ARTÍCULO DE ESTUDIO 40
Diti guiañ gonyno xchiin Jehová ló dzú ni ma cadubylagaʼ gudxliogoxreʼ
«Colguisagaʼdxich, diti guisian gonyto láani, né guirá ór colgony xchiin Señor» (1 COR. 15:58).
CANCIÓN 58 Voy a buscar a los amigos de la paz
AVANCEa
1. ¿Xigony ronyno crer que ma cadubylagaʼ gudxliogoxreʼ?
PAL LÓONO golno después de íz 1914, guidopynac vida xtunyno cabanyno láani «ló dzú ni ma guidubylagaʼ» (2 Tim. 3:1). Guiráno ma bicadiagno notísy ni goniʼ Jesús gac ló xtzúno: guerr, galrralán, xoʼ rodann galguitz ni ragaity xidalguixo buñ, gacxiroʼ cós mal né xpiin Dios sacaló persecución, né stipnés cós (Mat. 24:3, 7-9, 12; Luc. 21:10-12). Láaca rabiʼno que buñ nac suusi goniʼ apóstol Pablo (bibi’ cuadriyen ni laa, «¿Ximod nac buñ ló naareʼ?»). Lóono ni nacno xpiin Jehová nandxichno que ma rabésno ló «dzú ni ma guidubylagaʼ» (Miq. 4:1).
2. ¿Xí galrranabdiitz guicapyno?
2 Ma godudy xidal íz desde íz 1914, por ngú labúu guinino que ma nabanyno «ló dzú ni ma guidubylagaʼ». Fin xtuny gudxliogox reʼ ma noʼni gaxtiguié, por ngú non guicapyno xchop galrranabdiitz ni rasacgolú: ¿Xí láani gac órni guilox «dzú ni ma guidubylagaʼ»? Né ¿xí ranab Jehová gonyno laʼga yása guidxin dzúcu?
¿XÍ TZAGAC ÓRNI MA CADUBYLAGAʼ GUDXLIOGOXREʼ?
3. Mod ná 1 Tesalonicenses 5:1-3, ¿xí saniʼ buñ?
3 (Bíil 1 Tesalonicenses 5:1-3). Pablo raniʼ de «xtzú Jehová». Diitzreʼ radudyni diitz órni guirá gudxrop guicaló a «Babilonia la Grande» ni nac guirá religión falz ni noʼ ló guidopynac Gudxlio, né raloxni ló Armagedón (Apoc. 16:14, 16; 17:5). Antes de saló «dzúcu», guirá gudxrop saniʼ que ma noʼ «paz né seguridad». Tipnés buñ ni rony mandary lainy tipnés gudxrop rioʼ ór raquiinyibu diitzreʼ órni raniʼyibu ximod guiguaʼyibu sacró né stipnés gudxrop.b Per ni rasetlaa la Biblia diti nacni modreʼ. ¿Xigony? Portín órni guiniʼyibu anunys reʼ, xidal buñ sonyibu crer que buñ ni rony mandary lainy xidal gudxrop ma bunyibu que buñ guiguaʼ más sacró ló Gudxlio. Per órcu saló «gran tribulación» né tiptisi guinitló Jehová guirá buñ mal (Mat. 24:21).
Diti guidudyno lagary que anunys de paz né seguridad guiscú lóono. (Bibiʼ ni ná párrafos 3 a 6).h
4. a) ¿Xí cós diti nanno de «paz né seguridad»? b) ¿Xí ma nanno de láani?
4 Nanno tipnés cós órni guiniʼyibu de «paz né seguridad». Per noʼ cós ni diti nanno xomod xi láani guichiin layibu par guidudyibu anunyscu né ximod gonyibu láani. Nili nanno pal sonyibu láani tipbueltsi o xidal buelt. Nac nitisi mod gonyibu láani, noʼ ni nanno: diti guidudyno lagary guiscúyibu lóono né gonyno crer que buñ ni rony mandary ló xidal gudxrop guitnéyibu paz ló guidopynac Gudxlio. Ndeʼpa anunys ni cabésno guiniʼyibu, ndeʼ radudy diitz que «xtzú rodann Jehová» má yaaca salóni.
