Gupai Si Aida Ti Ni Oni Ini Rengo Tipa Edene

ZIREE sa kura abawirikipai naagumbaha tipa gu pangbanga du tipa Edene nga, kura apapara Ziazia Kekeapai agumbanga paha te. Nikpiapai, Bakere Bayugu Pambori nga Paul Morris akepai ki yaa: “I agumbanga pa ati Edene berewe rogo Ziazia Kekeapai fuo kinagu du rogo Bambata Pai te.” Kura aboro nabi tiyo nga i nga abainipai rengbe arengba ka ida kuti gako pai, ono tie, ziree du ko agumbaha re.

Ziazia Kekeapai ima fura bara dunguhe tipa ati Edene, tipa Adamu, tipa Eva, na tipa gu woo nafura fu Eva.a Ono anga kina kungbo abawirikipai sa natikango gipai re te, ono zavura abarumbatayo nga ga apambori yo a. Ho agi aboro re atikango ni wa gure, gure nga i natikango na sangba Ziazia Kekeapai. Wai duhe wo?

Pa ruga ani tirani na gupai namangi Edene yo naundo rani ani rugutirani na gu kura yangara papara Ziazia Kekeapai naabaha. Nikpiapai, i ake Fugo Mbori si undo rani ani gbia akaragapai kuti gu nyanyakipa asanahe nake rii aboro yo. Ziazia Kekeapai nakaragapai bara dunguhe kuti agu asanahe re, nga agu akaragapai nandu na kina gupai namangi ati Edene yo. Oni bingo bete agi asanahe re.

● Tipagine ani agbinza ti ni kini kpiki? Ka aAdamu na Eva anye niruruyo fu Mbori, ka i araki nyeanye kindi. Si adu nga kina gu ka i samungu, si ka i kpiki ti ni. Nigu uru i asamungu, kpotoyo atona ka kpi nibasa. (Bambata Pai 2:16, 17; 3:19) I aadunga berewe nirengberengbeyo te, na i avungu agude ami kidu na kina zangarengba gbiati ingapai. Si du Ziazia Kekeapai aya ti ni wee: “Wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.”​—ARomo 5:12.

● Tipagine Mbori ambu gbegberẽ apai ti ni si nimangi aboro? Ati Edene yo, Satana aya iraziree nga Mbori, na ko naka aka na wene ahe be gako aboro. (Bambata Pai 3:3-5) Gure nga ko ayawee Mbori azoganga rago ngba ruru gene te. Adamu na Eva asiapai ka pekafuo Satana; sidu, gure nga i aka ga Yekova zogarago aka a, kini berẽ gupai nga boro rengbe arengba nitini ka sia gupai duni wenehe na gudu nigbegberẽhe. Yekova amangisunge na gako rurupai gbiati tatamana ki bi gupai nga, gu gene rengbeko ka sara gu ngbanga re ngbaha nga ka mbu gbanga regbo fu aboro i zogo tiyo nitiyo wa i akpinyemuhe. Sangbanaha nga gine? Kina gbegberẽ apai namanga. Gipai re kini yugu gupai nga boro arengbanga ka zoga tini nisani zanga Mbori te.​—Yeremaya 10:23.

● Ga Mbori ringbisapai nga gine tipa kpotosende? Ati Edene yo, Yekova afu rugute fu aAdamu na Eva ki ya i sa kpotosende bibihe ngba angba gbe. Ko aya fuyó i vungu agude ki zugo azugo ki hiisi kpotosende “ki zogo ho,” tipa ka sa rago si du nibawenehe wakina wai duhe ngbangbaturũ yo. (Bambata Pai 1:28) Sidu, ga Mbori ringbisapai tipa kpotosende nga ka saha si du na aboro rogoho nirengberengbeyo, i kidu na kodatise wenengai. Bakere papara Ziazia Kekeapai nagumbapa wai Mbori nika sa aboro i duwo.

