“Oni Aina Nga Uru He Na gu Saa a Te”

“Oni ngere tie, bambiko oni aina nga uru he na gu saa a te.”—MT. 25:13.

GAONI KARAGAPAI NGA GINE?

Gini bete agene ani agbia undo ngbaha mbiko pa zanga ino ani gu uru watadu gu saa digido rago nika da ti ni?

Wai gu mbedimbedi aKristano angera angera kindi?

Rogo gini agene rengbe ani ka yugo gupai nga ani ima mbakadatirani tipa ye Kristo?

1-3. (a) Gini apai nayugopai tipa agu asanza ue Yesu afura tipaha? (b) Gini asanahe si aida ani karagapai kutini?

ONI makianga gupai nga nyanyakipa boro ya furoni oni gasi ní na tarambiri tipa nyanyakipa bambakada pai nga gu du ní nani. Ono tie, fuo bete aminiti mbata fu oni ndu ka dia ní, oni bi gupai nga benzimi ima mbeda ka nyasa rogo tarambiri. Si naida oni oro niipo ka ngbehe. Mbu roni kina koyo, gu nyanyakipa boro re ima da. Ní ngereke kirikiri zanga bi roni. Gene wa ka ní pidi roni te, ní sana kura boro tipa ní gasi ní. Oni yego ki bi gupai nga ní ima ndu. Ya mo oni dunga na bakabangirise te?

² Awere tie, oni makianga gupai nga oni du nga nyanyakipa boro naida ka mera na oni sia akumba biata tipa i ngerekurii nyanyakipa sunge. Oni gumba agu apai fuyo oni aida i mangihe na i dunduko ima idaha. Ono tie, fuo yego oni kusa, oni ki bi gupai nga aguyo ue gbua mangi gu sunge re. Kurii gure, bangisa ní amanganga ha te, ní nafu kina nduapai. Ono ní aʹasadanga kandara asadiasadihe te. Ya mo rago gberẽnga tironi te?

³ Rogo gu ga Yesu asanza yo du tipa ngasu adee na ataranda, ko amangisunge na kina ngbatunga pai wa gure tipa ka yugo ndu gupai bete mbedimbedi aKristano ti gi yangara arame re nikadu ti ni niruruyo ono ka aguyo adunga wo ya.a (Mt. 25:1-30) Yesu anyakasi gipai re ni ya ko wee: ‘Oni ngere tie, bambiko oni aina nga uru na gu saa,’ i nika gberesa gi ga Satana zegino re ti ni te. (Mt. 25:13) Ani rengbe arengba ka mangasunge na kina gu rugute re areme a. Wai rengbe ani ka gbia undo ti ngera angera kindi a wa Yesu angarasi rani ani mangihe? Ada mbakadi tiyo tipa ka gbia bata? Na ginipai si aida ani mangihe awere tipa kaa ngera angera kindi?

ANI GBIA UNDO TI NGERA ANGERA KINDI

4. Tipagine adunga ha ti ni nga ani ini gu regbo digido zegino nika da ti ni mbata ani kini ru kaa ‘ngera angera kindi’ ya?

⁴ Gu kura mangaapai duwa, mangasunge bambu mangaahe yo, ndu ka bi munganga, watadu ndu nunguro na baasi naida oni banda regbo abanda. Ono tie, tipa agu apai duwa biso we watadu ka batasa aboro ti regbo gberango, si aidanga ani sungu kaa bi kina saa te, si naida ani mangipai niʹipiʹipihe. Ho du apai ni wa gure, si ninyanyakipa pai ani moiberã rani fuo gu sunge si aida ani mangihe angianga ka banda regbo ya. Wa digido gi zegino re ambeda kada, gu sunge nga ka undo aboro i inipai tipa Yekova tipa wa ka i bati nga gu nyanyakipa sunge si aida ani mangihe awere susi gu niidumbata. Tipa ani naangera angera kindi wa aKristano na kini mangi gupai Yekova akpinyemuhe berani, si aidanga ani ini gu regbo aino mbata digido zegino nika da ti ni te. Nirengo, pa zanga ino ani gu uru na gu regbo digido zegino nika da ti ni naundo rani na apai wa kandara bisue.