5. ¿Ximod racné lóono 1 Tesalonicenses 5:4-6 par tzoʼno puext órni guidxin xtzú Jehová?
5 (Bíil 1 Tesalonicenses 5:4-6). Pablo raiby lóono xi non gonyno par tzoʼno «ló xtzú Jehová». Diti non gaisyno «xomod rony stipnés láani», nanísi guiguaʼno. Por ejemplo, raquiin gapno cuidad diti tzoʼno lad partid, pal ronyno láani cachéno nisló Dios. Pal rioʼno ladyibu labúu ñacno «toibsi né gudxliogoxreʼ» (Juan 15:19). Nanno que nosi Gobierno xtuny Dios sony que tzoʼ paz ló guidopynac Gudxlio.
6. ¿Ximod gacnéno buñ, né xigony?
6 Diti nosi rioʼno naní láaca racnéno stipnés buñ par tzoʼ naní, ndeʼ radudy diitz que gacnéno layibu guienyibu xi ná la Biblia guisaclóo gudxliogoxreʼ. Guisetnaladxno órni saló gran tribulación, ma diti ór par guiyopyibu Jehová. Por ngú raquiin gony predicarno guirá ór.c
TZODIEʼNO GUININO XTIITZ DIOS
Ló predicación, raslooyno buñ que nosi Gobierno xtuny Dios labúu gony que buñ guibany goxtiguie. (Bibiʼ ni ná párrafos 7 a 9).
7. ¿Xí ranab Jehová gonyno nigoreʼ?
7 Ma diti xidzú cayatz par guidxin «xtzú Jehová», por ngú ranabbu lóono tzodieʼno ló xchiimbu. Non gonyno rutirigaʼlni lóono par «tzodieʼno ló xchiin Señor» (1 Cor. 15:58). Órni goniʼ Jesús xi gac ló dzú ni ma guidubylagaʼ bisetlabu xi láani gonyno lóono ni nacno xpiin Dios. Goniʼbu: «Láaca, primer non gac predicar diitz sacró ló guidopynac gudxlio» (Mar. 13:4, 8, 10; Mat. 24:14). Gonyno pensary ló ndeʼ: guirá ór órni rareʼno predicación ronyno que profecía reʼ gac cumplirni.
8. ¿Xí raslooy que caniʼs xcudx Jehová?
8 Cada íz ni radudy, más buñ racadiag de Gobierno xtuny Dios. Guibiʼno ximod ló dzureʼ ni ma guidubylagaʼ ma noʼ más xpiin Jehová ló guidopynac Gudxlio, ni raniʼ de Gobierno xtuny Dios ló dzureʼ ni ma guidubylagaʼ. Ló íz 1914, goyoʼ 5.155 publicadores ló 43 gudxrop. Ló naareʼ nacno midid 8.500.000 publicadores ló 240 gudxrop né territorios. Per xchiinno diti ma biloxni. Non gaibyrano buñ que nosi Gobierno xtuny Dios sabeʼ guirá galnagan ni racaló buñ (Sal. 145:11-13).
9. ¿Xigony diti guisianno de guinino xtiitz Dios?
9 Non guinino de Gobierno xtuny Dios dada órni guiniʼ Jehová que dxiinreʼ ma biloxni. ¿Balaati tiemp nap buñ par labúu guimbuyibu Jehová né Jesucristo? (Juan 17:3). Diti nanno. Laʼga yása saló gran tribulación, guirá buñ ni guiniiny guibany tipzó napbu oportunida de guicadiagyibu diitz sacró (Hech. 13:48). ¿Ximod labúu gacnéno guirá buñreʼ antes de guilox dxiinreʼ?
10. ¿Xí galrracné radudy Jehová lóono par guisuidyno ni nigolú a buñ?
