Oni Wirikipai ti gu Hipai Nga ga Yekova na Yesu
“Oni ki ini he ya gu hipai nga ga gaani Gbia si nga gene bata.”—2 PET. 3:15.
GAONI KARAGAPAI NGA GINE?
Wai gu Yekova nayugu nani nga ko nahipai ahi?
Tipagine si aidi Yesu hipai ti ni tipa gbanga regbo?
Gini apai si aida ani mangihe tipa ka nyakasa gaani hipai?
1. Ginipai kura ruru amoyambu abaka bangiriyo nani?
WIRINA sa naahi dungu akpakarapai rogo gari raka yo tipa dungu bawe agarã asanahe ki yaa, “Ya mo mi abi digido zegino mbata fu mi kpi?” Agu aboro irisi Yekova tipa gbanga regbo nabaka bangiriyo na kina gu bangisapai re. Ani nakpinyemu ka bi gu uru Mbori nika sa ahe dunduko nivovoho na ki di agu apai ani agbiatirani nani areme kusayo. (Yugo. 21:5) Wa vura duhe nga dungu nduapai duho berani tipa ka ida kuti gupai nga digido gi ga Satana zegino re ima mbeda kada, si rengbe ka mbu ambu furani ani hipai da ti digidoho.
2. Gini asanahe tipa ga Mbori hipai ani nika wisigopai tipaha?
2 Ono wa vura duhe wo, Ziazia Kekeapai naya ani du na hipai. A wa si adu tipa gu ga Mbori amoyambu nadumbata, ka ani du na nyanyaki idapase gbiati hipai, ani gbia guhe agbia Mbori nakido rani tipaha ho ko ka digiso gako akidohe ni. (Oni gedi AEbere 6:11, 12.) Yekova nitiko aima digo nihipai. Ka ko aima nyasa riipa gbegberẽ apai bakuru yo, ono ko napido gu regbo du niwenehe. (Rom. 9:20-24) Tipagine ko ahipai ti ni? Wai du Yesu nigu kpia hipai nga ga Mbori? Gini amaku ani nika gbiaha ka ani du na gu hipai nga ga Mbori? Karagapai kuti agi asanahe re rengbe ka undo rani ani sonosi hipai gbiati nyanyaki idapase ka si vura du vurũ nga ani nabihe nga Yekova naima aima.
TIPAGINE YEKOVA AHIPAI TI NI?
3, 4. (a) Tipagine Yekova ahipai ti ni nigbangaha tipa ka digiso gako ringbisapai tipa kpotosende? (b) Ginipai Yekova amangihe tipa gu samungu naadu Edene yo?
3 Yekova na kina wene ndupai beko tipa ka hipai. Kina rengo du nga ko aima du na bakere pagbia kurii zegino ti aregbo dunduko; ono wa vura duhe wo, gu samungu naadu Edene yo akusi asanahe tipa gu bakere pagbia du ko nani. Yekova na hipai mbiko ko aima inoho nga si aida na bakere regbo tipa ka karagapai wenengai kuti agu asanahe re. Wa duhe nga ko ima du na inohe wenengai tipa agu aboro du ngbangbaturũ yo na aguyo du auru kpotosende, gupai ko amangaha, si tipa kina gaani niwenepai.—Eb. 4:13.
4 Ga Yekova ringbisipai adu nga atita Adamu na Eva hiisi kpotosende. Ho Satana anangi aEva ni na Adamu i basasangba Mbori, ko aambunga pa gako ringbisapai te. Ko aamanganga mbangirimbangiri, ka diaberã niipo watadu ka zinga ki gindigo wiri aboro te. Kuba gure, ko adi berã tipa gupai ko nika mangaha ka digiso gako ringbisapai tipa aboro gbiati kpotosende. (Yes. 55:11) Tipa Yekova digisi gako ringbisapai na ki di gbarasarimo kusayo ti gako bakere pagbia, ko ima mangasunge na bakere zatise na hipai, na ki sungu tipa kutu agarã tipa gu kura apapara gako ringbisapai digisitihe gba wene gene.