5. Wai pa zanga ino ani gu uru na gu saa digido zegino nika da ti ni aundo rani ani yugu gupai nzunzu du ngbaduraniyo?

⁵ Bambataha nga, pa zanga ino ani gu regbo digido zegino nika da ti ni nasarani ani yugu boro gupai nzunzu du ngbadurani yo. Nirengo, Yekova irisi rani nimbu ko gene furani ani mangisunge na gaani ranirii ka sia pa kakuti manga rurupai fuko. Wa vura duhe nga ani naida ka bata ti digido gi sino raka nga ga gi zegino re, ani nairiso Yekova bambiko ani nakpinyemu ko, angianga mbiko ani naida ka gbia bata ya. (Oni gedi Atambuahe 37:4.) Ani nagbia ngbarago ho ani amanga gupai ni Mbori akpinyemuhe, na ani ini gupai nga ko nayugopai furani tipa si undo rani. (Yes. 48:17) Nirengo, ga Mbori arugute asusanga omerani te.—1 Yo. 5:3.

6. Ho ani airiso Mbori ni mbiko ani nakpinyemuko, wai du ko abihe na tipagine?

⁶ Uehe nga, pa zanga ino ani gu uru watadu gu saa re nafu momu furani ani fu ngbarago ku kpoto Yekova yo. Ho ani airisoko ni mbiko ani nakpinyemu ko angianga mbiko digido zegino ima mbeda watadu mbiko ani naida mosoro ya, gure nga ani nasongoda Yekova ko yugu vurako nga Satana niʹiraziree. (Eyo. 2:4, 5; oni gedi Asanza 27:11.) Pa ino ani gu imisiri na arungo dunduko Satana aye nani nasarani ani du na ngbarago ka songoda ga Yekova bakere pagbia na ki ká ga Satana gbegberẽ zogarago.

7. Tipagine du pa mbu kura apai ti ni ka mangasunge fu Yekova niwenepai?

⁷ Biataha nga, ho ani amangasunge ni fu Mbori zanga ino gu uru digido zegino nika da ti ni, si nangarasa rani ani mbupa kura gaani apai rogo raka yo ka mangasunge fuko. Zavura agu aboro areme ainongo Mbori ya, i ima ino gupai nga gi zegino re nika digo adigo. Bambiko wa i agunde agunde nga pai ima rengba ka manga ki gberesi gi zegino re kusayo, i nagumba gupai nga, “Ani rí he ki nimbiri he, bambiko gba ani akpí akpi.” (1 Kor. 15:32) Ono tipa rani, ani agundenga te. Ani aidanga ka kpara tirani ka gbata kina gupai ani akpinyemuhe te. (Snz. 18:1) Kuba gure, ani naká fu gaani nyemuapai na kini mangisunge na gaani regbo, omerani, agu ahe du berani tipa kaa tungusa gu wene pangbanga du tipa ga Mbori Kindo fu kura aboro. (Oni gedi Matayo 16:24.) Ani nagbia ngbarago be manga ani sunge fu Mbori, gbe, ho ani aundo aboro ni i ye ka ino ko.

8. Gini kpiapai nga ga Ziazia Kekeapai nayugo gupai si aida ani kido ti ni kuti Yekova na Fugoko?

⁸ Biamaha nga, pa zanga ino ani gu uru watadu gu saa re naundo rani ani kido kuti Yekova na ngbaduraniyo dunduko na ki du na kakaka nyemu manga agu apai du rogo Fugoko yo rogo gaani raka. Bambiko ani nga kpakpa aboro, si furani taata ani kido kuti tirani. Pauro azungodi aKristano dunduko nga: “Gu ni naberã ha ya ni ru, ni bánda tini, ni ka ti.” AYisaraere nga 23,000 Yekova agindigo yó mbata fu Yosua nungusi ga Mbori aboro kurogo Ringara Mokido. Pauro ayaa: ‘Agi apai re adu nikekehe tipa za rani, nga agurani ye digida rago ku auru rani.’—1 Kor. 10:8, 11, 12.

