu ziazia toro si naayugo gene furoni, si nika sa gupai nga ka oni naamanganga agu apai nga ga borose ya. Bete gu mangaapai re nga “bari, na pa meteka, na wasiro, na irisa kpiaahe, na soroka, na asogote, na kpata, na aringo, na azinga, na kpika pai, na kparaka, na kparakpara pai, na kpiboro, na kpibuda, na do pumbo gbarakagbaraka.” (Gara. 5:19-21) Ka pepai ngba kura gene, oni ‘imi ga boroboro apai be toro.’ (Rom. 8:5, 13) Si nika undo roni oni moi berãroni fuo agu apai nga ga toro na kini mangipai ringbisihe kuti wai si amangasunge, kuba gupai nga oni mbu tironi fu gu nyemuhe nga ga borose.
6. Oni funga kpiapai nga gu nayugo gupai si aida ani mangihe kadu na zuzu toro.
6 Ho ziazia toro amangasunge ni kurironi, si nasa roni oni du na asino Mbori tironi, nga “zuzu Toro.” (Gara. 5:22, 23) Ono gupai tie si aidaha nga oni nyakasi tironi tipa ka gbiaha. Ani yugungo ho na kpiapai: Ho basopobino nisopo gani bino ni, si niidi mai ná kurii gani tunga na uru kini foi a; ka agi apai re amanganga ya, agu aũati re idinga te. Ani rengbe ka ringbisa ziazia toro kuti faa uru. Si naida ani du nani tipa ka zuka zuzu toro. Ono ya mo aũati rengbe ka ida ka baira ati amanganga sunge nyanyakii ya? (Snz. 10:4) Si tie ziazia nga, pa mbakada ani ngbaduroniyo nasa zuzu toro si sono rogo rani yo. Oni sananga tironi nga, ‘Ya mo mi naambu ziazia toro tipa si kusi zuzuhe rogore yo nimanga mi apai wa gu si aidaha?’
7. Tipagine du gedapai na berãkuriipai ti ni ninyanyakipa apai ka ani aida kadu na zuzu toro?
7 Tipa aũati idi, si naida mai ná aná kuriihe watadu bairaha tudihe atuda. Tipa oni kusi zuzu toro, si naida oni gbia gu ime nga ga rengo du rogo Ziazia Kekeapai na gu ba rengbe oni ka gbiaha rogoho nga gu dungurati nga ga aKristano. (Yes. 55:1) Si nawira oni ima gumbaha fu badungu aboro nga Ziazia Kekeapai aye be gu undohe nga ga ziazia toro. (2 Tim. 3:16) Berewe a, gu riko nga ga ‘ruru kangara moyambu’ naundo rani ani girogo Ziazia Kekeapai. (Mt. 24:45-47) Gupai ani aida ka gumbaha nga, ka ani aida ziazia toro mangisunge rogoraniyo, si naida ani naageda Fugo Mbori na kini berẽkuriihe. Kangia oni namanga gupai re, gure nga oni nawirika gu kpiapai nga ga agu anebi ‘nanaasanahe kini wisigipai nyanyakii.’ Zavura amaraika a, i na kina nyemu ka ino gu rengo du tipa gu tunga i akido paha na ka inopai tipa gu riigbu nga ga mbedimbedi aKristano.—Oni gedi 1 Petero 1:10-12.