● Tipagine Yesu Kristo aye ti ni ku sende no? Gu samungu nangia ga aAdamu na Eva aye na kpio kuriyó, na kurii atitayo dunduko, ono Mbori aima fu maabangirise fu aboro. Ko akedi Wiriko ku sende no ko ye ka fu guhe Ziazia Kekeapai ayambaha nga motumo. (Matayo 20:28) Wai ko afu motumo? Yesu nangia ‘yangara Adamu’; ko aima duna diabese rogo gu bangiriba Adamu ati rogoho. Yesu anye nirengberengbeko ninyeko niruruko fu Yekova. Fuoho, ko afu ungako nimotumo tumorii tipa Yekova rengbe ka mbupai fu aboro ti gayó aingapai na ki gbia gu unga aAdamu na Eva adu nani mbata fu mangayó ingapai. (1 AKorindo 15:22, 45; Yoane 3:16) Mbiko ga Yesu motumo, Yekova nika sa kpotosende asa berewe si du niparadizo wagu ati Edene adu.b

Ga Mbori ringbisapai tipa kpotosende nga kina ndikidipai nika manga amanga. A wa ati Edene angia ndikidi ba auru kpotosende ane, kidu na anyaa rogoho gbiati ndikidi aboro, kinawo kpotosende nikadu barambeda kumbatayo. Ya mo mo araka rogo gu paradizo naye re? Gure nabi kina ro gbe. Mbori nakpinyemu aboro dunduko gbia ngbatunga gu raka re, zavura aguyo namanga gbegberẽ apai awere.​—1 Timoteo 2:3, 4.

Ho Yesu aakpi ni ti ngbunduru ngua, ko afura fu gu bamangi gbegberẽ apai i akengeko patiko. Gu kumba re aima ino nga ko rẽarẽ i imiko. Ono ko aidi ka gbia wasa gbiati maabangirise be Yesu. Yesu aya fuko wai? Yesu aya fuko wee: ‘Ani adú na mo Paradizo yo.’ (Ruka 23:43) Ka si du nga Yesu nakpinyemu gu bamangi gbegberẽ apai re zingi bekpio ki raki paradizo yo, anga kina gu bangisapai re ko aidaha tipa ro te? Wo ko aidaha! Bako naidaha kinawo a! Ka mo aida ka raka paradizo yo, mo asadi tiro nyanyakii ka wirikapai tipa gu Mbori namangi ati Edene.

[Gu rukutu kekeapai du bandu kpewaraga yo]

[Gu sura du ti kpewaraga 10]

Gu Sangba Yekova Nakpamia Apapara Ziazia Kekeapai Sa

“Mi amáa sogote dagba roni na de, dagba atitaro na atitari a; ko ki mburu riro, mo ki mburu gidako.”​—Bambata Pai 3:15.

Gure nga gu bambatapai Yekova agumbaha tipa kumbatayo ati Edene yo. Da nga agi ariko aboro du biama re, nga: dee, atita dee, woo, na atita woo? Wai gu “sogote” i agumbapaha re adu?

WOO

Satana Bakitingbanga.​—Yugoti 12:9.

DEE

Gu ga Yekova riigbu du ngbangbaturũ yo na amaraika rogoho. (AGaratio 4:26, 27) Yesaya afura tipa “irazangada” ki yawee ri nika vunga gu rikaaboro nga ga toro yo.​—Yesaya 54:1; 66:8.

ATITA WOO

Agu aboro nadiaberã kaa manga gupai Satana akpinyemuhe.​—Yoane 8:44.

ATITA DEE

Bambata tita dee nga Yesu Kristo, naye rogo gu ga Yekova papara riigbu du ngbangbaturũ yo. Gu kura ‘atita dee’ nga agu awirina Kristo du nimbedimbediyo nitoro na kidu tipa zogarago naako ngbangbaturũ yo. Gu mbedimbedi aKristano re nakusa gu rikaaboro nga “ga Mbori Yisaraere.”​—AGaratio 3:16, 29; 6:16; Bambata Pai 22:18.

MBURA GIDASE

Si nga gu imo Yesu i aimiko. Satana aimiko ono ko ki ima zingabekpio, si kidu gbua wa mbura gida Yesu naadu.

MBURA RISE

Imo Satana. Yesu nika imo Satana nyeanye kindi. Zavura mbata fu gure, Yesu nika nyasariipa gu gbegberẽ apai dunduko Satana atonaha Edene yo.​—1 Yoane 3:8; Yugoti 20:10.

Tipa ka ino gu banguapai du rogo Ziazia Kekeapai wenengai, oni bi gu burosua nga The Bible​—What Is Its Message? ADezire Yekova nakusihe.

[Gu sura du ti kpewaraga 11]

Adamu na Eva agbia kereapai mbiko gayó ingapai