9. Wai aʹasada narengbe ka kpuruwa gaani idapase na ki mbedisi rani na Mbori?

⁹ Bisuehe nga, pa zanga ino ani gu regbo digido rago nika da ti ni naundo rani ani wirikipai ti agu aʹasada ani agbiatirani nani na si kini nyakasi gaani idapase. (Oni gedi Atambuahe 119:71.) Gi yangara arame nga ga gi sino raka re, si ‘nigbegberẽhe.’ (2 Tim. 3:1-5) Badungu agu aboro du rogo gi ga Satana zegino re nasoga rani, sidu, i rengbe ka rungosi rani tipa gaani idapase. (Yo. 15:19; 16:2) Ka ani umbasi tirani na kini gbata ga Mbori rugapai ti regbo aʹasada, si nika kpuruwa gaani idapase. Ka ani mbunga asada si rugusi rani ti iriso Yekova ya. Manga ani he wo nika mbedisa rani na Yekova susi gu rengbe ani ka berãha.—Yak. 1:2-4; 4:8.

10. Ginipai rengbe ka sa gupai nga regbo nindu niʹipo?

¹⁰ Regbo rengbe kaa susa niipo watadu yee. Ho ani amangapai ni zanga bi saa, regbo rengbe ka ndu nikina boro wiri ipo. Wakina gure a, ka si du nga ani fu tirani sa manga gu wene sunge Yekova nafuhe furani, gu uru na gu saa re rengbe ka da ti gu regbo ani aberãnga paha ti ni ya. Nibi gipai re, badungu mbedimbedi aKristano ima maa wene kpiapai furani. Ani bingo gupai namangi ngbutuko tifuo gu regbo Yesu atona zogarago ni Bakindo rogo 1914 na ki bingo wai kura bete mbedimbedi aKristano ambakaditiyo baraho aguyo ambakadanga tiyo ni ya.

MBEDIMBEDI AKRISTANO IMA MBAKADATIYO

11. Tingbafuo 1914, tipagine kura mbedimbedi aKristano aberẽ gupai ti ni nga Gbia naima aima?

¹¹ Ani berãnga berewe kurii gu ga Yesu sanza naadu tipa ngasu adee gbiati ataranda. Ka gu ngasu adee re na agu akanga re aini gu regbo si adu nga badidee watadu gbia naye ti ni, ka ndupai adunga ho i naangera angera kindi te. Ono i ainongo gu regbo re te, si du si aidi i mbakadi tiyo ti ni. Wa si avura du nga mbedimbedi aKristano aima ino gupai tipa dungu agarã nga ariapai nika manga amanga rogo gu garã nangia 1914, i aruganga tiyo nzunzu na gupai naandu ka manga te. Ho apai amanganga ni wa gu i aberãha ya, agu akura yó aberẽ gupai nga Yesu nagbe regbo. Kura wirina sa agumba gupai kusa nga, “bete rani aberẽ gupai nga ani nika ga ku ngbangbaturũ yo rogo gu bambata poso nangia ga Tanvuo 1914.”

12. Wai gu mbedimbedi aKristano ayugu gupai nga i nga ruru kangara moyambu?

¹² Ani berẽnga pa wai si adu nipa gberarago nga i aapido digido rago ono ka si ayengo ya! Gu regbo re adu nikerehe bambiko awirina agbiatiyo na rungosiro nikerehe rogo Bambata Vura Nga ga Zegino. Si nangia gu regbo sunge tungusapai ambedi ka ru ti ni. Ono rogo gu garã nangia 1919, i azingisi yó rame yo berewe! Yesu aye kurogo ga Mbori yekaru nga ga toro ka wisigopa agu aboro dunduko naaya aKristano nga yó. Ono tie, kura aboro ati gu asada re na ki zanga gu gayo momu nga ga manga ga Bakindo ‘sunge’ kindi. (Mt. 25:16) Gipai re adu wa ka i ya i ahiisongo gayo nzeme nga ga toro te, wakina gu ngasu adee nangia aira mungo. Wakina gu iranyomoro kanga re, i aidanga ka mbu pa kura gayo apai tipa ka mangasunge Kindo te. Ono wa vura duhe wo, badungu mbedimbedi aKristano akakuti gayo ruru mangapai nyanyaki na i adu na kakaka nyemu ka mangasunge fu Bairayo zavura ti kpakarakpakara aregbo nga ga vura vurũ.

