Gupai gu Ga Gbia Riahe Naadu Taata Ayugoho Furani Tipa gu Bakindo du Ngbangbaturũ Yo

1-2. (a) Ginipai i aini Yesu ti ni nga gu nayugo gupai nga si aima du nga ko nika ida ani naatingida pakpioko ngba taata gene? (b) Gini asino Yesu ani nika sakapai tipaha?

YA MO ka mo sakipai tipa gupai ninaamanga ti regbo Tingidapa Kpio Kristo na agarã dũ? Zanga kapa, badungu rani ima rengba ka tingida agu apai i naamangaha ti regbo Ga Gbia Riahe. Tipagine? Bambiko gu riahe re nidu ni taataha. Ono tie, si nidu na nyanyakipaha. Sidu, ani ima rengba ka sanahe nga, ‘Tipagine du gu riahe re ti ni ni taataha?’

² Ti regbo ga Yesu sunge tungusapai auru kpotosende, i ainiko ni gu boro gani tungusapai adu taata tipa ka giarogoyo. (Mt. 7:28, 29) Wakina gure a, ko apepa taata gene furani ani naatingida pakpioko ngbaha, ono nga gu du na nyanyakipaha. Ani sakingo pai tipa gu Ga Gbia Riahe nidu ti regbo Tingidab Pakpio Yesu gbiati bete agu apai Yesu agumbaha na ki mangihe. Ani nika ye ka rugatirani bakere gbe na pa wai du Yesu na umbasitise, wingbaduse gbiati nyemuse, na ani nika wirika wai a rengbe ani ka wirika gako kpiapai wenengai.

YESU NGA BORO UMBASITISE

3. A wa duhe rogo Matayo 26:26-28, wai du gu riahe Yesu asigiraha ti regbo tingida pakpioko adu taata, na agu ahe ue ko amangisunge na ni aarukuba gine?

³ Yesu asigira tingida pakpioko barabangiri gako ruru amokedi 11. Ko amangisunge na agu ahe nanye ti regbo Pumbo Susiri ki mangi tingida pakpioko ngba taata gene. (Oni gedi Matayo 26:26-28.) Agu ahe nanye ko amangisunge na ni re angia kpakuto zanga agbooro gbiati imekakue. Ko ape gupai fu gako amokedi nga agu ahe ue re aarukuba rengberengbe kpotoko gbiati kureko nga gu ko aandu ka fuhe ni motumo tipa yo. Si aarengbanga ka iriwo ti amokedi nga gi nyanyakipa vovo riahe re adu ni taataha te. Tipagine?

4. Wai du gu rugute Yesu afuhe mbata kusayo fu Marata aundo rani ani rugutirani na ndu gupai Yesu amangisunge ti ni na taata riahe ti regbo tingida pakpioko?

⁴ Oni bingo gupai naamangi adiwi kusayo, ti regbo ga Yesu biata garã kuti sunge tungusapai, ho ko andu ni kua agu abakureako yo nangia—Razaro, Marata, gbiati Maria. Ho ko adu ni yo, ko atona kaa yugopai. Marata adu kinaho, ono ri amoiberã ri naabaha kuti manga bakere riahe tipa gari bakerepa gino. Ho Yesu abi gipai re ni, ko arugu Marata ngba wene gene, ki undo ri ri bi gupai nga si aaidanga kina bakere riahe ti aregbo dũ te. (Rk. 10:40-42) Kusa, ho bete asaa aanye ni koyo kuti kpio Yesu ni motumo, ko amangipai nitiko kuti gu rugute ko afuhe furi re. Ko amangisunge na gu riahe naadu ni taataha tipa ka tingida pakpioko na ni. Ginipai gipai re ayugoho furani tipa Yesu?

5. Ginipai padu Ga Gbia Riahe ni taataha ayugoho furani tipa Yesu, na wai du du gipai re na ngbanya dagbaha na gupai du rogo AFiripoio 2:5-8?

⁵ Yesu adu ni boro umbasitise rogo agu apai yo dũ ko anaamangaha. Sidu, si airiwongo te nga ko ayugu bakere umbasitise rogo gu yangara yuru ko adu ni ungako auru kpotosende. (Mt. 11:29) Ko aima ino gupai nga ko aandu ka fu gu motumo naima kio kisusi amotumo dunduko, na ko aima ino gupai a nga Yekova nika zingisako azingisa ko du rogo nyanyakipa bangiriba ngbangbaturũ yo. Ono wa si avura duwo, ko aakiisongo patiko ni kerehe ni mangako bakere pumbo tipa ka tingida pakpioko te. Kuba gure, ko ape gupai fu gako abawiriki nga i naatingida pako bara sa rogo garãyo ni mangayo sunge na gi taata riahe re. (Yo. 13:15; 1 Kor. 11:23-25) Pa manga Yesu sunge na taata riahe ono nga gu narẽarẽ nayugo gupai nga Yesu aangianga boro rukö te. Ani ima rengba kadu na ngbarago nga umbasitise nga sino sa dagba gu wene asino yo duti gu gaani bakindo du ngbangbaturũ yo.—Oni gedi AFiripoio 2:5-8.