10 Jehová caquiimbu xcudxbu par guidudybu ni caquiinno par guisuidyno galnigolú a guirá buñ. Por ejemplo, guirá xomal rasuidybu lóono ló reunión ni rapno lainy xomal, ro rasuidyno ximod guinino órni tzáguenno buñ primer buelt ni gooyno diitz né layibu, ximod gonyno revisit né ximod guisuidyno buñ ni ná la Biblia. Xcudx Jehová láaca ma bidudy lóono tipnés herramientas ni noʼ ló kit de enseñanza. Ndeʼ labúu gacné lóono modreʼ:
par salóno guininéno buñ,
par guiniiny buñ guisuidy,
par guichiinni layibu guisuidyibu más,
par guisuidyno galnigolú órni guisuidyno buñ ni ná la Biblia né
guiruʼno buñ ni ná gan más par tzoʼ ló página de Internet xtunyno, né tzeebu Salón del Reino.
Diti nosi gapno herramientas reʼ, non guiquiinno láani.d Por ejemplo, pal rooyno diitz galán né toib buñ ni ná gan más né rasianno toib tratad o toib revista láabu, buñreʼ labúu goʼolbu de tema ni goninéno láabu dada órni guibiguetno stoib. Tigaagano napno responsabilidad tzodieʼno guinino xtiitz Dios guirá beʼo.
11. ¿Xigony goyaʼ toib lagary ló Internet par guisuidy buñ la Biblia?
11 Ganno xi stoib mod cayacné Jehová a buñ par guimbu galnigolú. Ló jw.org®, labúu guisuidy buñ ni ná la Biblia por Internet.e ¿Xigony goctzayni? Guirá beʼo, xidal mil buñ ni noʼ ló guidopynac Gudxlio rioʼyibu ló Internet xtunyno par guisuidyibu ni ná la Biblia. Ni noʼ ló sitio de Internet xtunyno labúu gacnéni buñ guimbu galnigolú ni sieed ló la Biblia. Tipnés buñ ni raninéno rioʼ ór diti nainy guisaguelyibu guisuidyno layibu ni ná la Biblia. Pal scú nacni, guislooyno layibu página reʼ o sección reʼ o guixelno toib enlace ló diitz ni rienyibu.
12. ¿Xí labúu guisuidy buñ ló página ni napno ló Internet?
12 Curso reʼ rasetlani ni ná la Biblia né ni Bisaʼ láani, láaca rasetlani de tipnés buñ ni rareʼ loguiaʼ ló la Biblia né mensaj de esperanza ni radudyni lóono. Órni buñ guisuidyibu guirá lesiony reʼ, sasuidyibu guirá ni sieed reʼ:
ximod racné la Biblia lóono,
chú layibu nac Jehová, Jesús né ángeles,
xigony bisaʼ Dios buñgudxlio né
xigony noʼ galrrioʼob né cós mal.
Ló curso reʼ láaca ritlaa temas reʼ:
xi láani sony Jehová par guinitlóbu galrrioʼob né galgoity,
ximod labúu guilísbu buñ ni ma goity né
xi labúu gonybu par labúu tzoʼ Gobierno xtunybu xalagary guirá gobiernos ni diti raquiin.
13. Golexa pal láacani ngú guisuidy buñ por Internet toib né guisuidy buñ né toib herman.
13 Curso reʼ diti rioʼni xalagary curso ni radudyno buñ riolidx. Jesús bidudy lóono toib privilegio par guisuidyno buñ gac xpiimbu. Raniiny lóono que buñ ni ná guisuidy, guisuidyibu ni noʼ ló sitio de Internet xtunyno, guisac par layibu ni guiniiny guisuidyibu más. Pal scú nacni, pentzi guisaguelyibu que toib publicador guisuidy layibu ni ná la Biblia. Ro ralox tigaaga lesiony, raibyni buñcu que labúu guiyopybu toib buñ ni tzáguen láabu par gacné guisuidybu más. Guirá dzú, ló guidopynac Gudxlio né xcalrracné sitio de Internet xtunyno racacuentno midid 230 solicitud de buñ ni ná guisuidy la Biblia. Nigolú rasac que tzoʼ ni guisuidy tigaaga buñreʼ.