13. Gini bipai kangara moyambu adu nani tifuo gu garã nangia 1914, na gayo bipai wai areme?

¹³ Tifuo gu garã nangia 1914, Ngbaõbambu Sinziri asaki pa gu berãpai badungu mbedimbedi aKristano adu nani ti gu regbo re. Si agumba gupai nga agu aboro naadu na wene bipai tipa gipai re, si aafunga gberarago fuyo te. Si ayaa: “Ani aaidanga kina gupai ani akpinyemuhe mangi te, sidu, ho ani abi gupai ni nga ani aapido irairapai rogo Tanvuo, 1914, ani adu na ngbarago nga Gbia aʹarianga gupai ko aida ka mangaha tipa si mangi wai ani akpinyemuhe te. Na ani aidanga Ko mangihe wo te.” Gupai gbua i aidaha nga ka rugutiyo na ga Mbori ringbisapai wenengai. Gu mbedimbedi aKristano du areme a nayugo kina gu bangisa sino nga ga umbasitise re na gu nyemupai nga ka manga gupai Mbori akpinyemuhe. I ayanga Mbori du nafura naayo te, ono i diberã ka manga ga Gbia ‘sunge’ auru kpotosende. Awere tie, gu “bakere rimbasa” “kura akandoro” nga agu aKristano du na maabangirise ka raka auru kpotosende ane, i napekafuo gayo kpiapai kaa ngera angera kindi na kidu zaaza tipa manga gupai Gbia akpinyemuhe.—Yugo. 7:9; Yo. 10:16.

ANI MBAKADITIRANI KINI NGERE

14. Tipagine duhe ti ni niwenepai ka manga agu apai ruru kangara moyambu agumbaha?

¹⁴ Mbori sia ruru kangara moyambu i fu riahe nga ga toro fu gako aboro watadu i yugu wai fuyo rengbeyo ka gbia undo rogo Fugoko yo gbiati gako toro. Na bakere rimbasa aboro yugu gupai nga i ima mbakadatiyo ka manga gupai kangara moyambu ayugoho. Si wa ka i ya i nahiiso gayo kambu na nzeme nga ga toro rogo Fugo Mbori yo na gako toro. (Oni gedi Atambuahe 119:130; Yoane 16:13.) Nisangbana gipai re, i rengbe ka mbakadatiyo a tipa digido zegino, ho Kristo nika ye ni. Na i na ome tipa ka nye niruruyo zavura tii kpakaraapai. Nikpiapai, rogo kura bambukiso sa naadu rogo gu bataya nga ga Nazi, awirina adu na Ziazia Kekeapai beyo gbua sa. Sidu, i akpari tipa agu ariahe nga ga toro. Ngbutuko, i agi gupai nga wirina ye kurogo gu bataya re na bete vovo Ngbaõbambu Sinziri nga gu ko aigihe ku rogo gako rakata yo. Kura wirina sa dagba mbedimbedi aKristano nabati nga Ernst Wauer agumba gupai kusa nga: “Yekova aundo rani ngba iiriwo gene tipa ani tingidi nyanyakipa apai rogo gu kekeapai yo re.” Ko ayaa: “Rogo agi aʹuru re, si taata ani gbia agu ariahe nga ga toro, ono ya mo ani nabihe na nyanyakipaha ti aregbo dunduko? Mi naa kido nga Yekova na amaku beko kpaima ko naigihe tipa agu aboro nakido kutiko, nanye niruruyo, na kini rihe ri gako mbisa.”

15, 16. Wai kura arogotise agbia maku mbiko gayo kakaka nyemu mangasunge, na ginipai rengbe oni ka wirikaha ti gipai re?

