Oni Mbedi Na Mbori

‘Ani Naida ka Karagatirani Fuoro’

Ya mo mo airisingo Yekova mbataano? Ya mo mo naberã pa irisoko berewe, ono kini baki kina bangiro singia ko rengbe ka dia ro kugume berewe? Ani nahõpai bero nga mo gedi gi kekeapai re wenengai. I akehe nzunzu tipa kina ro.

DEE sa nga guri nambu iriso Yekova na ki tona kaa manga agu apai naadu kia ti agu asino aKristano i asonosi ri kutini agumba gupai nga: “Mi akpari fu Yekova tipa ko di re kugume berewe na ki mbupai fere tipa wai mi aingipai kuti ko.” Ya mo nunga ri namanga ro? Ya mo mo asananga tiro nga: ‘Gini bipai du Mbori nani tipa agu aboro naima irisoko mbataano ono ki mbu irisoko? Ya mo ko natingidapa yó? Ya mo ko naida i “karaga” tiyo fuoko?’ Tipa ka gbia akaragapai kuti agu asanahe re, ani wisigingo gupai Yeremaya akehe. Zanga kapa, agu akaragapai du yo nika fu wasa afu ku kpotoro yo.—Oni gedi Yeremaya 31:18-20.

Mo makianga afugo Yeremaya tipa gipai re. Rogo gu garã nangia 740 M.B.K., dungu agarã mbata fu rago Yeremaya, Yekova ambu gu kindo nangia ga aYisaraere naadu na angbatunga bawe aAsuro zi yó.a Mbori ambu gipai re si mangi yó mbiko gupai nga i atona kaa manga kere ingapai zanga degatuyo kuti agu azahe ga Mbori anebi aafuhe fuyo. (2 Abakindo 17:5-18) Ya mo agi aboro re aˈaria berãyo mbiko gu rungo i agbiatiyo nani rogo gu ringara i aga naayo kurogoho ni akanga naadu tuturũu ti gayo ringara re? Ya mo bangiri Yekova ago tiyo? Ya mo ka i akaraga tiyo fuoko, ka ko adi yó kugume?

“Mi Asa Gi Berã”

Rogo gu ringara i adu rogoho ni akanga re, i aye ka inopa gayo ingapai na ki saberã. Yekova aima bi gu gayo ndikidi saberã re. Mo bingo wai Yekova afura tipa agu aYisaraere re. Rogo Yeremaya, i nayambayo na gu rimo nga Efuraima.

Yekova ayaa: “Mi gi pa Efuraima ko nikpari.” (Veresi 18) Yekova aima gia kpe aYisaraere i nikpari be sangbana gayo ingapai. I adu wakina ngbuongbuo gude nga guru nawo ti riru mbiko gu rungo u agbia tiru nani mbiko gupai nga u aima guari kporo na kini berẽpa gu wene raka u anaarakaha kporo yo. (Ruka 15:11-17) Ginipai agu aboro re aagumbaha?

“Mo arugu re . . . wa gu wiri bagara i aruga nga pai fu ru ya.” (Veresi 18) I aima ruga tiyo na gupai nga si arẽarẽ Yekova rugu yó, bambiko i adu wakina gu bagara i aruganga ru ya. Gi ringbisapai kuti bagara re nayugo gupai nga i adu wakina gu zingizingi bagara i avo ru na gire, nga guru kaa dunga rogo gire ya ka si nidu nga u azinganga te.

“Mo káraga re berewe ya mi karaga tire, bambiko mo nga Yekova nga gi Mbori.” (Veresi 18) I aumbasi pa tiyo na ki sana Mbori tipa undo. I aima rimiso tiyo gbe kurogo ingapai yo, ono tie, i akparadi tiyo fu Yekova tipa ko undo yó i karagatiyo berewe fuoko.

“Mi asa gi berã; . . . Mi adu ni zee, mi ki du mumungo.” (Veresi 19) I adu na rungo kpotoyo yo bambiko i amangi ingapai. I aima ida gayo ingahe. Kina boro zee nazi yó be gayo mangaapai.—Ruka 15:18, 19, 21.