5. Gini wenepai du ti ga Yekova hipai?
5 Gu kura ndupai naasa Yekova ko hipai nigbangaha nga ko naida dungu aboro gbia nyenye unga. Wa du regbo re, ko nambakada tiko tipa ka batasa “bakere rimbasa aboro.” (Yugo. 7:9, 14; 14:6) Yekova nayamba aboro vurube gaani sunge tungusapai tipa i ye ka wirikapai tipa gako Kindo gbiati gako ruru arugute. Gu pangbanga nga ga Kindo nga “wene pangbanga” fu aboro. (Mt. 24:14) Agu aboro dunduko Yekova aye naayo nibasasa, i nada ni papara gu gako dungurati du rogo zegino dunduko du agu aboro rogoho nakpinyemu rurupai. (Yo. 6:44-47) Gu barani nga boro nyemuse re naundo ngbatunga agu aboro re tipa wa ka ko idi na gayo pai. Ko aima digo nisiaka gu kura aboro tipa i du nigu aboro nika du rogo gako zogarago du ngbangbaturũ yo. Fuo da yó ngbangbaturũ yo, i nika mangasunge tipa ka sa aboro gisangba i da nirengberengbeyo na kini raki nyeanye kindi. Nirengo, wa vura duhe nga Yekova nahipai, ko namanga ome tipa ka digiso gako ringbisapai na gi gako ringbisapai re tipa gaani wenepai.
6. (a) Rogo gini gene Yekova ahipai ngbaha ti rago Noa? (b) Wai Yekova ahipai ti gi gaani regbo re?
6 Yekova nahipai ahi zavura ho aboro aimisa ngbaduko ni vurũ, ani rengbe ka bi gipai re ti wai ko amangipai na gu gbegberẽ aboro naadu ti regbo Ime Akangbii. Zegino aima hi be wasiro gbiati zuũ na ngbadu Yekova ki “niimi aima” mbiko gu gbegberẽ mangapai nga ga aboro. (Bam. P. 6:2-8) Ko arengbanga ka hi gupai re ahi kindi te, si du ko adiberã ti ni ka ye na ime akangbii kurii agu abasasangba re. Baraho “ga Mbori hipai aima ni rago Noa,” ko amangi mbakadapai tipa ka batasa Noa na gako aborokporo. (1 Pet. 3:20) Ho regbo ada ni be Yekova, ko atingidi Noa naapa gako diaberã na ki fu sunge fuko nga ko mbakadi kurungba. (Bam. P. 6:14-22) Kurigure, Noa angia “batungusi rurupai” kini fura fu gako amurakporo tipa gu gberãngbi naaye ka manga. (2 Pet. 2:5) Yesu ape gupai nga, gu regbo ani araka ti ni, si wakina ga Noa. Yekova ima diaberã tipa gu regbo ko nika gbarasa gi gbegberẽ zagino re ti ni kusayo. Boro ho ini “gu uru na gu saa” gupai re ka manga ti ni te. (Mt. 24:36) Ti gi gaani regbo re, Mbori fu sunge furani nga ani za aboro na kini pepa wai fuyo rengbeyo ka bata.
7. Ya mo Yekova naima aima tipa ka digiso gako ringbisapai? Oni sakinga rogoyo.
7 Nirengo, ga Yekova hipai ayugongo gupai gbua nga ko sungu ka pido regbo si susi te. Oó, si aidanga ani vundu pa gako hipai na pa bi apai taata te! Nirengo, si ima rengba ka kpakara furani ani moi gipai re kurirani yo ho ani agbiatirani na akpakarapai watadu ho ani nagbinza ni mbiko gi gbegberẽ zegino re. Gberarago ima rengba ka zio rani watadu ka sarani ani berẽhe nga Yekova naima aima, ko adigisongo gako akidohe niipo te. (Eb. 10:36) Ka bangirani gonga ti gupai nga wene ndupai kina be Yekova tipa ka hipai ya, na ko na mangasunge na gu regbo re tipa ka undo gako ruru amoyambu. (2 Pet. 2:3; 3:9) Oni kparianga wai Yesu adu na gu hipai nga ga Mbori.