¹⁵ Gu kura akandoro namanga gu sunge nga ga Gbia nyanyaki, ka songoda awirina Kristo. (Mt. 25:40) I wa gu gbegberẽ iranyomoro kanga Yesu agumbapa ko rogo gako sanza yo te, i na nyemu kafu tiyo ka peresa pa mangasunge Kindo mbatayo rogo gayo raka. Nikpiapai, ho i agumba gupai ni fu aJon na Masako nga i ndu ka tungusapai fu aboro China Kenya yo, i adu na kina wiri ndundu ti tonatonaha. Tifuo i makia agu apai naadu tipa yó na ki mangi kparakpee, i adiberã ka ndu koyo.

¹⁶ Yekova aima fu maku fuyo tipa gayo asadatise. I aya, “sunge tungusapai ima doroma ane.” I atona wirika Ziazia Kekeapai na aboro saba. Badungu wene apai nangbefuo gure. I agbia kurapai kutini ki ya, “Ani natambua Yekova naʹauru dunduko tipa wa ko aye na ani ku ane.” Badungu awirina kinaho du na nyemu ka mangasunge fu Mbori ka si vura du nga digido zegino nika ye ti ai regbo vurũ. Oni berẽnga pa gu kutu aboro nanyasi gu Sukuru Nga ga Girada na ki tona gu sunge nga ga amokedi. Oni rengbe ka wirika badungu apai tipa gu sunge amokedi amangaha rogo gu kekeapai yo nadu rogo gu Ngbaõbambu Sinziri nangia ga Tanvuo 15, 2001 tii gu riipai nayaa: “We Do the Best We Can!” Wa oni kaa geda pa wai mokedi agbia ngbarago be gani sunge rogo raka yo, si naida oni berãpa agu agene rengbe oni ka kiiso gaoni sunge ngbaha fu Mbori, na nisangbanaha, oni ki gbia ngbarago.

ONI A, ONI NAANGERA ANGERA KINDI

17. Wai du pa zanga ino ani gu uru watadu gu saa digido rago nika da ti ni nipa maku furani?

¹⁷ Si tie ziazia nga, pa zanga ino ani boro gu ndikidi uru watadu gu saa digido rago nika da ti ni nga maku furani. Kuba gupai nga ani du na gberarago, ani nambeda na Yekova nga gu Barani nga ga nyemuse ko ho ani amanga gupai ni ko akpinyemuhe. Pa berã ani kurii gu sunge Yesu afuhe furani ani mangihe na pa ne ani agu apai ka gbeberã rani naye na bakere ngbarago furani rogo ga Gbia sunge yo.—Rk. 9:62.

18. Tipagine si aida ani du ti ni niruru rani ti ngba gaani sunge fu Mbori?

¹⁸ Ani nambeda na ga Mbori uru sapangbanga wa pai. Boro ho dagbarani naida ka ba gberarago ti Yekova watadu Yesu te. I fu gu wene momu furani nga ka mangasunge ti gi yangara arame re. Nairiwo wai si aida ani bi gu kido du yó nani koyo du ani ni na kikiipaha!—Oni gedi 1 Timoteo 1:12.

19. Wai rengbe ani ka mbakadatirani tipa digido gi zegino re?

¹⁹ Ka si vura du nga ani na maabangirise ka ga ku ngbangbaturũ yo watadu ka raka auru kpotosende, ani diberã ka nye niruru rani ti ngba gu sunge Mbori nafuhe furani nga ga tungusapai na sa aboro ni abawiriki. Ani ainongo boro gu uru watadu saa ga Yekova uru nika ye ti ni te, na ya mo si naida ani inihe aino nzunzu? Gupai si aidaha nga ani mbakaditirani na kini sungudihe kindi. (Mt. 24:36, 44) Ani naa kido nga ka ani kido kuti Yekova na ki peresipa gako Kindo mbatayo, ani adunga na gberarago te.—Rom. 10:11.

[Footnote]

[Gu sura du ti kpewaraga 26]

Ka apai vura kpakara akpakara wai vurũ, si naida ani gbata gu riahe nga ga toro

[Gu sura du ti kpewaraga 27]

Regbo nasusa niʹipo ho ani amaa berãrani ni kuti manga ga Mbori sunge