Ni rasuidy la Biblia nigolúni
Desde ló dzú ni see, xidal clas buñ ma bidudy cuent que la Biblia rasuidy ni nigolú. Né ló naareʼ, xidal millón de buñ rasob ni náni. Per láaca noʼ stipnés buñ ni raniʼ que nacni toib libro ni ma godudy xtzú o que sitnéni pórsi diitzdaʼ. ¿Xí ronylo pensary? ¿Labúu guidzelno ni nigolú ló la Biblia la?
¿XIGONY LABÚU GAPLO CONFIANZ NI NÁ LA BIBLIA?
¿Ximod ganlo pal labúu gaplo confianz ni ná la Biblia? Bunysi pensary que por xidal íz toib ximiglo dipa biscú looy, ¿nálo que labúu gaplo confianz láabu la? Scú láani, ¿nac la Biblia xomod ximiglo ni labúu gaplo confianz la? ¿Guirá ór raniʼni ni nigolú la? Guisuidyno tipnés ejemplos.
Buñ ni bicaʼ la Biblia diti biscú
Buñ ni bicaʼ la Biblia bicaʼyibu modpa gocni, dada goniʼyibu ro bichéyibu né mod gocyibu. Por ejemplo, órni profeta Jonás bicaʼbu libro ni riné laabu, bisetbu que diti bisobbu Dios (Jonás 1:1-3). Órni bilox bicaʼbu ni bunybu, golexabu que Dios buny corregir láabu, per diti bisetbu pal cuacuentbu corrección xtuny Dios (Jonás 4:1, 4, 10, 11). Mod bicaʼyibu la Biblia raslooyni que nigolú gosac par layibu nacaʼyibu ni nigolú.
Sitnéni litz ni racné
¿Guirá ór racné xilitz la Biblia lóono ló ni ronyno la? Scú láani. Por ejemplo, bibiʼ xi ná la Biblia gonyno par guidzakno sacró stipnés. «Guirá cós ni nainy lóoto gony buñ lóoto, láaca scúca colgony layibu» (Mateo 7:12). «Órni buñ racapy né diitz nadaʼa rachocni ló galnadzuitz» (Proverbios 15:1). Nigolú racné xilitz la Biblia lóono ló naareʼ xomod dzú ni cuáni.
Historia ni napni nigolúni
Desde ló dzú ni see, xidal cós ni ma bidzel arqueólogos, raslooyni que buñ, lagary né cós ni rasetlaa la Biblia nigolúni. Por ejemplo, la Biblia raniʼ que ló dzú ni bibany Nehemías, buñ tirios (fenicios ni sieed de Tiro) ni bibany gudx Jerusalén «bitnéyibu beel né bisaʼ clas cós» (Nehemías 13:16).
¿Noʼ prueby que scú gocni la? Scú. Buñ arqueólogos ma bidzel tipnés cós fenicios lainy gudx Israel ni raslooy que ló dzú ni see, guiropca gudxrop reʼ bunyibu negosy ladyibu. Per diti ngúsi, láaca ma bidzelyibu lainy gudx Jerusalén tipnés dxit laidy beel xtuny nisdaʼ Mediterráneo ni ralooypa bitné buñ ni golés nigolú sit. Toib historiador órni bisuidybu prueby ni noʼ, biembu láani né goniʼbu: «Labúu guinino que xomod sieed ló Nehemías 13:16, buñ tirios bitoʼyibu beel lainy gudx Jerusalén».
Órni rasetlani de ciencia diti rachéni
Ná la Biblia nacni toib libro ni rasetlaa nosi de religión né de historia, órni raniʼni de ciencia diti rachéni. Guibiʼno toib ejemplo.
Ma de goló tzón mil gaaygayoʼ íz, la Biblia maca bisetlani que Gudxlio «nalxigaʼni labu» (Job 26:7). Ni ná la Biblia diti radzakni né tipnés diitzdaʼ ni bisetlaa que Gudxlio casobloni ló nís o naxni laidy toib luk xiroʼ. Midid tipmil tigayoʼ íz después de goló cuá libro xtuny Job, buñ bunysa crer que Gudxlio noʼ ni noʼoy láani. Dada ló íz 1687, pénsa de goló tzongayoʼ íz, Isaac Newton biembu xi ngú fuerza de gravedad né golexabu que láani nanásni Gudxlio. Ni bieen científico reʼ bislooyni que ni bisetlaa la Biblia ló más de tzón mil íz, nigolúni.
Profecía xtunyni nigolúni
¿Nigolú rac cumplir profecías xtuny la Biblia la? Guisuidyno toib ejemplo: mod goniʼ profeta Isaías guinitló Babilonia.
Profecía. Gaxca ló íz 732 antes de xtzúno, órni Babilonia diti ma nac toib gudx ni nap xiroʼ galnadip, profeta Isaías goniʼ que sioʼ ni gony gan gudx Babilonia, né que sadxin dzú ma diti sabés buñ lagarycu (Isaías 13:17-20). Isaías dada goniʼbu ximod gac laa buñguieeu ni gony gan láani: Ciro. Láaca goniʼbu ximod gony Ciro láani: guispiichbu guʼuc xtuny gudx Babilonia. Né láaca goniʼbu que xpuert gudxcu diti ñegni (Isaías 44:27–45:1).
Mod góc cumplirni. Godudy chopgayoʼ íz de goló bicaʼ Isaías profecía reʼ, toib rey persa cualó gudx Babilonia. ¿Ximod góc laabu? Ciro. Bigoo muros gudxcu, por ngú Ciro goniʼ que nadudyibu niis ronoʼ guʼuc ni laa Éufrates. Soldad xtunybu goleʼ toib biás né bixelyibu nís stoib lad. Órni nís cú bidxinni xcoryibu, soldad gosaa lainy guʼuc dada bidxinyibu ronoʼ xpuert Babilonia. Né radziguiaʼ buñ mod gocni, portín buñ babilonios bialadxyibu nasiegyibu xpuert gudxcu. Soldad xtuny Ciro bioʼyibu né bunyibu gan gudx Babilonia.
Per goyoʼ stoib cós ni yása ñac cumplir: ¿diti ñoʼ chú nabés lagarycu la? Por xidalguixo íz golés buñ lagarycu. Per ló naareʼ, lagarycu nosi noʼ yoʼ balaʼ né noʼni gax gudx Bagdad (Irak), ndeʼ raslooy que góc cumplir guiráxadit profecía reʼ. Scú láani, labúu gapno confianz ló la Biblia órni rasetlani ni gac ló dzú ni sietra.