Ani Sa Ziazia Toro Si Fu Ome Furani
8. Tipagine duhe ti ni ninyanyakipa pai ani sana Yekova tipa gako toro?
8 Anga kina wisigo Ziazia Kekeapai sa na berãkuriihe nyakipaha te. Gupai si aidaha nga ani kpatagara kuti sana Yekova tipa undo gbiati arugute. Ko rengbe arengba ka “manga bakere gbe si ki moi pai susi gu ani aõ na gu ani aberã dunduko.” (Ef. 3:20; Ruka 11:13) Ono ka boro sana roni ki yaa, ‘Ka si du tie nga “Mbori ima inopa agu ahe zingoho amangare,” tipagine si aida ti ni mi naasanako asana tipaha berewe?’ (Mt. 6:8) Ho ani akpara ni tipa ziazia toro, gure nayugo gupai nga ani nakido kuti Yekova. Nikpiapai, ka boro sana roni tipa undo, oni rengbe arengba ka manga asadatise tipa ka undo ní bambiko pa sana ní roni nayugo gupai nga ní nakido akido kuti roni. (Oni ringbisinga ha na Asanza 3:27.) Wakina gure a, Yekova nagbia ngbarago agbia ho ani asanako ni tipa gako ziazia toro, na ko nafuhe afu furani.—Snz. 15:8.
9. Wai pa ndu oni kupati agu adunguratise nga ga aKristano aundo roni tipa oni naamangapai ringbisihe kuti ga Mbori toro?
9 Gu kura gene berewe ani agbia ga Mbori toro ngbaha nga adunguratise, na kikindigi adunguratise. Manga asadatise tipa ka du pati adunguratise dedede na kini moiberã roni ka giapai nga nyanyakipa pai. Pa manga oni he wo nika undo roni oni girogo gu “dudungura apai nga ga Mbori.” (1 Kor. 2:10) Karagapai dedede pati dungurati yo nafu undo afu. Oni berẽnga tipa agu adunguratise oni amangihe vuru agu aposo biama susi. Oni atumba beroni bara wai tipa ka karagapai, tipa ka fura tipa gaoni idapase? Ya mo pai ho si aida oni mbakadihe nibi gipai re? Ka si du nga pai kinaho, oni diberã tipa ka mangaha rogo agu aposo naye re. Yekova nabi wai abi oni aʹasada tironi ka karagapai ti regbo adunguratise, na ko nika undo roni aundo na gako toro oni naamangapai nibawenehe rogo dungurati.
10. Pa pekafuo toro nakoda yamba aboro tipa ginihe?
10 Peka toro nakoda idapa gu yambahe ani naagedaha rogo Yugoti 22:17 nga gu nayaa: “Toro na gu de kumba nikadia ri, i niya, ‘Mo yé.’ Gu ni nagia ha ni ki ya a, ‘Mo yé.’ Gu ni gomoro ime namanga ni, ni ye, gu ni idi he, ni di ime unga gbua.” Wa gu toro re amangasunge rogo gu riko nga ga gu dee nika dia kumba, si nayamba aboro tipa ime unga. Ka singia oni ima idapa gu yambahe nga “Mo yé,” ya mo oni diberã tipa ka yamba kura aboro? Nangbaa gu momu du berani nga kaa manga gu sunge naye na bata fu aboro re!
11, 12. Waigu ziazia toro aundo sunge tungusapai?
11 Gi nyanyakipa sunge re namanga awere mbiko gu undo nga ga ziazia toro. Ani nagedapai tipa wai ziazia toro aundo agu amokedi nadu rogo bambata sa kama agarã i ndu kurogo agu aba si aaidaha i ndu kurogoho. “Ziazia Toro aza [gu mokedi nangia Pauro gbiati gako abadia nunguro] tipa gumba ga Mbori pai Asia yo”; na si aaidanga ha a i ndu yó ku Bitunia yo te. Ani ainongo wai nzunzu toro azayo ti nduge kurogo agu aba re te, ono si tie ziazia nga, toro nasa Pauro ko ndu ku Putu yo. Ko abi boro Masedonia rogo yuguyugupai ní nikpari tipa undo.—Amo. 16:6-10.
12 Kina gu bangisapai re du areme a, ga Yekova toro nanungusa gu sunge tungusapai awirina amangaha rogo zegino dunduko. Yekova amanganga sunge ngba iiriwo gene rogo yuguyugupai tipa ka nungusa mbedimbedi aKristano te, ono ko namangasunge na gako toro si naangbe fuyó kumbatayo. Na toro nafõngbadu awirina yo tipa i nitungusipai na kini yugupai a wa rengbe omeyo nani. Zanga kapa, oni natungusapai atungusa. Ya mo oni rengbe ka kiiso gaoni ngbarago rogo ti sunge re?
