Rimo Yekova na Nyanyakipaha fu Yesu

1-2. (a) Ginipai Yesu amangihe rogo gu yuru nadu mbata fu ko kpi? (b) Gini asanahe ani nika sakapai tipaha rogo gi kekeapai re?

NYEMU Rago Biama, rogo Nisani 14, 33 Fuo Batikayo Kristo, Yesu ari riahe na gako amokedi, ko aima ino gupai nga fuoho aturongo te Yuda ki kusi ko, avurako ki rungosi ko, na ki imiko. Sidu, fuo riahe, ko ape dungu afugo ngarasaro fu gako amokedi. Ho regbo ada ni fuyo tipa i guari, Yesu amangi nyanyakipa kparakpee gbe. Ani ima rengba ka geda gi kparakpee re rogo Yoane kapita 17.

² Rogo gi kekeapai re, ani nika bi agu apai rengbe ani ka wirikaha ti gu ga Yesu kparakpee re. Ginipai ko aabaka bangiriko tipaha mbata fu ko kpi? Ginipai paha anyaki fuko ho ko adu ni auru kpotosende ane? Ani sakingo pai tipa akaragapai kuti agi asanahe re.

“MI YUGU RIMORO FU YO”

3. Ginipai Yesu apehe tipa rimo Yekova, na ginipai ko aaida ka pehe? (Yoane 17:6, 26)

³ Yesu ape gupai rogo gako kparakpee yo nga: “Mi yugu rimoro fu yo.” Ani ima ino gupai nga gi pai re adu na nyanyakipaha fu Yesu bambiko ko apehe bara ue. (Oni gedi Yoane 17:6, 26.) Ginipai ko aaida ka pehe? Ya mo si aaida ko sakipai fu gako abawiriki nga rimo Mbori nga Yekova? Ga Yesu abawiriki angia aYudo, sidu, i aima ino gupai nga rimo Mbori nga Yekova. Bange gu rimo re rogo Kuru Ndiko ima mbeda kuti 7,000. Sidu, ho Yesu aya ni “mi yugu rimoro fu yo,” anga gupai ko aaida ka pehe nga ko yugu gupai fuyo nga rimo Mbori nga Yekova te, kuba gure, gupai ko aaida ka pehe nga ko yugu pa gu ngbatunga Mbori fuyo nga Yekova, ko aundo gako abawiriki tipa i ini Yekova wenengai ko dihe na ga Yekova ringbisapai tipa kpotosende na aboro, gupai ko namangihe, gupai ko nika mangaha, na agu asino du tiko. Kina Yesu sa inipai tipa Yekova wenengai.

4-5. (a) Waigu rengbe rimo boro ka da na nyanyaki paha furani? Oni funga kpiapai (b) Rogo gini gene ga Yesu abawiriki aye ka ino rimo Yekova ngbaha?

⁴ Tipa ka yugoho na kpiapai, mo berẽnga gupai nga bakumba gu duho rogo gamo dungurati du rimoko nga David na ko a nga gu munganga ni naagba aboro. Mo ima ino gu wirina re tipa dungu agarã. Ono tie, rogo gu kura uru sa, gamo raka kini du ngbapai na mo kini idi na ga munganga undo. I kini ndu na mo ku rogo gu bambu ngua gu munganga re ni naamangasunge rogoho na gu wirina re kini batasi ungaro. Awere, mo ima kpinyemu gu wirina re kisusi gu nidu mbata na ho mo agia rimoko ni, mo naberãpa gupai ko namangihe foro! David kindi nga gu bakumba mo niima inoko tipa ngbanga regbo, ono awere ko a nga gu munganga nabatasi ungaro.

⁵ Wakina gure a, ga Yesu abawiriki aima ino rimo Yekova. Ono pa gu rimo re aye ka nyaka fuyo ni bakerehe bambiko Yesu aundo yo tipa i ini Yekova wenengai. Tipagine rengbe ani ka pe gupai re ti ni? Bambiko Yesu awiriki Bako rogo agu apai yo dunduko ko aagumbaha na ki ni mangihe. Sidu, ga Yesu amokedi aye ka ino Yekova wenengai ni degayó tuyo kuti gu gene ko ayugupai ngbaha na ni bi yo gu gene ko aamangapai na aboro ngbaha.​—Yo. 14:9; 17:3.

