Ga Mbori Toro Angbembatayo Fu Amokedi Na Ti Gi Gaani Regbo Re

“Toro kina sa namanga agi apai dunduko re.”​—1 KOR. 12:11.

1. Gini apai ani nika wisigopai tipaha rogo gi kekeapai re?

PENDEKOTE! Nairiwo gu wene apai gu bangisa fugo re atingida rani nani! (Amo. 2:1-4) Pa zora ziazia toro kurii amokedi rogo bambata sa kama agarã nayugo gu iiriwo gene Mbori atona ka mangapai ngbaha na gako amoyambu. Rogo gu kekeapai ye mbata fu gere, ani awisigipai yo tipa gu bete agene ga Mbori toro aundo gu ruru amoyambu nadumbata ngbaha i mangi agu asunge naadu nikpakarakpakaraha na agu naadu na futufutu apai rogoho. Ono gini kparakparapai du ti gu gene ga Mbori toro amangisunge ngbaha mbata fu rago aKristano na rogo bambata sa kama agarã? Na wai aKristano agbia undo ti gu mangapai nga ga ziazia toro areme? Ani bingoho.

“Mo Ngere ga Gbia Kanga Nga Mi”

2. Wai gu Maria abi gu mangapai nangia ga ziazia toro?

² Maria adu kinaho rogo gu bakere vuru bambu naadu kuari Yerusarema yo ho ziazia toro azoro ni kurii amokedi. (Amo. 1:13, 14) Ono wa si avura duwo, agarã wa biata bawe mbata fu gu uru re, ri aima bi wai ga Yekova toro amangisunge ngba iiriwo gene. Yekova aaria gu raka nangia ga bangisa Wiriko ngbangbaturũ yo ku auru kpotosende ane nisako Maria ri du na mobara mbu ri kindi ningasu ri. Gu mobara ri adu nani re, si aye “mbiko Ziazia Toro.”​—Mt. 1:20.

3, 4. Gini bipai Maria adu nani, na wai rengbe ani ka wirika ri?

³ Tipagine Mbori afu gu riko iiriwo momu re ti ni fu Maria? Fuo maraika saki gupai furi Mbori aida ri mangihe, ri ayaa: “Mo ngere ga Gbia kanga nga mi; i mangi he fere wa gu mo agumba.” (Rk. 1:38) Gupai Maria agumbaha re ayugu kina boro gupai Mbori abihe kurogo ri yo. Pa karaga ri pai niipo nayugo gupai nga ri aima ida ka manga gupai Mbori akpinyemuhe. Ri aasadanga ka sanahe tipa gu bipai aboro arengbe kadu nani fuo bi yó ri na mobara watadu gu kpakarapai si arengbe ka kusaha kuti gu mbakadapai nangia ga rogatise dagbari na Yosefa te. Pa yamba Maria tiri nga kanga nayugupa wai ri akido kuti Yekova na ngbaduriyo dunduko.

⁴ Ya mo gunde azingo roni ti kura regbo be akpakarapai watadu ti ga Mbori sunge? Ani dunduko nibasasa si aida ani sana tirani nga, ‘Ya mo mi naakido kuti Yekova na ngbadureyo dunduko tipa ka mangapai ringbisihe kina kuti gupai ko akpinyemuhe? Ya mo mi naayugo gu toro nga ga futise?’ Oni du na gu kido nga, Mbori nafu gako toro afu fu agu aboro nakido kutiko na ngbaduyo yo dũ na kini gi agu apai ko agumbaha.​—Amo. 5:32.

Ga Mbori Toro Aundo Petero

5. Rogo gini agene Petero abi ziazia toro si nimangisunge ngbaha mbata fu rago Pendekote?

⁵ A wa si adu tipa Maria, gu mokedi nangia Petero aima bi gu ome mangapai nangia ga ziazia toro mbata fu rago Pendekote rogo gu garã nangia 33 F.B.K. Yesu afu pagbia fuko na fu gu kura amokedi i nido adaimona kusayo. (Mk. 3:14-16) Wa vura duhe nga Ziazia Kekeapai afuranga gbe tipa agu adaimona i ado ra te, si nawira wa Petero aima mangasunge na gu pagbia re. Ga Mbori ome adu niyuguyuguhe a ti gu regbo Yesu ayambu Petero ko ye fuoko rii gu Baime nga ga Gariraya, Petero ki ima mangaha. (Oni gedi Matayo 14:25-29.) Si tie ziazia nga, Petero akido kuti ziazia toro si undo ko ko naamanga iiriwoapai. Barambeda, gu toro re aandu ka mangasunge na Petero gbiati gu kura abawiriki ngba vovo gene.

