¿Pu dzú gosaló buny mandary Gobierno xtuny Dios? (Midid chop)

TOIB REPAS DE XPACAʼAL NABUCODONOSOR

Julio: Xitalsa Ernesto, rabaladxi ni cabiʼya looy stoib. Nigolú rioladxi ni rieela guirá xomal par guininéya looy ni ná la Biblia.a ¿Ximod noʼlo?

Ernesto: Labúuga.

Julio: ¡Rabaladxi ni labúuga noʼlo! Nascú biiyno diitz xigony lóodo ni nacdo testigos xtuny Jehová ranido que Gobierno xtuny Dios gosalóni cayony mandaryni desde íz 1914.b Ló capítulo 4 de libro xtuny Daniel ni bisuidyno racnéni lóono guienno láani. ¿Rasetnaladxlo xí lainy la?

Ernesto: Scú, bacaʼal ni gop rey Nabucodonosor.

Julio: Scú láani. Goniʼ xcaʼalbu toib yac nasoʼdii ni bidxin dada lainy guibá. Ló bacaʼal cu, bicadiagbu toib ángel ni goniʼ que naroc yac cu. Nosi loo yac cu biaʼan. De ngú godudy «gatz tiemp» né yac cu goniʼsni stoib.c Láaca ma bisuidyno que profecía reʼ ma góc cumplirni chop buelt. ¿Ximod góc cumplirni primer buelt? ¿Rasetnaladxlo la?

Ernesto: Ni gosaclóo Nabucodonosor, ¿ja? Cuábu yoʼob né goyoʼbu scú gatz íz.

Julio: Scú láani. Cuábu yoʼob né ma diti gócbu rey. Ni rarop buelt ni góc cumplir profecía reʼ gocni órni biroc ló xcalmandary Dios ló Gudxlio reʼ por gatz tiemp. Tiemp gosalóni órni binitló gudx Jerusalén ló íz 607 antes de xtzúno. Dada ízcu ma diti goyoʼ rey ni buny mandary lóo laa Jehová ló Gudxlio. Órni nalox tiemp reʼ, Dios nabú stoib rey per ndeʼ ma ñony mandary dada lainy guibá. Labúu nanino, que órni nalox gatz tiemp nasaló ñony mandary Gobierno xtuny Dios. Ma bisuidyno pú dzú gosaló gatz tiemp reʼ. Nigoreʼ guisuidyno balac gocla gatz tiemp reʼ par ganno xi íz gosaló cayony mandary Gobierno xtuny Dios. ¿Ma cayenienlo lainy la?

Ernesto: Scú, ma casetnaladxi ni gonino nascú.

Julio: Galán. Nigoreʼ guisuidyno balac gocla gatz tiemp reʼ. Naʼ láaca bisudi lainy stoib antes de ñeela par guisetnaladxi láani. Goni rutirigaʼlni par cuéxaya láani looy.

Ernesto: Bay.

RALOX GATZ TIEMP, NÉ RASALÓ DZÚ NI MA GUIDUBYLAGAʼ

Julio: Primer buelt ni góc cumplir xpacaʼal Nabucodonosor, gatz tiemp goclani gatz íz. Per ni rarop buelt ni góc cumplirni, Gobierno xtuny Dios goclani más tiemp.

Ernesto: ¿Né ximod nanlo láani?

Julio: Gatz tiemp reʼ gosalóni ló íz 607 antes de xtzúno, órni binitló gudx Jerusalén. Pal ragabno dada ízcu, gatz íz radxinni íz 600 antes de xtzúno né ló ízcu diti godudy xitcal ni nadzak né Gobierno xtuny Dios. Xomod ma bisuidyno órni bieed Jesús ló Gudxlio xidal íz después, láabu goniʼbu que gatz tiemp reʼ diti ma biloxni.

Ernesto: Scú, ma casetnaladxi lainy.

Julio: Por ngú, labúu guinino que gatz tiemp reʼ diti gocni gatz íz; non gaclani más.

Ernesto: ¿Gaclani más la? ¿Balac tiemp?