13. Wai rengbe oni ka ra nigoroni kutii gu rugapai nga ga ziazia toro? Oni funga kpiapai tipa gipai re.
13 Oni rengbe ka ra nigoroni fu ziazia toro nimanga oni agu arugute Mbori afuhe fu gako aboro. Ani wisigingo gupai du tipa paranga dee nga Mihoko du rogo gu ringara nga Japan. Ho ri aduni kindi nivovo nazakigene, ri anaabi tiri nga si aidanga ri karaga tiri fuo boro te mbiko ri aainongo wai ka gbeberã irakporo kuti rengo te. Ti gu regbo re, i akusi apai rogo Gaani Sunge Nga ga Kindo nga gu nayugo wai ka karagatise fuo boro. Fuoho, i akusi gu burosua nga Satisfying Life—How to Attain It. Si adu niwene ũsunge Japan yo. Mihoko amangisunge na gu berãpai fuuyó ho rogo gu burosua re, gbe gu nga wai ka karagatise fuo boro. Nikina wiri ipo, ri atona ka wisigo Ziazia Kekeapai na agu aboro kaa idanga ka wisigo Ziazia Kekeapai na ri mbata ya. Fugori nga: “Mi anidu na badungu aboro bere si aida mi wisigipai naayó ti bangisa regbo bangeyo anida ada ti 12. Gipai re asa re mi sana aguyo tipa i ru mbataano tipa mi wirikipai na aguyo!” Nirengo, ho ani apeka toro ni, na kini mangi agu arugute i afuhe fu ga Yekova amoyambu, si nasa gupai nga apai ngba kubara roni yo.
Oni Kido Kuti ga Mbori Toro
14, 15. (a) Wai rengbe kpakpa aboro ka raka ringbisihe kuti gayó zungahe nga ga kparatise fu Mbori? (b) Ginipai ka oni mangihe ki gbia wene abakure?
14 Wangia ani abamangisunge fu Mbori, ani na sunge tungusapai nga gu si aida ani mangihe. (Rom. 10:14) Si rengbe kadu nga oni nabi tironi nga oni arẽnga tipa ngbatunga gu sunge re te. A wa duhe tipa mbedimbedi aKristano, Mbori du nasayo i rẽ. (Oni gedi 2 AKorindo 3:5.) Oni rengbe arengba ka raka ringbisihe kuti gaoni zungahe nga ga kparatise, nimanga oni asadatise na kini kido kuti ga Mbori toro.
15 Nirengo, anga si nitaatapai furani nga kpakpa aboro ka raka ringbisihe kuti gaani zungahe nga ga kparatise fu gaani Mbori nga Yekova nga rengberengbe boro te. Pai sa dagba agu akuraha nagbarasapa apai kubara roni yo nga, agu abakurearoni oni anaasungo mbata naayó, kina ngbayo nika zera wa i nika bi gu vovo gene oni araka ngbaha si kini sa yó i tona ka ‘gbera ngbayo yo furoni.’ (1 Pet. 4:4) Ono tie, ka bangironi gonga ti gupai nga oni awere na vovo abakurearoni ya, aguyo nyaki payo gbe, nga Yekova na Yesu Kristo. (Oni gedi Yakoba 2:21-23.) Si a ninyanyakipa pai ka ino awirina rogo gaoni dungurati. I nga agu aboro du rogo gu badona nga ga “awirina” du rogo zegino dunduko. (1 Pet. 2:17; Snz. 17:17) Yekova nika undo roni aundo na gako toro tipa oni zi bakure na agu aboro nika undo roni.