6. Wai du rengbe ani ka wirika ga Yesu umbasitise ho ani agbiatirani ni na fudifudiapai?

⁶ Waigu rengbe ani ka wirika ga Yesu umbasitise? Ni maa ani ga akuarani nyemupai mbatayo fu gaani. (Frp. 2:3, 4) Oni berãnga kusayo ku rogo gu yuru Yesu adu ni ungako auru kpotosende. Yesu aima ino gupai nga ko nika kpi iigirã kpio barambeda; ono wa si avura duwo, ko aabakabangiriko bakere gbe tipa gako ruru amokedi nga aguyo naandu kadu rogo rungo tipa ko barambeda. Sidu, ko aayugopai fuyo, kini ngarasiyo, na kini fu kido fuyo rogo gu yangara yuru naadu mbata fu kpiko. (Yo. 14:25-31) Sidu, Yesu adu na umbasitise kini berãpa gu du wenengai nga ga kura aboro kisusi gako. Nairiwo gu bawene kpiapai ko amoihe furani re!

YESU NGA BORO WINGBADUSE

7. Wai du Yesu ayugu bakere wingbaduse nibasa tingbafuo sigirako Ga Gbia Riahe?

⁷ Nibasa tingbafuo Yesu sigira Ga Gbia Riahe, ko ayugu bakere wingbaduse. Wai du ko ayuguhe? Yesu adi gupai kugume Bako aaidaha tipa ko, wa si avura du vurũ nga ko aima ino gupai nga sangbana manga ko ho wo nika ngia i nika kita ngbanga ko nga ko nga boro gberẽngbayo na i ki imiko. (Mt. 26:65, 66; Rk. 22:41, 42.) Yesu anye ni ruruko rogo apai yo dũ tipa gupai nga ka taasarimo Yekova, ka songoda ga Mbori bakere pagbia, na ka zaka gene fu agu aboro nasa berãyo tipa i raki nyeanye kindi. Ti kina gu bangisa regbo re a, Yesu ambakadi apefuoko tipa gupai i aandu ka gbiatiyo na ni kumbatayo fuo regbo ngbutuko.

8. (a) Ginipai Yesu apehe fu gako ruru amokedi? (b) Wai du ga Yesu abawiriki apekefuo gako kpiapai nga ga wingbaduse rogo agu agarãyo naadu tingbafuo kpiko?

⁸ Yesu ayugu wingbaduse a ni zanga ko maa ko berãko fuo ai gu bakabangirise ko arengbe ka gbiatiko na ni na ni maa ko berãko tipa agu azingo nangia ga gako ruru amokedi. Gu Ga Gbia Riahe naadu ni taataha ko asigiraha tingbafuo do ko Yuda, si adu nga si nika tingida agu aboro nika da ni mbedimbedi apefuoko na pa agu aundo duti gu kure Yesu nauka na ti du ni papara vovo ndiko. (1 Kor. 10:16, 17) Tipa ka undo apefuoko i nye ni ruruyo na kidu na ko ngbangbaturũ yo, ko ape gupai fuyo ko na Bako aaidaha beyo. (Yo. 15:12-15) Yesu aima pepa agu aˈasada a fuo apefuoko i aandu ka gbiatiyo na ni kumbatayo. Fuo gure, ko angarasi yo i pekefuo gako kpiapai ni ya ko fuyo i du na “wingbaduse!” NW. (Yo. 16:1-4a, 33) Fuo dungu agarã kusa, ga Yesu abawiriki aawirika gako kpiapai nga ga futise kindi na kini yugu wingbaduse. Wa si avura du nga i nika rungo arungo, i aaundo tiyo dagbatiyo rogo agu akpakarapai yo i agbiatiyo na ni.—Eb. 10:33, 34.

9. Waigu rengbe ani ka wirika Yesu ni yugo ani wingbaduse?

⁹ Wakina gure areme, ani napeka ga Yesu kpiapai nga ga yugo wingbaduse. Ni kpiapai, si naida ani du na wingbaduse tipa ka undo agu awirinarani i arungosiyo tipa gayo idapase. Ti kura aregbo, i ima rengba ka ba awirinarani ku bambukiso yo gbua zanga nduhe ti ni. Ho gipai re amanga ni, si naida ani mangi ai gupai rengbe ani ka mangaha tipa yo, kodihe na fura ani kubayo. (Frp. 1:14; Eb. 13:19) Gu kura gene rengbe ani ka yugo wingbaduse ngbaha nga ni ndu ani kumbatayo kaa tungusapai kindi na “wingbaduse,” NW. (Amo. 14:3) Wakina Yesu, ani ima diaberã ka tungusa gu pangbanga nga ga Kindo, ka si vura du vurũ nga aboro ima rengba ka soga rani na ki rungosi rani. Ono tie, ti kura aregbo, ani ima rengba ka bi gupai nga ani na wingbaduse te. Ginipai rengbe ani ka mangaha?

