Oni Wiriki gu Kpiapai Nga ga Anebi—Yona
1. Gini wene asino Yona adu nani?
1 Ginipai naye ku berãro yo ho mo aberãpa gu nebi ni nangia Yona? Kura aboro rengbe ka berã gupai nga ko angia boro gunde watadu gu boro aberãnga pa ga aboro raka ya. Ono tie, ko angia gu boro nayugu umbasitise na wingbaduse, na ko ambu pa kura gako apai ka manga gu nga ga Mbori. Wai rengbe ani ka wirika ga Yona wene asino?—Yak. 5:10.
2. Wai rengbe ani ka wirika ga Yona umbasitise?
2 Umbasitise: Ti tonatonaha, Yona aandunga kurogo gu ba i akedi ko kurogoho te, ono ko azubo kurogo kura ba kia. Gipai re arengbanga ka kpakara bangirani te bambiko aAsuro angia kere amangi gbegberẽpai, na aboro atona yamba Nineve nga “bakporo kure.” (Nau. 3:1-3) Ono wa si avura duwo, Yekova arugu Yona na ko ki yugu umbasitise ki idi pandu ka manga gu sunge re ho Yekova afuhe ni fuko berewe niuehe. (Snz. 24:32; Yona 3:1-3) Wa si avura du nga ko azubo be gu sunge re ti tonatonaha, ko aima ye ki mangi gupai Yekova akpinyemuhe. (Mt. 21:28-31) Ya mo ani nadiaberã wakina Yona ka tungusa wene pangbanga, zavura ho i aruga rani ni watadu ka i kedi rani ani ndu ka tungusapai rogo gu dagbarago du na kpakaraapai rogoho?
3. Gini ngbatunga apapara gaoni sunge tungusapai si aida oni du na wingbaduse na mbupa kura apai rogoho?
3 Wingbaduse na Mbu Boro pa Kura Gani Apai: Ho Yona aini gupai ni nga gako gbegberẽ diaberã ka ndu ku Tarusisa yo moi ga abasikisi kurungba raka ngbapai, ko aima ida ka kpi tipa i bati. (Yona 1:3, 4, 12) Kusa, ho ko atona gako sunge ni Nineve yo, ko andu ki rimi ku bebere bakporo yo, kini gbata ndikidi gu ba narẽ tipa ka takapande ga Yekova sapangbanga rogoho. Agu amangapai re aangianga ga iragunde te, ono si angia ga ga Mbori ngangara nebi! (Yona 3:3, 4) Na tipa rani areme? Si naida Mbori fu wingbaduse furani tipa ka manga dezirepai zanga gunde ho aboro asoga rani ni. (Amo. 4:29, 31) Si naida boro mbupa kura gani apai ambu tipa kadu na bakere regbo beni tipa sunge tungusapai na ka fu ahe tipa si undo sunge tungusapai.—Amo. 20:24.
4. Tipagine si aida ani di regbo ti ni ka berãkurii gu wene kpiapai ga Yekova anebi amoihe?
4 Ai regbo mo ka ni gedi pangbanga tipa boro sa dagba ga Yekova anebi, mo ni kaa gbia undo agbia ka mo abi tiro rogo agu apai i adu rogoho. Mo sananga tiro nga: ‘Ka si adu nga mi du, ginipai ka mi amangihe? Wai rengbe mi ka wirika gani asino rogo gimi raka?’ (Eb. 6:11, 12) Kekeapai kinaho nikadu kumbatayo rogo Gaani Sunge Nga ga Kindo nga gu nikaa fura tipa kura nyanyakipa apai nga gu rengbe ani ka wirikaha be kura ga Yekova ruru anebi.