Julio: Ló libro xtuny Apocalipsis, noʼ toib profecía ni radzak né ni goniʼ Daniel ni labúu gacné lóono guienno balac gocla gatz tiemp reʼ. Ló profecíacu náni que gatz tiemp gorol radudyni diitz 1260 dzú.d Por ngú gatz tiemp reʼ radudyni diitz, 2520 dzú. ¿Dada reʼ ma cayenienlo lainy la?

Ernesto: Scú, per diti tampa rienna xigony lóoto raniʼto que Gobierno xtuny Dios gosalóni dada ló íz 1914.

Julio: Diti guidudy galrrasaʼ looy, guisuidyno láani stoib. Ló tipnés profecías ni sieed ló la Biblia, ro náni que tipdzú nacni suusi tobiz.e Pal rabiʼno lainy scú, gatz tiemp, ndeʼ radudy diitz 2520 dzú nacni 2520 íz. Pal rasalóno ragabno 2520 íz ló íz 607 antes de xtzúno, íz ni gosaló gatz tiemp, radxinno ló íz 1914.f Por ngú ranido que ló ízcu bilox gatz tiemp né Jesús bidxin góc rey de Gobierno xtuny Dios. Né ló íz 1914 gosaló góc tipnés cós ni goni’la Biblia gac ló dzú ni ma guidubylagaʼ.

Ernesto: ¿Né xí cós góc?

Julio: Ló Mateo 24:7, Jesús goniʼ ni ñac órni nasalóbu ñony mandarybu dada lainy guibá: «Portín gudxrop né gudxrop sadíil né gobierno láaca sacaló saʼ gobierno, né sioʼ galrralán né xo rodann guirá lagary xitzca saʼ». Reʼ rasetlaa, que Jesús goniʼ que ñoʼ galrralán né xo rodann. ¿Diti ngú ni cayac ló Gudxlio desde ízcu la?

Ernesto: Scú, nigolú.

Julio: Jesús láaca goniʼ que sioʼ guerr. Né ló libro xtuny Apocalipsis diti goniʼni que ñacni lainy toibsi gudxrop, xalagary ngú ñacni ló guidopynac Gudxlio.g ¿Rasetnaladxlo pu dzú góc Primera Guerra Mundial la?

Ernesto: Íz 1914. Merpa íz ni raniʼto que gosaló Jesús buny mandary. Diti bitzanló ló xpensari nadzaʼga láani scú.

Julio: Nigolú, órni radudyno cuent ximod radzak profecía ni raniʼ de gatz tiemp né profecía de dzú ni ma guidubylagaʼ, rien buñ lainy. Lóodo ni nacdo testigos xtuny Jehová nandxichdo que ló íz 1914 Jesús ma gosaló cayony mandary né desde ízcu ma nabanyno ló dzú ni ma guidubylagaʼ.

Ernesto: Ma cayenna láani.

Julio: Nigolú. Naʼ láaca gosac nagana ñenna láani órni golexayibu láani naʼ primerdiguieʼ buelt. Per nica ni ma biiyno diitz ma gocnéni looy más, ná ló la Biblia diti ritlaa íz 1914, lóodo ni nacdo testigos xtuny Jehová napdo xiroʼ razón par gonydo crer que Jesús gosaló buny mandary ízcu. Láaca buni rutirigaʼlni naʼ par bisienna looy que guirá ni ronydo crer sieedni ló la Biblia.

Ernesto: Scú, nga ni radziguiaʼya lóoto guirá ór. Looy raquiinlo la Biblia par rabexalo galrranabdiitz ni napa. Nac nitisi galrranabdiitz looy dipa raniʼlo, «Naʼ roni crer» o «Naʼ scú raabi». Guirá ór raquiinlo la Biblia. Per ¿xigony nagan guieen buñ láani? ¿Xigony diti goniʼca Jehová que Jesús nasaló ñony mandary ló íz 1914?

Julio: Galán galrranabdiitzcu, Ernesto. Noʼ xidal cós ni sieed ló la Biblia ni nagan par guieen buñ. ¿Xigony bicaʼ Dios lainy scá? ¿Xigony non gonyno xtem par guienno láani? ¿Nainy looy gooyno diitz de ndeʼ stoib xomal la?

Ernesto: Scú, nainy naʼ. Cuésa looy.