Guisuidyno de herman ni rasuidytzay Xtiitz Dios

Herman ni nan rasuidytzay xtiitz Dios nacyibu toib galrrascad ni noʼ lainy congregación. Tipnésyibu nacyibu herman ni cayony xchiin Jehová ma xidzú íz. Stipnésyibu nac herman ni nicopyga gosaló né láaca rasuidytzayibu buñ. Guiráyibu nacyibu buñ ni raduidy cuent que Jesús ngú ni sanir nisló xcudx Jehová ló naareʼ ni ma guidubylagaʼ né cayonybu que stipnés buñ gan xtiitz Dios (Mat. 28:19, 20). Por ni layibu ma xidzú íz caniʼyibu xtiitz Dios, ma cuaʼyibu «galnadip ni buñ diti nap», ndeʼ racné layibu par guicalóyibu galnagan (2 Cor. 4:7). Layibu rioladxyibu gacnéyibu stipnés herman gan ni layibu nanyibu, por ngú guicacuentno guirá ni labúu guisuidyibu lóono (Sal. 71:18). ¿Ximod labúu gonyno láani?

Órni rioʼno yoʼ por yoʼ. Par labúu guinino galán xtiitz Dios, raquiinno que herman ni nantzay raniʼ xtiitz Dios guisuidy lóono. Labúu guisuidyno ximod ronyibu láani pal racaano cuidad ximod rony herman ni nantzay raniʼ xtiitz Dios órni rieeyibu yoʼ por yoʼ. (Bibiʼ párrafo 3 ni sitné subtítulo «Ayude a los nuevos», ni sieed ló artículo «Cómo mantener el entusiasmo en la predicación», ni sieed ló La Atalaya del 15 de febrero de 2015.) ¿Ximod ma gocnéni looy ni rareʼlo toibsi né herman ni nantzay raniʼ xtiitz Dios?

¿Xigony diti raruʼlo herman ni nantzay par guirenélo layibu yoʼ por yoʼ? Pal nacbu toib herman ni caxoʼ, looy labúu tzanélo toibtica buñ ni rasuidylo lidxbu par guisuidyto. Órni guiloxto, gonabdiitz láabu pal bunylo láani galán né gonab láabu gacnébu looy par gonylo láani más galán.

Biiy diitz né layibu. Buny por guimbulo layibu. Biruʼ layibu par tzoʼyibu né looy órni guienlo Jehová né xfamilylo né láaca gonabdiitz láabu ximod bimbubu Jehová né ximod ma cuaʼbu xcalnasác Jehová né láaca ximod ma goniʼs xcudx Jehová de goló goyonisbu. Pal nacbu toib herman ni caxoʼ, looy labúu tzeelo lidxbu par guiento Dios né xfamilylo toibsi né láabu.

Góc toib buñ ni natzaay xcalrrien né ni rasac xi láani cadudyibu ló. Xomodca lóono, herman ni ma xidzú caniʼ xtiitz Dios diti toibsi mod rasuidyibu buñ (Rom. 12:6-8). Tipnésyibu ma nacyibu buñgolien, né ma diti labúu ronyibu xchiin Dios o stipnés cós xomod rony toib mbioxhlas. Ná nacyibu buñgolien, noʼ ni labúu guisuidyno de layibu portín ma xidzú cayonyibu xchiin Jehová né nantzayibu ronyibu láani.