10. Ginipai si nika ida ani mangihe rogo agu aposo nika du mbata fu Tingida Pakpio Yesu, na tipagine?

¹⁰ Ani rengbe ka nyakasa gaani wingbaduse ni berã ani pa gu maabangirise ga Yesu motumo tumorii afuhe furani. (Yo. 3:16; Ef. 1:7) Rogo agu aposo nika du mbata fu Tingida Pakpio Kristo, ani nika du na kparakpara momu berani ka kiiso gaani tambuahe tipa motumo tumorii. Ti gu regbo re, mo pekefuo gu geda Ziazia Kekeapai nga ga Tingida Pakpio Yesu, kini mangi kparakpee na kini berẽkurii agu apai namangi ti gu regbo Yesu akpi ti ni. Ho ani nika dunguratirani ni tipa Ga Gbia Riahe, ani nika rugatirani bakere gbe na wai nyakipa gu kpakuto gbiati gu imekakue du tipa Tingida Pakpio Yesu gbiati gu bakerepa motumo kisusi si arukubaha. Ho ani arugatirani ni na pa gupai aYesu na Yekova namangihe furani, na ani ki rugutirani na wai si afu undo furani na gaani aboro, gaani maabangirise tipa kumbatayo nadu ni bakerehe, na ani kidu na nyemu ka hipai na wingbaduse dakuti digido gi zegino re.—Eb. 12:3.

11-12. Da ku ane, ginipai ani nawirikihe?

¹¹ Da ku ane, ani ima wirika gupai nga Ga Gbia Riahe atingidanga rani sa na kina pa motumo tumorii te, ono si natingida rani a na pa gu wene asino Yesu nga umbasitise gbiati wingbaduse. Nairiwo gu tambuahe rengbe ani kadu na ni nga Yesu nandu kindi kumbatayo kaa yugo agi asino re wadu ko ni gaani Gbiamotumo, nga guko nakpara tipa rani! (Eb. 7:24, 25) Tipa ka yugo gaani tambuahe, si naida ani naatingida pakpio Yesu, kina wai ko arugu rani ani naamangaha. (Rk. 22:19, 20) Ani naamanga gipai re rogo gu uru ninaandu sa na gu ramediwi nga Nisana 14, na gu ramediwi re nga nyanyakipa ramediwi kisusi rogo garã yo.

¹² Gu kura sino kinaho berewe naasa Yesu ko kpi tipa rani ani awirika paha ti wai Ga Gbia Riahe adu ni taataha. Aboro aima inoko ti gu sino re ho ko adu ni auru kpotosende. Gini sino du ngaha?

YESU NGA BORO NYEMUSE

13. Waigu Yoane 15:9 gbiati 1 Yoane 4:8-10 asakapa gu nyemuse aYekova na Yesu nayuguhe, na ada nagbia undo ti gayo nyemuse?

¹³ Yesu aima yugokpia ga Yekova bakere nyemuse tipa rani rogo agu apai yo dunduko ko amangihe. (Oni gedi Yoane 15:9; 1 Yoane 4:8-10.) Gu nyakipaha anyaka gbe nga, Yesu afu unga ko tipa rani na kpotokoyo dũ. Singia ani nga mbedimbedi aKristano watadu “kura akandoro,” ani nagbia undo ti gu nyemuse aYekova na Wiriko nayuguhe furani vurube gu motumo tumorii re. (Yo. 10:16; 1 Yo. 2:2) Oni berẽnga pa agu ahe a i naamangasunge na ni ti regbo Tingida Pakpio Yesu; si nayugo gupai ayugo nga Yesu ima kpinyemu gako abawiriki na ko naberãpa yo aberã. Wai du duhe wo?

14. Rogo gini gene Yesu ayugu nyemuse tipa gako abawiriki?

¹⁴ Yesu aima yugo nyemuse tipa gako mbedimbedi abawiriki ni sigira ko Ga Gbia Riahe fuyo ngba taata gene. Wa regbo aasusa, si aaida i naamanga Tingida Pakpio Yesu na agarã dũ, na kini mangihe wo a rogo dungu akpakarapai yo, kodihe na ho du yo ni bambukiso yo. (Yugo. 2:10) Ya mo i agisangba Yesu? Ii, i aima giaha!