16. Tipagine rengbe oni ti ni kaa ‘ngi mbiko agu apai rungbura oni rogoho’ wakinagu si adu tipa Pauro?
16 Ka oni vura duadu na wene abakurearoni rogo dungurati, si rengbe arengba kadu kindi nimbumbuhe oni dibe kura apai. Si rengbe kadu nga ome apai nafu afu rironi ti kura aregbo. Ka pai du wa gure tipa roni, si tie nga gu regbo si aida oni sana Yekova tipa gako ziazia toro. Gu mokedi nangia Pauro akepai ki yaa: “Ho mi nirungbura ni mi nidu ho nyanyaki.” (Oni gedi 2 AKorindo 4:7-10; 12:10.) Pauro aima ino gupai nga, ga Mbori toro naundo aboro aundo ho du yó ni rurungburaa. Sidu, ga Mbori ome rengbe arengba ka nyakasa roni ho du oni ni rurungburaa na kini idi undo. Pauro akepai ki yawee ko ‘naangi angi mbiko agu apai rungbura ko rogoho.’ Gu regbo ko anidu rurungburaa, si naaningia gu regbo ko anibi gupai nga ziazia toro namangasunge rogo ko yo. Kina gu bangisapai re rengbe kadu tipa roni a!—Rom. 15:13.
17. Wai rengbe ziazia toro ka undo roni oni da rogo gu ba oni andu kurogoho?
17 Si naida ani du na ga Mbori ziazia toro tipa kaa raka gu gaani raka ani akparaha fuko. Oni berẽpa tironi nigu boro naruga rii gu kurungba wege aturaha. Gu sásá moi oni he nga oni naida kaa mangasunge fu Yekova nyeanye kindi. Ziazia toro nga guhe oni aidaha duwa wege tipa si tura gaoni kurungba kurogo gu ba oni andu kurogoho. Oni aidanga gupai nga gu toro nga ga zegino naatura roni kubani na kubani te. (1 Kor. 2:12) Gupai si aidaha beroni nga ka ino gu wege nika tura gaoni kurungba kurogo gu ba oni aida ka ndu kurogoho. Gu wege re nga ziazia toro. Fugo Mbori, ziazia toro, gbiati gu undo ga Mbori riigbu afuhe nika sa gupai nga oni ndu ki da rogo gu ba oni andu kurogoho.
18. Ginipai di oni berã ka mangaha, na tipagine?
18 Kangia oni aima digo niwiriki Ziazia Kekeapai na aDezire Yekova, kini kodi tironi naayó, ono oni atamanganga gu nyanyakipa pai nga ka kpara gaoni raka fu Mbori ki zi bapatiza te, oni sana tironi ki yaa, ‘Tipagine mi akeesa ti ni?’ Kangia oni kparia gupai nga ziazia toro namangapai amanga areme ka digiso ga Yekova ringbisapai, oni mangi gupai wiriki oni he. Yekova afu maku afu furoni. Ko afu gako toro afu furoni. Kangia oni aima zio bapatiza bakuru kusayo, si nawira gupai tie nga oni ima inopai tipa wai ziazia toro amangapai rogo ga boro raka. Oni ima ino wai rengbe Mbori ka nyakasa roni na gako toro. Gupai re rengbe arengba kaa ndu kumbatayo kindi zanga digo. Wa duhe tie were, si naida ani diberã ka mbu ziazia toro si naayugo gene furani.
[Gu kpiahe du ti kpewaraga 17]
Tipa oni mbakadi ngbaduroniyo, si naida sunge
[Gu kpiahe du ti kpewaraga 19]
Ya mo ga Mbori toro mangi ariapai rogo gaoni raka?
[Gu kpiahe du ti kpewaraga 20]
Oni Natingidaha?
• Rogo gupai yo nga ‘peka toro’ nga gine?
• Gine rengbe ka undo roni oni ‘naapeka toro’?
• Wai rengbe oni kaa raka ringbisihe kuti gaoni kparatise fu Mbori?