GONYNO XTEM GACNÉNO BUÑ GUIDXIN GAC XPIIN JESÚS
14. Mod goniʼ Jesús ló Mateo 28:19, 20, ¿xí xtem ronyno, né xigony?
14 (Bíil Mateo 28:19, 20). Órni guisuidyno buñ ni ná la Biblia, non gonyno rutirigaʼlni lóono par gacnéno buñ gac xpiin Jesús né gacnéno layibu guisobyibu guirá ni ná Jesús. Non gacnéno layibu que nigolú rasac tzoʼyibu xilad Jehová né gobierno xtuny. Ndeʼ radudy diitz gacnéno layibu par guisobyibu ni casuidyibu, gac dedicaryibu Jehová né tzonisyibu. Modreʼ labúu salaayibu ló xtzú rodann Jehová (1 Ped. 3:21).
15. ¿Ló xí láani diti non guisnitno xtiempno, né xigony?
15 Mod ma bisuidyno mápa mer guinitló gudxliogoxreʼ. Por ngú, diti non guisnitno tiemp loguiaʼ buñ ni diti ná gac xpiin Jesús (1 Cor. 9:26). Dxiinreʼ nigolú rasac gacni nimaca, portín noʼra xidal buñ ni non guicadiag de Gobierno xtuny Dios antes de guidxin xtzú Jehová.
GUIREʼNO LAD RELIGIÓN FALZ
16. Mod ná Apocalipsis 18:2, 4, 5, 8, ¿xí non gonyno guiráno? (Láaca bibiʼ ñeʼ guiich).
16 (Bíil Apocalipsis 18:2, 4, 5, 8). Versículos reʼ raslooyni lóono que noʼ más cós ni ranab Jehová gonyno. Guiráno ni nacno cristianos ni rasuidy xinésni non galsitno de Babilonia la Grande. Sigory tipnés buñ ni rasuidy ni ná la Biblia goyoʼ lad religión falz antes ni nasuidyibu galnigolú. Sigory goyeeyibu xquidaʼyibu, bunyibu guirá ni rony religión xtunyibu o bidudyibu bidxiich. Antes de gac aprobaryibu par gacyibu publicador ni yása tzonis, nír non guisianyibu guirá ni rony religión falz. Non gonycuentyibu toib guiich ro guiniʼyibu que ma bisianyibu religión ni gopbu o non guiyopybu mod ma diti guidzakyibu religión ro goyoʼyibu ló, o nitisi organización ni noʼ lad Babilonia la Grande.f
17. ¿Xí clas dxiin diti non gonyno, né xigony?
17 Lóono ni nacno cristianos ni rasuidy xinésni non ganno que dxiin ni ronyno diti guidzakni né Babilonia la Grande (2 Cor. 6:14-17). Por ejemplo, diti sonyno dxiin lainy toib guidaʼ. Né pal ronyno dxiin par toib empresa, diti sonyno toib dxiin ni guiquiinyibu par religión falz. Né pal napno negosy, diti sonyno dxiin nili sacacuentno dxiin ni radzak né Babilonia la Grande. ¿Xigony ronyno scú? Portín diti nainy gacno toibsi né guirá ni rony organizaciones religiosas né galkié ni ronyibu ni nac buidy nisló Dios (Is. 52:11).g
18. ¿Xí buny toib hermano órni goyoʼ ni góoch láabu ñonybu dxiin lainy toib guidaʼ?
18 De goloʼ xidal íz, toib contratista gonab a toib anciano ni ronytzaay yac ni nap negosy xtuny par ñonybu toib dxiinien lainy guidaʼ lainy gudx ro golésbu. Buñcu gon que hermano reʼ guirá ór goniʼbu que diti ronybu dxiin lainy guidaʼ. Per buñreʼ, nigolú biquiin que ñoʼ toib ni ñony dxiinreʼ. Ná scú hermano reʼ bisob ni ná la Biblia né diti cuacuentbu dxiinreʼ. Tixomal después bireʼ toib retrat ló periódico ro birecaa stoib buñ ni ronytzaay yac ro cacaʼbu toib crois lainy guidaʼ. Pal hermano reʼ nasaguel ñony dxiinreʼ xiretratbu nareʼ ló periódico. Gonysino pensary balaati ñac buidy laabu lainy congregación né ximod nasac Jehová.