6. Ginipai Petero amangihe mbiko ga Mbori toro mbata fu rago Pendekote na fuo rago Pendekote?

⁶ Ti regbo gu pumbo nangia ga Pendekote rogo gu garã nangia 33 F.B.K., Petero na gu kura aboro agbia gu momu nga ga fura na agu aboro naye ku Yerusarema yo rogo agu afugo i agumbaha. Fuo gupai re ngbutuko, Petero aru kuari ki tona ka fura fu rimbasa aboro. (Amo. 2:14-36) Ii, gi kumba nanaamanga apai amanga mbata bau watadu nanaagunde agunde be aboro ti gu kura aregbo aru kuari tipa ka manga dezirepai zanga gunde, aboro ki vura ka rungosiko na kini serekpoko vurũ. (Amo. 4:18-20, 31) Mbori afu inohe fuko rogo yuguyugupai. (Amo. 5:8, 9) Na Mbori afu ome a fuko tipa ko zingisi boro bekpio.​—Amo. 9:40.

7. Gini ga Yesu ayugopai Petero agirogoyo kina fuo zora ziazia toro kuriko?

⁷ Zavura mbata fu rago Pendekote, Petero aima giarogo gu dungu arengo Yesu ayuguhe. (Mt. 16:16, 17; Yo. 6:68) Ono gu kura ga Yesu ayugopai kinaho nga gu ko agianga rogoyo mbata fu rago Pendekote ya. Nikpiapai, Petero aruganga tiko na gupai nga Kristo nika zinga bekpio fuo arame biata na gu kpoto tiko nga ga toro watadu gako Kindo nika du ngbangbaturũ yo te. (Yo. 20:6-10; Amo. 1:6) Petero aruganga tiko wenengai na gupai nga aboro nika ndu ku ngbangbaturũ yo ka zogarago yo te. Ko agirogo agi apai re kina fuo zora ziazia toro kuriko na fuo fu yó gu maabangirise nga ga ga ku ngbangbaturũ yo fuko.

8. Gini bangisa inohe du fu mbedimbedi aKristano na “kura akandoro”?

⁸ Agu apai ga Yesu abawiriki agianga rogoyo mbata ya, i agi tiyo nani fuo zora ziazia toro kuriyo. Ga Mbori toro adu kugii agu aboro nake Vovo Andiko i peke agu arengo furani du tipa ga Yekova ringbisapai. (Ef. 3:8-11, 18) Areme, mbedimbedi aKristano na “kura akandoro” nari kina gu bangisa riahe sa nga ga toro, kini wiriki bangisa rengo sa. (Yo. 10:16) Ya mo oni na tambuahe tipa gu inohe gbiati giarogo Fugo Mbori ziazia toro afuhe areme furoni?

Pauro ‘Ahi Be Ziazia Toro’

9. Ginipai Pauro arengbe arengba ka mangaha mbiko ziazia toro?

⁹ Fuo susa regbo wa garã sa fuo Pendekote rogo gu garã nangia 33 F.B.K., gu kura boro agbia ziazia toro. Gu boro re angia Saura, aboro ainiko kusa nga Pauro. Toro amangisunge naako ngba agu agene ani agbia undo agbia behe areme. Ga Mbori toro adu naako ko keke akitabu 14 rogo Ziazia Kekeapai yo. Kina wai ga Mbori toro aundo Petero, kinawo a si aundo Pauro ko gi rogopai yo na ki kepai zukazuka tipa unga zanga kpio gbiati raka nyeanye kindi ngbangbaturũ yo. Mbiko ziazia toro, Pauro ahusi aboro, ko ado adaimona, na ki zingisi boro bekpio! Ono tie, gu ome ko agbiaha be ziazia toro si adu tipa ka manga gu kura nyanyakipa pai nani, ga Mbori amoyambu namanga kina gu bangisapai re areme, wa vura duhe vurũ nga i amanganga iiriwopai te.

10. Wai ziazia toro aundo Pauro tipa ko za ngbako na fugo?

¹⁰ Pauro nga gu boro “nahi be ziazia toro” afura zanga gunde fu boro soroka. Gipai re aima du na bakere sangbanaha kurii gu gbiakporo nangia ga Kupurio naadegatuko kuti gu gayo fugodagbase re. Gu gbiakporo re adi rengo kugume, mbiko ‘iriwo gu yugopai nga ga Gbia ati tiko.’ (Amo. 13:8-12) Nirengo, Pauro aima rugatiko wenengai naapa nyakapa wai ga Mbori ziazia toro afu ome fuko tipa ko gumba rengo zukazuka. (Mt. 10:20) Kusa, ko azungodi agu awirina naadu rogo gu dungurati naadu Efesa yo i kpari tipa ko tipa wa ka ko ‘aza ngbako’ na fugo.​—Ef. 6:18-20.

