Yesu Kristo Sangbana Gako Pangbanga

“Gu bakerepai ani aino ti ni nga iratatamana aima kura Kaparanauma yo nga, sangbako nazio ngbadu aboro yo kindi na kini aria gayó aberã.”a​—AUTHOR GREGG EASTERBROOK.

GUPAI boro apehe si na ome ti ni. Wene fugo tatamana rengbe ka fõngbadu boro yo, ka fu maabangirise, na ki aria ga boro raka. Boro ho gani fugo adu na ome ki susi ga Yesu te. Gu kumba nagi gu ga Yesu tungusapai nadu rii bagangara yo akepai kusa ki yaa: “Ho Yesu anyasi agi apai ni re, gako yugopai airiwo ti arimbasa.”—Matayo 7:28.

Zavura areme, agu apai Yesu apehe nigupai aboro rogo zegino dunduko naima rugatiyo nani. Ani wisigingo bete agu apai Yesu apehe du na rogoyo ti ni kpaima.

“Ka oni ata ra nga fu Mbori nira fu ũzegino a te.”​—Matayo 6:24.

“Agu apai dunduko oni akpi nyemu aboro nimangi he fu roni, oni nimángi kina ha fu yo a.”​—Matayo 7:12.

“Agu ahe nga ga Kaisara tie, oni nifú kina ha fu Kaisara; agu ahe nga ga Mbori oni nifú kina ha fu Mbori.”​—Matayo 22:21.

“Gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi.”—Amokedi 20:35, NW.

Yesu amangi dungu apai susi gu gbua nga ka gumba agu apai ka bangiri aboro agonga ti ni ya. Gu pangbanga ko atungusihe aduna ome bambiko si ayugu rengo tipa Mbori, ki sa aboro i du naa kido rogo raka yo, na ki pe pa gu ziga du tipa ga aboro arungo, nga ga Mbori Kindo. Wa ani ka wisigo gipai re rogo agu akpewaraga ngbe fuo gere, ani ka ino ndu gupai sangba Yesu azio “ngbadu aboro yo [ti ni] kindi na kini aria gayó aberã.”

[Gu rukutu kekeapai du bandu kpewaraga yo]