Ni non guisetnaladxno órni tzoʼno samblia de tzón govitz
Ór salóni. Puert ro gac samblia saxalni las 8:00 rosil. Guionca govitz cú música salóni las 9:20. Ór reʼ ma guirácano non guiguaʼno ló xiletno, modreʼ guislooyno respet né que rasacni par lóono. Dzú vierna né sábda samblia saloxni gahxca las 5:00 né doming saloxni gahxca las 4:00.
Gonyxiroʼno Jehová né cánticos. Dada nírcu, xcudx Jehová biquiin cánticos par bunyxiroʼ láabu, ló naareʼ láaca rasacgoluʼni guienno Jehová né cánticos (Sal. 28:7). Antes de saló discurs ló samblia racadiagno música. Né música reʼ diti cuenunysi rioʼni, rioʼni par gonyxiroʼno né guisuidyno de Jehová. Por ngú órni herman raniʼ que ma saló música, ma non guiguaʼno xalagaryno né guicadiagno láani, xalagary gooyno diitz. Órni ronyno láani raslooyno que rasac xtem ni rony herman de orquesta Watchtower. Chop buelt ló toib íz hermanos né hermanas xcaxtyibu rieeyibu Patterson, Nueva York par gonyibu grabación reʼ. Órni ma bilox bicadiagno música reʼ, guiráno non gonyxiroʼno Jehová órni golno cántico.
Ro guisagaʼ camión. Diti noʼ chú saguiix ro guisagaʼ camión pal lóono cayapno láani, né camión sasagaʼ conforma cadxin. Per diti rioʼ lagary par xidalgoluʼ camión, por ngú pal labúuni xidalno tzoʼno lainy toibsi camión. Noʼ toib lagary ro rasagaʼ camión par buñguitz per nosi ni nap permís guisagaʼ lagarycu.
Xilet. Órni raxal puert guirá rosil diti guixonyno xomod buñ ni ragoʼ prueby né saʼ par guidzelno lagary ni más rioladxno. Tzoʼno galrrasaʼ por stipnés herman ná ndeʼ raduidy diitz tzachéno stoib lagary ni diti tampa rioladxno. Órni lóono rioʼno galrrasaʼ por stipnés raslooyno que nacno buñ ni racanal a Jesús né ndeʼ rony que stipnés buñ ni rabiʼ lóono láaca saniiny guieen Dios (Juan 13:34, 35; 1 Cor. 13:5; 1 Ped. 2:12). Nosi guiyopyno xilet par herman ni riee toibsi né lóono lainy camión, buñ ni rabés lainy toibsi yoʼ né lóono o buñ ni rasuidyno. Ranabdo lóoto diti guisianto cós ló xilet ni diti saquiinto. Ni lóoto gonyto ndeʼ sony que stipnés herman guibiʼ que noʼ xilet nadach. Láaca rioʼ toib lagary ro rioʼ xilet par buñgol né buñguitz. Goxé xilet raguaʼ lagarycu, por ngú nosi toib o chop buñ ni cayan buñguitz o buñgol labúu cuu lagarycu.
Lairy ni guacno guienni sacró. Lairy ni guacno guienni sacró diti gacni xomod lairy ni roc buñ ni diti rien Dios (1 Tim. 2:9). Órni rioʼno né rareʼno lainy hotel o rioʼno stoib lagary órni ma bilox samblia diti guacno lairy ni radudy binii, nabédxich o nigolú dop. Pal rocno lairy sacró diti satoyno ni sanéno guiich ni raslooy que nacno testigos xtuny Jehová né labúu sanino de Dios a stipnés buñ. Mod nacno né mod gactzayno ló samblia diti nosi gonyni que buñ ni natzaay xcalnabany guidop né lóono, láaca sagoʼ nakitni Jehová (Sof. 3:17).
Celular né stipnés cós. Pal napno teléfono celular o stipnés cós non guiyopyno mod par diti gonyni ruid né modreʼ diti gonynuidyno herman. Pal cueʼno retrat, gony grabarno o guiquiinno stipnés cós, gapno respet herman né guiduidyno lagary guibiʼyibu ni catuidy discurs. Né diti guiquiinno celular par guixelno mensaje órni noʼno ló samblia.
Galrro. Ranabdo lóoto tzanéto xcalrroto xalagary guireʼto siʼto láani locay. Diti tzanéto toib cós xiroʼgolu ro tzoʼ xcalrroto lainy. Tzanéto toib de buentimidid ni tzoʼ ni guá xfamilto né diti non tzanéto cós de vidrio ló samblia.
Guiduidyno bidxiich scásiʼ. Labúu guislooyno que nigolú rasac samblia reʼ órni raduidyno bidxiich par samblia ni rac ló guidopy Gudxlio. Pal gonylo láani né cheque buny láani ló laa, «Christian Congregation of Jehovahʼs Witnesses». Ló tipnés samblia láaca labúu guiduidyno bidxiich scásiʼ né tarjeta de débito né crédito.