GU GENE DU YESU NGBAHA NIWENE KPIAPAI NGA GA HIPAI
8. Gini ngbatunga apai Yesu ahipai rogoho?
8 Yesu namanga gupai Mbori akpinyemuhe na ko aima digo nimangihe wo tipa dungu akutu agarã. Ho Satana asamungu ni, Yekova adiberã nga bangisa wiriko nika ye ku auru kpotosende ane ni Masiya. Oni berẽnga kina pa wai Yesu atona ka hipai tipa akutu agarã daho gu regbo re ada ni. (Oni gedi AGaratio 4:4.) Vuru gu regbo re dunduko, ko asungongo asungo gbua kaa ngera te, ko aamanga gu sunge Bako afuhe fuko. Ho ko aye ni niyangaraha ku auru kpotosende ane, ko aima inoho nga Satana nika imoko aimo, a wa ani anebi apehe. (Bam. P. 3:15; Mt. 16:21) Ko afutiko ka manga gupai Mbori akpinyemuhe, wa si avura du vurũ nga ko nika kpi iigira kpio. Ko adu niruruko kisusi aboro dunduko. Ko aberãnga kina patiko na gu bangiriba du ko rogoho te, ani rengbe arengba ka gbia undo ti gi gako kpiapai re.—Eb. 5:8, 9.
9, 10. (a) Ginipai Yesu adigi nimangihe wa ko asungu kaa pido Yekova ko mangipai? (b) Wai si aida ani nibi ga Yekova regbo mangapai?
9 Fuo zinga Yesu bekpio, Yekova afu pagbia fuko ngbangbaturũ yo na auru kpotosende. (Mt. 28:18) Ko namangasunge na gu pagbia re tipa ka digiso ga Yekova ringbisapai ringbisihe kina kuti ga Yekova regbo mangapai. Yesu asungu ku kumba bee Mbori yo tipa gbanga regbo daho Mbori amoi avurako ni nigbada nduko rogo gu garã nangia 1914. (Tam. 110:1, 2; Eb. 10:12, 13) Barambeda kumbatayo, ko nika gbarasa gi ga Satana zegino re kusayo. Wa du rago tie re, Yesu namangapai na aboro rogo hipai na kini nungusiyo koyo du “aime unga ni.”—Yugo. 7:17.
10 Ya mo oni bi gu kpiapai nga ga Yesu nibi wai si aida oni nibi ga Yekova regbo mangapai? Yesu adu na nyemu ka manga agu apai dunduko Bako aida ko mangihe; ono wa si avura duwo, ko asungu ka pido gu regbo Mbori aida ko mangihe ti ni. A wa ani apido pa gbarasayo gi ga Satana gbegberẽ zegino re, si naida ani du na hipai wakina Mbori, na ki ni pidi ga Mbori arugapai angianga ka mbuhe ho du ani ni na gberarago ya. Ginipai rengbe ani ka mangaha tipa kadu na ngbatunga gu hipai nga ga Mbori re?
WAI RENGBE ANI KADU NA GU HIPAI NGA GA MBORI TIRANI?
11. (a) Rogo gini gene du wiratise dagba idapase na hipai ngbaha? (b) Tipagine du ani ti ni na nyanyaki ndupai berani tipa kadu na idapase?
11 Mbata fu Yesu ye ku auru kpotosende, anebi gbiati gu kura ruru amoyambu aima maa kpia wai rengbe kpakpa aboro ka hipai. Wiratise aima du dagba gayo idapase na hipai. (Oni gedi Yakoba 5:10, 11.) Ka i aidanga kuti gupai Yekova apehe watadu kadu na idapase kutini ya, ya mo ka i asungu ka hipai tipa ka bi wai agu akidohe re ka digisotihe? Dedede, wo i anaagbiatiyo na agu akpakarapai naʹasada gayo idapase, ono i ki du naa kido kindi nga Mbori nika manga gupai amanga ko nakidohe tipaha. (Eb. 11:13, 35-40) Ani na dungu nduapai berani tipa kadu na nyanyaki idapase mbiko Yesu awere “ni baenge gaani idapase.” (Eb. 12:2) Ko digisi sangbanebi na ki yugu ga Mbori ringbisapai ngba gu gene nasa rani ani du na nyanyaki nduapai berani tipa kadu na idapase.