¿XÍ MA BISUIDYNO?
19, 20. a) Dada reʼ, ¿xí láani ma bienno? b) ¿Xí más non guisuidyno?
19 Mod ritlaa profecías ni sieed ló la Biblia, stoib cós ni rasac ni gac ló guidopynac Gudxlio láani ngú órni guiniʼyibu que ma noʼ «paz né seguridad». Per Jehová ma bisuidy lóono que buñ ni rony mandary lainy xidal gudxrop diti labúu sonyibu que tzoʼ paz por tipzó. ¿Xí non gonyno antes de gac guirá ndeʼ, né antes de guidxin xtzú Jehová? Dios ranabbu lóono que tzodieʼno guinino de Gobierno xtuny Dios né gacnéno más buñ gac xpiin Jesús. Laʼga cayonyno guirá ndeʼ, non galsitno de religión falz. Ndeʼ radudy diitz que diti tzoʼno lad buñ ni noʼ lad religión falz né dxiin ni ronyno diti non guiotzni né Babilonia la Grande.
20 Noʼra más cós ni gac antes de guilox «dzú ni ma guidubylagaʼ» né noʼra más cós ni ranab Jehová gonyno. ¿Xí nábu gonyno? Né ¿ximod labúu tzoʼno puext né guirá ni guidxin par ló dzú ni sietra? Ló artículo ni sieed sasuidyno láani.
CANCIÓN 71 ¡Somos los guerreros de Jehová!
a Rabésno que mápa mer guiniʼ gudxrop que ma noʼ paz né seguridad. Ndeʼ saslooy que gran tribulación mápa mer salóni. ¿Xí ranab Jehová gonyno? Artículo reʼ sacnéni lóono ganno xi láani gonyno.
b Por ejemplo, Organización de las Naciones Unidas rasetlayibu ló página de Internet xtunyibu que más rasac par layibu «tzoʼ paz né seguridad ló guidopynac Gudxlio».
c Bibiʼ artículo de número reʼ ni laa, «Órni rony castigar Dios, ¿radudybu abís buñ la?».
d Ló Guiich ni caniʼ beʼo octubre íz 2018 sadzelno ximod guiquiinno herramientas ni noʼ ló kit de enseñanza ni sieed ló artículo ni laa, «Enseñemos la verdad».
e Curso reʼ nosi noʼni ló inglés né portugués, después láaca sioʼni ló stipnés diitz.
f Láaca diti non tzoʼno ro radop mbioxhlas ni radzak né religión falz. Por ejemplo, par ganno pal labúu tzoʼno o yaca ló YMCA (Asociación Cristiana de Jóvenes), labúu golno sección ni laa, «Ni ranabdiitz buñ ni roʼol» de Guiich ni caniʼ 1 de marz íz 1979. Ngúca labúu guinino de YWCA (Asociación Cristiana de Mujeres Jóvenes). Ná tipnés grupos ni noʼ ladyibu diti tampa rasac par layibu cós ni rony xireligionyibu, guirá ni rayopyibu né ni ronyibu ralanyni de religión.
g Ló sección ni laa, «Ni ranabdiitz buñ ni roʼol» de Guiich ni caniʼ de 15 de abril íz 1999, radzelno ximod rabexatzay la Biblia pal labúu gonyno dxiin né organización ni radzak né religión.
h NI RITLAA LÓ RETRAT REʼ: Notísy ni rareʼ televisión ni rasetlaa de «paz né seguridad» ronyni que tipnés buñ ni noʼ ló toib cafetería guidziguiaʼ láani. Anunys reʼ diti rascúni a toib galtzeʼel de Testigos ni casaladx laʼga cayony predicar.