Gaani Sunge Tungusapai Naida Zerangbaduse
1. Wai du Yekova ayugo gako zerangbaduse fu awiri aboro?
1 Zerangbaduse nga gu nyanyakipa sino Yekova amangapai nani na aboro. (Gate 34:6; Tam. 106:41-45; 2 Pet. 3:9) Ani nabi kpiapai tipa ga Yekova zerangbaduse rogo gu sunge tungusapa Kindo namanga rogo zegino dunduko. Yekova aima digo nimangipai na aboro rogo zerangbaduse tipa agarã wa 2,000, ono wa vura duhe were, ko naye na aboro kindi koyo du ko ni. (Yo. 6:44) Wai rengbe gaani sunge tungusapai ka yugo ga Yekova zerangbaduse?
2. Wai rengbe ani ka yugo zerangbaduse rogo gu gaani dagbarago ani atungusapai rogoho?
2 Tungusapai Nitanga Nani ti Akporo: Ani nawirika ga Yekova zerangbaduse nitungusa ani pai zanga ‘piriga’ rogo gu dagbarago adunga aboro rogoho na nyemu gupai ani atungusaha ya. (Amo. 5:42) Wa ani atungusapai, ani nagbia agu aboro adunga nyemuhe tiyo ya, aguyo kini sawia rani, aguyo kini sogoho. Agi apai re dunduko ani ahihe ahi. (Mk. 13:12, 13) Ani nayugo gaani zerangbaduse nimanga ani bakere ome tipa ka tuda gu tunga rengo ani arũhe. Na zavura ti agu aregbo duhe nikpakarapai ka gbia agu aboro tii kporo ani afura naayo, ani namanga gaani sunge amanga kindi.
3. Tipagine si aida zerangbaduse ti ni ho ani akaraga tirani ni ka bi agu aboro ani atungusipai fuyo na ho ani wisigopai ni na aboro?
3 Gaani Abawiriki Ziazia Kekeapai: Tipa ka ngerafuo gaani aũati, si naida zerangbaduse. Ani ima rengba ka ngerafuoho wenengai, ono ani arengbanga ka saha si sono niipo te. (Yak. 5:7) Teketeke a, sona kumbatayo rogo toro yo namanga tooni tooni wakina gupai du tipa aũati. (Mk. 4:28) Si rengbe kadu nga agu aboro ani awisigo Ziazia Kekeapai naayo, si fuyo nimbumbuhe tipa i mbu agu aida nga ga zire pambori watadu gu mangaapai Ziazia Kekeapai asogaha. Si aidanga ani mangi agu aboro ani awisigo Ziazia Kekeapai naayo ngbaome tipa i mangi ariapai rogo gayo raka te. Si naida zerangbaduse na regbo tipa ga Mbori toro undoyo i mangi ariapai rogo gayo raka.—1 Kor. 3:6, 7.
4. Wai rengbe zerangbaduse ka undo rani ani tungusipai wenengai fu agu agumerani adunga na ani rogo gaani pambori ya?
4 Agu Agumerani Adunga na Ani Rogo Gaani Pambori Ya: Wa vura duhe nga ani na kakaka nyemu gupai nga agu agumerani adunga na ani rogo gaani pambori ya wiriki rengo, ani nasungo na zerangbaduse ka pido wene regbo ka yugoho fuyo. Ani agumbanga apai fuyo susi omeyo te. (Batu. 3:1, 7) Ono wa ani kaa sungudo wene regbo tipa yó, ani mbu gaani wene sino mangapai si naayugo gu rengo du tipa rani, na ani kini fura fu aboro tipa gaani idapase ngba zezeredi gene na niirisa. (1 Pet. 3:1, 15) Nirengo, gu sunge tungusapai ani amangaha na zerangbaduse naye na wene sangbanaha na si nafu ngbarago fu gu Barani du ngbangbaturũ yo.