15-16. Wai du kura awirinarani adu na rengba ka manga Tingida Pakpio Yesu i ki vura dũ vurũ rogo akpakarapai yo?

¹⁵ Naatona rogo bambata kama agarã da ku awere, ndikidi aKristano ninaamanga ome kindi tipa kaa tingida pakpio Yesu. I naamanga kina gupai teketeke Yesu amangihe ti regbo Ga Gbia Riahe wa rengbe omeyo na ni. Oni bingo agi akpiapai re. Ho Wiriba Harold King adu ni bambukiso yo China yo, ko agbata gene ka manga Tingida Pakpio Yesu. Ko ambakadi gu kpakuto gbiati gu imekakue du tipa Tingida Pakpio Yesu ni gbuko, ni mangako sunge na agu ahe naadu beko. Ko aima geda ramediwi wenengai gbe wa omeko arengbe na ni tipa ka ino uru Tingida Pakpio Yesu. Ho regbo Tingida Pakpio Yesu ada ni, ko abi bia nisako bambukiso yo, ki mangi kparakpee, na ki mangi gumbapai nga ga Ziazia Kekeapai.

¹⁶ Kura kpiapai gere berewe. Badona nga ga awirina ni adee nga aguyo i aziyo ku bataya zizi aboro yo ti regbo gu Ue Vura Nga ga Zegino amoi gayo raka ngbapai yo tipa ka manga Tingida Pakpio Yesu. Ono tie, mbiko gupai nga agu ahe i naamangasunge na ni ti regbo Tingida Pakpio Yesu, si ni taataha, i aima du na rengba ka manga Tingida Pakpio Yesu ni gbuko. I aya: “Ani aru mbembedi na tirani gidigidi pati mbata nga gu ani aba pusi roko riihe na ki moi kpakuto na imekakue riihe. Ani azigi baro dimoyo, bambiko ka ani azigi we karaba (électricité), ka aboro aima ino gupai ani aamangaha. . . . Ani agumbapa gaani akidohe fu Barani bara dunguhe tipa ko undo rani ani mangisunge na omerani dũ ka ziasi rimo Ko.” Nairiwo gu bakere idapase i ayuguhe re! Na nairiwo gu nyemuse Yesu ayuguhe furani re ho ko asigira tingida pakpioko ni ngba gu gene nasaha furani taata ani naatingidaha zavura ho du ani ni rogo akpakarapai!

17. Gini asanahe rengbe ani ka sana tirani na ni?

¹⁷ Wa Tingida Pakpio Yesu ambeda, si naida ani sana tirani na agu asanahe nga: ‘Waigu rengbe mi ka wirika Yesu teketeke gbe rogo yugo nyemuse yo? Ya mo mi naberã gbe tipa agu azingo nga ga agu aboro ani airiso Mbori na yo kisusi wai mi aberã tipa gimi? Ya mo mi naida awirinami du kisusi wai rengbe yo kadu, watadu mi ima rugatire na gayo azangarengba?’ Ani naawirikanga Yesu awirika ti aregbo dũ na kini yugu “nunga” fu akuarani.—1 Pet. 3:8.

ONI MOI AGI APAI ANI NAWIRIKIHE RE KU BERÃRONI YO

18-19. (a) Ginipai rengbe ani kadu na kido tipaha? (b) Ginipai mo nadiberã ka mangaha?

¹⁸ Tingida Pakpio Yesu nika digo adigo, na gu regbo si nika digo ti ni aturongo aturo gbe kumbatayo te. Ho Yesu nika “ye” ni ti regbo bakere gberãngbi, ko nika dungura yangara “gako siasia aboro” ku ngbangbaturũ yo, na fuo gure, Tingida Pakpio Yesu amanganga berewe te.—1 Kor. 11:26; Mt. 24:31.

¹⁹ Zavura ho i nikaa manganga Tingida Pakpio Yesu ni berewe ya, ani ima rengba kadu na gu kido nga ga Mbori aboro nikaa berã aberã kusayo kini tingidipa Ga Gbia Riahe ni gupai nanaayugo pa gu bakerepa umbasitise, wingbaduse, gbiati nyemuse Yesu ayuguhe. Zanga kapa, agu aboro nanaadu pati Tingida Pakpio Yesu nikaa pe paha ape tipa ka undo agu aboro nikaa raka ti gu regbo re. Ono tipa ka gbia undo awere ti gi Ga Gbia Riahe re, si naida ani diberã ka wirika ga Yesu umbasitise, wingbaduse, gbiati nyemuse. Ka ani mangihe wo, ani ima rengba kadu na gu kido nga ani nika gbia gaani mosoro agbia be Yekova.—2 Pet. 1:10, 11.