Remeidy. Pal cayaclo remeidy diti guialadxlo tzanélo láani, portín ló samblia yadi remeidy. Pal caxonélo dxiin né raquiinlo jeringa o gúchgohx bisapy láani ro non tzeeni, diti guisapylo láani lad guix ló samblia o lainy hotel ro riaʼanlo.
Par diti tzoʼ desgrasy. Ranabdo lóoto colgap cuidad par diti guiroch o guirel ñeʼto né gacnato. Guirá íz rioʼ desgrasy por clas zapat ni racañeʼno né máspa or nacni zapat nasoʼ. Más galán guicañeʼno zapat ni labúu tudyneno ló squiler o rotísi lagary.
Ni diti naní guidiag. Ló tipnés samblia buñ ni diti naní guidiag labúu guicadiag guirá discurs ló radio FM. Par gacni scú raquiin tzanébu toib radio ni raquiin bateria né audífono.
Camionguien par badaʼ. Camionguien né xilet par badaʼ diti non tzanéno láani ló samblia. Per labúu tzanéno láani pal labúu guilipno láani ló xilet.
Nisralanax. Xidal lagary ro rac samblia nayeg. Por ngú toib mod ni guislooyno que rioʼno galrrasaʼ por stipnés herman, láani ngú diti tampa guiquiinno nisralanax ni nadip xpu portín noʼ herman ni caxoʼ né labúu gonyni mal layibu (1 Cor. 10:24).
Restaurante. Gonyxiroʼno laa Jehová órni guislooyno respet lainy restaurante. Lairy ni guacno guislooyni que nacno testigos xtuny Jehová. Guiduidyno bidxiich a buñ ni rony dxiin lagarycu pal racni scú.
Hotel.
Diti guinabno cuart ni diti guiquiinno, diti tzoʼno xidalno lainy toibsi cuart pal diti napno permís.
Pal ma bunyno compromis guidxinno lainy toib hotel diti guitzaʼno ni ma gonino, né pal rioʼ toib desgrasy né ma diti labúu guidxinno, ni maca guininéno buñ ni rony dxiin lainy hotel né modreʼ stipnés buñ labúu guiquiin cuart cú (Mat. 5:37). Né órni guininéno buñreʼ, layibu non guiduidyibu toib número ro raslooy que ma diti saquiinno cuart. Né non gonyno láani órni cayatz 48 ór portín pal diti ronyno láani scú diti sadxiguetyibu xpidxiichno.
Guisetnaladxno que pal raquiinno tarjeta de crédito o débito par quiixno hotel ro guiaʼanno, layibu sianéyibu stidxo bidxiich ni guiquiinyibu pal tzoʼ ni tzagac cuart ro guiaʼanno. Sadxiguetyibu láani lóono dada órni ma bireʼno cú.
Labúu guituidyno xcósno né camionguien órni ma noʼno puext né non guidxiguetcano láani xalagaryni par que stipnés labúu guiquiin láani.
Pal racni scú, guiscadno bidxiich a buñ ni rony dxiin lainy hotel né buñ ni ratuidy xcósno.
Labúu gonytzaayno galrro lainy cuart pal napno permís gonyno láani.
Órni raduidyibu café, yel o ni guá buñ ni noʼ lainy hotel, diti non tzanéno láani ló samblia.
Guirá ór guislooyno espíritu xtuny Dios órni guininéno buñ ni rony dxiin lainy hotel. Layibu cayanyibu xidal buñ né rioladxyibu que gacno buñ natzaayxat, gapno paseinys né gacno buñ ni noʼ xcalrrien.
Buñ non ganyibu xiinyibu guirá ór lainy guidopy hotel xomod ro raguit buñ lainy nís, ro racacuentyibu buñ né stipnés lagary.
Sac ni riax toib cuart de hotel ló toib dzú sieedni ló Lista de hoteles recomendados, per ló ngú diti sieed sac impuesto. Pal náyibu quiixno más, diti non guisaguelno né ni maca tzoʼno Lagary ronoʼ herman ni Rayopy ro Guidxin buñ né gaibyno láani layibu.
Pal noʼ ni rasaclóo cuart ni caguiixno, ni maca tzoʼno Lagary ronoʼ herman ni Rayopy ro Guidxin buñ né gaibyno láani layibu.
Ni gony dxiin scásiʼ. Guirá ni ná gony dxiin scásiʼ labúu guininébu herman ni cayony dxiin Lagary par ni ná Gony dxiin Scásiʼ. Mbiox ni yása guisaʼ 16 íz labúu gonybu dxiin toibsi né bixiosbu, xinaʼbu o toib herman ni ma nigox pal bixiosbu rasaguel.