12. Ginipai si aida ani mangihe tipa ka sonosa gaani idapase?
12 Gini apai rengbe ani ka mangaha tipa ka nyakasa gaani idapase na kini sonosi gaani hipai? Gu banguapai si aida ani mangihe nga ka manga ga Mbori arugute. Nikpiapai, oni berẽnga kurii gu nduapai si aida oni peresipa Kindo ti ni mbata rogo gaoni raka yo. Ya mo oni rengbe ka manga ome tipa ka mangapai kuti agu arugute du rogo Matayo 6:33? Gure rengbe ka sa gupai nga oni di bakere regbo ku gene tungusapai yo watadu ka manga ariapai rogo gaoni gene raka yo. Ka bangironi gonga ti wai Yekova nafu maku kurii gaoni bakere asadatise ya. Si rengbe kadu nga ko sa roni oni gbia vovo boro tipa ka wirika Ziazia Kekeapai na ní watadu ka undo roni oni gbia “gu zereda nga ga Mbori nagasi rugatinapai dunduko.” (Oni gedi AFiripoio 4:7.) A wa oni kaa maa berãroni kuti agu aundo oni agbiaha ti peka oni fuo ga Yekova arugute, si nika saroni oni bi gu hipai du oni nani na kikiipaha.—Tam. 34:8.
13. Wai rengbe ani ka ringbisapa sonosa idapase na hipai?
13 Kpiapai ima rengba ka undo rani ani rugutirani naapa wai rengbe gaani idapase ka sarani ani hipai nibakerehe. Basopobino nasopa bino, ki girisihe, ki rũhe, na ki kehe. Ka gani ahe kuru wenengai, ní nadu na ngbarago tipa ka rũhe berewe rogo gu kura garã. Kina rengo ngaha nga, ní du wa ka ní du na bakere hipai tipa ka ru ka ke agu ahe re, ono gure akanga nani ti rũ gu kura ahe te, watadu ka rũhe rogo gu kura garã naye nibakerehe te. Ní naa kido nga ahe aida aida funi. Teketeke a, ho ani awirikapai ni tipa ga Yekova arugute dedede, kini pekefuoho, na sangbanaha kidu niwenehe, gaani kido kuti Yekova nasona. Wakina gure a, gaani idapase nasona na ki saha furani taata tipa ani sungu ka pido agu amaku ini anihe nga si ayeaye.—Oni gedi Yakoba 5:7, 8.
14, 15. Gini bipai si aida ani du nani tipa gu rungo aboro arungo ho?
14 Gu kura gene rengbe ani ka sonosa hipai ngbaha nga wai si aida ani bi zegino na agu apai du tipa rani. Ani asadi ka bi apai wa gu Yekova abihe. Nikpiapai, ani berẽnga kurii wai ko abi aboro i nirungo. Ko aima du nifudifudiko be gu rungo nga ga aboro; ono wa vura duhe wo, ko aambunga gu gberarago re si zako ti manga wenepai te. Ko akedi bangisa Wiriko tipa ko “gbarasi ga bakitingbanga mangaapai” na ki di gu gbegberẽ apai dunduko Satana aye nani kuti aboro. (1 Yo. 3:8) Gu rengo duho nga, Mbori nika nyasa riipa arungo nyeanye kindi. Teketeke a, kuba gupai nga ani duna bakere bakabangirise tipa gi ga Satana zogarago re watadu ka bihe nga gini regbo si nika digo ti ni, ani moi gaani idapase kuti agu apai ani abingo ho ya nga gu nika nyeanye kindi. Yekova ima diaberã tipa gu regbo ko ka nyasa riipa gbegberẽ apai ti ni na ko nika mangaha kina boro ti regbo.—Yes. 46:13; Nem. 1:9.