“GU RIMORO FU MO FERE”

6. Ginipai Yesu aaida ka pehe ho ko aya ni Yekova fu rimo Ko fuko? (Yoane 17:11, 12)

⁶ Rogo ga Yesu kparakpee yo, ko akpari tipa gako abawiriki ki ya: ‘Mo aka kuti yo ni gu rimoro fu mo fere.’ (Oni gedi Yoane 17:11, 12.) Ya mo gipai re nayugo gupai nga si naida i naayamba Yesu awere nga Yekova? Oó. Ho Yesu afura ni tipa rimo Yekova, ko aya “gu rimoro.” Sidu, rimo Yekova aadanga ni rimo Yesu te. Ginipai tie Yesu aaida ka pehe ho ko aya ni wẽ i fu rimo Mbori fuko? Ni bambataha, Yesu aarukuba Yekova na kini fura kuba ko. Ko aye ni rimo Bako na ki mangi dungu apai ni gu rimo re. (Yo. 5:43; 10:25) Kurii gure, gu rimo nga Yesu rogo yo nga “Yekova Nga Bata.” Sidu, rogo rimo Yesu yo nakoda rimo Yekova.

7. Tipagine Yesu arengbe ka fura ti ni fu aboro kuba Yekova? Oni funga kpiapai

⁷ Tipa ka rugatirani na ndu gupai Yesu arengbe ti ni ka fura kuba Yekova, ani berẽnga kurii gi kpiapai re. Bazogo ima rengba ka keda boro kubani ni ndu ka fura na kura aboro. Sidu, ho gu boro re afura ni, ni na kina gu bangisa pagbia beni du gu bazogo re na ni. Wakina gure a, Yesu aafura kuba Yekova na kini fura fu aboro ni rimo Ko.​—Mt. 21:9; Rk. 13:35.

8. Tipagine Yekova aya ti ni rimo Ko adu “rogo” Yesu yo zavura mbata fu Yesu ye ku auru kpotosende? (Gate 23:20, 21)

⁸ Baibiri nayamba Yesu nga “Pai” bambiko Yekova amangisunge na ko tipa ko gumba gupai fu amaraika na aboro Yekova aaida i inihe na ki mangihe. (Yo. 1:1-3) Si nawiraha wa, Yesu du nangia gu maraika Yekova akedi ko ho awiri aYisaraere adu ni ngbakungbo yo. Ho Yekova ape gupai ni fu agu aYisaraere re nga i gisangba gu maraika re, Ko aya: “Bambiko rimore du rogo ko yo.”a (Oni gedi Gate 23:20, 21.) Yekova ape gipai re bambiko Yesu aafura kuba Ko na ko nangia gu yangara boro nayugu gupai nga Yekova namanga apai dunduko ni ruruhe na Ko ni ziazia ko.

“BUBA, MO TÁASI RIMORO”

9. Waigu rimo Yekova adu na nyanyakipa ha fu Yesu? Oni sakingo rogoyo.

⁹ A wa ani nasakipai tipaha, zavura mbata fu Yesu ye ku auru kpotosende, rimo Yekova aima du na nyanyakipa ha fuko. Ho ko adu ni auru kpotosende, ko ayuguhe berewe a rogo agu apai yo ko amangihe nga rimo Yekova naadu na nyanyakipa ha fuko! Ho ga Yesu sunge aambeda ka digo ni, ko asana Yekova nga: “Buba, mo táasi rimoro.” Nibasa, Bako akaragapai kuti ni na bakere woro fugo ngbangbaturũ yo nga: “Mi taasi he, mi atáasa ha ataasa berewe a.”​—Yo. 12:28.

10-11. (a) Waigu Yesu ataasi rimo Yekova? (Oni bi sura a.) (b) Tipagine si aaida i ziasi rimo Yekova ti ni?

¹⁰ Yesu aima taasarimo Bako a. Ngba gini gene? Gene sa nga niyugo ko ga Bako wene asino na mangaapai fu kura aboro. Ono ko aima manga kurapai a kia. Si aaida Yesu yugu gupai nga Yekova amangi apai dunduko ni ruruhe na rimo Ko ni ziazia ha. Yesu ayugupa nyaka gipai re ho ko ayugu kpia kparakpee ni fu apefuoko. Ko aya: “Barani du ngbangbaturũ yo, Ani írisi rimoro airisa.”​—Mt. 6:9.