Agu aYisaraere re asaberã. I arungo kpotoyo yo nibakerehe, i ki kusi gayo ingaapai fu Mbori, na ki mbu gu gbegberẽ apai i aamangaha. Ya mo gayo saberã azeresi ga Mbori zinga kuti yó? Ya mo ko arengbe ka dia yó berewe kugume?

‘Mi Aínapai Aina fu Ko Nirengo’

Yekova aima kpinyemu aYisaraere. Ko agumba gupai nga: “Mi nga ba fu Yisaraere, Efuraima ki ngia bambata wire.” (Yeremaya 31:9) Gini bagude ka ká ka dia gu wirini kugume naima yugo ndikidi saberã? Oni bingo gu gene ko afura ngbaha fu gako aboro wakina baagude.

“Gu wire nga Efuraima, ngba ko ti re gbe? Ko nga gu wire nga mangure? Bambiko wa mi naazinga kuti ko dedede, mi naberã pako kindi.” (Veresi 20) Nangba agu afugo Mbori ko agumbaha tipa yó re! Wakina gu baagude du na nyemuse ono naru nyanyaki tipa rurupai, Mbori “anaazinga” na awiriko dedede, kini fu zahe fuyo tipa agu ingaapai i anaamangaha. Ho i aká ni ka degatuyo fuko, ko ambuyo i di yó kusayo rogo gayo ringara ki ga naayo kurogo kura ringara nizizi aboro. Wa ko avura fu mbusa fuyo, bangiriko agonga tiyo te. Bangiriko arengbanga ka go tiyo te. Gu baagude du na nyemuse tipa awirini, bangirini agonga tira te. Ono wai gu tie Yekova adu ho ko abi gupai ni nga agu awiriko re aima saberã nzunzu?

“Si du kpotore yo du ni fudifudi he tipa ko; mi aína pai aina fu ko ni rengo, wo poi Yekova.” (Veresi 20) Yekova aima du na bakere nyemuse tipa agu awiriko re gbe. Gayo ndikidi saberã azi ngbaduko yo na ko ki idi i karagatiyo fuoko. Kina wai gu bagude du rogo gu ga Yesu sanza du tipa gu ingiingi paranga adu na nunga tipa wiriko, kina wo a ‘nunga’ yó amangi Yekova na ko ki idi ka dia yó kugume berewe.—Ruka 15:20.

“Yekova Mo Idihe Fere Mi Karagatire Fuoro Berewe!”

Agu afugo du rogo Yeremaya 31:18-20 naundo rani ani inipa ga Yekova nunga gbiati inapai. Bangiri Mbori agonga ti agu aboro naima irisoko mbataano te. Na ka si du nga agu aboro re naida ka karagatiyo berewe fuoko? Mbori “zaza tipa vu aboro.” (Atambuahe 86:5) Ko abasanga pa agu aboro naye fuoko na ndikidi saberã te. (Atambuahe 51:17) Ko na ngbarago ka dia yó kugume berewe.—Ruka 15:22-24.

Gu dee ani nifura tipa ri ti tonatonaha, ri amangi ome tipa ka karaga tiri fuo Yekova, ri andu kurogo gu dungurati nga ga aDezire Yekova naadu rogo gu ba ri adu rogoho. Ti tonatonaha, si aidi ri dibe gu iraira bipai ri adu nani tipa tiri. Sangbari nga: “Mi abi tire nga mi arẽnga Yekova di re berewe kugume te.” Ono abaakumba rogo dungurati angarasi ri na ki undo ri tipa ri nyaki berewe rogo toro yo. Na gu bakere ngbarago ri adu nani, ri agumba gupai nga, “Mi na bakere ngbarago ka bi gupai nga Yekova ima diare kugume berewe!”

Ka si du nga mo aima iriso Yekova mbataano na mo naida ka irisoko berewe, ani nayamba ro mo ndu kurogo gu dungurati nga ga aDezire Yekova du rogo ga dagbarago. Mo tingidi gupai nga Yekova nayugo nunga gbiati inapai fu agu aboro nasaberã na ki gumba gupai fuko nga, “Yekova mo idihe fere mi karagatire fuoro berewe.”

[Footnote]