11. Wai ga Mbori toro angbembatayo fu Pauro?

¹¹ Ziazia toro anaaundo Pauro aundo ko nifura, ono kura aregbo anidu kinaho si aidanga ha fuko ko fura rogo gu kura aba ya. Ga Mbori toro nanaangbe fuko kumbatayo ho ko anaandu gako anunguro ni nga ga amokedi. (Amo. 13:2; oni gedi Amokedi 16:6-10.) Yekova namangasunge kindi na gako toro tipa kaa ruga sunge tungusapai. A wa si adu tipa Pauro, gu ga Yekova amoyambu dunduko nagiasangba ko namanga ome tipa ka tungusapai zaaza zanga gunde. Wa vura duhe nga gu rugapai nga ga ziazia toro areme wa gu si adu ti rago Pauro te, ani na gu kido nga Yekova namangasunge na gako ziazia toro tipa agu aboro du na ruru ngbaduyo yo gi rengo.​—Yo. 6:44.

‘Asunge Nibakiakia’

12-14. Ya mo ga Mbori toro namangasunge kina sa rogo gako amoyambu yo dunduko? Oni sakinga rogo.

¹² Ya mo pangbanga ga Yekova maku kurii gu dungurati nangia ga mbedimbedi aKristano rogo bambata sa kama agarã nangarasa ga Yekova amoyambu areme? Ii! Oni berẽnga kurii agu afugo Pauro ko agumbaha fu gu dungurati naadu Korinda yo nibipa gu gamunihe nga ga manga iiriwopai ti rago ko, ko yaa: ‘Were agamahe na angbatungaha akia, ono Toro du sa nafu he. Mangapase ki du na angbatungaha akia, Gbia ki du sa i namanga pa ko. Manga sunge ki du sa angbatungaha akia, ono Mbori du sa, namanga apai dunduko rogo ahe dũ.’ (1 Kor. 12:4-6, 11) Ii, ga Mbori toro rengbe ka mangasunge na ga Mbori amoyambu nibakiakia tipa gako ringbisapai. Nirengo, ziazia toro fu aboro dunduko, “umba rika aboro” gbiati gu “kura akandoro.” (Rk. 12:32; Yo. 10:16) Ono wa vura duhe wo, si amanganga sunge na aboro dunduko rogo dungurati kina sa te.

¹³ Nikpiapai, ziazia toro nasia abaakumba. (Amo. 20:28) Ono anga mbedimbedi aKristano dunduko namangasunge ni abaakumba rogo dungurati te. Ginipai rengbe ani ka gumbaha tipa gipai re? Gupai si ayugoho furani nga ga Mbori toro namangasunge na agu aboro du rogo dungurati nibakiakia.

¹⁴ Gu toro nasa mbedimbedi aKristano i ini gupai nga i nga awiri Mbori, kinaha Yekova amangisunge nani tipa ka zingisa bangisa Wiriko bekpio ko ga ku ngbangbaturũ yo. (Oni gedi ARomo 8:11, 15.)a Kina gu bangisa toro re du Yekova amangisunge nani tipa ka kusa zegino naabaha. (Bam. P. 1:1-3) Kinaha a ko amangisunge nani tipa ka sa Besarere ko rẽ tipa mangasunge banye, kinaha a ko afu ome nani fu Samusona ko mangi gu iiriwoapai ko amangihe, na ki sa Petero ko ndu rii ime. Sidu tie, si aidanga ani vundu padu boro na ga Mbori toro tiní na pa mbeda yó boro nitoro te, pa mbedayo boro nitoro nga gu kparakpara gene toro amangasunge ngbaha. Pa mbedayo boro nitoro nga ga Mbori siahe.

15. Ya mo bapatizi aboro na ziazia toro anyeanye kindi? Oni sakinga rogo.

¹⁵ Ga Mbori toro aima digo nimangisunge na gako ruru amoyambu ngba agu agene du nibakiakia. Si aima digo nimangisunge naayo tipa akutu agarã mbata fu Mbori tona ka mbeda aboro na toro. Gi vovo mangasunge na toro re atona rago Pendekote rogo gu garã nangia 33 F.B.K., ono si anyenga anye kindi te. Bapatizi aboro na ziazia toro nika digo adigo, ono ziazia toro nikaa mangasunge na ga Mbori aboro tipa i nimangi gupai ko akpinyemuhe nyeanye kindi.