¹¹ Tipagine si aaida i ziasi rimo Yekova ti ni? Bambiko Satana agumba ziree ati Edene yo kuti Yekova Mbori. Satana ape gupai nga Yekova nga iraziree na ko aaká aká na wene apai be aAdamu na Eva. (Bam. P. 3:1-5) Ni mangaha wo, Satana aaida ka pe gupai nga gu gene Yekova amangapai ngbaha arunga te. Mbiko gu ziree Satana apehe tipa Yekova, aboro ima rengba ka berã gupai nga Yekova nga gbegberẽ Mbori. Kusa ti regbo Eyobo, Satana ape gupai nga, agu aboro nairiso Yekova, i nairisoko gbua mbiko agu ahe rengbe yo ka gbiaha beko. Gu iraziree re ape gupai a nga, aboro ima rengba ka mbu iriso Yekova ho i agbiatiyo ni na akpakarapai bambiko i akpingo nyemu Ko nzunzu te. (Eyo. 1:9-11; 2:4) Si aaida aida na regbo tipa ka ino da nangia iraziree, Yekova watadu Satana.

“MI NAZOGA UNGARE”

12. Ginipai Yesu adu na nyemu ka mangaha mbiko gu nyemuse ko adu na ni tipa rimo Yekova?

¹² Mbiko ga Yesu nyemuse tipa Yekova, ko aaida ka manga agu apai dunduko narengbe na omeko tipa ka ziasi rimo Ko. Yesu aya “Mi nazoga ungare.” (Yo. 10:17, 18) Nirengo, ko aima du na nyemu ka kpi tipa rimo Yekova.b Gu bambata rengberengbe aboro ue nangia aAdamu na Eva aima basasangba Yekova na ki pekefuo Satana kuba ko. Ni gupai du kia, Yesu adu na nyemu ka ye ku auru kpotosende na ka yugo gako nyemuse tipa Yekova. Yesu amangi gipai re ni giako sangba Yekova rogo agu apai yo dunduko ko amangihe na ki pehe. (Eb. 4:15; 5:7-10) Ko abanda gako padu ni ruruse rogo gako raka yo naabaha dunduko, daho ko akpi kere iigirã kpio ni ti ngbunduru ngua rungosi. (Eb. 12:2) Ngba gi gene re, ko ayugu gako nyemuse tipa Yekova na tipa Rimoko.

13. Tipagine Yesu angia gu wene boro ti ni narengbe ka yugoho nga Satana nga iraziree? (Oni bi sura a.)

¹³ Agu apai dunduko Yesu amangihe ayugu gupai nga Satana du nga iraziree angianga Yekova ya! (Yo. 8:44) Yesu aima ino Yekova wenengai kisusi ai gu boro naraki. Ka si angia ai pai ho nga gu Satana apehe tipa Yekova angia rengo, ka Yesu aima inopai tipaha. Ono Yesu aima diaberã kaa songodapai kubara rimo Yekova yo. Zavura ho si aangera ni wa Yekova aima mbu Yesu, ko adu na nyemu ka kpi na ki nye ni ruruko kuba gupai nga ka basasangba ko.​—Mt. 27:46.c

“MI . . . NYASI GU SUNGE FU MO FERE MI MANGI HE”

14. Waigu Yekova afu mosoro fu Yesu tipa gako du niruruse?

¹⁴ Rogo gu kparakpee Yesu amangihe rogo gu yuru nadu mbata fu ko kpi, ko aima rengba ka ya: “Mi . . . nyasi gu sunge fu mo fere mi mangi he.” Ko aima du na gu kido nga Yekova nika fu mosoro afu fuko tipa gako du niruruse. (Yo. 17:4, 5) Na si aruaru fu Yesu tipa ko kido kuti Bako. Yekova aaida nga ka mbuko ko nye ku murö yo te. (Amo. 2:23, 24) Ko azingisi Yesu na ki kiisi pako gbe ngbangbaturũ yo. (Frp. 2:8, 9) Niyangaraha, Yesu atona zogarago ni Bakindo ga Mbori Kindo. Ginipai si adu nga gu Kindo re nika mangaha? Gu ue papara gu kpia kparakpee Yesu ayuguhe nape gupai furani nga: “Ga ngbi yé. Ani mángi rogo kpotosende wa mo [nga Yekova] akpi nyemu he, wa du he ngbangbaturũ yo.”​—Mt. 6:10.