15 Rogo gi yangara arago du nikerehe re, ani ima rengba ka gbiatirani na akpakarapai mbiko gaani idapase. Kuba gupai nga ani zingi mbiko gu mangapai nga ga zuũ watadu mbiko gaani boro nakpi, si naida ani diberã tipa ka kido kuti Yekova na ngbaduraniyo dunduko. Si taata furani ani mangi gipai re te mbiko kpakpa aboro nga ani. Si naida ani tingidi gupai Yesu amangi du rogo Matayo 26:39.—Oni gedihe.
16. Ginipai si aida ani ne mangaha vuru gu regbo nye koyo re?
16 Guhe rengbe ka gbarasapa gaani hipai nga gu gbegberẽ bipai nga mi nasungo ka bi gimi nikina bangire. Rogo gupai re nga gine? Ka pepai nimasaku, gu boro adunga naa kido ya, ní rengbe ka tona kaa manga kura gani mbakadapai kia ka si du nga apai amanganga wa gu Yekova nagumbaha nga si nika mangaha te. Ka pehe rogo kura afugo, ní rengbe ka berã nga ‘Mi nasungo ka pido ka bi gimi nika bangire singia boro Yekova nika manga gupai re nirengo.’ Ní ima rengba ka tona ka sa rimoni si wo rogo gi zegino re, ka gbata aũkumuko kuba peresapa ga Mbori Kindo mbatayo, watadu ka kido nga bakere wirikapai nika sa bani si ngba rogo raka yo awere. Ya mo gure ayugongo gupai nga ní zanga idapase te? Oni tingidi gupai nga Pauro azungodi rani ani wiriki gu ruru amoyambu nagbia akidohe be Yekova “mbiko idapase na hipai.” (Eb. 6:12) Yekova ambunga gi gbegberẽ zegino re si nindu andu kindi kumbatayo kisusi gako ringbisapai te. (Abak. 2:3) Wa du regbo re, ka ani naamanganga sunge fu Yekova nikina wiri tooni he mbata fu gu regbo re da ya. Kuba gure, si naida ani naangera angera na kini mangi ome tipa ka tungusa gu wene pangbanga nga mburu gu weneapai nika manga adunga gu wa ha ya.—Rk. 21:36.
GINI AMAKU HIPAI AYE NANI?
17, 18. (a) Gini momu du berani awere wa ani apido ga Mbori uru? (b) Gini amaku ani agbiaha mbiko hi ani pai awere?
17 Singia ani irisi Yekova tipa bete adiwi gbua watadu tipa dunga abawe agarã, gupai ani aidaha nga kaa irisoko airiso nyeanye kindi. Hipai naundo rani ani hipai daho gaani bata ka ye ni, ka apai vura kaa manga rani amanga wai vurũ rogo gi yangara areme re. Yekova nafu momu furani awere tipa ani yugu gaani kido kutiko na ngbaduraniyo dunduko na ani yuguhe nga ani ima kpinyemu ka rungo be gbegberẽ apai tipa rimoko. (1 Pet. 4:13, 14) Mbori nafu rabahe a furani nga gu rengbe ka undo rani ani du na gu hipai si aidaha tipa ani bati.—1 Pet. 5:10.
18 Yesu na pagbia ngbangbaturũ yo na auru kpotosende, na he ho rengbe ka ká naako ti banda rani te, ono kina rani tirani. (Yo. 10:28, 29) Ndupai ho si aida ani gunde ti ni bekpio watadu gupai nika manga kumbatayo te. Agu boro nika hipai dati digidoho i nika bata abata. Si naida ani bandatirani ka zegino nangingo rani na ki sarani ani mbu kido kuti Yekova ya. Kuba gure, si naida ani sonosi gaani idapase na ki nimangisunge na gu regbo Mbori ahipai rogoho re nitatamana.—Mt. 24:13; oni gedi 2 Petero 3:17, 18.
[Pictures on page 21]
Ga Mbori hipai naundo roni oni moiberã roni kuti Kindo wa ka oni gbia amosoro