16. Ginipai ga Mbori toro aundo gako amoyambu i nimangihe awere?

¹⁶ Ginipai namanga awere rogo zegino mbiko ga Yekova ziazia toro? Yugoti 22:17 nakaragapai niyaa: “Toro na gu de kumba nikadia ri, i niya, ‘Mo yé.’ Gu ni nagia ha ni ki ya a, ‘Mo yé.’ Gu ni gomoro ime namanga ni, ni ye, gu ni idi he, ni di ime unga gbua.” Ga Mbori toro nafõ aKristano areme i niundo Yekova ti yamba agu aboro “gomoro ime” amanga yó tipa i ye ka mbira gu ime nga ga unga. Mbedimbedi aKristano nga agu aboro nangbe kumbatayo rogo gi sunge re. Ono wa vura duhe wo, kura akandoro naundo yó aundo ti gi sunge re. I dunduko ga Mbori toro angbe fuyo kumbatayo rogo gi sunge re. I dunduko niima kpara gayo raka fu Yekova na ki yuguhe nizio yó bapatiza “ku rogo rimo Mbori nga Ba na Wiri na Ziazia Toro.” (Mt. 28:19) I dunduko nambu ga Mbori toro si ningbe fuyo kumbatayo na kini mbuhe si nikusi zuzuhe rogo gayo mangapai yo. (Gara. 5:22, 23) Gu kura akandoro nambu ga Mbori toro si undo yó kina wai duhe tipa mbedimbedi aKristano. Mbiko gu undo nga ga toro, i namanga ome tipa ka raka ringbisihe kina kuti gupai Yekova akpinyemuhe.​—2 Kor. 7:1; Yugo. 7:9, 14.

Oni Nisanahe Asana Tipa Ziazia Toro

17. Wai rengbe ani ka fu gopai nga ani na ga Mbori toro tirani?

¹⁷ Kangia gu maabangirise du oni nani nga ka raka nyeanye kindi auru kpotosende watadu ka ga ku ngbangbaturũ yo, Yekova rengbe arengba ka fu “bakere tandu susi” tipa oni ruho ka kakuti gaoni ruru mangapai fuko na ki gbia mosoro ho. (2 Kor. 4:7) Oni nika gbiatironi agbia na asogote wa oni kaa tungusa gu wene pangbanga nga ga Kindo dedede. Ono oni tingidi gupai nga, “ka i agbarasa rimoroni mbiko rimo Kristo, airamaku nga oni; mbiko gu toro nga ga taarimo nasunga ku ri roni, nga ga Mbori Ziazia Toro.”​—1 Pet. 4:14.

18, 19. Wai rengbe Yekova ka undo roni na gako ziazia toro, na gaoni diaberã nga gine?

¹⁸ Ziazia toro nga ga Mbori gamunihe fu agu aboro nagbataha. Anga si rengbe ka kiiso kina gaoni inohe sa te ono si nakiiso gu nyemupai a du oni nani tipa ka mangasunge fuko. “Mbori nga gu ko namanga pai rogo roni yo, sa ida pai na manga ha mbiko wene sangbako.” Gu bawene gamunihe nga ziazia toro kodihe na gaani bakere asadatise tipa ka ‘zada gu fugo nga ga unga totoroto,’ si nika sarani ‘ani mangi pa gaani bata tigaani nigunde na kio.’​—Frp. 2:12, 13, 16, NW.

¹⁹ Oni kido kuti ga Mbori toro na ngbaduroniyo dunduko, oni mangi agu asunge fu yó ho furoni na ngbaduroniyo dunduko, oni mangi ome tipa kadu na inohe rogo gu sunge fu yó ho furoni oni mangihe, na ki ngere koyo du Yekova ni tipa ko undo roni. (Yak. 1:5) Ko nika fu gu he afu furoni oni aidaha tipa ka giarogo Fugoko yo, ka hi akpakarapai, na ka tungusa wene pangbanga. Ziazia Kekeapai nayaa: “Oni sána he tipa he, i ki fu he fu roni; oni gbáta he, oni ki bi he; oni ngóka ngbadimo, i ki uru he fu roni,” gipai re nakoda pa gbia ziazia toro a. (Rk. 11:9, 13) Nirengo, oni kakuti kpara fu Yekova tipa wa ka oni du wa gu ruru amoyambu nadumbata na aguyo du ti gi gaani regbo re ga Mbori toro angbe fuyo kumbatayo.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• A wa si adu tipa Maria, gini ngbatunga bipai si aida ani du nani nga gu rengbe ka ye na amaku furani?

• Rogo gini gene ga Mbori toro angbembatayo fu Pauro?

• Wai ga Mbori toro angbembatayo areme fu gako amoyambu?

[Gu sura du ti kpewaraga 26]

Ga Mbori toro aundo Pauro ko dibe gu ome nangia ga gbegberẽ atoro

[Gu sura du ti kpewaraga 28]

Areme, ziazia toro naundo aKristano wa vura du yó na amaabangirise nibakiakia