15. Ginipai Yesu nika mangaha berewe?

¹⁵ Barambeda kumbatayo, Yesu nika sovura kuti avura Mbori na ki gbarasi gbegberẽ aboro ti regbo Aramegido. (Yugo. 16:14, 16; 19:11-16) Fuo gure ngbutuko, Yesu nika ba Satana ku rogo “gu due zanga mburuhe,” yo ko nika du ni ni zizi ko ni na ka gene adunga beko ko mangi ai pai ya. (Yugo. 20:1-3) Fuoho, Yesu nika zogarago tipa agarã kutu, na ko nika karaga zereda ku auru kpotosende na ki undo aboro tipa i da ni rengberengbe yo. Ko nika zingisa kpikpi aboro be kpio. Ko nika sa kpotosende dunduko ni paradizo. Ga Yekova ringbisapai nika digisotihe!​—Yugo. 21:1-4.

16. Waigu raka nika du tingbafuo ga Yesu Zogarago Tipa Agarã Kutu?

¹⁶ Waigu raka nika du tifuo ga Yesu Zogarago Tipa Agarã Kutu? Gu ingapai na zangarengba du ti aboro nika go kusayo. Si aidanga berewe aboro naasanahe tipa mbupai ti gayo aingapai riimburu motumo tumorii te na i aidanga na azarõ watadu aboromotumo a te. Na gu “yangara vura i nikagbarasa ha nga [ga Adamu] kpio.” Ti gu regbo re, i nika ima zingisa kpikpi aboro be kpio. Aboro dunduko auru kpotosende nika du ni rengberengbe yo.​—1 Kor. 15:25, 26.

17-18. (a) Ginipai nika manga ti digido ga Yesu Zogarago Tipa Agarã Kutu? (b) Ginipai Yesu nika mangaha ho regbo nika da ni fuko ko nyasi zogarago? (1 AKorindo 15:24, 28) (Oni bi sura a.)

¹⁷ Gini kurapai berewe nika manga ti digido ga Yesu Zogarago Tipa Agarã Kutu? Ti gu regbo re, bawene kparakparapai nika manga. Boro ho berewe nika du na kapa singia Yekova ni ziazia ko watadu ko nga Mbori ruru sarangbanga te. Tipagine? Ati Edene yo, Satana ape gupai nga Yekova nga iraziree na ko azoganga aboro rogo nyemuse yo te. Natona ti gu regbo re, agu aboro irisi Yekova ima yugoho berewe na berewe nga gako agene ni bawene he tipa rani. Sidu, ti digido ga Yesu Zogarago Tipa Agarã Kutu, i nika dia gbarasa rimo kusayo ti rimo Yekova dunduko. Ko nika ima yugoho gbaiga nga ko nga gu Barani du ngbangbaturũ yo nga boro nyemuse.

¹⁸ Tifuo digido ga Yesu Zogarago Tipa Agarã Kutu, aboro dunduko nika ino gupai nga agu apai Satana apehe tipa Yekova angia ziree. Ginipai Yesu nika mangaha ho regbo nika da ni fuko ko nyasi zogarago? Ya mo ko nika manga gupai Satana amangihe na ki samungu kuti Yekova? Wagusa te! (Oni gedi 1 AKorindo 15:24, 28.) Yesu nika karaga Kindo berewe fu Bako. Ko nika ra ni goko kutii ga Yekova zogarago. Ii, ni gu boro du kia ti Satana, Yesu na nyemu ka mbu pa apai dunduko mbiko gako nyemuse tipa Yekova.

19. Waigu nyakipa rimo Yekova fu Yesu?

¹⁹ Ngbarani azera nga tie ka bi gupai nga Yekova adu na nyemu ka fu rimo Ko fu Yesu te! Yesu ima yugo wai nzunzu du Bako. Sidu, ginipai rimo Yekova ayugoho fu Yesu? Si ni banyanyaki paha fu Yesu kisusi ai he. Ko adu na nyemu ka kpi tipa gu rimo re, na ko nika du na nyemu ka karaga apai dunduko fu Bako ti digido gako Zogarago Tipa Agarã Kutu. Waigu rengbe ani ka wirika ga Yesu kpiapai? Ani nika sakapai tipa karagapai kuti gu sanahe re rogo gu kekeapai ngbefuo gere.